Zama gu hevbula silo nya siphya tepo u hevbulago Bhibhiliya

Tepo hi dzi dongiseyago gasi gu hevbula, hi yede gu dzi wudzisa gu khethu: ‘Nyo vireya gu hevbula ginani?’ Ganiolu, hi yede gu dundruga gu khethu ambari ho ba hi siti esi hi na hevbulago ga mahungu nyo khaguri, isoso kha si thuli gu khiso gimwalo nya giphya Jehovha a vbwetago gu khuye hi hevbula. Hi nga engiseya kharini esi Jehovha a hi hevbudzago?

Lomba guti. Lomba Jehovha gasi a gu phasa gu pwisisa esi a si vbwetago gu khuye u si hevbula olu. (Jak. 1:5) U nga eneledwi basi khesi u sitigo. — Mav. 3:5, 6.

Dzumeleya tshivba nya lito la Nungungulu li kuha womi wago. “Lito la Nungungulu li ngu vbanya.” (Hebh. 4:12) Khu kharato, tepo yatshavbo hi hevbulago Bhibhiliya, hi nga hevbula gilo nya giphya nigu iyo yi nga hi phasa khu dzindziya nyo hambane womini gwathu. Ganiolu, isoso si na girega basi ha gu dzumeya gu khethu hi yede gu hevbula esi Nungungulu a hi hevbudzago.

Bonga khu satshavbo esi Jehovha a si thumisago gasi gu hi hevbudza. Guhodza gwaye ga liphuvboni gwa gu fana ni “buzo nya [wu]khongolo.” (Isa. 25:6) U nga potsi gu leri mahungu u pimisago gu khuwe kha wu na nga ma tsakeya. Uwe kha wu na nga wuyedwa basi, ganiolu u na tsaka khesi Nungungulu a gu ningago.