Khu mani a nga pheya wukhongeyi wa Dzifakazi dza Jehovha?

Hengeledzano nya Dzifakazi dza Jehovha ya matshigoni yathu yi phede khu myaga nya va 1800. Khu tepo yoyo, tsawa nya wudugwana nya sihevbuli nya Bhibhiliya, wu nga ba vbanya vbafuvbi ni Pittsburgh, Pennsylvania, tigoni ga Estados Unidos, wu di pheya gu hevbula Bhibhiliya khu wukheta. Va di gu fananisa sihevbudzo si nga ba si hevbudzwa khu dzitshetshe ni esi Bhibhiliya yi hevbudzago khu lisine. Khavbovbo, va di pheya gu dusa esi va nga ba va si hevbula omu nya mabhuku, dzijornali ni revhista eyi olu yi ranwago pwani Mukhedziseyi — A Tivisago Mufumo wa Jehovha.

Vbakari nya sihevbuli soso nya Bhibhiliya si nga ba si vbweta guti lisine, gu diri ni mwama moyo nyo pwani khu Charles Taze Russell. Ambari olu Russell a nga ba a thangeya thumo nyo hevbudze Bhibhiliya dziteponi dzile ni gu ba ari uye muthu nyo pheye gu dusa Mukhedziseyi, Russell khandruye a nga pheya wukhongeyi nya wuphya. Makungo ya Russell ni simbe Sihevbuli nya Bhibhiliya, kha nga edzi wu nga ba wu tidwa khidzo tsawa wowu, gu diri gu huweleya sihevbudzo sa Jesu Kristo ni gu landrisa giyeyedzo gi tshidwego khu Makristo nyo pheye. Kha nga olu Kristo a gu uye Mupheyi nya Wukristo, ethu ho wona uye nga mupheyi nya hengeledzano yathu. — Vakolosi 1:18-20.