Wa gu dzigaradza, u na si kodza gu tadzisa misuwo yago
GA VAPHYA
Nya wu 12: Gu dzi vegeya misuwo
SO THULA GINANI
Gu manega ni misuwo si na ni lisima ngudzu guvbindra gu lora mwendro gu dogoreya silo nyo khaguri. Misuwo nya lisine yo pata gu dundrugeya gwadi khiyo, gu lulamisa esi si vbwetegago ni gu dzigaradza.
Misuwo nya yidugwana yi nga dzega dzisemana mwendro matshigu nya madugwana gasi gu tadzisega, yimbe yi nga dzega ngima nigu eyi nya yi khongolo ngudzu yi nga dzega mwaga ni gu vbindra gasi gu tadzisega. Wa gu pheya khu gu tadzisa misuwo nya yidugwana u na si kodza gu tadzisa misuwo nya yi khongolo.
KHU GINANI SI GU NA NI LISIMA
Gu tadzisa misuwo yago si na gu gira u dzi tumba, u tiyisa wupari u bwe u tsaka.
Gudzitumba: Wa gu dzi vegeya misuwo nya yidugwana u bwe u yi tadzisa, si na gu ninga tshivba nya gu dzi vegeyi misuwo nya yi khongolo. U na dzi tumba ngudzu wa gu emisana ni sigaradzo sa tshigu ni tshigu, nya nga kutsedzelo nya dzipari.
Wupari: Vathu nya vangi va ngu gola gu khala ni vathu va gu na ni misuwo, mwendro va gi tigo egi va gi vbanyeyago ni esi va dzi emisidego gu gira. Mwenyo nya dzindziya nya gu tiyise wupari, gu manega ni dzipari dzi gu na ni misuwo ya yimweyo.
Gutsaka: Wa gu dzi vegeya misuwo u bwe u yi tadzisa, u na tsaka.
“Nyi ngu gola gu dzi vegeya misuwo. Iyo, yi ngu nyi gira nyi khala na nyi pharigide nyi bwe nyi manega ni gu dogoreya nya gu gire simbe. Tepo u si kodzago gu tadzisa misuwo nyo khaguri, u na tsaka khu guti gu khuwe esi u nga ba u si vbweta u si kodzide!” — Christopher.
Litshina nya nayo nya Bhibhiliya: “Uye a khedziselago dziphuvbo, gima kha yali, ni wule a khedziselago mapfhi, gima kha na vbwera.” — Muhevbudzi 11:4.
GINANI U NGA GIRAGO
Wona dzindziya dzi na gu phasago gu dzi vegeya misuwo nyo khaguri u bwe u yi tadzisa.
Sasamedza esi u si vbwetago gu gira. Gira sasamedzo u bwe u vega matshigu. Pheya khu gu sasamedza esi u vbwetao gu pheya khiso gu gira, khu gu landreya lova esi si na landreyago.
Hunga makungo. Ga misuwo yatshavbo u dzi vegedego, gira esi:
Dzi vegeyi tepo u vbwetago gu yi tadzisa khiyo.
Sasamendza yatshavbo u yi vbwetago gu yi tadzisa.
Dundrugeya khu sigaradzo u nga tshanganago naso u bwe u vbwetedzeya dzindziya u nga si palago khidzo.
Gira gilogyo. U nga vireyi gu khuwe kala uti satshavbo gasi u pheya gu gira thumo nyo khaguri. Dzi wudzisi gu khuwe: “Ginani nyi yedego gu pheya khigyo nyi gira gasi gu tadzisa misuwo yangu?” Khu gu landreya gira isoso. Funga esi u vbedzidego gu gira.
Litshina nya nayo nya Bhibhiliya: “Makungo ya muthu a gu ma pimisa gwadi, ma na mu ninga mihandro.” — Mavingu 21:5.