GIPANDRE 5

Ndrambi nya yikhongolo — Khu vamani va nga engisa? Khu vamani va nga ne gu engisa?

Vathu nya vangi matshiguni ya Nowa va di gu gira silo nya guvivbe. Genesi 6:5

Dzingilozi nya guvivbe dzi ambadego mili nya vathu dza gu dzi tshanganisa ni vathu

Adhamu ni Evha va di velega sanana, vathu va engedzeyana mafuni. Khu gugimbiya nya tepo dzimbe dzingelozi dzi di hengeya ni Sathane dzi wugeya Nungungulu.

Dzi di releya mafuni dzi ta dzi gireya mili nya vama gasi dzi dzegana ni vanyamayi. Vanyamayi vovo va di velega sanana nya gu laphe ngudzu, nya makhuva ni tshivba.

Nyamayi a khusidego gyanana na gu vetwa khu gikhwathana; Gidandrangulu, sanana sa dzingilozi nya guvivbe, sa gu tshanisa vathu

Litigo li di tala khu vathu nya gu gire silo nya guvivbe. Bhibhiliya ya ri khiyo: “Gughoha nya vathu gu diya na gu engedzela gudandra khu tshivba ni tshivba tigoni; ni gukhuye mapimo ni maalakanyo ni makungo yatshavbo ya monyoni nya vathu, gikhati gyatshavbo ma gu wegelela guvivbani basi.”

Nowa a di engisa Nungungulu, a gira litaro. Genesi 6:13, 14, 18, 19, 22

Nowa a diri muthu nya wadi. Jehovha a di embeya Nowa gu khuye a na resa ndrambi nya yikhongolo gasi gu fuvisa vathu nya guvivbe.

Nungungulu a di bwe a leleteya Nowa gu gira ngalava nya yikhongolo, yi ranwago gu pwani litaro, gasi a beya umo uye ni ndranga yaye gumogo ni sirengo nya mafumbo yatshavbo.

Nowa a gengedza vathu khu guta nya Ndrambi, ganiolu va mu hega

Nowa a di embeya vathu gu khuye yi nguta Ndrambi, ganiolu avo kha va engisa. Vambe va di mu hega; ni vambe gambe va di mu venga.

Nowa ni ndranga yaye va tshanganisa sirengo gasi gu si bedza ngalavani

Tepo a nga vbedza gu gira litaro, Nowa a di bedza sirengo.