Wa gu dundrugeya ginani khu wumindru?

NGA WONA ESI BHIBHILIYA YI SI GANEYAGO

‘Nungungulu a na bavbula marongo mahoni gwawe, kholu gima kha gu na manega gambe gufa, guliya gu na vbeya, ni gudileya ni wuvi, kholu dzitshanisa dza gale dzi vbindride.’ — Gutuledwa 21:3, 4.

GUTI ISOSO GU NGA GU PHASA KHARINI

U na mana thumo nya gutsakise ni gubhindzula. — Isaya 65:21-23.

U na tsaka khu guti gu khuwe madwali ni gutshaniseka gwatshavbo si na vbeya. — Isaya 25:8; 33:24.

U na vbanya kala gupindruga nu tsakide ni valongo ni dzipari. — Ndzimo 37:11, 29.

HI NGA SI KHODWA FURI ESI BHIBHILIYA YI SI GANEYAGO?

Ina, khu sighelo sivili:

• Nungungulu na ni tshivba nya gu tadzise gitumbiso gegi. Omu nya Bhibhiliya, Jehovha Nungungulu khuye enga a ranwago pwani Nungungulu “nya tshivba yatshavbo,” kholu tshivba yaye yi mwalo mahegiso. (Gutuledwa 15:3) Khu kharato, uye na ni tshivba nya gu tadzise gitumbiso gyaye nya gu vbindrugedze mafu yaya ma gira nya wutshukwana. Khu gu landra esi Bhibhiliya yi ganeyago, “ga Nungungulu satshavbo si ngu kodzega.” — Matewu 19:26.

• Nungungulu a ngu dogoreya gu tadzisa gitumbiso gegi. Khu giyeyedzo, Jehovha a ngu suva gu wusa ava va fudego. — Joba 14:14, 15.

  Bhibhiliya gambe yi ngu yeyedza gu khiyo Jesu, Gyanana gya Nungungulu, hawulugiside vadwali. Khu ginani a nga gira isoso? Kholu uye a di gu dogoreya gu va hawulugisa. (Marko 1:40, 41) Khu gu dogoreya gwaye gu phasa ava va vbwetago giphaso, Jesu yeyedzide khu guvbeleya makhalelo ya Babe waye. — Johane 14:9.

  Khu kharato, hi ngu kodza gu tiyisega gu khethu Jehovha ni Jesu va ngu dzina gu hi phasa gasi hi mana womi nya wutshukwana mindru wa tshigu! — Ndzimo 72:12-14; 145:16; 2 Pedro 3:9.