Va velega gyanana!

Gu di gu vbindra myaga nya yingi Abrahama ni Sara na va tshadhide. Avo va di digide ndranga yawe nya yadi Uri va ya vbanya omu nya litendra. Ganiolu, Sara a di si solasoli kholu uye a di gu mu tumba Jehovha.

Sara a di gu gi vbweta ngudzu gyanana avba nyo kala a embeya Abrahama khuye: ‘Nari khatshi githumi gyangu Agari a di gu velega gyanana nago, nyi di hadzi gi wona nari gyangu.’ Khu gu gimbiya nya tepo, Agari a di velega gyanana. Lina lagyo gi diri Ismayeli.

Hwane nya myaga nya yingi, Abrahama nari ni 99 myaga, Sara nari ni 89, va di endredwa khu vapfhumba vararu. Abrahama a di va rana gasi va ya hefemula mutsani nya simbo a bwe a va ninga guhodza. U ngu dziti gu khuwe khu vamani vapfhumba vakona? Gu diri dzingilozi! Idzo dzi di embeya Abrahama gu khidzo: ‘Mwaga wu tago khu tepo yeyi, uwe ni mwangadzi wago mu na velega gyanana.’ Sara a di gu engiseya nari litendrani. Khavbovbo, a di hega na gu pimisa esi: ‘Ina nyi na velega gyanana kamo eni edzi nyi gumbidego khidzo kharati?’

Khu mwaga wu nga landreya, Sara a di velega gyanana nya gikhwathana, kha nga edzi dzingilozi dza Jehovha dzi nga ba dzi tumbiside. Abrahama a di gi riya lina nya gu pwani khu Isaki, li tshamuseyago gu khilo “Mahego.”

Tepo Isaki a nga ba ari ni 5 myaga, Sara a di wona Ismayeli na gu tshanisa Isaki. Sara a di gu vbweta gu vhikeya gyanana gyaye. Khu kharato, a di hongola ga Abrahama a ya mu lomba gu khuye a tutumisa Agari ni Ismayeli. Gupheya, Abrahama kha nga dzina gu gira isoso. Ganiolu, Jehovha a di embeya Abrahama khuye: ‘Mu engise Sara. Eni nyi na mu sayisa Ismayeli. Ganiolu, khu Isaki nyi na mu thumisago gasi gu tadzisa situmbiso sangu.’