Gukhodwa ga Abrahama gu lingwa

Abrahama a di hevbudza gyanana gyaye gu haladza Jehovha ni gu tumba situmbiso satshavbo saye. Ganiolu, tepo Isaki a nga ba ari ni gipimo nya 25 myaga, Jehovha a di lomba Abrahama gu khuye a gira gilo nyo garadze ngudzu. Gilo muni?

Nungungulu a di embeya Abrahama gu khuye: ‘Nyo lomba gu kheni u hongola gigomoni gya Muriya, u ya nyi gireya muphaso khu gyanana gyago gya gimwegyo.’ Abrahama a di si dziti gu khuye khu ginani Jehovha a mu lombago gu gira isoso. Ganiolu, a di engisa.

Ga litshigu li nga landreya, Abrahama a di vindruga a hongola gigomoni gya Muriya ni Isaki ni sithumi saye nya sivili. Hwane nya gu ba va gimbide matshigu mararu, va di pheya gu wona gigomo na va ngari hwindzwana. Abrahama a di embeya sithumi saye gu khuye si tshala si mu vireya, gasi uye ni Isaki va hongola va ya gira muphaso. Abrahama a di rwega dzikhuni Isaki, uye a phara ngala. Isaki a di wudzisa papayi waye khuye: ‘Papayi, yomo hayi nvuta yakona hi na girago khiyo muphaso?’ Abrahama a di hlamula khuye: ‘Mwanangu, Jehovha a na hi ninga.’

Tepo va nga vboha gigomoni, va di vbaha alitari. Khavbovbo, Abrahama a di hunga mawogo ni mawundru ya Isaki a mu ladzisa vbatshani nya alitari.

Khavbovbo, Abrahama a di dzega ngala. Khu gitepwana gyogyo, ngilozi ya Jehovha yi di mu rana khu ndzadzini khiyo: ‘Abrahama! U nga gi giri gilo gikhwatana gyogyo! Nyi ngu dziti gu kheni u ngu khodwa ga Nungungulu kholu u di dzi emisede gu gira muphaso khu gyanana gyago.’ Khavbovbo, Abrahama a di wona nvuta na yi kwekede avba nya simbo khu dzikeho. A di tshula Isaki khu guvbiredza, a gira muphaso khu nvuta, a diga Isaki.

Gukhugeya litshigu lolo, Abrahama a di khala pari ya Jehovha. U ngu dziti gu khuwe khu ginani? Abrahama a di gu gira satshavbo esi Jehovha a nga ba a si vbweta ambari a gu ba a si si pwisisi gu khuye khu ginani Jehovha a nga ba a mu lombago gu gira isoso.

Jehovha a di bwe a phindra gitumbiso a nga ba a giride ga Abrahama, khuye: ‘Nyi na gu kategisa, nyi engedzeya gitugulwana gyago.’ Isoso so thula gu khiso Jehovha a di hadzi kategisa vathu vatshavbo nya vadi khu gu thumisa ndranga ya Abrahama.