Muthangeyi nya muphya ni vanyamayi vavili nyo tiye hwambo

Josuwa thangede vathu va Jehovha khu myaga nya yingi a hegisa afa nari ni 110 myaga. Ga myaga yatshavbo yoyo a nga ba a vbanya, Vaisrayeli va di gu khozeya Jehovha. Ganiolu, hwane nya gu ba a fude, Vaisrayeli va di pheya gu khozeya sifananiso, kha nga esi va nga gira Vakhanani. Kha nga olu Vaisrayeli va nga ba va si engisi Jehovha, Jehovha a di diga pfhumu ya Khanani nyo pwani khu Jabhina, yi va tshanisa. Vaisrayeli va di lomba Jehovha gu khavo a va phasa. Khu kharato, Jehovha a di va ninga muthangeyi nya muphya. Lina laye gu diri Bharaki. Bharaki a di hadzi phasa vathu gu va wusedza gu khozeya Jehovha.

Gu di rumedwa muprofeti nya nyamayi Dhebhora a hongola ga Bharaki a ya mu embeya mahungu ya Jehovha, khuye: ‘Dzega 10 000 vama mu hongola gitsongwanani gya Kisomi, u ya dwana ni Sisera muthangeyi nya masotshwa ya Jabhimi, u va pala.’ Bharaki a di embeya Dhebhora gu khuye: ‘Nyi na hongola wo dzumeya gu hongola ni eni.’ Dhebhora a di hakha khuye: ‘Nyi na hongola nago. Ganiolu, dziti gu khuwe Jehovha a di khuye khandruwe u na songago Sisera. Jehovha a di khuye Sisera a na songwa khu nyamayi.’

Dhebhora a di hongola ni Bharaki ni masotshwa yaye gigomoni gya Tabhori va ya dzi dongiseya gu dwana. Tepo Sisera a nga sipwa isoso, a di tshanganisa dzikareta dzaye nya nyimbi ni masotshwa yaye vbafuvbi ni tsongo. Dhebhora a di embeya Bharaki gu khuye: ‘Muhuno Jehovha a na gu phasa gu pala.’ Bharaki ni masotshwa yaye nya 10 000 va di releya khu gigomoni va ya manana ni masotshwa nya tshivba ya Sisera.

Jehovha a di gira gu gitsongwana gya Kisomi gi tala khu mati. Marodha nya dzikareta dza Sisera ma di pfugeya omu nya maraga. Sisera a di duga khu gu tutuma khomu nya kareta yaye. Bharaki ni masotshwa yaye va di pala masotshwa ya Sisera. Ganiolu, Sisera a di tutuma a ya sihala litendrani la nyamayi nyo pwani khu Jayeli. Jayeli a di vbedza a mu hidzimeleya khu gwadi a ya mu khokhotheya gikhongwani nya litendra hungoni, afa.

Bharaki a di vboha ga Jayeli na gu vbwetedzeya Sisera. Jayeli a di duga khu litendrani gwaye, khuye: ‘Beya, Oyu omu mwama mu mu vbwetago.’ Bharaki a di beya litendrani a ya mana gu Sisera a di fude. Bharaki ni Dhebhora va di dhumisa Jehovha khu gu embeleya dzindzimo khu kotani nya olu a nga phasa Vaisrayeli gu pala valala vawe. Vaisrayeli va di vbanya khu gurula ndrani nya 40 myaga yi nga landreya.