GIHEVBULO 37
Ginani egi Bhibhiliya yi ganeyago khu thumo ni dzitsapawu?
U di nga tshuka u garadzega khu kotani nya thumo ni dzitsapawu? Si nga garadza gu mana silo nyo dzi vbanyise khiso ni gu khozeya Jehovha khu ndziya a yi vbwetago. Ganiolu, Bhibhiliya yi ngu hi ninga wusingalagadzi wu nga hi phasago.
1. Ginani egi Bhibhiliya yi ganeyago khu thumo?
Nungungulu o vbweta gu khuye hi tsaka thumoni gwathu. Bhibhiliya yari khiyo “gimwalo gi gu gyadi ga muthu guvbindra . . . gutsaka ni gukhalega khu handro nya thumo waye.” (Muhevbudzi 2:24) Jehovha a ngu thuma khu sighingi. Gu vbwetega hi pimedzeya Jehovha khu gu thuma khu sighingi. Ho gira isoso, hi na tsakisa Jehovha hi bwe hi tsaka thumoni gwathu.
Thumo wu na ni lisima. Ganiolu, kha hi yeli gu diga thumo wathu wu khala wa lisima ngudzu guvbindra gu khozeya Jehovha. (Johane 6:27) Jehovha o tumbisa gu khuye ho thangisa gugola gwaye guvbanyani gwathu, a na hi ninga esi si vbwetegago gasi hi vbanya.
2. Hi yede gu dzi wona kharini dzitsapawu?
Bhibhiliya yi ngu ganeya khiyo ‘dzitsapawu dzi ngu vhikeya.’ (Muhevbudzi 7:12) Ganiolu, yi ngu ganeya gambe khiyo khandri dzitsapawu basi dzi resago gutsaka. Khu kharato, Bhibhiliya yo hi kutsa gu mba gola dzitsapawu, ganiolu hi ‘tsaka khu esi hi gu naso.’ (Leri Vahebheru 13:5.) Ho tsaka khesi hi gu naso, kha hi na nga khaleya gu garadzega khu gu vbweta silo nyo engedzelege. Nigu kha hi na nga dzi gireya mangava nya mba na gighelo. (Mavingu 22:7) Hi na bwe hi potsa dzimhango dzi vangwago khu mapalisana nyo ghanye khayo dzitsapawu ni dzindziya nyo ghanye khidzo khu guvbiredza.
3. Hi nga thumisa kharini dzitsapawu gasi gu phasa vambe?
Jehovha Nungungulu nya wuhindzi, nigu tepo hi ‘yeyedzago lihaladzo ni gu ninga sisiwana’, ho pimedzeya uye. (1 Thimoti 6:18) Hi nga gira isoso khu gu thumisa dzitsapawu dzathu gasi gu seketeya libandla ni gu phasedzeya ava va hamugago, ngudzungudzu vandriyathu gukhodwani. Jehovha kha khedzi tengo nya dzitsapawu hi ningago, ganiolu o khedza gighelo gi hi girago ni ninga. Ho gireya wuhindzi vambe na si khugeya monyoni, hi na tsaka hi bwe hi tsakisa Jehovha. — Leri Mithumo 20:35.
GIRA WUGEVISISI NYO ETE
Wona gu khuwe khu ginani si gu sadi gu vega thumo wulangani wawo ni gu tsaka khesi hi gu naso.
4. Zundza Jehovha khu mathumelo yago
Wupari wathu ni Jehovha gu vbwetega wu kuha gambe edzi hi wu wonago khidzo thumo. Sistirini VHIDHYU, mu vbedza mu bhula khu siwudziso sesi.
Omu nya vhidhyu, ginani gi hlamadzisidego ngudzu wo khedza edzi Gerson a nga ba a gira khidzo silo ni mavbanyelo yaye thumotunu?
Ginani a giridego gasi gu vega thumo wulangani wawo?
Lerini Vakolosi 3:23, 24, mu vbedza mu bhula khu giwudziso gegi:
Khu ginani si gu sa lisima gu hi khala vathumi nya vadi?
Thumo wu na ni lisima, ganiolu kha hi yeli gu wu dzumeleya wu khala wa lisima ngudzu guvbindra gu khozeya Jehovha
5. Gu tsaka khesi hi gu naso si ngu phasa ngudzu
Vathu nya vangi va ngu zama gu wungeledzeya dzitsapawu nya dzingi khavba va si kodzago khavbo. Ganiolu, Bhibhiliya yo hi kutsa gu gira simbe. Lerini 1 Thimoti 6:6-8, mu vbedza mu bhula khu giwudziso gegi:
Ginani egi Bhibhiliya yi hi kutsago gu gira?
Ambari ho ba hiri mwalo dzitsapawu nya dzingi, hi nga si kodza gu tsaka. Sistirini VHIDHYU, mu vbedza mu bhula khu giwudziso gegi.
Ambari olu va gu mwalo dzitsapawu nya dzingi, ginani gi phasago dzindranga dzedzi gu tsaka?
Ahati ho ba hiri nadzo ke, ganiolu hi simama gu vbwetedzeya dzimbe? Jesu ganede khu gipimaniso gi hi gengedzago ga mhango yeyi. Lerini Luka 12:15-21, mu vbedza mu bhula khu giwudziso gegi:
Ginani u gi hevbulago avba nya gipimaniso gya Jesu? — Wona livhesi 15.
Lerini mu bwe mu fananisa Mavingu 10:22 ni 1 Thimoti 6:10. Khavbovbo, mu bhula khu siwudziso sesi:
Khu mawonelo yago, ginani gi gu gya lisima ngudzu? Gu khala pari ya Jehovha mwendro gu manega ni dzitsapawu nya dzingi? Khu ginani?
Khu dzevbini dzimhango dzi reswago khu gu thega hi wuga na hi thega hi wuga khu gu vbwetedzeya dzitsapawu nya dzingi?
6. Jehovha a na hi sayisa
Gu garadzega khu thumo ni dzitsapawu si nga linga gukhodwa gwathu ga Jehovha. Sistirini VHIDHYU gasi mu wona ndziya nya gu emisane khiyo ni silingo sesi, mu vbedza mu bhula khu siwudziso sesi.
Kha nga hi si wonidego omu nya vhidhyu, sigaradzo muni a tshanganidego naso ndriyathu?
Ginani a giridego gasi gu pala sigaradzo sile?
Lerini Matewu 6:25-34, mu vbe- dza mu bhula khu giwudziso gegi:
Ginani egi Jehovha a tumbisago vale va thangisago gugola gwaye guvbanyani?
VAMBE VARI KHAVO: “Gu vbwetega nyi thuma gasi nyi sayisa ndranga yangu. Khu kharato, kha nyi na nga hongola mitshanganoni semana ni semana.”
Lowo muni nya Bhibhiliya wu gu girago u khodwa gu khuwe gu thangisa gugola ga Jehovha guvbanyani gilo nya lisima ngudzu ga satshavbo u nga girago?
REZUMO
Thumo nya gudzivbanyise ni dzitsapawu si na ni lisima, ganiolu kha si yeli gu tsolopeteya thumo wathu ga Jehovha.
Siwudziso nyo wusedze
Ginani gi nga gu phasago gu manega ni mawonelo nya yadi khu thumo?
Khu ginani si gu sadi gu tsaka khesi hi gu naso?
U nga yeyedza kharini gu khuwe u ngu khodwa ga gitumbiso gya Nungungulu nyo khathaleye vathu vaye?
HEVBULA SIMBE
Ina Bhibhiliya yi ngu ganeya gu khiyo si vivbide gu manega ni dzitsapawu?
“Ina dzitsapawu khamba nya guvivba gwatshavbo?” (Ndrima nya jw.org, khu Giputukezi)
Wona edzi hi nga khalago khidzo vathu nya wuhindzi gasi hi tsakisa Nungungulu.
Ina gu gira mapalisana nyo ghanye khayo dzitsapawu givbungadzo basi?
Wona egi gi kutsidego mwama nyo khaguri gu ema gu gira mapalisana nyo ghanye khayo dzitsapawu ni guba.