GUPHEYA MABHULO
GIHEVBULO 6
U nga dzumeleyi hwanga wu gu gira u ema gu tshumayela
Litshina nya nayo: “Hi manegide ni gutiya-hwambo khu gu phaswa khu Nungungulu wathu gasi hi ta mi embeya mahungu nya yadi.” — 1 Tes. 2:2.
Ginani Jesu a giridego?
1. Sistiri VHIDHYU, mwendro leri Luka 19:1-7. Khavbovbo gira siwudziso si landreyago:
Khu ginani vathu nyo khaguri va nga potsa Zakewu?
Ginani gi nga kutsa Jesu gu mu bhuleya mahungu nya yadi, ambari olu vathu va nga ba va mu wona nga gighohi?
Ginani hi gi hevbulago khu Jesu?
2. Kha hi yeli gu manega ni hwanga gasi gu tshumayela mahungu nya Mufumu ga vatshavbo.
Pimedzeya Jesu
3. Tumba Jehovha. Liphuvbo la Nungungulu li ningide tshivba eyi Jesu a nga ba yi vbweta gasi gu tshumayela, nigu ilo li nga gu ninga tshivba anuwe. (Mat. 10:19, 20; Luka 4:18) Lomba Jehovha a gu ninga gutiya-hwambo gasi u tshumayela vale u va thavago. — Mith. 4:29.
4. U nga lamuli vathu. Adzina hi nga potsa gu tshumayela vathu khu kotani nya edzi va ambalago khidzo, thumo wawe, edzi va vbanyago khidzo ni wukhongeyi wawe. Ganiolu, dundruga khuwe:
Jehovha ni Jesu va ngu siti esi si gomogo myonyoni nya vathu, ganiolu ethu kha hi siti.
Kha hi yeli gu pimisa gu khethu muthu nyo khaguri kha na nga phaswa khu Jehovha.
5. U nga khali hwanga, ganiolu yeyedza githawo u bwe u dzi phara. (Mat. 10:16) Potsa gu ganedzisana. A gu tshuka muthu nyo khaguri a si dzini gu engiseya mahungu nya yadi mwendro u wona khuwe kha si na nga vbeya gwadi, sega mabhulo khu ndziya nya yadi. — Mav. 17:14.