Khu Ginani hi yedego gu Gombeya khu lina la Jesu?
JESU dzitepo nya dzingi a di gu hevbudza vathu ndziya nya gu gombeye khiyo. Matshigoni yaye, vathangeyi nya wukhongeyi nya Vajudha va di gu gombeya “mahandzakanyani nya dzindziya”. Khu ginani? “Gasi va feya gu wonwa khu vathu.” Somo guagani gu avo va di gu vbweta gu ningwa githawo khu kotani nya gu vbisege gwawe ga Nungungulu. Nya vangi va di gu gira milombelo nya gu laphe, va ganeya khu gu phindra-phindra, va gira nga khatsi milombelo yawe yi di hadzi engisedwa va “gu thumisa malito nya mangi”. (Matewu 6:5-8) Jesu a ganede gu khuye siolovedzo sawe si di si phasi gilo, khavbovbo a phaside vathu va gu na ni myonyo nya yadi gasi vati esi va si yeligo gu gira tepo va gombeyago. Ambari ulolo, uye kha va hevbudza basi esi va nga ba va si yeli gu gira tepo va gombeyago.
Jesu a hevbudzide gu, omu nya milombelo yathu, hi yede gu yeyedza gu hi ngu vbweta gu lina la Jehovha li agiswa, Mufumo waye wu wuta nigu gugola gwaye gu girega. Jesu gambe a hevbudzide gu si na ni lisima gu lomba giphaso ga Nungungulu gasi hi emisana ni sigaradzo hi tshanganago naso. (Matewu 6:9-13; Luka 11:2-4) Khu gu thumisa siyeyedzo, Jesu a yeyedzide khuye gu ngu vbwetega gu dzigaradza, gu khodwa ni gu dzinogisa gasi milombelo yathu yi engisedwa. (Luka 11:5-13; 18:1-14) Nigu uye a di gu gira esi a nga ba a hevbudza. — Matewu 14:23; Marko 1:35.
Khu lisine, Giyeyedzo gegi gi phaside vapizane va Jesu gu tshukwadzisa Milombelo yawe. Khu kharato, gu diri ga wutshigu waye nya gu hegise omu mafuni a nga hevbudza vapostoli vaye silo nya lisima maningano khu gu gira nombelo.
“Guvbindrugedza nya gukhongolo ga ndziya eyi vathu va nga ba va gombeya khiyo”
Jesu a vbedzide tepo nya yingi ga wutshigu nya gu hegise na gu tiyisa vapostoli vaye nya gu tumbege. Iyoyo yi diri tepo nya yadi gasi gu ganeya silo nya siphya. Uye a di khuye: “Eni kheni ndziya ni lisine ni womi. Mwalo a hongolago ga Papayi nasiri khavbo gwangu.” Hwane nya gitepwana a di va tumbisa silo nya gu tsakise: “Satshavbo esi mu lombago khu lina langu, nyi na gira, gasi Papayi a dhumiswa khu kotani nya Gyanana.” Guhegisani nya mabhulo yaya, uye a di khuye: “Kala olu mu si lombi ne gilo gimwegyo khu lina langu. Lombani mu na ningwa, gasi mu mana gutsaka nya gukhongolo.” — Johane 14:6, 13, 14; 16:24.
Malito yoyo ma diri ni lisima ngudzu. Limwedo nya libhuku nya giyeyedzo li ganede gu khilo malito yaya “ ma giride guvbindrugedza nya gu khongolo ga ndziya eyi vathu va nga ba va gombeya khiyo.” Jesu a di si ganeyi gu khuye milombelo yi yede gu yiswa iyo gwaye guvbindra gu yiswa ga Nungungulu. Vbavbandzi nya isoso, uye a di gu yeyedza ndziya nya yiphya nya gu hidzimeye khiyo ga Jehovha.
Nya ba kanakana, Nungungulu tepo yatshavbo a ngu engiseya milombelo nya sithumi saye nya gu tumbege. (1 Samuweli 1:9-19; Ndzimo 65:2) Ganiolu, gu khugeya ga tepo Nungungulu a nga gira gidzumeledzwanu ni Vaisrayeli, ava va nga ba va vbweta gu milombelo yawe yi engisedwa va di yede gu dzumeya gu Israyeli li diri litigo li hathidwego khu Nungungulu. Nigu khu gu gimbiya nya tepo, gu khugeya matshigoni ya Solomoni avo va di yede gu dzumeya gu Tempele wulanga owu wu hathidwego khu Nungungulu gasi gu gireya avbo miphaso. (Dhewuteronome 9:29; 2 Dzikoronika 6:32, 33) Ambari ulolo, ndziya yeyi nya gu khozeye khiyo yi diri nya gitepwana. Guya khu mupostoli Pawulo, nayo wu nga ningwa Vaisrayeli ni miphaso yi ningedwago Tempeleni yi diri “mutsa nya silo nya sadi si ngo gu tago, ganiolu kha wu si kodzi gu si yeyedza khu guvbeleya”. (Vahebheru 10:1, 2) Mutsa wu di yede gu tshikedzwa khu silo nya gu wonegi.(Vakolosi 2:17) Gu khugeya khu 33 matshigoni yathu, wupari nya muthu ni Jehovha kha wu dzi seketeyi avba nya gu engise nayo wa Mosi. Ganiolu, wa gu dzi seketeya avba nya gu engise oyu nayo wu yeyedzago uye a gu — Jesu Kristo. — Johane 15:14-16; Vagalatiya 3:24, 25.
Lina li gumogo “vbatshani gu vbindra mambe malina yatshavbo”
Jesu a yeyedzide litshina nya likhongolo gasi hi si kodza gu hidzimeya ga Jehovha, uye a gu dzi yeyedza kha nga pari nya tshivba, oyu a tulago ndziya gasi milombelo yathu yi engisedwa nigu hlamudwa khu Nungungulu. Ginani gi girago Jesu a hi tuleya ndziya?
Kha nga olu ethu hi nga velegwa ma gighohoni, yi mwalo mithumo hi nga yi girago mwendro miphaso hi nga yi ningeyago gasi hi agiswa sighoho sathu mwendro gu hi gira hi manega ni wupari ni Jehovha, Nungungulu nyo age. (Varoma 3:20, 24; Vahebheru 1:3, 4) Khu kharato, Jesu a ningede womi waye nya guvbeleye gasi a livba sighoho nya vathu gasi va si kodza gu manega ni wupari ni Nungungulu. (Varoma 5:12, 18, 19) Khu kharato, vatshavbo va vbwetago gu divaledwa sighoho sawe va na ni lithomo nya gu manege na va agide mahoni ga Jehovha ni gu ‘ganeya na va tshulegide.’ — Vaefeso 3:11, 12.
Tepo hi gombeyago khu lina la Jesu, ha gu yeyedza gu khodwa gwathu ga dzindziya dziraru edzi a dzi giridego gasi a tadzisa makungo ya Nungungulu: (1) Jesu khuye “Ginvutana gya Nungungulu” muphaso waye khuwo wu girago gu hi divaledwa sighoho sathu. (2) Jesu a wusidwe khu gufani nigu olu o thuma kha nga “muprista nya khongolo ngudzu” oyu a woneleyago giphaso nya gu tshudziswe. 3) Uye khuye basi a gu “ndziya” gasi hi si kodza gu hidzimeya ga Jehovha khu nombelo — Johane 1:29; 14:6; Vahebheru 4:14, 15.
Gu gombeya khu lina la Jesu so gira gu uye a ningwa githawo. Uye a yede gu yeyedzwa githawo kholu gu gola ga Jehovha gu “vathu vatshavbo va ninga wuzundzo lina la Jesu. . . , “Nigu gasi malimi yatshavbo ma ganeya guagani gu khayo Jesu Kristo Pfhumu gasi gu dhumisa Nungungulu, Papayi.” (Vafilipi 2:10, 11) Nya lisima ga satshavbo khu gu, gu gombeya khu lina la Jesu sa gu ninga wuzundzu Jehovha, oyu a ningedego gyanana gyaye gasi ethu hi phasega. — Johane 3:16.
Hi yede gu gombeya khu “monyo wathu watshavbo”, na siri gasi gu hi tadzisa nayo.
Gasi hi si kodza gu pwisisa wulanga nya gu khugege wa Jesu, Bhibhiliya yi ngu thumisa sikhalo nya singi, malina nya gu hambane-hambane gasi gu mu tshamuseya. Sikhalo soso si ngu hi phasa gu pwisisa giphaso hi gi manidego khu kotani nya esi Jesu a giridego, ni esi a ngu gu hi gireyago muhuno. (wona kwadru “Thumo nya lisima wa Jesu”.) khu lisine, Jesu a hakhide “lina li gomogo vbatshani nya malina yatshavbo.”a Uye a ningidwe wuthangeyi watshavbo omu mafuni ni ndzadzini. — Vafilipi 2:9; Matewu 28:18.
Kha hi yeli gu gombeya khu lina la Jesu gasi gu tadzisa nayo basi
Khu lisine, ha gu ba hi vbweta gu Jehovha a engisa milombelo yathu, hi yede gu gombeya khu lina la Jesu. (Johane 14:13, 14) Ganiolu, kha hi yeli gu phindra-phindra gu ganeya gu khethu “khu lina la Jesu”, hi gira nga khatsi giolovedzo gyathu. Khu ginani?
Wona giyeyedzo gegi. Wa gu hakha lidangaliya litago khu ga muthu nya dzinogosi, gu tala nya dzitepo, lidangaliya lolo la gu hegisa khu malito ma gu khayo “atenciosamente”. Wa gu pimisa gu khuwe malito yaya ma gu yeyedza edzi muthu yoyo a khadego khidzo mwendro a thumiside malito yaya kholu basi ma yedwego gu thedwa tepo muthu nyo khaguri a lovago lidangaliya nya dzinegosi? Khu lisine, gu thumisa lina la Jesu tepo hi gombeyago si yede gu manega ni lisima guvbindra tepo muthu nyo khaguri a lovago lidangaliya nya dzinegosi. Ambari olu hi yedego gu “ gombeya tepo yatshavbo” hi yede gu gira isoso khu “monyo watshavbo”, na siri gu tadzisa nayo basi. — 1 Vatesalonika 5:17; Ndzimo 119:145.
U nga gira kharini gasi u potsa gu thumisa malito ma gu khayo “khu lina la Jesu” khu ndziya nya ba yadi? Mweyo nya dzindziya gu dundrugeya khu makhalelo nya gu tsakise aya Jesu a gu nawo ni gu pimisa khesi Jesu a hi giredego ni esi a ngu gu vbwetago gu hi gireya. Tepo u gombeyago, bonga ni gu dhumisa Jehovha khu ndziya eyi a thumisago khiyo gyanana gyaye. Tepo u girago isoso, u na engedzeya gutumba gwago avba nya gitumbiso gya Jesu nya gu khigyo: “Mwa gu lomba ni gevbini gilo ga Papayi khu lina langu, uye a na mi ninga.” — Johane 16:23.
a Guya khu Expository Dictionary of New Testament Words (Dicionário Expositivo de Palavras do Novo Testamentode vine), lito nya Gigreki li nga vbindrugedzedwa li khala “Lito” li nga yeyedza “Satshavbo si pategago avba nya lina nyo khaguri, wuthangeyi, wu wuthu, wuzundzo, wukhongolo ni tshivba.”