Khodwa ga situmbiso sa Jehovha
“Gukhodwa, gutumba nyo tiye nyo khethu esi hi si vireyago si na tadzisega, nigu gutiyisega nyo khethu esi hi si si wonigo somo khu lisine.” — Vahebheru 11:1, nota.
1. Khu ginani hi yedego gu bonga Jehovha kholu a hi phasago gu manega ni gukhodwa?
Gukhodwa likhalelo nya lisima. Ganiolu, khandri vatshavbo va gu nalo likhalelo leli. (2 Vatesalonika 3:2) Ambari lolo Jehovha a ngu ‘ninga gukhodwa’ ga gimwegyo ni gimwegyo nya sithumi saye (Varoma 12:3; Vagalatiya 5:22) Tepo yatshavbo hi ngu bonga Jehovha khu gu a hi phasa gu manega ni likhalelo leli.
2, 3. (a) Khu yavbini makategwa hi na ma manago ha gu yeyedza gu khodwa?? (b) Khu sevbini siwudziso hi na bhulago khiso avba nya ndrima yeyi?
2 Jesu a di khuye, Jehovha a gu hidzimisa vathu iyo gwaye khu gu thumisa uye. (Johane 6:44, 65) Nigu vathu va gu yeyedza gukhodwa ga Jesu va na divaledwa sighoho sawe. Jesu a ngu tuleya dzindziya vathu gasi va si kodza gu khala dzipari dza Nungungulu kala gupindruga. (Varoma 6:23) Nasiri Jehovha na si si kodzegi gu hi mana makategwa yoyo. Kha nga olu hi gu sighohi hi konedwe gufa. (Ndzimo 103:10) Ganiolu Jehovha a wonide makodzelo yathu. Khu kotani nya wuwadi waye a giride gu si kodzega gu mahungu nya yadi, ma kuha myonyo yathu. Khu ndziya iyoyo, hi ngu si kodza gu khodwa ga Jesu nigu manega ni gutumba nya guvbanye kala gupindruga. — Leri 1 Johane 4:9, 10.
3 Ganiolu, ginani gukhodwa? Ina guti basi gu khu sevbini situmbiso sa Nungungulu? Nya lisima ga satshavbo, ginani gi yeyedzago gu hi na ni gukhodwa?
“Yeyedza gukhodwa myonyoni gwago”
4. Khu ginani gukhodwa gu patago ni monyo, nasiri basi guti makungo ya Nungungulu khu wumindru?
4 Gu manega ni gukhodwa si ngu pata silo nya singi guvbindra guti makungo ya Nungungulu khu wumindru. Gukhodwa tshivba nya yikhongolo yi girago gu muthu a vbweta gu gira gugola ga Nungungulu nigu monyo nuwo wu ngu patega. Mupostoli Pawulo a di khuye: “Kholu wa gu fakaza vathuni khu likana lago khuwe Jesu, Pfhumu, u bwe u khodwa monyoni gwago khuwe Nungungulu mu wuside khu ga va fudego, u na vbulugiswa. Gasi muthu a mana gululama, gu vbwetega a khodwa monyoni gwaye; nigu gasi a vbulugiswa, gu vbwetega a fakaza khu likana laye vathuni.” — Varoma 10:9, 10; 2 Vakorinto 4:13.
5. Khu ginani si gu na ni lisima gu manega ni gukhodwa, nigu ginani hi yedego gu gira gasi hi manega ni gukhodwa nya gutiye? Ninga giyeyedzo.
5 Somo guagani gu gasi hi si kodza gu mana womi nya gupindruge mafuni nya maphya aya Nungungulu a ma tumbisago hi yede gu manega ni gukhodwa nya gutiye. Gukhodwa gu ngu fana ni gifilori, gasi gu gifilori gi dandra gwadi gi yedwe gu tedwa gwadi mati. Guya khedzi gi khathaledwago khidzo, gifilori gi nga wuna mwendro gubhura ni gu dandra gwadi. Gya mba mana mati nya gu eneye, gifilori nya gumbure gi ngafa. Khu ndziya nya gufane ha gu mba khathaleya gukhodwa gwathu ugo vbadugwana-vbadugwana gu ngafa. (Luka 22:32; Vahebheru 3:12) Hi yede gu gira satshavbo hi si kodzago gasi gukhodwa gwathu gu simama gu “dandra” khu ndziya yoyo, hi na si kodza gu “tiya gukhodwani” — 2 Vatesalonika 1:3; Tito 2:2.
BHIBHILIYA YA GU TSHAMUSEYA KHARINI GUKHODWA?
6. Guya khu Vahebheru 11:1, silo muni nya sivili si pategago avbo nya gukhodwe?
6 Bhibhiliya yi ngu tshamuseya gu ginani gukhodwa omu ga Vahebheru 11:1. (Leri) Guya khu livhesi leli gukhodwa gu ngu pata silo sivili hi gu mba si wona: (1) “Esi hi si vireyago” — isoso sa gu pata gambe silo esi Nungungulu a si tumbisidego khu wumindru, nya nga gu vbedza wuvivbi ni mafu nya maphya. (2) “Lisine li si wonegigo.” Ga mahungu yaya, lito nya gihebheru li nga vbindrugedzedwa kha nga wu “fakazi wu tiyidego” la gu thula “wufakazi wu khodzisago” nya lisine li si wonegigo, nya nga gu Jehovha Nungungulu womo, Jesu Kristo, Dzingilozi ni silo satshavbo si giregago mufumoni wa ndzadzini. (Vahebheru 11:3) Ha gu yeyedza kharini gu gutumba gwathu gu tiyide ga silo hi gu mba si wona si khumbugwago omu nya Bhibhiliya? A gu si yeyedza isoso khu sigiro sathu ni malito — ha gu mba gira isoso gukhodwa gwathu gu na ba gwa sa tiya.
7. Giyeyedzo gya Nowa gya gu hi phasa kharini gu pwisisa tshamuselo nya gu manege ni gukhodwa? (Wona fotu gupheyani nya ndrima)
7 Vahebheru 11:7 la gu ganeya khu gukhodwa Nowa a gu yeyedzidego khilo, “Khu gukhodwa, Nowa tepo a nga embedwa silo si nga hadzi girega, ambari olu a nga ba a si si woni a engiside Nungungulu, khu kharato a vbaha litaru gasi a vbulugisa ndranga yaye.” Nowa yeyedzide gu khuye a diri ni gukhodwa khu gu vbaha litaru nya likhongolo. Nya mba kanakana si nga gira vavhizinyo na va gu wudziside nowa gu khu ginani a nga ba a gira thumo wule. Ina Nowa a di degula mwendro a di va embeya gu va di yede gu khataleya womi wawe? Ne vbadugwana. Khu kotani nya gu khodwe gwaye, uye a di va tshumayela khu gutiya hwambo a bwe a va tivisa gu Jehovha a di hadzi gu resa gumbembisa khu gu thumisa ndrambi. Nya mba kanakana, Nowa a ganede khu guphindra-phindra malito aya Jehovha a mu embedego nya gu khayo “Eni nyi na tshisa talo nya ndrambi mafuni, gasi guta langaladza sivangwa satshavbo si vbanyago vbavbatshi nya lidambo; satshavbo si guromo mafuni si nafa.” Vbavbandze nya isoso, nya mba kanakana Nowa tshamusede vathu gu khuye va di hadzi gu vbuluga basi va gu beya omu nya litaru, kha nga edzi Nungungulu a rumidego. Khu kharato, Nowa yeyedzide gu khuye a diri ni gukhodwa khu gu khala “mutshumayeli nyo lulame.” — Genesi 6:13, 17, 18; 2 Pedro 2:5.
8. Ginani Jakobe a ganedego mayelano ni gukhodwa nya lisine?
8 Jakobe nuye a ganede khu gukhodwa. Si nga gira na gu lovide lidangaliya laye Pawulo na ngari gu vbedza gu loveya lidangaliya Vahebheru. Nigu gu fana ni Pawulo, Jakobe tshamusede khuye gukhodwa nya lisine gwa gu pata mithumo nasiri gukhodwa basi. Uye lovide khuye: “Nyi yeyedze gukhodwa gwago nya mba na mithumo, eni nyi na gu yeyedza gukhodwa gwangu khu mithumo.” (Jakobe 2:18) Gasi gu yeyedza guhambana gu gomogo avbo nya gu khodwe ga gilo ni gu yeyedza gukhodwa, Jakobe a khumbugide esi si giregago ni madhemoni. Ayo ma ngu khodwa gu khayo Nungungulu womo ganiolu, ina ayo ma na ni gukhodwa nya lisine? Ne. Gasi gu ganeya lisine, ayo ma gu gira satshavbo ma si kodzago gasi gu gira gu situmbiso sa Jehovha si si tadzisegi. (Jakobe 2:19, 20) Khu gu landreya Jakobe a di fananisa isoso ni giyeyedzo gya Abrahama khuye: “Ina Papayi wathu Abrahama kha wonwa na lulamide khu kotani nya mithumo kholu a nga ningeya gyanana gyaye Izaki vbaalitaritunu? U ngu wona gu khuwe gukhodwa gwaye gu di gu longoloka ni mithumo yaye.” Khu gu landreya gasi gu tshingisa gu gukhodwa nya mbana mithumo kha gu phasi gilo Jakobe a di khuye: “kha nga olu givili gi gu mwalo liphuvbo gi fudego, khu ndziya nyo fane gukhodwa nya mba na mithumo anugo gu fude.” — Jakobe 2:21-23, 26.
9, 10. Mupostoli Johane a gu hi phasa kharini gu pwisisa lisima nya gu manege ni gukhodwa?
9 Na gu vbindride 30 myaga ni guvbindra, mupostoli Johane lovide ivhangeli yaye ni madangaliya mararu. Gufana ni vambe valovi nya Bhibhiliya, Johane a di gu pwisisa gu khuye ginani gukhodwa nya lisine. Johane thumiside lito nya Gigreki, dzimbe dzitepo li vbindrugedzedwago kha nga “gu manega ni gukhodwa” guvbindra ni wevbini mulovi nya Bhibhiliya.
10 Khu giyeyedzo, Johane ganede khuye: “Oyu a khodwago ga Gyanana na ni womi nya gupindruge, ganiolu oyu a si engisigo Gyanana kha na nga mana womi, nigu zanga ya Nungungulu kha yi na nga duga gwaye.” (Johane 3:36) Gukhodwa nya lisine gwa gu pata gu engisa milayo ya Jesu. Umo nya ivhangeli ya Johane, hi ngu wona gu Jesu ganede khu guphindra-phindra gu hi yede gu manega mwendro gu yeyedza gukhodwa. Malito ya Jesu ma ngu hi gira hi pwisisa gu hi yede “gu yeyedza gukhodwa” tepo yatshavbo. — Johane 3:16; 6:29, 40; 11:25, 26; 14:1, 12.
11. Hi nga yeyedza kharini gubonga khu guti lisine?
11 Hi ngu tsaka ngudzu khu gu ba Jehovha a thumiside liphuvbo laye nya guage gasi a hi phasa guti lisine ni gu hi phasa gu manega ni gukhodwa avbo nya mahungu nya yadi. (Leri Luka 10:21.) Si na ni lisima gu bonga Jehovha tepo yatshavbo khu gu na hi hathide khu gu thumisa gyanana gyaye, a gu “Pfhumu yi ningago guvbanya ni oyu a girago gu gukhodwa gwathu gu vbeleya.” (Vahebheru 12:2) Hi nga yeyedza kharini gubonga khu wuhindzi nya wukhongolo wa Jehovha? Hi yede gu simama gu tiyisa gukhodwa gwathu khu gu thumisa nombelo ni gihevbulo nya lito la Nungungulu. — Vaefeso 6:18; 1 Pedro 2:2.
Yeyedza gukhodwa gwago khu gu tshumayela khavbo si kodzegago khavbo tepo yatshavbo (Wona paragrafu 12)
12. Ha gu yeyedza kharini gu khethu hi na ni gukhodwa?
12 Mithumo yathu yi yede gu vega guagani gu hi ngu khodwa avbo nya situmbiso sa Jehovha. Khu giyeyedzo, hi ngu simama gu tshumayela khu mufumo wa Nungungulu ni gu patega avbo nya thumo nya gu gire vapizani. Vbavbandze nya isoso, hi ngu simama gu “gireya silo nya sadi vatshavbo, ngudzu-ngudzu vandriyathu gukhodwani.” (Vagalatiya 6:10) Nigu gambe hi ngu dzi garadza gasi hi tshula “Muthu wa gale ni mithumo yaye.” — Vakolosi 3:5, 8-10.
GUKHODWA GA NUNGUNGULU GU YEDE GU KHALA GILO NYA GUPHEYE WOMINI WATHU
13. Khu levbini lisima nya gu manege ni gukhodwa ga Nungungulu, gwa gu fananiswa ni ginani nigu khu ginani?
13 Bhibhiliya ya gu ganeya gu khiyo “nya mba na gukhodwa kha si kodzegi gu tsakisa Nungungulu kholu uye a hidzimeyago ga Nungungulu yede gu khodwa gu khuye uye womo nigu uye a ngu tshatshazeya ava va mu vbwetedzeyago khu lisine.” (Vahebheru 11:6) Bhibhiliya ya gu tshamuseya “gukhodwa ga Nungungulu” kha nga gisekelo mwendro gilo nya gu pheye womini nya Makristo. Gukhodwa gu na ni silima gasi gu muthu a kala mwendro a simama gu khala Mukristo nya lisine. (Vahebheru 6:1) Na hi gu ganeya khu gisekelo gegi, Makristo ma yede gu haguleya mambe makhalelo nya lisima “gasi ma simama lihaladzoni la Nungungulu.” — 2 Pedro 1:5-7; Judha 20, 21.
14, 15. Khu ginani gu manega ni lihadzo si gu na ni lisima gu vbindra gu manega ni gukhodwa basi?
14 Valovi nya Bhibhiliya va tshingiside lisima nya gukhodwa khu gu khumbuga likhalelo leli dzitepo nya dzingi. Gu mwalo limbe likhalelo li khumbugwago dzitepo nya dzingi gu fana ni eli. Ina soso sa gu thula gu khiso gukhodwa khilo likhalelo nya lisima eli mukristo a yedego gu manega nalo?
15 Na gu fananisa gukhodwa ni lihaladzo Pawulo a di khuye: “Nya gu ba nyiri ni gukhodwa gwatshavbo avbo nya gu nyi kula sigomo, ganiolu nya gu ba nyiri mwalo lihaladzo kha nyiri wa gilo.” ( 1 Vakorinto 13:2) Tepo va nga wudzisa Jesu gu khu wevbi nayo nya wukhongolo ga yatshavbo, Jesu a di hlamula khuye gu haladza Nungungulu. (Matewu 22:35-40) Lihaladzo likhalelo li gimbileyanago ni mambe makhalelo nya lisima, nya nga, khu giyeyedzo gukhodwa. Bhibhiliya yari khiyo “Lihaladzo. . . li ngu khodwa silo satshavbo.” Khu kharato, lihaladzo li ngu hi phasa gu khodwa avbo nya lito la Nungungulu, Bhibhiliya. — 1 Vakorinto 13:4, 7.
16, 17. Gukhodwa ni lihaladzo ma ngu khumbugwa dzitepo nya dzingi ya mavili omu nya Bhibhiliya. Ninga giyeyedzo. (b)Khu levbini likhalelo nya likhongolo ga makhalelo yaya nigu khu ginani?
16 Lihaladzo ni gukhodwa makhalelo nya lisima ngudzu. Omu nya Bhibhiliya, makhalelo yaya ma ngu khumbugwa dzitepo nya dzingi ya mavili. Khu giyeyedzo, Pawulo khutshide vandriyaye gu ambala “givhikelo nya khana nya gukhodwe ni lihaladzo.” (1 Vatesalonika 5:8) Na gu ganeya khu Jesu, Pedro lovide khuye: “Ambari olu mu si gu mu wonigo, enu mu ngu mu haladza. Ambari olu mu si mu wonigo olu, mu ngu khodwa gwaye.” (1 Pedro 1:8) Jakobe wudziside vandriyaye nya gutodzwe khuye: “Ina Nungungulu kha hatha vale va gu sisiwana mahoni nya litigo gasi va khala sighanyi gukhodwani va bwe va hakha Mufumo owu uye a tumbisidego ava va mu haladzago?” (Jakobe 2:5) Johane lovide khuye ‘Khu lisine, nayo Nungungulu a hi ningago khowu: Gu vbwetega hi khodwa avba nya lina la Gyanana gyaye Jesu Kristo hi bwe hi haladzana nga edzi a hi rumidego khidzo.’ — 1 Johane 3:23.
17 Ambari olu gukhodwa gu gu na ni lisima, kha gu na nga vbwetega gu manega ni gukhodwa ga dzitepo dzitago khulu situmbiso sa Nungungulu si na ba si tadzisegide. Ganiolu, gu na vbwetega gu hi simama ni lihaladzo, kholu tepo yatshavbo hi yede gu haladza Jehovha ni vandriyathu. Khu ndziya yoyo, Pawulo a di khuye: “Ganiolu olu gu tshade silo sesi sa siraru: gukhodwa, gutumba ni lihaladzo; ganiolu ga esi sa siraru nya gikhongolo lihaladzo.” — 1 Vakorinto 13:13.
GIYEYEDZO NYA LISIMA NYA GUKHODWA
18, 19. Vathu va Jehovha va gu yeyedza kharini khu khavo va na ni gukhodwa avbo nya mufumo wa Nungungulu muhuno nigu khu mani a yedwego khu wuzundzu?
18 Muhuno, vathu va Jehovha va ngu yeyedza gu va ngu khodwa avbo nya mufumo wa Nungungulu. Iso si girago vathu nya vangi nya gu vbindre 8 dzimiliyoni va vbanya khu gurula ni wumowo nga khatshi va gu vbanya paradhesini, kholu va ngu yeyedzana makhalelo nya liphuvbo la Nungungulu. (Vagalatiya 5:22, 23) Esi khiso si ranwago paradhesi ya maliphuvboni. Si ngu hlamadzisa gu wona esi gukhodwa nya lisine ni lihaladzo si si khodzago gu gira!
19 Khu mani a yedego gu zundwa khu silo sesi? Muthu nyo khaguri? Ne; paradhesi yeyi ya liphuvboni ya gu khodzega basi khu kotani ya Nungungulu wathu. Nigu wuyelo wakona wu ngu resa “wuzundzo ga PFHUMU Nungungulu ni gialakanyiso nya gupindruge gi na gumba divadwa gambe.” (Isaya 55:13) Jehovha a gu vbweta khuye hi “vbulugiswa khu kotani nya gukhodwe”, nigu ethu hi ngu bonga ngudzu khu ‘giningwa gegi hi ningidwego khu Nungungulu’ (Vaefeso 2:8) Paradhesi yathu ya liphuvboni yi na simama gu dandra ni gu engedzeya gu mbura, khala mafu yatshavbo ma tala khu vathu nya gu vbeleye, va tshakidego va khozeyago Nungungulu khu wumowo kala gupindruga. Ganiolu, hongoleni hi simama gu yeyedza gu khethu hi na ni gukhodwa avbo nya situmbiso sa Jehovha!