Jehovha a ngu ninga lisima sithumi saye nyo dzinogise

1. Jehovha a gu dzipwa kharini khu vathu nyo dzinogise? Tshamuseya.

JEHOVHA a ngu haladza vathu nyo dzinogise. Ava va dzi nogisago khu lisine khavo basi va nga manegago ni wupari wa vbafuvbi ngudzu ni Jehovha. Ganiolu “va nya matshandza, a gu vati nari khu hwindzo.” (Ndzi. 138:6) Hatshavbo hi ngu dzina gu tsakisa Jehovha ni gu haladzwa khuye, khu kharato hi na ni sighelo nyo pwale nya gu hi haguleya gudzinogisa.

2. Ginani hi na bhulago khigyo avba nya ndrima yeyi?

² Avba nya ndrima yeyi hi na bhula khu mihlamulo nya siwudziso sesi sa siraru: 1) Ginani gudzinogisa? 2) Khu ginani hi yedego gu gu haguleya? 3) Siemo muni si nga lingago gudzinogisa gwathu? Kha nga hi na si wonago, tepo hi haguleyago gudzinogisa, ha gu tsakisa monyo wa Jehovha hi bwe hi phasega nethu. — Mav. 27:11; Isa. 48:17.

GINANI GUDZINOGISA?

3. Ginani gudzinogisa?

³ Muthu nyo dzinogise kha pimisi gu khuye a na ni lisima ngudzu guvbindra vambe, kha dzi khusedzi. Bhibhiliya ya gu yeyedza gu khiyo, muthu nyo dzinogise a ngu pwisisa gu khuye Jehovha khongolo ngudzu guvbindra uye a bwe ati wulanga waye vbakari nya vambe vathu. Uye gambe a ngu pwisisa gu khuye vambe i tshukwana gwaye khu dzindziya nyo khaguri. — Filp. 2:3, 4.

4-5. Khu ginani hi nga ganeyago gu khethu muthu a nga wonega nari muthu nyo dzinogise ganiolu na si dzi nogise khu lisine?

⁴ Vambe va ngu dzi amba gu khavo va ngu dzi nogisa narigu khu lisine vo dzi pemba. Si nga gira na vari vathu nyo degule mwendro nya dzitshoni. Adzina va nga yeyedza githawo ni wuthu khu kotani nya edzi va dandrisidwego khidzo khu vavelegi vawe. Ganiolu myonyoni gwawe na gu tade gudzikhusedza. Guhweya ni gumba hweya, avo va na yeyedza edzi va gu idzo khu lisine. — Luka 6:45.

⁵ Muthu a gu yeyedza gutiya, a ganeya mawonelo yaye khu silo nyo khaguri kha si thuli gu khiso uye muthu nyo dzi khusedze. (Joh. 1:46, 47) Ambari ulolo, avo va gu ni makodzelo yoyo gu vbwetega va dzi woneya gu dzi tumba ngudzu. Gani hi vathu nyo degule mwendro nyo tiye gu ganeya, gu vbwetega hi dzigaradzeya gu haguleya gudzinogisa khu lisine.

6. Kha nga hi si wonago omu ga 1 Vakorinto 15:10, ginani hi nga gi hevbulago avba nya giyeyedzo gya mupostoli Pawulo?

⁶ Nga wona giyeyedzo gya mupostoli Pawulo. Uye thumisidwe ngudzu khu Jehovha gasi gu emisa mabandla madhoropani nyo hambanehambane. Si nga gira na giride nya singi thumoni nyo tshumayele guvbindra vatshavbo vapostoli va Jesu Kristo. Ambari ulolo, Pawulo kha dzi khusedza vbakari ga vandriyathu. Khu gu dzi nogisa a di khuye: “Kha nyi faneli gu ranwa mupostoli, khu kotani nyi nga tshanisa Libandla la Nungungulu.” (1 Kor. 15:9) Khavbovbo, Pawulo a di ganeya gu khuye a diri ni wupari nyo tiye ni Jehovha khu kotani nya olu Jehovha a mu yeyedzidego wuhigo wu nga ba wu si mu faneyi, nasiri khu gu ba ari wa lisima ngudzu guvbindra vambe, mwendro kholu a giridego nya singi guvbindra vambe. (Leri 1 Vakorinto 15:10.) Pawulo giyeyedzo nya gyadi nya muthu nyo dzi nogise. Tepo a nga loveya lidangaliya laye maKristo ya Korinto, uye kha dzi khusedza khesi a nga ba a gira, ambari olu vambe va nga ba va mu solasola! — 2 Kor. 10:10.

7. Vambe vandriyathu matshiguni yathu va gu yeyedza kharini gudzinogisa? Ninga giyeyedzo.

⁷ Vathu va Jehovha nya vangi va ngu tiyiswa ngudzu khu matimo nya guvbanya ya ndriyathu Karl F. Klein, a thumidego kha nga givbango nya Huwo nya Guthangeye. Omu nya matimo yaye, ndriyathu Klein a gu dzi nogisa a tshamuseya sigaradzo nya singi a emisanidego naso guvbanyani gwaye. Khu giyeyedzo, uye zamide gu pheya gu tshumayela khu ndranga ni ndranga khu 1922. Ganiolu si di mu garadzeya ngudzu nyo bwe a si vbweti ni gu engedza gambe ndrani nya myaga mivili. Khu hwane nya tepo, na gu thumeya Bheteli, ndriyathu moyo a di mu ninga wusingalagadzi ganiolu uye a di mu zangareya. Nigu a di bwe a tshikeledwa khu madwali nya makhongolo nya mapimo (colapso nervoso), ganiolu khu gu gimbiya nya tepo a di tshukwata. Ambari ulolo, uye giride mithumo nya lisima ngudzu. Ndriyathu Klein yeyedzide gudzinogisa khu gu khumbuga sihosohoswana saye ambari olu a nga ba tidwa ngudzu. Vandriyathu nya vangi va ngu tsakiswa ngudzu khu gu dundruga ndriyathu Klein gumogo ni matimo yaye ma yeyedzago gutumbega gwaye.b

KHU GINANI HI YEDEGO GU HAGULEYA GUDZINOGISA?

8. 1 Pedro 5:6, a gu hi phasa kharini gu wona gu khethu gudzinogisa gu ngu tsakisa Jehovha?

⁸ Gighelo nya lisima ngudzu gi hi girago hi haguleya likhalelo leli khu gu li ngu tsakisa Jehovha. Mupostoli Pedro si vegide guagani isoso. (Leri 1 Pedro 5:6.) Na li gu ganeya khu malito ya Pedro, libhuku ‘Venha Ser Meu Seguidor’, lari khilo: “Gudzikhusedza gu ngu fana ni vheneno. Ugo gu na ni mhango. Ambari muthu a gu ba ari ni makodzelo nyo gire ginani, a gu ba a dzi khusedza kha phasi gilo mahoni ga Nungungulu. Ganiolu, muthu a dzi nogisago ambari a gu ba ari mwalo makodzelo nga vambe, Jehovha a ngu mu ninga ngudzu lisima. Wa gu dzi nogisa, Jehovha a na tsakiswa ngudzu khu gu gu tshatshazeya.”c Ina gyomo gimbe gilo nya lisima ngudzu hi nga girago guvbindra gu tsakisa Jehovha? — Mav. 23:15.

9. Gudzinogisa ga gu gira vambe va vbweta gu khala dzipari dzathu khu ndziya muni?

⁹ Vbavbandze nyo tsakise Jehovha, hi na phasega khu dzindziya nya dzingi ha gu haguleya gudzinogisa. Ha gu dzi nogisa, vathu nya vangi va na vbweta gu khala dzipari dzathu. Khu ginani? Nga dundrugeya khu vathu u tsakago khu gu vbungadza navo. (Mat. 7:12) Gutala nya ethu kha hi tsakiswi khu gu vbungadza ni muthu tepo yatshavbo a vbwetago gu khuye hi gira esi uye a si vbwetago basi a bwe a bomba mawonelo ya vambe. Guhambana ni isoso, si ngu hi tsakisa ngudzu gu vbungadza ni vandriyathu, ‘hi hengela mapimo ni monyo moyo, hi golana khu gyathu khu lihaladzo nya wundruye, hiri vathu nya gurule ni gu dzi nogisa.’ (1 Ped. 3:8) Ha gu hidzimeya ga vathu vovo, anavo va na hidzimeya gwathu, ho nga nga ba hiri vathu nyo dzinogise basi.

10. Gudzinogisa ga gu vbevbugisa womi wathu khu ndziya muni?

¹⁰ Gudzinogisa gambe gu ngu vbevbugisa womi wathu. Khu lisine, adzina hi ngu wona silo guvbanyani gwathu si si wonegigo na si lulamide. Mwama nyo gengeye, Pfhumu Solomoni, a di khuye: “Nyi di wona dzikhumbi dzi gimbila khu dzikavalu, aholu, vafumeli va gimbila khu migondro nga dzikhumbi.” (Muh. 10:7) Dzimbe dzitepo vale va gu ni makodzelo mwendro wusikodzi nyo khaguri kha va ningwi wuzundzo. Ganiolu ava va gu mwalo makodzelo yoyo va nga ningwa ngudzu wuzundzo. Ganiolu, Solomoni a di tugula gu khuye gwadi ngudzu gu hi dzumeya edzi womi wu gu idzo, wulangani nyo khaleye gu garadzega khedzi silo si gimbiyago khidzo guvbanyani gwathu. (Muh. 6:9) Ha gu dzi nogisa, si na hi vbevbugeya gu dzumeya edzi womi wu gu idzo, wulangani nyo zame gu gurumedzeya gu khethu wu na khale khu yimbe ndziya.

SIEMO SI NGA LINGAGO GUDZINOGISA GWATHU

11. Ginani hi yedego gu gira tepo hi phaswago?

¹¹ Tshigu ni tshigu hi na ni mathomo nya mangi nyo yeyedze gudzinogisa. Nga wona siemo nyo khaguri. Tepo hi ningwago wusingalagadzi. Hi yede gu dundruga gu khethu o gara muthu nyo khaguri a dzi ninga tepo gasi gu hi phasa, so yeyedza gu khiso hi hosiside kamo. Tepo hi phaswago, adzina hi nga dzegeya gu goroga hi bomba giphaso. Adzina hi nga solasola oyu a hi phasidego mwendro gu solasola edzi a ganedego khidzo. Ganiolu ha gu ba hi dzi nogisa, hi na zama gu wona silo khu ndziya nya yadi.

12. Khu guya khu Mavingu 27:5, 6, khu ginani hi yedego gu bonga o gara ndriyathu nyo khaguri a hi ninga wusingalagadzi? Ninga giyeyedzo.

¹² Muthu nyo dzi nogise a ngu bonga wusingalagadzi a ningidwego. Gasi gu fananisa: Nga dzi dundrugeya na wuri mitshanganoni nya wuKristo. Hwane nyo bhule ni vandriyathu nya vangi, moyo wawe a gu ndreyisa phuvbo, a gu lembeya ndzeveni khuye, gu tshade sithaphana nyo khaguri magwahani gwago. Nya mba kanakana u di hadzi khala dzitshoni. Ganiolu, ina u di hadzi gu mba bonga khesi ndriyathu a gu giredego? Khu lisine u di hadzi ganeya gu khuwe nari khatshi nyi di dzegede gu embedwa gupheyani! Khu gufana, gu vbwetega hi dzi nogisa gasi gu bonga ndriyathu a tiyidego-hwambo a hi ninga wusingalagadzi khu tepo hi nga ba hi wu vbweta. Ethu ha gu wona ndriyathu yoyo kha nga pari nasiri nala. — Leri Mavingu 27:5, 6; Gal. 4:16.

13. Hi nga yeyedza kharini gudzinogisa tepo vambe va hakhago malungelo hengeledzanoni?

¹³ Tepo vambe va ningwago malungelo. Lidhota limwedo nyo pwani khilo Jason lari khilo: “Tepo nyi wonago vambe na va gu ningwa malungelo, nyi ngu tshuka nyi dzi wudzisa gu kheni gasi khu ginani nyi gu mba hathwa eni!” Ina u di nga tshuka u dzipwa khu ndziya yoyo? Kha sa vivba “gu dogorela” gu gira mithumo nya lisima ngudzu hengeledzanoni. (1 Thim. 3:1) Ambari ulolo, gu vbwetega hi dzi woneya ga esi hi si pimisago. Ha gu mba dzi woneya hi nga diga gudzikhusedza gu tsitsa mikhamba myonyoni gwathu. Khu giyeyedzo, mwama moyo nya muKristo adzina a nga pheya gu pimisa gu khuye khuye enga a ninganedwago khu gu gira gwadi thumo nyo khaguri libandlani. Mwendro mwangadzi nya muKristo adzina a nga pimisa gu khuye, ‘Mwama wangu a di hadzi gira gwadi thumo wule guvbindra ndriyathu wule!’ Ambari ulolo, ha gu ba hi dzi nogisa khu lisine, hi na potsa liphuvbo lolo nyo dzikhusedze.

14. Ginani hi nga gi hevbulago khu ndziya eyi Mosi a dzi pharidego khiyo, tepo vambe va nga hakha malungelo?

¹⁴ Hi nga hevbula khesi Mosi a giridego tepo vambe va nga hakhago malungelo. Mosi a di gu ninga ngudzu lisima thumo waye kha nga muthangeyi wa va Israyeli. Ganiolu tepo Jehovha a nga ninga vambe makodzelo nyo gire thumo wa wumoyo, ginani Mosi a nga gira? Uye khapwa wufu. (Mite. 11:24-29) A di dzi nogisa a dzumeleya vambe va mu phasa gu lamula vathu. (Ekiso. 18:13-24) Vaisrayeli va diri ni vama nya vangi va nga ba vari giemoni nyo thume kha nga valamuli, khu kharato gu diri mwalo gighelo nya gu va simama gu vireya. Mosi a di gu dzi garadzeya gu phasa vambe, gasi anavo va gira mithumo nya yingi. Khu lisine, igyogyo giyeyedzo nya gyadi ngudzu gwathu. Gu vbwetega hi dundruga gu khethu, gasi gu hi thumiswa ngudzu Jehovha, gudzinogisa gu na ni lisima ngudzu guvbindra makodzelo yathu. “Ambari olu PFHUMU Nungungulu a gu romo vbatshani ngudzu, Uye a ngu yingisa avo va dzi [nogisago].” — Ndzi. 138:6.

15. Siemo muni nya siphya nya vangi va tshanganidego naso?

¹⁵ Tepo hi emisanago ni siemo nya siphya. Matshigwanaya, vandriyathu nya vangi va thumedego Jehovha khu myaga nya yingi va ngu ningwa mithumo nya yiphya. Khu giyeyedzo, khu 2014, hengeledzano yi ganede gu khiyo kha gu ngo vbwetega gambe vawoneleyi nya distritu, khu kharato vandriyathu va nga ba va gira thumo wowo va di ningwa yimbe mithumo. Khu mwaga wowo gambe, hengeledzano yi di khiyo ndriyathu a gu vbohisa 70 myaga, kha ninganedwi khu gu thuma gambe kha nga muwoneleyi nya gipandre. Nigu vandriyathu va gu na ni 80 myaga ni guvbindra kha va ninganedwi khu gu thuma kha nga vatshanganisi nya huwo nya madhota. Gimbe gambe khu gu myaga yi vbindridego, nya vangi Bheteli va di rumedwa guya thumeya thembweni. Vambe va emide thumo nya tepo yatshavbo nyo hathege khu kotani nya mawugelo yawe, sigaradzo ndrangani mwendro simbe sigaradzo.

16. Vandriyathu va yeyedzide kharini gudzinogisa tepo va dzi pwananisidego ni siemo sawe nya siphya?

¹⁶ Guvbindrugedza gogo kha ga va vbevbugeya vandriyathu. Va di gu yi gola ngudzu mithumo va giridego khu myaga nya yingi yi vbindridego. Vambe va pwide wuvi nya wukhongolo tepo va nga ba va zama gu dzi pwananisa ni siemo nya siphya khu kotani nya olu va nga ba va dundruga mithumo va nga ba va yi haladza ngudzu gale yoyo. Khu gu gimbiya nya tepo, va si kodzide gu gola gambe mithumo yawe nya yiphya. Khu ginani? Khu kotani nya lihaladzo lawe khu Jehovha. Va di gu dziti gu khavo va di dzi hendzeledzide ga Nungungulu nasiri ga thumo, mwendro malungelo. (Kol. 3:23) Ga wevbini thumo avo va di gu tsakiswa khu gu simama gu thumeya Jehovha khu gu dzinogisa. Avo va di ‘vega avbo gwaye sigaradzo sawe satshavbo’ na va gu tumba gu khavo uye a na va khathaleya. — 1 Ped. 5:6, 7.

17. Khu ginani hi bongago kholu Lito la Nungungulu li hi kutsago gu haguleya gudzinogisa?

¹⁷ Ina kha hi bongi kholu Lito la Nungungulu li hi kutsago gu haguleya gudzinogisa? Tepo hi haguleyago likhalelo leli, ha gu phasega ethu gumogo ni vambe. Hi na si kodza gambe gu emisana ni sigaradzo guvbanyani gwathu. Nigu nya lisima ga satshavbo hi na hidzimeya ga Papayi wathu wa ndzadzini. Si ngu tsakisa ngudzu guti gu khethu, ambari olu a “Khugegidego,” uye a ngu haladza ni gu ninga lisima sithumi saye nyo dzinogise! — Isa. 57:15.