Lisine maningano ni wumindru
U di nga dundrugeya khedzi guvbanya gu na khalago khidzo mindru wa tshigu? Bhibhiliya yi ngu ganeya khu silo nya lisima si na giregago nya mba hweya, si na khuhago guvbanya nya vathu vatshavbo omu mafuni.
Jesu tshamusede edzi hi nga kodzago gu dziti khidzo gu khethu “Mufumo wa Nungungulu wu vbohide.” (Luka 21:31) A di ganeya gu khuye gu na manega dzinyimbi, sirevareva nya sikhongolo, dzindzala ni madwali — a gu iso si giregago kamo muhuno. — Luka 21:10-17.
Bhibhiliya yi ganede gambe gu khiyo hi nga tugula gu khethu hi womo omu nya “matshigu nya guhegise” nya mifumo nya vathu, khu gu hi wona mavbanyelo nyo vivbe nya vathu. Bhibhiliya ya gu si tshamuseya gwadi omu ga 2 Thimoti 3:1-5. Wa gu wona makhalelo ni mithumo yeyi nya vathu muhuno, wo dzegeya gu khodwa kamo gu khuwe giprofeto gegi nya Bhibhiliya gi ngu tadzisega kamo khu tsheta ni tsheta.
Sa gu thula ginani isoso? So thula gu khiso tepo nya gu Mufumo wa Nungungulu wu vbindrugedza silo nya sikhongolo mafuni ni gu bwe wu tshukwadzisa womi nya vathu, yomo vbafuvbi. (Luka 21:36) Omu nya Bhibhiliya, Nungungulu a ngu tumbisa silo nya singi nya sadi a na girago mafuni ni ga vathu va na vbanyago umo. Wona siyeyedzo nyo khaguri.
MUFUMO NYA WADI
“Va di mu ninga [Jesu] gufuma, wudhumo ni mufumo, gasi mayigo ni vathu nya malimi yatshavbo va mu thumela. Wufumu waye khwa gu kala gupindruga, wu mwalo mahegiso, mufumo waye gima mwalo a na gu wu dzegago.” — DHANIYELI 7:14.
Sa gu thula ginani isoso: Khu kotani nya Mufumo wa Nungungulu wu na fumago mafuni gwatshvbo Pfhumu yakone a gu Gyanana gyaye, u na dzi buza khu gu vbanya nya gwadi.
WOMI NYA WADI
‘Mwalo ni moyo muvbanyi a na gukhuye: “Eni nyi ngu dwala”’ — ISAYA 33:24.
Sa gu thula ginani isoso: Gima khu na nga dwala gambe mwendro gu khala gilima; u na vbanya kala gupindruga.
GURULA MAFUNI GWATSHAVBO
“Uye a ngu vbedza mayunga kala mahegiso nya litigo.” — NDZIMO 46:9.
Sa gu thula ginani isoso: Gu na ba guri mwalo gambe dzinyimbi, nigu vathu kha va na nga tshaniseka gambe khu kotani nya sigaradzo si vangwago khu dzinyimbi.
MAFU MA NA TALA KHU VATHU NYA VADI
“Kha gu na wonega gambe muthu nya guvivbe . . . Va nya gurula va na fumela litigo.” — NDZIMO 37:10, 11.
Sa gu thula ginani isoso: Gu na ba guri mwalo gambe vathu nya mba vadi, gu na ba guri ni vathu nya vadi va engisago Nungungulu basi.
MAFU YATSHAVBO MA NA BA MARI PARADHESI
“Avo va na vbaha dzinyumba, va vbanya umo; va na yala [dzimbewu], gambe va na hodza mihandro yakone.” — ISAYA 65:21, 22.
Sa gu thula ginani isoso: Mafuni gwatshavbo gu na ba guri wulanga nyo mburi. Nungungulu a na hlamula gilombo hi girago avba nya nombelo wa Pfhumu, hi lombago gu khethu gudzina gwaye gu na girege “mafuni.” — Matewu 6:10.