Ndziya nya gu dugeleye kha nga mutshumayeli — Ema gu gimbidziseya gihevbulo nya Bhibhiliya muthu a si yeyedzigo gutshunguhedza

KHU GINANI SI GU SA LISIMA: Gasi gu muthu a vbuluga, guvbwetega a ranwa khu lina la Jehovha. (Ro 10:13, 14) Ambari ulolo, khandri vatshavbo va tsakeyago gu hevbula Bhibhiliya va dzi emiseyago gu vbanya khu milayo ya Jehovha. Ha gu thumisa gwadi tepo yathu gutshumayelani khu gu phasa ava khu lisine va dzi emisedego gu vbindrugedza gilogyo gasi gu tsakisa Jehovha. Hwane nya tepo nyo khaguri, gihevbuli nya Bhibhiliya gya gu mba tshunguhedza, wugengeyi gu ema gu hevbula nagyo gasi hi feya gu thumisa gwadi tepo yathu guvbwetedzeyani nya ava va ndrindrwago khu Jehovha ni hengeledzago yaye. (Joh 6:44) Ganiolu khu gu gimbiya nya tepo muthu yoyo a gu vbindrugedza silo nyo khaguri, a bwe a yeyedza gu khuye ‘dziemisede gu hakha guvbanya nya gupindruge,’ hi na pheledza gu hevbula naye Bhibhiliya. — Mith 13:48.

MAGIRELO YAKONE:

• Zundza gihevbuli khu gudziemiseya gwagyo nyo vbwete guti lisine. — 1Tm 2:4

• Tshingisa lisima nya gu vbanye khesi a si hevbudego. — Lu 6:46-49

• Khu gurula, ganeya khu gipimaniso gya Jesu nya muyali, u bwe u mu wudzisa gu khuwe ginani gi mu tandregisago gu tshunguhedza. — Mt 13:18-23

• Khu ndziya nya yadi mu tshamuseye gu khuwe khu ginani u vbwetago gu ema gu hevbula naye

• Mu embeye gu khuwe khu gu gimbiya nya tepo u na ya mu wuseya gasi gu mu tiyisa, nigu a gu tshunguhedza u na pheledza gu hevbula naye

HWANE NYO WONE VHIDHIYU, HLAMULA SIWUDZISO SESI:

• Avba nya mabhulo yaya, ginani gi yeyedzidego gu khigyo gihevbuli kha gi tshunguhedzi?

• Muhuweleyi phaside kharini gihevbuli gu wona lisima nyo vbindrugedze silo nyo khaguri?

• Muhuweleyi tude kharini malimba nyo pheledze gambe gihevbulo mindru ga tshigu?