Lidima nya guhathege li na girwago khu Novembro, nya gu huweleye Mufumo wa Nungungulu

Jesu a di khuye “Mahungu nya Yadi nya Mufumo wa Nungungulu.” (Lu 4:43) Uye hevbudzide vathu gu gombeleya Mufumu wa Nungungulu. (Mt 6:9, 10) Ndrani nya ngima nya Novembro, hi na gira ni gevbini hi gi kodzago gasi gu huweleya Mufumo wa Nungungulu. (Mt 24:14) Gira gwadi longoloko wago gasi u manega khu gitalo avba nya lidima leli nyo hathege. Vatshavbo va thumago kha nga vapiyonero nyo phasedzeye va nga hatha gu ningeya 30 mwendro 50 dziora avba nya ngima wowu.

Sa gu kodzega yeyedza vatshavbo vathu va gipandreni gwago lowo wu ganeyago khu Mufumo wa Nungungulu. Tepo u hathago lowo, dundrugeya khu tumbunugo nya matimu nya wukhongeyi ga vaengiseyi vago. Va gu yeyedza gutsakeya ga mabhulo nyo pheye, ningeya Mukhedziseyi nya vathu vatshavbo nya N.° 2 nya 2020. Khu gu landreya, haguleya gutsakeya gogo a gu yeyedzago, sa gu kodzega pheya gihevbulo nya Bhibhiliya khu gu thumisa limwedo nya mabhuku ma gu romo omu nya Dziferameta hi hevbudzago khidzo. Nugunugu Mufumu wa Nungungulu wu na fuvisa yatshavbo mifumu yi wu wugeyago. (Dhan 2:44; 1Ko 15:24, 25) Khu kharato, hi na wuyedwa ngudzu khu gigiro gegi nyo hathege gi yeyedzago gutumbega gwathu ga Jehovha ni Mufumu waye!