Ina u womo ga ndziya yi yisago gubhabhatiswatunu?
MAVBANYELO NYA WUKRISTO
Hatha gu thumeya Jehovha
U mukristo nya muphya mwendro u gihevbuli nya Bhibhiliya u gu ni makungu nyo vbwete gu bhabhatiswa? Khu ginani u vbwetago gu bhabhatiswa? Gu dzi hendzeledza ni gu bhabhatiswa so kodzega khu gu ba na wuri ni wupari nyo hathege ni Jehovha. (Ndz 91:1) Ni gu isoso si na gira gu u ta vbuluga. (1Pe 3:21) Ginani u nga girago gasi gu vboheya lizambo lolo?
U yede gu khodwa gu khuwe eli lisine. Wa gu tshuka u tedwa khu siwudziso mapimoni gwago gira wugevisisi. (Ro 12:2) Tugula silo nyo khaguri u nga vbindrugedzago, wa gu gira isoso u na wona gu khuwe egi u yedego gu gira gu tsakisa Jehovha. (Mav 27:11; Ef 4:23, 24) Tepo yatshavbo gombeya gwaye gasi a gu phasa. Wa gu gira isoso Jehovha a na gu ninga tshivba ni gu gu phasedzeya khu liphuvbo laye nyo age. (1Pe 5:10, 11) Gu dzigaradza u gu giridego khwa lisima ngudzu. Gu thumeya Jehovha khiyo ndziya nya lisima ngudzu womini! — Ndz 16:11.
YEYEDZA VHIDHIYU YI GU KHIYO NDZIYA YI YISAGO GUBHABHATISWATUNU, KHU HWANE U GIRA SIWUDZISO SESI:
Sigaradzo muni esi muthu a nga si palago gasi a bhabhatiswa?
U nga manega kharini ni gukhodwa gu vbwetegago gasi gu dzi hendzeledza ga Jehovha?
Ginani gi kutsidego vambe gu vboheya lizambo leli nyo vbwete gu bhabhatiswa?
Makategwa muni ma manwago khava va hathago gu thumeya Jehovha?
So thula ginani gudzihendzeledza ni gu gubhabhatiswa?