Mawonelo ma nga girago gu mitshangano nya thumo nyo tshumayele yi phasa

Mitshangano nya thumo nyo tshumayele ni mitshangano nya libandla giningwa gitago khiyo ga Jehovha. Iyo yi ngu hi phasa gu kutsa vambe gu yeyedza lihaladzo ni gu gira mithumo nya yadi. (Heb 10:24, 25) Tshangano nya thumo n yo tshumayele wu yede gu girwa khu 5 mwendro 7 dzimeneti. Ndrani nya tepo yeyi, muthangeyi nya thumo nyo tshumayele, a yede gu yeyedza edzi wu nga girwago khidzo thumo, a kabanisa mitsawa, a yi leleteya omu yi na thumeyago umo a bwe a gira nombelo. (Tshangano nya thumo nyo tshumayele wo girwa hwane nya mitshangano nya libandla, wu yede gu girwa khu dzimeneti nya dzidugwana.) Muthangeyi nya thumo nyo tshumayele a yede gu dongiseya silo si na phasago vahuweleyi. Khu giyeyedzo, khu Sabhadho muthangeyi nya thumo nyo tshumayele, a nga ninga mawonelo nya esi va nga ganeyago kha nga olu vambe vahuweleyi va si si kodzigu gu duga thumoni nyo tshumayele tshigu ni tshigu vbakari nya semana. Ginani gambe va nga bhulago khigyo avba nya tshangano wowu?

• Mabhulo nya Bhibhiliya ma gomogo omu nya Gibhukwana nya mitshangano nya thumo ni mavbanyelo yathu nya wuKristo

• Edzi va nga thumisago khidzo mahungo mwendro silo si giregago omu hi vbanyago umo gasi gu pheya mabhulo

• Edzi hi nga hlamulago khidzo muthu a gu hi piya mabhulo

• Esi u nga ganeyago wa gu mana muthu a gu mba khodwa ga Nungungulu, a khodwago ga evholusawu, a ganeyago limbe lidimi mwendro a girago gipandre nya tshetshe yi gu mba tidwa ngudzu gipandreni gwago

• Edzi va nga thumisago khidzo dziferameta dzi gomogo omu nya sayiti jw.org, aplikativhu JW Library^® mwendro dzi gomogo omu nya Bhibhiliya

• Edzi u nga thumisago khidzo mweyo nya dziferameta nyo hevbudze khidzo

• Edzi hi nga pategago khidzo avba nya thumo nyo tshumayele khu gu thumisa telefone, gu lova malangaliya, wufakazi wa guagane, maendro nyo bweleleye mwendro gu gimbidzisa sihevbulo nya Bhibhiliya

• Sidundrugiso maningano ni gu dzi vhikeya, gu dzi pwananisa ni giemo, edzi va nga manegago khidzo ni mavbanyelo nya yadi thumoni nyo tshumayele mwendro simbe

• Gihevbulo mwendro vhidhiyu nya broxura tshukwadzisa malerelo ni ma hevbudzelo yago

• Edzi u nga tiyisago ni gu phasa khidzo pari yago nya thumo nyo tshumayele

• Lowo nya Bhibhiliya wu gimbileyanago ni thumo nyo tshumayele mwendro litshango nyo khaguri nyo tsakise