Vandriyathu nya vanyamayi va nga gira kharini gasi gu engedzeya thumo wawe ga Jehovha?

Vandriyathu nya vanyamayi va ngu gira gipandre nya lisima ngudzu thumoni nyo tshumayele. (Ndzi. 68:11) Avo va ngu gimbidzisa sihevbulo nya singi nya Bhibhiliya nigu gipandre nya gikhongolo nya vapiyonero nya tepo yatshavbo gyo wumbwa khu vandriyathu nya vanyamayi. Wulangani nya isoso basi dzimiliyoni nya vandriyathu nya vanyamayi va ngu thuma khu monyo wawe watshavbo omu nya Dzibheteli, va thuma kha nga va misiyonariyu, va phasedzeya mwendro gu thuma omu nya gu vbahe ni gu vbindrugedzeya. Vandriyathu nya vanyamayi va vidzidwego khu liphuvboni va ngu tiyisa dzindranga dzawe ni libandla. (Ndzi. 14:1) Ambari olu vandriyathu nya vanyamayi va gu mba thuma kha nga madhota mwendro vaphasedzeyi nya libandla ambari ulolo avo va nga dzivegeya misuwo nya liphuvbo. Abari gu uwe u ndriyathu nya nyamayi khu dzevbini dzimbe dzindziya nya gu u engedzeya thumo wago ga Jehovha?

• Zama gu haguleya makhalelo nya yadi nya Wukristo. — 1 Thim 3:11; 1Pe 3:3-6

• Phasa vambe vandriyathu nya vanyamayi va vbwetago giphaso — Tit 2:3-5

• Zama gu tshukwadzisa mahevbudzelo yago thumoni nyo tshumayele u bwe u engedzeya tepo u vbedzago na wu gu tshumayela

• Hevbula limbe lidimi

• Dziningedzeye gu thuma omu gu vbwetegago giphaso

• Prenxeri petusawu gasi gu thuma Bheteli mwendro gu phasedzeya omu nya thumo nyo vbahe

• Prenxeri petusawu gasi gu hevbula xikola nya vavhangeli nya Mufumo

YEYEDZA VHIDHIYU VANYAMAYI VA THUMAGO KHU GU DZIGARADZA KHU GU LANDREYA GIRA GIWUDZISO GEGI:

• Matshango ya vandriyathu vava nya vanyamayi ma gu kutside kharini?