Lidima nyo hathege gasi gu pheya sihevbulo nya Bhibhiliya khu Setembro

Khu Setembro, hi na thuma ngudzu gasi gupheya sihevbulo nya Bhibhiliya khu gu thumisa broxura Vbanya kala gupindruga! Vahuweleyi va nga hatha gu thuma kha nga vapiyonero nyo phasedzeye va ningeya 30 dziora. Hi nga gira kharini gasi gu patega avba nya lidima leli nyo hathege?

• Avba nya Mabhulo nyo pheye: yeyedza kapa ya hwane nya broxura gasi gu ndrindra gupima ga muni ndranga, u bwe u yeyedza edzi gi girwago khidzo gihevbulo nya Bhibhiliya. Dundruga vale va nga yeyedza gu tsakeya avbo nya mabhulo nyo pheye ni avba nya maendro nyo bweleleye. Ambari vo ba va tshukide va bomba gu hevbula, si nga gira olu na va tsakiswa khu mahevbudzelo yathu nya maphya ni broxura, kha hi yeli gu tshiya dzibroxura omu nya dzindranga mwendro gu pata ni malangaliya gasi gu ningeya ava va nga mba yeyedza gutsakeya avba nya mabhulo nyo pheye. Kometi nya thumo nya libandla, yi na gira malulamiselo nya tshangano nya thumo ndrani nya ngima wowu.

• Mambe mathomo: Abari gu libandla lago li ngu thumisa sikarinyana gasi gu yeyedza broxura Vbanya kala gupindruga! embeya ava va yeyedzidego gutsakeya gu khuwe broxura yeyi yo gira gipandre nya gihevbulo nya Bhibhiliya nya mahala. Dzegeya gu gira giyeyedzo nya edzi gi girwago khidzo gihevbulo nya Bhibhiliya mwendro gu gira malulamiselo gasi u ta gira isoso limbe litshigu. Muwoneleyi nya thumo, a na gira malulamiselo nya gu vahuweleyi va vidzidwego va hongola omu gu rengisedwago silo va ya pheya sihevbulo nya Bhibhiliya. Gimbe gambe, adzina u nga pheya gihevbulo nya Bhibhiliya ni githumi gikwawe mwendro ni muthu u na mananago naye omu nya thumo nyo tshumayele khu githugedza.

Jesu hi rumide gu “gira vapizani” ni gu “va hevbudza.” (Mt 28:19, 20) Lidima leli nyo hathege, li na hi phasa gu tadzisa makungu yaya khu gu thumisa broxura Vbanya kala gupindruga!