Ginani Libhuku la Gutuledwa li ganeyago khu wumindru wathu?

1. Khu gevbini gilo nya lisima vathu vatshavbo va yedego gu hunga?

MUHUNO vathu va yede gu hunga gilo nya lisima. Va yede gu hunga gu khavo va na seketeya Jehovha Nungungulu kha nga Mufumeli nya mafu yatshavbo mwendro va na seketeya nala waye, Sathane Dhiyabhulosi. Hatshavbo hi yede gu hatha moyo nasiri gu gandra eno ni eno. Esi va na hungago gu gira si na hunga gu khiso va na vbanya kala gupindruga mwendro ne. (Mat. 25:31-33, 46) Ndrani nya ‘tshanisa nya yikhongolo’ va na hakha gifungo gi na yeyedzago gu khigyo va na vbulugiswa mwendro va na fuviswa. — Gutu. 7:14; 14:9-11; Ezek. 9:4, 6.

2. a) Vahebheru 10:35-39 a gu hi kutsa gu gira ginani? b) Libhuku la Gutuledwa li nga hi phasa kharini?

² Leri Vahebheru 10:35-39. Wa gu ba u hathide gu seketeya Mufumo wa Jehovha, u hathide gilo nya gyadi. Olu, uwe wa gu vbweta gu phasa vambe gu hatha gilo nya gyadi. U nga thumisa mahungu ma gomogo umo nya libhuku la Gutuledwa gasi gu va phasa. Libhuku leli, la gu ganeya khesi si na dugeleyago vale va wugeyago Jehovha, ganiolu ilo gambe li ngu ganeya khu makategwa ma na manwago khu vale va seketeyago Mufumo waye khu gu tumbega. Hi yede gu hevbula lisima nya lisine leli. Gu gira isoso, si na hi phasa gu simama gu thumeya Jehovha. Nigu hi nga thumisa esi hi si hevbudego gasi gu phasa vambe gu simama gu thumeya navo Jehovha.

3. Ginani hi na bhulago khigyo avba nya ndrima yeyi?

³ Ga ndrima yeyi, hi na bhula khu siwudziso sesi: Ginani gi na dugeleyago vale va seketeyago Mufumo wa Nungungulu? Ginani gi na dugeleyago vale va hathago gu seketeya girengo nyo fuviye, gi khumbugwago umo nya libhuku la Gutuledwa?

ESI SI NA GIREGEYAGO VALE VA TUMBEGAGO GA JEHOVHA

4. Tsawa muni Johane a wu wonidego na wu romo ndzadzini ni Jesu?

⁴ Umo nya giwoniso, mupostoli Johane a gu wona mitsawa mivili yi seketeyago Mufumo wa Nungungulu nigu na yi gu hakha makategwa nya womi nya gupindruge. Tsawa nyo pheye, wa gu wumbwa khu 144 000. (Gutu. 7:4) Avo va gu duswa khu mafuni gasi guya wumba Mufumo ni Jesu ndzadzini. Avo va na fuma gumogo mafu. (Gutu. 5:9, 10; 14:3, 4) Umo nya giwoniso gyogyo, Johane a gu wona Jesu ndzadzini na emide gigomoni gya Siyoni.— Gutu. 14:1.

5. Ginani gi na giregago nugunugu ni vale va tshadego va wumbago tsawa nya 144 000?

⁵ Gukhugeya dziteponi dza vapostoli kala olu, dzimiliyoni nya vathu va ngu hathwa gasi gu gira gipandre nya ava nya 144 000. (Luka 12:32; Rom. 8:17) Ambari ulolo, Johane ganede gu khuye ava va tshadego mwendro tengo nya wudugwana, wu di hadzi gu vbanya mafuni ndrani nya matshigu nyo hegise. Ava ‘va tshadego’ va na hakha “gifungo” nyo hegise gasi va tsakedwa khu Jehovha na yi si pheyi tshanisa nya yikhongolo. (Gutu. 7:2, 3; 12:17) Khu kharato, ndrani nya tshanisa nya yikhongolo, ava va tshadego va na dzegwa va hongola ndzadzini va ya patana ni ava va wumbago tsawa nya 144 000 va ngafa na va tumbegide. Eyi, avo va na ya fuma gumogo ni Jesu avba nya Mufumo wa Nungungulu. — Mat. 24:31; Gutu. 5:9, 10.

6-7. a) Khu wevbini tsawa Johane a wonidego khu gu landreya, nigu ginani hi gi hevbulago khuwo? b) Khu ginani ava va tshadego ni ‘gidzemo nya gikhongolo’ va yedego gu vega gupima avbo nya gipimo 7 nya libhuku la Gutuledwa?

⁶ Hwane nya gu ba a wonide tsawa wu hongolago ndzadzini, Johane wonide ‘gidzemo nya gikhongolo.’ Gu hambana ni ava nya 144 000, tsawa wowu wu mwalo tengo. (Gutu. 7:9, 10) Ginani hi gi hevbulago khuwo? Johane ganede gu khuye: “Ava khu vale va tago khu musigaradzoni nya sikhongolo, vale va nga handzago dzingandzu dzawe va dzi agisela novbani nya Nvutana.” (Gutu. 7:14) Hwane nyo ba va vbulugisidwe ndrani nya tshanisa nya yikhongolo, ‘gidzemo gegi nya gikhongolo’ gi na vbanya omu mafuni gi bwe gi hakha makategwa nya mangi nyo tsakise. — Ndzi. 37:9-11, 27-29; Mav. 2:21, 22; Gutu. 7:16, 17.

⁷ Gani hi hathidwe gasi gu vbanya mafuni mwendro ndzadzini, ina hi yede gukhodwa gu khethu hi ngu patega avba nya siprofeto si khumbugwago umo nya libhuku la Gutuledwa gipimo 7? Ina hi yede. Khu lisine, gu na bari tepo nyo tsakise ngudzu ga mitsawa yeyi ya mivili nya sithumi sa Nungungulu. Hi na tsaka ngudzu khu gu ba hi hathide gu seketeya Mufumo wa Jehovha. Ginani gimbe egi libhuku la Gutuledwa li hi embeyago khu tshanisa nya yikhongolo? — Mat. 24:21.

ESI SI NA GIREGEYAGO VALE VA WUGEYAGO NUNGUNGULU

8. Tshanisa nya yikhongolo yi na pheya kharini, nigu vathu nya vangi va na gira ginani?

⁸ Avba nya ndrima yi vbindridego, hi hevbude gu khethu ava va wumbago politika ga mafu yaya, nugunugu va na wugeya Bhabhiloni nya Khongolo, a gu wukhozeyi nya malipha wa Mafuni gwatshavbo. (Gutu. 17:16, 17) Gigiro gegi gi na pheya khu tshanisa nya yikhongolo. Khu kotani nya isoso, ina vathu nya vangi va na pheya gu thumeya Jehovha? Ahihi. Vbavbandzi nya isoso, libhuku la Gutuledwa gipimo 6 la gu yeyedza gu khilo ga tepo yoyo vathu va gu mba thumeya Jehovha va na vbweta gu vhikedwa khu varengisi ni mifumo nya mafu yaya yi fananiswago ni sigomo. Khu kotani nya olu vathu vovo va si seketeyigo Mufumo wa Nungungulu, Jehovha a na va wona na vari vawugeyi. — Luka 11:23; Gutu. 6:15-17.

9. Ndrani nya tshanisa nya yikhongolo gu hambana muni gu na wonegago ga vathu va Nungungulu ni vambe, nigu khu wevbini handro wakone?

⁹ Khu lisine, sithumi nyo tumbege sa Jehovha si na wonwa na si hambanide ndrani nya tshanisa nya yikhongolo. Iso songa si na ba si wumba tsawa nya vathu va thumeyago Jehovha Nungungulu mafuni nasiri gu seketeya ‘girengo nya likhabi.’ (Gutu. 13:14-17) Khu kotani nya olu va simamago gu tumbega ga Jehovha, vale va wugeyago Jehovha va na goroga ngudzu. Kha nga handro wakone, mayigo ma na wugeya vatshavbo vathu va Nungungulu omu mafuni. Bhibhiliya yo rana gigiro gyogyo kha nga gu wugeya nya Goge wa Magoge. — Ezek. 38:14-16.

10. Kha nga si khumbugwago omu ga Gutuledwa 19:19-21, ginani egi Jehovha a na girago khu gu wugedwa nya vathu vaye?

¹⁰ Ginani egi Jehovha a na girago khu gu wugedwa gogo? Uye wari khuye: “Nyi na mu gorogela ngudzu.” (Ezek. 38:18, 21-23) Gutuledwa gipimo 19 a gu ganeya khesi si na dugeleyago khu gu landreya. Jehovha a na rumeya Gyanana gyaye gasi gu vhikeya vathu vaye ni gu pala valala vawe. Jesu a na patana ni “mabutho ya ndzadzini” a gu dzingilozi nyo tumbege gumogo ni vale nya 144 000 gasi gu dwana ni Goge wa Magoge. (Gutu. 17:14; 19:11-15) Ginani gi na dugeleyago avbo nya nyimbi yoyo? Vathu ni mitsawa va wugeyago Jehovha, vatshavbo va na fuviswa khu gu vbeleya. — Leri Gutuledwa 19:19-21.

MUTSHADHO WU NA GIREGAGO HWANE NYA NYIMBI

11. Gigiro muni nya lisima gi gomogo omu ga libhuku la Gutuledwa?

¹¹ Nga dundrugeya edzi ava va tumbegidego omu mafuni va na dzipwago khidzo khu gu ba va vbulugide avbo nya gu fuviswe nya valala va Nungungulu! Gu na bari tepo nyo tsakise ngudzu! Ambari olu gu na manegago gutsaka nya gu khongolo ndzadzini tepo Bhabhiloni nya khongolo a na fuviswago, gu na ni gimbe gilo gi na hi ningago litsako nya likhongolo. (Gutu. 19:1-3) Gigiro gegi nya lisima, gyomo omu nya libhuko la Gutuledwa a gu “mutshadho wa Nvutana.” — Gutu. 19:6-9.

12. Kha nga li yeyedzago libhuku la Gutuledwa 21:1, 2, lini wu na giregago mutshadho wa Nvutana?

¹² Lini wu na giregago mutshadho wowo? Vatshavbo nya 144 000 va na ba va romo ndzadzini na gu keneleya vbadugwana gasi gu yi pheya nyimbi ya Harmagedhoni. Ambari ulolo, iyoyo yi na ba siri tepo nya mutshadho wa Nvutana. (Leri Gutuledwa 21:1, 2.) Mutshadho wa Nvutana wu na girega hwane nyo ba yi giregide nyimbi ya Harmagedhoni ni gu na va fuvisidwe valala va Nungungulu. — Ndzi. 45:3, 4, 13-17.

13. Ginani gi na giregago avbo nya mutshadho wa Nvutana?

¹³ Ginani gi na giregago avbo nya mutshadho wa Nvutana? Kha nga olu mutshadho wu patago mwama ni nyamayi, mutshadho wowu nyo fananise wu na pata Pfhumu Jesu Kristo ni “noivha” yaye a gu ava nya 144 000. Gigiro gegi nya lisima gi na emisa Mufumu nya wuphya wu na fumago mafuni khu 1000 myaga. — Gutu. 20:6.

LIDHOROPA NYA LIPHYA NI WUMINDRU WATHU

14-15. Gutuledwa gipimo 21 a gu fananisa avo nya 144 000 ni ginani? (Wona fotu nya kapa.)

¹⁴ Khu gu landreya, Gutuledwa gipimo 21 a gu fananisa ava nya 144 000 ni lidhoropa nyo mbure ngudzu li ranwago pwani “Jerusalema guphya.” (Gutu. 21:2, 9) Lidhoropa lolo, li diri ni 12 siwindri nya siseketelo si nga ba si lovidwe “malina nya 12 vapostoli va Nvutana.” Khu ginani isoso si drindridego gupima ga Johane? Kholu uye a di wona lina laye na li lovidwe avba nya gimwegyo nya siwindri soso. Isoso si diri lithomo nya likhongolo! — Gutu. 21:10-14; Efes. 2:20.

¹⁵ Lidhoropa leli nyo fanekiseye li hambanide ni mambe. Ilo li diri ni ndziya nya ndralama nya gukhedzige, 12 malimba nya siwindri nya gukhedzige, siseketelo nya libhiyo si nga ba si londridwe khu mafumbu yatshavbo nya siwindri nigu li di pimidwe gwadi. (Gutu. 21:15-21) Ganiolu, Johane tugude gu khuye gyomo gilo gi nga ba gi keneleya. Johane ganede esi: “Kha nya wona Nyumba ya Nungungulu. Kholu uye Pfhumu Nungungulu nya Tshivba Yatshavbo, gumogo ni Nvutana, khuye abune Nyumba ya Nungungulu. Lidhoropa lakone khali vbweti lidambo, ambari ngima gu wenengedza, kholu la gu wenengedzwa khu wudhumo wa Nungungulu, wenengedzo waye khu Nvutana.” (Gutu. 21:22, 23) Vale va girago gipandre gya Jerusalema nya guphya va na bari ni Jehovha. (Hebh. 7:27; Gutu. 22:3, 4) Khu kharato, Jehovha ni Jesu khavo tempele nya lidhoropa leli.

16. Ginani gi na dugeleyago vathu va na vbanyago ndrani nya Mufumo wa Nungungulu nya 1000 myaga?

¹⁶ Si na tsakisa ngudzu ava va todzidwego va gu dundrugeya khu lidhoropa lolo. Ganiolu, ambari ava va gu na ni gutumba nya gu vbanye mafuni anavo va na ni sighelo nya gu dundrugeye khu lidhoropa lolo. Ndrani nya Mufumo wa Nungungulu nya 1000 myaga, Jerusalema nya guphya wu na resa makategwa nya mangi. Johane a gu fananisa makategwa yoyo ni “tsongo nya mati nya womi.” Khu dzibambe nya tsongo wowo gu diri ni ‘misimbo nya womi’ yi nga ba yi velega mahagane nya “rendre nya guhawulugise vathu vatshavbo.” (Gutu. 22:1, 2) Vatshavbo vathu va na vbanyago khu tepo yoyo, va na wuyedwa khu silo sesi nya sadi. Vbadugwanavbadugwana, vatshavbo vathu va engisago Jehovha a na va gira va vbeleya. Kha nga handro wakone, kha gu na nga manega gambe madwali, kha hi na nga lila ni gupwa wuvi. — Gutu. 21:3-5.

17. Kha nga li yeyedzago libhuku la Gutuledwa 20:11-13, khu vamani va na wuyedwago ndrani nya Mufumo nya 1000 myaga?

¹⁷ Khu vamani va na wuyedwago khu malulamiselo yaya nyo hlamadzise? Avo nyo pheye va na wuyedwago, khu gidzemo nya gikhongolo gi na vbulugago avba nya Harmagedhoni ni gevbini gyanana adzina gi na velegwago mafuni nya maphya. Ganiolu, Gutuledwa gipimo 20 a gu tumbisa gambe gu khuye ava va fudego va na wuswa. (Leri Gutuledwa 20:11-13.) Ava va tumbegidego a gu “va nya gu lulama” va fudego gale ni ava “nya mba lulama”, va nga ne gu mana lithomo nya gu hevbule khu Jehovha va na wuswa va vbanya gambe omu mafuni. (Mith. 24:15; Joh. 5:28, 29) Ina isoso so thula gu khiso vatshavbo va na wuswa va vbanya ndrani nya Mufumo nya 1000 myaga? Ahihi. Vale va bombidego gu thumeya Jehovha na va si gufi kha va na nga wuswa va vbanya. Kholu avo va diri ni mathomo nya mangi, ganiolu va yeyedzide gu khavo kha va yedwi khu gu vbanya mafuni paradhesini. — Mat. 25:46; 2 Tes. 1:9; Gutu. 17:8; 20:15.

GULINGWA NYO HEGISE

18. Ginani gi na giregago mafuni guvbeyani nya 1000 myaga?

¹⁸ Guvbeyani nya 1000 myaga, vatshavbo va vbanyago mafuni va na vbeleya. Mwalo gambe muthu a na kuhwago khu gighoho hi ningidwego khu Adhamu. (Rom. 5:12) Gighoho gya Adhamu gi na ba gi dusidwe khu gu vbeleya. Khu kharato, iso si thulago gu khiso vale va na vbanyago mafuni “va na wuswa” nari vathu va vbeledego guvbeyani nya 1000 myaga. — Gutu. 20:5.

19. Khu ginani gu vbwetegago gulingwa nyo hegise?

¹⁹ Ethu hi ngu dziti gu khethu Jesu simamide gutumbega ga Nungungulu ambari tepo a nga lingwa khu Sathane. Ganiolu, ina vathu vatshavbo va na simama na va tumbegide ga Jehovha tepo va na lingwago khu sathane? Moyo ni moyo a na yeyedza gu khuye tumbegide ga Jehovha tepo khiyo Sathane a na tuledwago khu phalani nya guete guvbeyani nya 1000 myaga. (Gutu. 20:7) Vale va na tumbegago ndrani nya gu lingwe nya guhegise va na mana womi nya gupindruge nigu va na tshulega khu lisine. (Rom. 8:21) Vale va wugeyago va na fuviswa khu gu vbeleya gumogo ni Dhiyabhulosi ni madhemoni yaye. — Gutu. 20:8-10.

20. Wa gu dzipwa kharini khu siprofeto nyo hlamadzise si gomogo omu ga libhuku la Gutuledwa?

²⁰ Wa gu dzipwa kharini hwane nya gu ba hi bhude khu mahungu ma gomogo umo nya libhuku la Gutuledwa? Ina kha si gu tsakisi gu dzi dundrugeya na wu gu vbanya ndrani nya gu tadzisege nya siprofeto sesi nyo hlamadzise? Ina isoso kha si gu kutsi gu rana vambe gasi va ta dzi pata ni ethu avba nya wukhozeyi nya guage wa Nungungulu wathu? (Gutu. 22:17) Olu hi bhudego khu silo sesi si na tadzisegago mindru wa tshigu, hi tsakide nigu kha nga mupostoli Johane ha gu vbweta gu ganeya gu khethu “Amen. Delu Pfhumu Jesu!” — Gutu. 22:20.