NDRIMA NYA GIHEVBULO 26
NDZIMO 123 Seketeya hengeledzano ya Jehovha khu gutumbega
Khu gu dzi nogisa, dzumeya esi u gu mba siti
“Mwalo uye a kodzago gu hidzimela ga Uye a gu na ni Tshivba Yatshavbo.” — JOBA 37:23.
MAKUNGO NYA GIHEVBULO GEGI
Ambari olu hi gu mba siti satshavbo si na giregago, ethu hi nga timiseya sigaradzo tepo hi dundrugeyago khesi hi sitigo ni gu tumba Jehovha.
1. Khu yavbini makodzelo Jehovha a hi ningidego, nigu khu ginani?
JEHOVHA a hi vangide ni makodzelo nya gu pimisi, nya gu hevbule silo nya siphya ni guti edzi hi nga thumisago khidzo esi hi si hevbudego. Khu ginani a nga hi gira khu ndziya yeyi? Kholu a gu vbweta gu khuye hi ‘mana guti ga Nungungulu’ ni gu mu thumeya khu gu thumisa makodzelo yathu nya gu pimisi. — Mav. 2:1-5; Rom. 12:1.
2. a) Ginani hi yedego gu gi pwisisa maningano khethu vamune? (Joba 37:23, 24) (Wona fotu.) b) Khu ginani si gu na ni lisima gu pwisisa gu khethu kha hi siti satshavbo?
2 Ambari olu Jehovha a nga hi vanga ni makodzelo nya gu hevbule silo nya singi, khandri satshavbo hi sitigo. (Leri Joba 37:23, 24.) Dundrugeya khu giyeyedzo gya Joba. Jehovha a di mu gira siwudziso nya singi gasi gu mu phasa gu pwisisa gu khuye gu diri ni silo nya singi a nga ba a si siti. Mabhulo yaya ma mu phaside gu dzi nogisa ni gu vbindrugedza mapimiselo yaye. (Joba 42:3-6) Anethu hi ngu wuyedwa ngudzu tepo hi dzi nogisago ni gu dzumeya gu khethu kha hi siti satshavbo. Tepo hi dundrugago gu khethu khandri satshavbo hi sitigo, isoso si ngu hi phasa gu dzi nogisa ni gu tumba tepo yatshavbo gu khethu Jehovha a na hi ninga esi hi si vbwetago gasi gu hunga makungo nya yadi. — Mav. 2:6.
Gu dzumeya gu khethu khandri satshavbo hi sitigo si nga hi phasa, gu fana ni Joba (Wona paragrafu 2)
3. Ginani hi na bhulago khigyo avba nya ndrima yeyi?
3 Avba nya ndrima yeyi, hi na bhula khu silo nyo khaguri hi gu mba siti ni sigaradzo hi tshanganago naso khu kotani nya isoso. Hi na hevbula gambe gu khethu khu ginani si gu sadi gu mbati silo nyo khaguri. Esi hi na si hevbulago si na hi phasa gu tumba gu khethu Jehovha, ‘oyu a vbeledego khu guti,’ a ngu hi embeya esi hi yedego gu siti. — Job 37:16.
KHA HI DZITI GU KHETHU LINI MA NA VBOHAGO MAHEGISO
4. Guya khu Matewu 24:36, ginani hi gu mba giti?
4 Leri Matewu 24:36. Ethu kha hi dziti gu khethu lini ma na vbohago mahegiso nya mafu yaya nyo vivbe. Ambari Jesu tepo a nga ba a romo mafuni, kha nga ba a liti “litshigu lolo ni ora.”a Khu gu landreya, uye a di embeya vapostoli vaye gu khuye Jehovha khuye a gu na ni fanelo nya gu hungi gu khuye lini si na giregago silo nyo khaguri. (Mith. 1:6, 7) Jehovha vegide tepo nya mahegiso nya mafu yaya nyo vivbe, ganiolu ethu hi mwalo makodzelo nya guti litshigu si na giregago isoso.
5. Khu kotani nya olu hi gu mba liti litshigu ma na vbohago mahegiso, isoso si nga hi kuha kharini?
5 Guya khesi Jesu a nga ganeya, kha hi dziti gu khethu tepo muni hi na vireyago kala mahegiso ma vboha. Khu kotani nya isoso, hi nga diga gulaphisa-monyo hi bwe hi vbeya tshivba, ngudzu-ngudzu abari gu hi na ni tepo nyo laphe na hi gu vireya litshigu la Jehovha. Nigu hi nga vbeya tshivba a gu tshuka nongo wathu mwendro mumbe muthu a hi hega kholu mahegiso ma gu mba vboha. (2 Ped. 3:3, 4) Adzina hi nga pimisa gu khethu nari khatshi hi ngu liti litshigu nyo kongome nya mahegiso nya mafu yaya, hi di hadzi gu si kodza gulaphisa-monyo ni gu timiseya tepo vambe va hi hegago.
6. Khu ginani si gu sadi gu mba liti litshigu ma na vbohago mahegiso?
6 Khu gu ba Jehovha a si hi embeyi litshigu ma na vbohago mahegiso, uye a gu hi ninga lithomo nya gu yeyedze gu khethu ha gu mu thumeya kholu hi mu haladzago ni gu mu tumba. Ethu ha gu vbweta gu thumeya Jehovha kala gupindruga nasiri basi kala ma vboha mahegiso. Wulangani nyo vege basi gupima ga tepo li na vbohago “litshigu la Jehovha,” hi yede gu vega gupima ga esi nya sadi si na giregago. Ha gu gira isoso, hi na simama gu hidzimeya ga Jehovha, gu mu tumba ni gu gira satshavbo hi si kodzago gasi gu mu tsakisa. — 2 Ped. 3:11, 12.
7. Ginani hi gitigo?
7 Si na ni lisima gu dundrugeya khesi hi sitigo. Ethu hi ngu dziti gu khethu matshigu nyo hegise ma di pheya khu 1914. Omu nya Bhibhiliya, Jehovha a hi ningide siprofeto si yeyedzago gu khiso khu 1914 gu di hadzi gu pheya matshigu nyo hegise. Nigu uye gambe a hi ningide mahemanyana nya esi si nga hadzi gu girega hwane nya mwaga wowu. Kha nga handro wakone, ethu hi ngu tiyisega gu khethu ‘li ngu vboha litshigu nya likhongolo la Jehovha.’ (Sof. 1:14) Ethu hi ngu wuti gambe thumo Jehovha a vbwetago gu khuye hi gira, a gu gu tshumayela ‘mahungu nya yadi nya Mufumo’ ga vathu vatshavbo. (Mat. 24:14) Mahungu yaya, ma gu tshumayedwa ga 240 mayigo nigu guvbindra 1000 malimi. Kha si lombegi kala hi liti “litshigu lolo ni ora” gasi gu tshumayela khu sighingi.
KHA HI DZITI EDZI JEHOVHA A NA GIRAGO KHIDZO SILO
8. So thula ginani ‘mithumo ya Nungungulu yi ngu mba yiti’? (Muhevbudzi 11:5)
8 Khandri ‘mithumo yatshavbo ya Nungungulu hi yitigo.’ (Leri Muhevbudzi 11:5.) Malito yaya ma gu thula satshavbo esi Nungungulu a girago ni esi a si dzumeleyago gu khuye si girega gasi gu tadzisa gugola gwaye. Khandri tepo yatshavbo hi na gitigo gighelo gi nga gira Jehovha a dzumeleya silo nyo khaguri si girega mwendro esi a na girago gasi gu hi phasa. (Ndzi. 37:5) Bhibhiliya yi ngu fananisa gu mba yiti ‘mithumo yatshavbo ya Nungungulu’ ni edzi hi ngu mba dziti edzi gyanana gi wumbwago khidzo ndrani ga mamayi wagyo. Ambari vasiyentista kha va dziti khu gu vbeleya edzi gyanana gi dandrago khidzo ndrani ga mamayi wagyo. Khu ndziya nyo fane, kha hi dziti khu gu vbeleya edzi Jehovha a na girago khidzo silo.
9. Hi nga dzipwa kharini khu kotani nya olu hi gu mba dziti edzi Jehovha a na girago khidzo silo?
9 Khu gu ba hi si dziti edzi Jehovha a na girago khidzo silo, adzina hi nga kanakana gu gira silo nyo khaguri. Ethu adzina hi nga kanakana gu dzi hiya silo nyo khaguri gasi gu andrisa thumo wathu nyo tshumayele, khu gu vbevbugisa womi wathu mwendro gu hongola hiya phasedzeya omu gu vbwetegago ngudzu giphaso. Nigu adzina hi nga pimisa gu khethu Jehovha kha hi tsakeyi ha gu mba si kodza gu vboheya misuwo yathu, gu mba wona mihandro nya thumo hi wu girago thumoni nyo tshumayele mwendro ha gu ba hi tshangana ni sigaradzo tepo hi pategago avba nya projetu nyo khaguri nya hengeledzano.
10. Makhalelo muni nya lisima hi na ma haguleyago khu gu mba dziti khu gu vbeleya esi Jehovha a na girago?
10 Kha nga olu hi gu mba dziti khu gu vbeleya edzi Jehovha a na girago khidzo silo, isoso si na hi phasa gu haguleya makhalelo nya lisima ngudzu, nya nga gudzinogisa ni guninganiseya. Isoso si na hi phasa gambe gu dziti gu khethu Jehovha a ngu siti esi si gu sadi gwathu. (Isa. 55:8, 9) Iso gambe si ngu hi hevbudza gutumba khu gu vbeleya gu khethu Jehovha a na hi khathaleya ga satshavbo. Tepo hi manago mihandro nya yadi thumoni nyo tshumayele mwendro avba nya projetu nyo khaguri nya hengeledzano hi ngu ninga watshavbo wuzundzu Jehovha. (Ndzi. 127:1; 1 Kor. 3:7) Nigu gya gu tshuka gilo nyo khaguri gi si dugi edzi hi nga ba yi gi vbweta khidzo, hi yede gu dundruga gu khethu Jehovha a ngu wona satshavbo. (Isa. 26:12) Hi yede gu gira gipandre gyathu hi bwe hi tumba gu khethu Jehovha a na hi phasa tepo yatshavbo. Ethu hi ngu tumba gu khethu a na hi ninga sileletelo hi si vbwetago, ambari a gu mba gira isoso khu ndziya nya gilewugiso kha nga edzi a nga gira khidzo gale. — Mith. 16:6-10.
11. Silo muni nya lisima hi sitigo?
11 Ethu hi ngu dziti gu khethu Jehovha tepo yatshavbo a na ni lihaladzo, lulamide nigu a na ni guti. Hi ngu dziti gu khethu uye a ngu ninga ngudzu lisima esi hi gireyago uye ni vandriyathu. Nigu hi ngu dziti gu khethu Jehovha tepo yatshavbo a na tshatshazeya vale va tumbegago gwaye. — Hebh. 11:6.
ETHU KHA HI SITI ESI SI NA GIREGAGO MINDRU WA TSHIGU
12. Ginani hi gi hevbulago omu ga Jakobe 4:13, 14?
12 Leri Jakobe 4:13, 14. Khandri ha gu dzi kalaveya tepo hi ganeyago gu khethu kha hi siti esi si na giregago mindru watshigu. Mafuni momu, hi nga dugeledwa khu silo nya singi hi nga mba si vireya mwendro hi gu mba si kodza gu si woneleya. (Muh. 9:11) Kha nga handro wakone, kha hi dziti gu khethu hi na si kodza gu tadzisa makungo yathu mwendro gu khethu hi na vbanya gasi gu ma tadzisa.
13. Gu mba siti esi si na giregago mindru wa tshigu si nga hi kuha kharini?
13 Adzina saye si na hi garadzeya gu timiseya khu kotani nya olu hi gumba siti gwadi esi si na giregago mindru wa tshigu. Khu ginani? Adzina saye hi na garadzega ngudzu khu kotani nya esi si na giregago nyo bwe hi luza litsako lathu. Womi wathu wu nga vbindrugedza mwendro hi nga dugeledwa khu silo nya mba sadi nya mba si vireya, nigu isoso si nga hi vbisa ngudzu ni gu hi gira hi garadzega. Nigu silo sa gu mba duga gwadi khedzi hi nga ba hi si vireya khidzo, hi nga khunguvanyega ni gu vbeya tshivba. — Mav. 13:12.
14. Ginani hi yedego gu gira gasi hi tsaka khu lisine? (Wona dzifotu.)
14 Ambari ha gu tshangana ni gevbini gigaradzo womini gwathu, hi nga yeyedza gu khethu ha gu thumeya Jehovha kholu hi mu haladzago. Bhibhiliya ya gu yeyedza gu khiyo kha hi yeli gu vireya gu khethu Jehovha a hi vhikeya ga satshavbo sigaradzo ni gu uye kha hungi esi si na hi giregeyago womini gwathu. Uye a ngu dziti gu khuye hi nga tsaka ambari ha gu mba siti satshavbo si na hi giregeyago mindru wa tshigu. Nigu hi nga tsaka gambe khu gu landra sileletelo saye womini gwathu ni gu mu engisa. (Jer. 10:23) Tepo hi mu lombago sileletelo ha gu ba hi vbweta gu hunga makungo, so gira gu khatshi ho ganeya gu khethu: “Jehovha o dzina hi na vbanya, hi gira egi ni gile.” — Jak. 4:15.
Gu vbwetedzeya sileletelo sa Jehovha ni gu si landrisa si ngu hi ninga wuthavelo nya lisine (Wona dziparagrafu 14-15)b
15. Ginani hi gitigo maningano khu wumindru?
15 Ethu kha hi siti esi si na giregago litshigu ni litshigu gu gyago, ganiolu hi ngu dziti gu khethu Jehovha a hi tumbiside womi nya mba vbeya — ndzadzini mwendro mafuni. Ethu hi ngu dziti gu khethu uye kha liphi nigu gimwalo gi na mu himbedzeyago gu tadzisa situmbiso saye. (Tit. 1:2) Uye khuye basi a ‘tivisago esi si giregidego gukhugela guhegulani, gukhugela dzinango dzi vbindridego nidzo dzi nga gutago.’ Satshavbo a profetidego gu khuye si di hadzi gu girega dziteponi nya Bhibhiliya si tadzisegide, nigu satshavbo a profetidego maningano khu wumindru aniso si na tadzisega. (Isa. 46:10) Ethu hi ngu dziti gu khethu gimwalo gi na himbedzeyago Jehovha gu hi haladza. (Rom. 8:35-39) Uye a gu hi ninga guti, a hi thaveleya ni gu hi ninga tshivba hi yi vbwetago gasi gu timiseya satshavbo sigaradzo. Hi nga tiyisega gu khethu Jehovha a na hi phasa ni gu hi kategisa. — Jer. 17:7, 8.
KHA HI SI KODZI GU PWISISA KHU GU VBELEYA EDZI JEHOVHA A HITIGO KHIDZO
16. Ginani egi Jehovha a gitigo maningano khethu, nigu isoso so hi gira hi dzipwa kharini? (Ndzimo 139:1-6)
16 Leri Ndzimo 139:1-6. Muvangi wathu a ngu siti satshavbo maningano khethu. Uye a ngu siti esi hi si pimisago ni edzi hi dzipwago khidzo, a ngu siti gambe esi hi ganeyago ni esi si gomogo monyoni gwathu. Nigu uye a ngu siti satshavbo hi girago ni esi si hi kutsago gu gira isoso. Pfhumu Dhavhidhe ganede gu khuye Jehovha dongide tepo yatshavbo gasi gu hi phasa. Wa gu dzipwa kharini khu gu dziti gu khuwe Nungungulu nya Tshivba Yatshavbo, a nga vanga silo satshavbo a ngu khathala ngudzu khuwe? Dhavhidhe a di khuye: “NdziIa u nyitigo khiyo yi ngu nyi samadzisa ngudzu, yi khusegide, kha nyi kodzi gu yi pima.” — Ndzi. 139:6.
17. Khu ginani adzina si nga hi garadzeyago gu khodwa gu khethu Jehovha a ngu hiti gwadi?
17 Khu kotani nya avba hi nga dandriswa avbo, mavbanyelo yathu mwendro esi hi nga ba hi si khodwa, si nga hi garadzega gu wona Jehovha nga Papayi nya lihaladzo a khathalago khethu. Mwendro hi nga dzipwa gu khethu khu kotani nya sihoso hi giridego gale, Jehovha kha na nga vbweta gu khala gambe pari yathu mwendro gu pimisa gu khethu womo hwindzo ni ethu. Ambari Dhavhidhe anuye dzipwide khu ndziya nyo fane. (Ndzi. 38:18, 21) Muthu nyo khaguri a zamago gu vbindrugedza silo nyo khaguri womini gwaye mwendro gu vbanya khu ndziya yi tsakisago Nungungulu, a nga dzi wudzisa gu khuye: ‘Abari gu Nungungulu a ngu nyiti gwadi, khu ginani a vbwetago gu khuye nyi diga womi nyi nga wu oloveya?’
18. Ha gu wuyedwa kharini khu gu dzumeya gu khethu Jehovha a ngu hiti gwadi guvbindra ethu habune? (Wona fotu.)
18 Hi yede gu hevbuleya gu dzumeya gu khethu Jehovha a ngu siti esi si gu sadi gwathu, ni gu uye a nga wona silo nya sadi gwathu hi gu mba si kodza gu si wona. Ambari olu a wonago sihoso sathu, uye a ngu wona gudzigaradza hi gu girago gasi gu gira silo nya sadi, nigu a ngu hi haladza. (Rom. 7:15) Tepo hi tiyisegago gu khethu Jehovha a ngu wona makodzelo yathu, isoso si ngu hi ninga tshivba nya gu mu thumeye khu gu tsaka.
Jehovha a ngu hi phasa gu tiyisa gutumba gwathu avba nya wumindru nyo tsakise hi na manegago nawo. Nigu isoso si ngu hi phasa gu timiseya sigaradzo si hi dugeleyago nya mba si vireya (Wona dziparagrafu 18-19)c
19. Ginani hi gitigo maningano khu Jehovha?
19 Hi ngu dziti gu khethu Jehovha, lihaladzo. Gimwalo gi hi girago hi kanakana isoso. (1 Joh. 4:8) Hi ngu dziti gu khethu uye o hi embeya gu gira gilo nyo khaguri mwendro gu mba gira kholu a hi haladzago ni olu a vbwetago gu khuye hi manega ni womi nyo tsakise. Hi ngu dziti gu khethu Jehovha o vbweta gu khuye hi mana womi nya gupindruge. Uye a hi ningide dzegiso gasi isoso si kodzega. Kha nga olu Jesu a nga hi feya, hi nga tiyisega gu khethu ambari ha gu gira sihoso, ha gu dzi laya, hi nga thumeya Jehovha khu ndziya yi mu tsakisago. (Rom. 7:24, 25) Nigu hi ngu dziti gu khethu “Nungungulu khongolo gu vbindra myonyo yathu nigu a nguti satshavbo.” (1 Joh. 3:19, 20) Jehovha a ngu siti satshavbo si gomogo monyoni gwathu, nigu a ngu tumba gu khuye hi nga dugeleya ha gu gira gugola gwaye.
20. Ginani gi na hi phasago gu mba garadzega ngudzu khu silo hi ngu mba siti?
20 Jehovha a ngu hi embeya satshavbo hi yedego gu siti. Khu kharato, kha hi yeli gu luza ligovbe khu kotani nya esi hi ngu mba siti. Vbavbandzi nya isoso, hi yede gu vega gupima ga esi si gu na ni lisima ngudzu. Ha gu gira isoso, hi nga yeyedza gu khethu hi ngu tumba Jehovha khu gu vbeleya, “uye a vbeledego ni mune nya lisine.” (Joba 36:4) Ambari olu si gu na ni silo nyo khaguri hi gu mba si pwisisa, hi ngu tumba gu khethu Jehovha a na simama gu hi hevbudza silo nya siphya kala gupindruga. Nigu hi si lambede ngudzu isoso, kholu gima kha hi na nga ema gu hevbula silo nya siphya khu Nungungulu wathu nya lihaladzo Jehovha. — Muh. 3:11.
NDZIMO 104 Liphuvbo nya guage, giningwa gya Nungungulu
a Jesu a na thangeya nyimbi a na dwanago ni Sathane ni litigo laye nyo vivbe, khu kharato hi nga ganeya gu khethu olu Jesu a ngu liti litshigu yi na pheyago Arimagedhoni ni tepo a na ‘palago valala vaye.’ — Gutu. 6:2; 19:11-16.
b TSHAMUSELO NYA FOTU: Papayi ni gyanana gyaye va dongiseyago pasta gasi va khala na va dongide gya gu tshuka gi dugeleya gigaradzo nya mba gi vireya.
c TSHAMUSELO NYA FOTU: Ndriyathu a emisanago ni sigaradzo womini gwaye a dundrugeyago khu womi nyo tsakise a na manegago nawo mafuni nya maphya.