U nga digi gu gombeleya vambe

1. Ho dziti kharini gu khethu milombelo yathu yi na ni lisima ga Jehovha?

NOMBELO giningwa nya lisima ngudzu. Dundrugeya khesi: Jehovha ningide dzingilozi thumo nyo khaguri. (Ndzi. 91:11) Nigu uye gambe ningide thumo nya lisima ngudzu Gyanana gyaye. (Mat. 28:18) Ambari ulolo, ina Jehovha hathide mumbe muthu gasi a engiseya milombelo yathu? Ahihi! Owu i thumo owu Jehovha a dzi ningidego. Jehovha, ‘mu engiseyi nya milombelo,’ nigu uye a ngu hi engiseya gwadi. — Ndzi. 65:2.

2. Khu ginani mupostoli Pawulo a gu giyeyedzo nya gyadi nyo gombeleye vambe?

² Ambari olu hi nga gombeyago ga Jehovha hi mu embeya sigaradzo sathu na hi tshulegide, hi yede gu gombeleya vambe navo. Khiso mupostoli Pawulo a giridego. Khu giyeyedzo, a di gombeleya libandla la Vaefeso a bwe a va embeya gu khuye: “Nyi ngu simama gu mi khumbuga milombeloni yangu.” (Efes. 1:16) Pawulo a di gu gombeleya vambe khu moyo ni moyo. Khu giyeyedzo, a di embeya Thimoti gu khuye: “Nyi ngu bonga Nungungulu, . . . gima kha nyi divali gu gu khumbuga milombeloni gwangu wutshigu ni mihani.” (2 Thim. 1:3) Pawulo a diri ni sigaradzo saye gasi gu gombeya khiso. (2 Kor. 11:23; 12:7, 8) Ambari ulolo, uye a di gu dzi ninga tepo gasi a gombeleya vambe.

3. Khu ginani hi nga divalago gu gombeleya vambe?

³ Dzimbe dzitepo, hi nga divala gu gombeleya vambe. Khu ginani hi ganeyago isoso? Ndriyathu moyo nyo pwani khu Sabrinaa, a ganede gighelo gyakone. Uye a di khuye: “Womi nya litigo leli wo hi gira hi khala na hi pharegide basi. Hi nga vega basi gupima avba nya sigaradzo sathu hi bwe hi gombeya khiso basi.” Ina isoso si ngu gu giregeya dzimbe dzitepo? Abari gu i ina, ndrima yeyi yi na gu phasa ngudzu. Iyo yi na 1) tshamuseya khu ginani si gu na ni lisima gu gombeleya vambe ni gu 2) ninga mawonelo nya edzi u nga girago khidzo isoso.

KHU GINANI HI YEDEGO GU GOMBELEYA VAMBE?

4-5. Gu gombeleya vambe si nga ninga ‘ngudzu tshivba’ khu ndziya muni? (Jakobe 5:16)

⁴ Gu gombeleya vambe si ngu ninga ‘ngudzu tshivba.’ (Leri Jakobe 5:16.) Ina hi nga si kodza gu vbindrugedza siemo sa vambe tepo hi va gombeleyago? Ina, si ngu kodzega. Jesu na dziti gu khuye mupostoli Pedro a na mu danga guraru, a di mu embeya gu khuye: “Nyi ngu gombeya khuwe gasi gukhodwa gwago gu si vbeyi.” (Luka 22:32) Pawulo a di gu dziti anuye gu khuye nombelo wu nga vbindrugedza siemo sa vambe. Tepo a nga khothedwa na sa ghoha gilo Roma, a di loveya Filemoni gu khuye: “Nyi na ni gutumba nyo kheni khu kotani nya milombelo yanu nyi na tshudwa nyi wuya gambe gwanu.” (File. 22) Nigu khiso kamo si nga girega, hwane nya tepo nyo khaguri Pawulo a di tshudwa khu pasoni aya pheledza thumo waye nyo tshumayele.

⁵ Ganiolu, isoso kha si thuli gu khiso tepo hi gombeyago hi ngu gurumedza Jehovha gu gira gilogyo. Uye a ngu wona sigaradzo sithumi saye si emisanago naso, nigu dzimbe dzitepo o hatha gu gira gilogyo guya khu silombo sawe. Guti isoso si nga hi phasa gu gombeya ga Jehovha khu monyo wathu watshavbo hi mu embeya giemo gyathu, hi bwe hi diga satshavbo mandzani gwaye na hi gu mu tumba. — Ndzi. 37:5; 2 Kor. 1:11.

6. Gu gombeleya vambe si nga kuha kharini esi hi sipwago khavo? (1 Pedro 3:8)

⁶ Gu gombeleya vambe si ngu hi phasa gu haguleya ‘pweya-wusiwana.’ (Leri 1 Pedro 3:8.) Muthu a gu na ni pweya-wusiwana a ngu wona gutshaniseka ga vambe ni gu a ngu dzina gu gira gilogyo gasi a va phasa. (Marko 1:40, 41) Lidhota nyo khaguri nyo pwani khu Michael li di khilo: “Tepo nyi gombeyago khesi vambe vathu va si vbwetago, nyi ngu pwisisa sigaradzo va emisanago naso nigu isoso si ngu nyi gira nyi engedzeya gu va haladza. Nyi ngu dzipwa vbafuvbi gwaye ambari na va si siti isoso.” Nigu limbe lidhota nyo pwani khu Richard li ganede khu wumbe wuyelo a wu manago. Li di khilo: “Tepo hi gombeleyago muthu nyo khaguri isoso si ngu hi kutsa gu vbweta gu mu phasa.” Ilo lo engedza gambe gu khilo: “Tepo hi phasago khu ndziya nyo kongome muthu nyo khaguri hi mu gombeleyago, so fana ni gu ba na hi gu hlamula milombelo hi mu gireyago.”

7. Gu gombeleya vambe si nga hi phasa kharini gu manega ni mawonelo nya yadi khu sigaradzo hi emisanago naso? (Vafilipi 2:3, 4) (Wona dzifotu.)

⁷ Gu gombeleya vambe si ngu hi phasa gu manega ni mawonelo nya yadi khu sigaradzo hi emisanago naso. (Leri Vafilipi 2:3, 4.) Kha nga olu hi vbanyago ga litigo leli la Sathane, hatshavbo hi ngu emisana ni sigaradzo. (1 Joh. 5:19; Gutu. 12:12) Ha gu manega ni giolovedzo nyo gombeleye vambe, isoso si nga hi dundrugisa gu khiso “vandriyathu va mafuni gwatshavbo anavo va ngu emisana ni sigaradzo sasimweso.” (1 Ped. 5:9) Piyonera moyo nyo pwani khu Katherine a di khuye: “Gu gombeleya vambe si ngu nyi phasa gu dundruga gu kheni vambe vandriyathu va ngu emisana ni sigaradzo. Nigu isoso si ngu nyi phasa gu mba vega ngudzu gupima avba nya sigaradzo ni emisanago naso.”

AVO VA NGU PHASEGA KHU MILOMBELO YATHU

8. Ninga siyeyedzo nya vathu hi nga va patago omu nya milombelo yathu.

⁸ Khu mani hi nga mu patago omu nya milombelo yathu? Hi nga gombeleya vandriyathu nyo hambane-hambane, nya nga vale va dwalago, vaphya va pharwago khu ndziya nya mba yadi mwendro va gurumedzwago khu sihevbuli-khwathu xikwatuno gu gira silo nyo vivbe mwendro vale va tshanisekago kholu va dandridego khu tanga. Vandriyathu nya vangi va ngu wugedwa khu valongo mwendro mifumo nya litigo leli. (Mat. 10:18, 36; Mith. 12:5) Vambe vandriyathu si lombide va diga dzindranga dzawe khu kotani nya sigaradzo nya politika. Vambe va ngu emisana ni dzimhango nya tumbunugo. Adzina saye kha hi tivani ni vandriyathu vava. Ganiolu tepo hi va gombeleyago, hi ngu yeyedza gu khethu hi ngu landrisa gileletelo gya Jesu nya gu hi “haladzana.” — Joh. 13:34.

9. Khu ginani hi nga gombeleyago vale va hi thangeyago hengeledzanoni ya Jehovha gumogo ni vagadzi vawe?

⁹ Hi nga gombeleya gambe vale va hi thangeyago hengeledzanoni ya Jehovha. Isoso so pata vandriyathu va Huwo nya Guthangeye ni vaphasedzeyi vawe, sivbango nya kometi nya litamo, vawoneleyi nya dzieskritoryu dza Bheteli, vawoneleyi nya sirkwitu, madhota ya libandlani ni vaphasedzeyi nya libandla. Gu tala nya vandriyathu vava va ngu emisana ni sigaradzo sawe, ganiolu va ngu thuma khu gu dzi garadza gasi gu hi phasa. (2 Kor. 12:15) Khu giyeyedzo, muwoneleyi moyo nya sirkwitu nyo pwani khu Mark a di khuye: “Gigaradzo gyangu nya gikhongolo gu khala hwindzo ga vavelegi vangu va dandridego khu tanga. Vavavili va na ni gigaradzo nya madwali. Ambari olu ndriyangu nya nyamayi ni mwama waye vava khataleyago, si ngu nyi vbisa ngudzu gu mba si kodza gu va phasa khu vbafuvbi.” Adzina saye kha hi siti satshavbo sigaradzo esi vandriyathu va hi thangeyago va emisanago naso, ganiolu hi yede gu dundruga gu va gombeleya. (1 Tes. 5:12, 13) Hi nga gombeleya gambe vagadzi va vandriyathu vava, kholu khu kotani nya giphaso gyawe avo va ngu si kodza gu simama gu gira mithumo yawe.

10-11. Ina milombelo hi girago yi patago vandriyathu vatshavbo va emisanago ni sigaradzo yi ngu tsakisa Jehovha? Tshamuseya.

¹⁰ Kha nga hi nga si wona, gutala nya dzitepo hi ngu gombeleya vandriyathu nyo hambane-hambane. Ganiolu, ha gu mba dundruga muthu nyo khaguri khu gu kongoma, hi nga lomba Jehovha gasi a phasa vale va nga khothedwa mwendro vale va nga fedwa khu sigodwa sawe. Lidhota nyo pwani khu Donald li di khilo: “Hi na ni vandriyathu nya vangi va emisanago ni sigaradzo, nigu dzimbe dzitepo hi ngu gira nombelo hi lomba Jehovha gasi a phasa vandriyathu vava.”

¹¹ Ina milombelo yeyi hi ngu tsakisa Jehovha? Kha sifi gu si wudzisa! Kholu ethu kha hi siti gu khethu sigaradzo muni vandriyathu vatshavbo va emisanago naso. Khu kharato, hi nga gira nombelo hi lomba gasi vandriyathu vatshavbo va emisanago ni sigaradzo va phaswa. (Joh. 17:20; Efes. 6:18) Milombelo yeyi yo yeyedza gu khiyo hi ngu “haladza vandruye vatshavbo.” — 1 Ped. 2:17.

TEPO U GOMBELEYAGO VATHU NYO KHAGURI KHU GU KONGOMA

12. Gu khedziseya gwadi, si nga hi phasa kharini gu gira milombelo nyo kongome?

¹² Khedziseya gwadi. Vbavbandze nyo gombeyele vandriyathu nyo hambane-hambane, gwadi gu khumbuga gambe malina yawe omu nya milombelo yathu. Ina womo ndriyathu nyo khaguri libandlani gwago a emisanago ni madwali nya makhongolo? Ina womo muphya nyo khaguri a garadzegago, adzina saye khu kotani nya sigaradzo a emisanago naso xikwatuno? Ina mamayi nyo khaguri a gu mwalo pari nya wugadzi a ngu dzi garadzeya gu “dandrisa ni gu hevbudza [sanana saye] guya khesi Jehovha a ganeyago”? (Efes. 6:4) Wa gu khedziseya gwadi vandriyathu, u na si kodza gu engedzeya gu va haladza ni gu va yeyedza wuwadi, nigu isoso si na gu kutsa gu va gombeleya.b — Rom. 12:15.

13. Hi nga si kodza kharini gu gombeleya vale hi gu mba tivana navo khovbe ni khovbe?

¹³ Gombeleya vambe khu gu thumisa malina yawe. Hi nga gira gambe isoso ni vale hi gu mba vati. Khu giyeyedzo, nga dundrugeya khu vandriyathu va nga khothedwa ga mayigo nya nga Crimeia, Eritreia, Rússia ni Cingapura. Omu nya jw.org, si ngu kodzega gu mana malina ya vale va nga khothedwa.c Muwoneleyi moyo nya sirkwitu a di khuye: “Nyi di tugula gu kheni gu lova lina la ndriyathu nyo khaguri a nga khothedwa, khavbovbo nyi li ganeya khu lito nyo khugege si ngu nyi phasa gu li dundrugeya nyi bwe nyi li pata omu nya milombelo yangu.”

14-15. Hi nga gira kharini milombelo nyo kongome?

¹⁴ Gira milombelo nyo kongome. Ndriyathu Michael, a nga khumbugwa gupheyani o hi ninga mawonelo yaya: “Tepo u lerigo mahungu omu nya jw.org, ma ganeyago khu vandriyathu va nga khothedwa, zama gu dundrugeya edzi u nga hadzi gu dzipwa khidzo nari khatshi u womo ga giemo gyawe. Nari khatshi kheni, nyi di hadzi gu garadzega khu mwangadzi wangu ni gu vbweta gu tiyisega gu kheni a na ni satshavbo a si vbwetago. Khu kharato, isoso si ngu nyi gira nyi pata omu nya milombelo yangu vandriyathu va tshadhidego va gomogo pasoni.” — Hebh. 13:3.

¹⁵ Tepo hi zamago gu dundrugeya gambe edzi womi wa vandriyathu va gomogo pasoni wu gu idzo tshigu ni tshigu, hi nga mana simbe silo nyo kongome nyo gombeye khiso. Khu giyeyedzo, hi nga gombeya gasi dzighadhi nya lipaso dzi phara vandriyathu khu ndziya nya yadi, hi bwe hi gombeya gu khethu vale va gomogo ga sikhalo nyo thangeye va dzumeleya vandriyathu va gira wukhozeyi wawe na va tshulegide. (1 Thim. 2:1, 2) Hi nga gombeya gambe gasi mabandla ma gomogo ga sipandre vandriyathu va nga khothedwa ma tiyiswa khu giyeyedzo nyo tumbege gya vandriyathu vava mwendro hi gombeya gu khethu simbe sibotshwa si wona mavbanyelo nya yadi ya vandriyathu si bwe si dzumeya mahungu nya yadi. (1 Ped. 2:12) Lisine gu, hi nga thumisa mawonelo yamamowo tepo hi gombeleyago vambe vandriyathu va emisanago ni sigaradzo nyo hambane. Khu gu khedziseya gwadi, hi gombeleya vambe khu gu thumisa malina yawe ni gu gira milombelo nyo kongome, hi ngu yeyedza gu khethu hi ngu “haladzana ngudzu.” — 1 Tes. 3:12.

MANEGA NI MAWONELO NYA YADI KHU MILOMBELO YAGO

16. Hi nga manega kharini ni mawonelo nya yadi khu milombelo yathu? (Matewu 6:8)

¹⁶ Kha nga hi nga si wona, milombelo yathu yi nga vbindrugedza giemo nya muthu nyo khaguri hi mu gombeleyago. Ganiolu, hi yede gu manega ni mawonelo nya yadi. Hi yede gu dundruga gu khethu, tepo hi gombeyago khandri ho embeya Jehovha silo a gu mba siti, nigu khandri ho mu embeya ndziya nya yadi nya gu lulamise giemo nyo khaguri. Jehovha a ngu siti satshavbo sithumi saye si si vbwetago ambari ethu mwendro iso kamo na si si siti. (Leri Matewu 6:8.) Ganiolu, khu ginani hi gombeleyago vambe? Vbavbandze nya sighelo hi nga si wona avba nya ndrima yeyi, hi ngu gira isoso gasi hi yeyedza gu khethu hi ngu khathala khu vambe. Lihaladzo, li ngu hi kutsa gu gombeleyana khu gyathu. Nigu Jehovha a ngu tsaka khu gu wona sithumi saye na si gu pimedzeya lihaladzo laye.

17-18. Hi nga fananisa milombelo yathu ni giyeyedzo muni?

¹⁷ Ambari sa gu wonegisa gu khatshi milombelo yathu kha ya vboheya mahegiso hi ma vbwetago, iyo yi ngu yeyedza lihaladzo hi gu nalo khu vandriyathu ni gu Jehovha a ngu si wona isoso. Hi nga si fananisa khu ndziya yeyi: Nga dundrugeya ndranga nyo khaguri yi gu na ni sanana sivili nya sidugwana, gimwegyo nya gikhwathana ni gimbe nya gyagadzyana. Egi nya gikhwathana gi lade kamani khu gu dwala. Nigu egi nya gyagadzyana gi embeya papayi wagyo khiyo: “Nyo lomba papayi, gira gilogyo gasi ndriyangu a hawuluga. Uye a ngu dwala ngudzu!” Gasi gu ganeya lisine, papayi wagyo a ngu haladza ngudzu gyanana gyaye nya gikhwathana nigu a ngu gi khathaleya. Ganiolu, uye a ngu tsaka ngudzu khu gu wona gu khuye gyanana gyaye gi ngu khathala ngudzu khu ndriyaye avbo nya gu a lomba papayi waye gasi a mu phasa.

¹⁸ Khiso Jehovha a hi kutsago gu gira, hi khathaleyana khu gyathu hi bwe hi gombeleyana. Tepo hi girago isoso, hi ngu yeyedza gu khethu kha hi khathali khethu basi, ganiolu hi ngu haladza khu lisine vandriyathu vatshavbo, nigu Jehovha a ngu vega gupima ga isoso. (2 Tes. 1:3; Hebh. 6:10) Gu diga isoso, kha nga hi nga si wona, milombelo yathu hi nga vbindrugedza giemo gya muthu nyo khaguri. Khu kharato, hongoleni hi gira satshavbo hi si kodzago gasi hi gombeleya vambe.