Siwudziso si girwago khu valeri

“Mapimo” muni Jehovha a na theyago monyoni ya vanyamayigo nya mba hweya?

Na li gu ganeya khu maphelo nya tshanisa nya yikhongolo, libhuku la Gutuledwa 17:16, 17 lari khilo: “10 Dzikeho u dzi wonidego ni girengo nya likhabi, si na nyenya liphuphulu. Avo va na li wugeya va li tshiya wumbwiri, va hodza nyama yalo va bwe va li vbisa khu guvbeleya niloni. Kholu Nungungulu thede myonyoni gwawe gudogoreya nyo gire gugola gwaye, a gu gupwanana khu gyawe, gasi gu ninga girengo nya likhabi mufumo wawe.” Gale, mabhuku yathu ma di gu ganeya gu khayo “mapimo” aya Jehovha a na theyago myonyoni ya vanyamayigo gu fuvisa wukhongeyi nya malipha.

Khu ndziya yoyo, gu ngu vbwetega mapwisiselo nya maphya. Mapimo Jehovha a na theyago myonyoni ya vanyamayigo khu gu avo va ningeya “girengo nya likhabi mufumo wawe.” Gasi gu pwisisa edzi isoso si na tadzisegago khidzo wona siwudziso si landreyago.

Khu va mani va girago gipandre nya giprofeto gegi? “Liphuphulu” li tidwago gambe kha nga “Bhabhiloni nya Khongolo”, ilo la gu emeya watshavbo wukhongeyi nya malipha. “Girengo nya likhabi nyo fuviye”, gya gu emeya hengeledzano nya gurule yi nga pheya gu thuma khu 1919 Kha nga Liga das Nações, muhuno yi tidwago kha nga Organização das Nações Unidas. (Gutu. 17:3-5) “10 Dzikeho” dza gu emeya yatshavbo mifumo nya tshivba yi seketeyago girengo gegi.

Gu pwanana muni gu gomogo avbo nya liphuphulu ni girengo nya likhabi nyo fuviye? Liphuphulu “li khade” vbatshani nya girengo, si thulago gu khiso ilo la gu gi seketeya ni gu zama gu gi woneleya.

Ginani gi na gireyago liphuphulu? Girengo nya likhabi ni 10 dzikeho dzi li seketeyago, “si na nyenya liphuphulu.” Iso si na li nyenya ngudzu nyo bwe si li duseya satshavbo li gu naso ni gu yeyedza wuvivbi yalo. Khavbovbo, si na li fuvisa a gu iso Jehovha a nga ganeya gu khuye si na girega. (Gutu. 17:1; 18:8) Owu wu na ba wuri mahegiso nya wukhongeyi watshavbo nya malipha. Ganiolu, na si si giregi isoso Jehovha a na gira gilo nya gu gima gi si girege omu nya matimo nya vathu.

Ginani egi Jehovha a na theyago monyoni ya vanyamayigo gasi va gira? Uye a na theya monyoni nya 10 dzikeho “mapimo yaye”, gasi gu “ninga tshivba ni wufumu wawe ga girengo nya likhabi [nyo fuviye]” a gu Nações Unidas. (Gutu. 17:13) Dundrugeya khu tshamuselo nya isoso. Isoso kha si thuli gu khiso mufumo wu na hunga wabune gu ningeya tshivba wayo ni wuthangeyi ga girengo nya likhabi. Giprofeto gyo yeyedza gu khigyo khu Nungungulu kamo a na va kutsedzeyago gu gira isoso. (Mav. 21:1; fananisa ni Isa. 44:28) Guvbindrugedza gogu gu na girega khu gu vbiredza. Khavbovbo, girengo nya likhabi gi na fuvisa khu gu vbeleya watshavbo wukhongeyi nya malipha.

Ginani hi gi vireyago mindru wa tshigu? Kha hi yeli gu vireya gu wona mifumo na hi gu seketedwa vbadugwana-vbadugwana khu Nações Unidas. Esi hi yedego gu si vireya khesi: Khu gi thugedza, Jehovha a na theya monyoni ga vanyamayigo mapimo nya gu ningeyi tshivba yawe ga girengo nya likhabi. Tepo si na giregago isoso, hi na dzegeya gu dziti gu khethu tshanisa nya yikhongolo yo vbweta gu pheya. Na hi gu vireya isoso, “hongoleni hi khalani na hi gengede” kholu nya mba hweya hi na wona silo na si gu vbindrugedza khavba ni avba! — 1 Tes. 5:6