Gubhapatiswa — Gilo nya lisima ngudzu ga maKristo

1, 2. a) Vo dzipwa kharini vavelegi nyo khaguri tepo gyanana gyawe gi vbwetago gu bhapatiswa? b) Khu ginani vale va vbwetago gu bhapatiswa va wudziswago gu pwani ina va dzi hendzeledzide ga Jehovha mwendro ne? (Wona foto vbatshani.)

VAVELEGI va Maria, va di wona gyanana gyawe Maria na gi emide gumogo ni vambe va nga ba va hongola gubhapatiswatunu. Khavbovbo muganeli a di gira siwudziso sivili. Maria a di hlamula khu lito nyo khugege, li pwalago gwadi. Gitepwana hwane nya isoso, uye a di bhapatiswa.

² Vavelegi va Maria va di tsakide ngudzu kholu gyanana gyawe gi nga hendzeledza womi wagyo ga Jehovha gi bwe gi bhapatiswa. Ganiolu na si si gu giregi isoso, mamayi wa Maria a di gu garadzeganyana. A di gu dzi wudzisa khuye: ‘Ina Maria na ni tanga nyo ningane gu bhapatiswa? Ina kamo a ngu li pwisisa lisima nyo dzi hendzeledze ga Jehovha? Ina khandri tshukwana a vireyanyana na si gu bhapatiswe? Vavelegi nya vangi nya lihaladzo va ngu dzi gira siwudziso nya nga esi tepo gyanana gyawe gi gu khigyo gyo vbweta gu bhapatiswa. (Muhevbudzi 5:5) Ga satshavbo, gilo nya lisima egi muthu a nga hungago gu gira, gu hendzeledza womi waye ga Jehovha ni gu bhapatiswa. — Wona kwadru yi gu khiyo “Ina u dzi hendzeledzide ga Jehovha?”

3, 4. a) Mupostoli Pedro hi phaside kharini gu wona lisima nyo bhapatiswe? b) Khu ginani Pedro a nga fananisa gubhapatiswa ni guvbahwa nya litaro la Nowa?

³ Mupostoli Pedro fananiside gubhapatiswa ni guvbahwa nya litaro la Nowa. Uye a di khuye: “Gubhapatiswa, gu fanago ni egi khugo gu mi vbulugisago muhuno.” (1 Pedro 3:20, 21, NM) Litaro li ningide giyeyedzo nya gutiye nyo khigyo Nowa a di gu vbweta gu gira gugola ga Nungungulu khu monyo waye watshavbo. Nowa giride thumo a nga ba a ningidwe khu Jehovha khu gutumbega. Khu kotani nya gukhodwa gwaye, Jehovha mu vbulugiside ni  ndranga yaye teponi nya Ndrambi. Ginani egi Pedro a nga ba a zama gu hi hevbudza?    

⁴ Tepo vathu va nga wona litaro, va dzitide gu khavo Nowa a di gu khodwa ga Nungungulu. Vathu vo wona muthu na gu bhapatiswa, va ngu dziti gu khavo uye hendzeledzide womi waye ga Nungungulu kholu a khodwago ga Kristo a wusidwego khu gufani. Kha nga Nowa, ava va bhapatiswago va ngu engisa Nungungulu va bwe va gira thumo owu a va ningidego. Kha nga olu Jehovha a vbulugisidego Nowa teponi nya Ndrambi, uye a na vbulugisa sithumi saye nyo tumbege si bhapatisidwego tepo a na fuvisago litigo leli nyo vivbe. (Marko 13:10; Gutuledwa 7:9, 10) Khu kharato, si na ni lisima ngudzu gu hendzeledza womi wathu ga Jehovha hi bwe hi bhapatiswa. Khu lisine, muthu a gu hunisa gu bhapatiswa, a nga luza lithomo nyo vbanye kala gupindruga.

5. Ginani hi na gi hevbulago avba nya ndrima yeyi?

⁵ Olu hi li tidego lisima nyo bhapatiswe, gu vbwetega gu hiti mihlamulo nya siwudziso sesi sa siraru si landreyago: Ginani egi Bhibhiliya yi gi ganeyago maningano ni gubhapatiswa? Ginani egi muthu a yedego gu gira na si gu bhapatiswe? Khu ginani hi yedego gu dundruga lisima nyo bhapatiswe tepo yatshavbo hi hevbudzago sanana sathu mwendro sihevbulo sathu nya Bhibhiliya?

ESI BHIBHILIYA YI SI HEVBUDZAGO MANIGANO NI GUBHAPATISWA

6, 7. a) Gubhapatisa ga Johane gu di gu tshamuseya ginani? b) Gubhapatiswa ga mani gu nga ba gu hambanide ni gwatshavbo, nigu khu ginani?

⁶ Omu nya Bhibhiliya, muthu nyo pheye hi hevbulago khuye a bhapatisidego vambe vathu khu Johane Mubhapatisi. (Matewu 3:1-6) Khu ginani vathu va nga hongola gwaye gasi gu ya bhapatiswa? Avo va di gu gira isoso gasi gu yeyedza gu khavo va di gu dzi laya khu sighoho sawe, si gu khiso, va di gu dzumeya gu khavo va ndragide Nayo wa Mosi nigu va di gu dzi sola ngudzu khisoso. Ganiolu gubhapatisa nya lisima ngudzu ogu Johane a gu giridego gu diri ni tshamuselo nyo hambane ngudzu. Johane manegide ni lithomo nya likhongolo ngudzu nyo bhapatise Jesu, Gyanana nyo vbeleye gya Nungungulu. (Matewu 3:13-17) Jesu gima kha ghoha. A diri mwalo gighelo nya gu dzi laye. (1 Pedro 2:22) Ganiolu, khu ginani Jesu a nga bhapatiswa? Bhapatisidwe gasi gu yeyedza gu khuye a di dzi emisede gu thumisa womi waye gasi gu gira gugola ga Nungungulu. — Vahebheru 10:7.

⁷ Hwane nyo ba Jesu a phede gu tshumayela, vapizane vaye va di pheya gu bhapatisa vambe vathu. (Johane 3:22; 4:1, 2) Vathu vovo navo va di gu bhapatiswa kholu va nga ba va dzi layide sighohoni sawe nya gu ndrage Nayo wa Mosi. Ganiolu, hwane nyo ba Jesu a fude a bwe a wuswa khu gufani, ava va nga ba va vbweta gu khala vapizane vaye va di yede gu bhapatiswa khu gimbe gighelo nyo hambane.

8. a) Gileletelo muni egi Jesu a ningedego hwane nyo ba na wusidwe khu gufani? b) Khu ginani maKristo ma yedego gu bhapatiswa?

⁸ Khu mwaga nya 33, gitepwana hwane nya gu ba a wusidwe khu gufani, Jesu ganede ni gidzemo nyo vbindre 500 vama, vanyamayi, adzina ni sanana. Adzina eyi khiyo tepo a nga khuye: “Khu kharato, indrani mu gimbila mu hevbudza mayigo yatshavbo, mu bhapatisa vathu khu lina la Babe, ni la Mwamana, ni la Liphuvbo nya Guage. Va hevbudzeni gu landrisa satshavbo iso nyi nga mi hevbudzani.” (Matewu 28:19, 20; 1 Vakorinto 15:6) Jesu rumide valandreyi vaye gu gira vapizane. Ni wevbini a vbwetago gu khala mulandreyi waye mwendro gu rwala “pingwi” waye, a yede gu bhapatiswa. (Matewu 11:29, 30) Gasi gu thumeya Nungungulu khu ndziya eyi yi Mu tsakisago, muthu a yede gu dzumeya gu khuye Nungungulu a gu thumisa Jesu gasi gu gira gugola Gwaye. Khavbovbo, muthu yoyo a nga bhapatiswa na gu tsakedwa khu Nungungulu. Bhibhiliya yi ngu ninga siyeyedzo nya singi nyo khiso vapizane nyo pheye va Jesu va di gu liti lisima nyo bhapatiswe. Kha va nga ba va pimisa gu khavo tshukwana gu vireya va ta bhapatiswa khu yimbe tepo. — Mithumo 2:41; 9:18; 16:14, 15, 32, 33.

U NGA GIRI MIHUNI GU BHAPATISWA

9, 10. Ginani hi gi hevbulago avba nya gubhapatiswe ga muEtiyopi ni Sawule?

⁹ Leri Mithumo 8:35, 36. Mwama moyo nya muEtiyopi a nga ba a khodwe ga wukhongeli nya giJudha, a di gu bweleya gaya na gu wuya khu gukhozeyatunu tempeleni ya Jerusalema. Ngilozi ya Jehovha yi di rumeya Filipi gasi gu ya mu tshumayela, ni gu mu hevbudza “mahungu nya yadi ya Jesu.” Ginani egi mwama nya muEtiyopi a giridego? A di li wona lisima nya gu dzumeye Jesu kha nga Pfhumu, a bwe a vbweta gu gira esi Jehovha a si vbwetago ga maKristo. Khavbovbo, a di bhapatiswa nya mba hweya.

¹⁰ Gimbe giyeyedzo khya mwama moyo nya muJudha nyo pwani khu Sawule. Vajudha vatshavbo va di dzi hendzeledzide ga Nungungulu, ganiolu Jehovha a di va digide kholu kha va nga ne mu engisa. Sawule a di gu pimisa gu khuye vaJudha va di ngo thumeya Nungungulu khu ndziya yi mu tsakisago, khu gighelo gyogyo uye a di gu tshanisa maKristo. Ganiolu litshigu limwedo, Jesu, oyu Sawule a nga ba a pimisa gu khuye fude, a di ganeya ni Sawule khu abune na ari khu ndzadzini. A si wone kharini Sawule? A di dzumeya giphaso a ningidwego khu mupizane nya muKristo Ananiya khu monyo watshavbo. Bhibhiliya yari khiyo: “Khavbo avbo, a di wona, a gu bhapatiswa.” (Mithumo 9:17, 18; Vagalatiya 1:14) Khu gu gimbiya nya tepo a di tidwa nga mupostoli Pawulo. Wona gu khuwe tepo a nga tugula gu khuye Nungungulu a di gu thumisa Jesu gasi gu gira gugola gwaye, Sawule a di bhapatiswa nya mba hweya. — Leri Mithumo 22:12-16.

11. a) Ginani gi girago sihevbulo nya Bhibhiliya muhuno si bhapatiswa? b) Ho dzipwa kharini a gu bhapatiswa muthu nyo khaguri?

¹¹ Si ngu fana ni esi si giregago ga sihevbulo nya singi nya Bhibhiliya muhuno, esi si ngarigo vaphya ni esi si dandridego khu tanga. Khu kotani nya olu si golago ni gu tumba esi Bhibhiliya yi si ganeyago, iso si ngu dogoreya ngudzu gu dzi hendzeledza ga Jehovha ni gu bhapatiswa. Khu lisine, ganelo yi vegedwago ava va hongolago gubhapatiswatunu, gipandre nyo hathege nya mitshangano nya gipandre ni eyi nya mughanga. Dzifakazi dza Jehovha dzi ngu tsaka dzo wona sihevbulo nya Bhibhiliya na si gu dzumeya lisine si bwe si hunga gu bhapatiswa. Vavelegi navo va ngu tsaka vo wona sanana sawe na si gu gira sasimweso. Ndrani nya mwaga nya thumo nya 2017, gu bhapatisidwe vathu nyo vbindre 284 000 gasi gu yeyedza gu khavo va dzi hendzeledzide ga Jehovha. (Mithumo 13:48) Khu lisine, va li pwisiside lisima nya gu maKristo ma bhapatiswa. Ganiolu ginani va giridego na va si gu bhapatiswe?

12. Ginani esi sihevbulo nya Bhibhiliya si yedego gu gira gupheya na si si gu bhapatiswe?

¹² Na si si gu bhapatiswe, sihevbulo nya Bhibhiliya, gu vbwetega siti lisine khu Nungungulu, ni makungo yaye khu vathu ni mafu, ni esi a giridego gasi gu vbanyisa vathu. (1 Thimoti 2:3-6) Khavbovbo, gu vbwetega si manega ni gukhodwa, ogu gu na si phasago gu engisa milayo ya Nungungulu ni gu diga gu gira esi a si vengago. (Mithumo 3:19) Isoso si na ni lisima, kholu Jehovha kha na nga dzumeya gudzihendzeledza nya muthu a ngo girago silo esi Uye a si vengago. (1 Vakorinto 6:9, 10) Ganiolu gu na ni simbe gambe. Ava va vbwetago gu hendzeledza womi wawe ga Jehovha gu vbwetega gu va manega mitshanganoni nya libandla va bwe va tshumayela mahungu nya yadi ni gu hevbudza vambe tepo yatshavbo. Isoso khiso si vbwetegago ga oyu a vbwetago gu landreya Kristo. (Mithumo 1:8) Gihevbulo nya Bhibhiliya gu vbwetega gi pheya khu gu gira satshavbo sesi. Khavbovbo gi nga hendzeledza womi wagyo ga Jehovha khu nombelo gi wu girago gyonga gi bwe gi bhapatiswa.

PHASA SIHEVBULO SAGO NYA BHIBHILIYA GU DZI VEGEYA MISUVO NYO BHAPATISWE

13. Tepo hi hevbudzago vambe vathu, khu ginani hi yedego gu dundruga gu khethu gu vbwetega va bhapatiswa gasi gu va khala maKristo nya lisine?

¹³ Tepo hi phasago sanana sathu ni simbe sihevbulo nya Bhibhiliya gasi gu si gira silo sesi nya lisima ngudzu, hi yede gu dundruga gu khethu ava va vbwetago gu khala valandreyi nya lisine va Jesu gu vbwetega gu va bhapatiswa. Khavbovbo, kha hi na nga thava gu va embeya lisima nyo dzi hendzeledze ni gu bhapatiswa so ba si ningana. Ethu ho vbweta gu khethu sanana sathu ni simbe sihevbulo nya Bhibhiliya si simama gu dandra khu liphuvboni si bwe si bhapatiswa!

14. Khu ginani hi gu mba yela gu gurumedza muthu gu bhapatiswa?

¹⁴ Khu lisine, mwalo a yedego gu gurumedza gyanana gyaye mwendro gihevbulo nya Bhibhiliya gu bhapatiswa. Jehovha kha gurumedzi ni moyo wathu gu mu thumeya. (1 Johane 4:8) Tepo hi hevbudzago vambe vathu, hi yede gu va phasa gu pwisisa lisima nyo manege ni wupari wa vbafuvbi ni Jehovha. Khavbovbo, gihevbulo nya Bhibhiliya gyo tsakiswa furi khu guti lisine khu Nungungulu gi bwe gi vbweta gu gira satshavbo esi maKristo nya lisine ma yedego gu gira, gi na vbweta gu bhapatiswa. — 2 Vakorinto 5:14, 15.

15, 16. a) Ina so hunga gu muthu a manega ni tanga nyo khaguri gasi gu a bhapatiswa? Tshamuseya. b) Khu ginani gihevbulo nya Bhibhiliya gi yedego gu bhapatiswa kha nga moyo nya Dzifakazi dza Jehovha ambari gyo ba gi bhapatisidwe ga yimbe tshetshe?

¹⁵ Kha si hungi gu muthu ari ni tanga nyo khaguri gasi gu bhapatiswa. Muthu ni muthu hambanide ni mumbe, simbe sihevbulo si ngu vbiredza gu dandra khu liphuvboni guvbindra simbe. Nya vangi va ngu bhapatiswa na va ngari vaphya ngudzu, va bwe va simama na va tumbegide ga Jehovha tepo va dandrago. Vambe vo pheya gu hevbula lisine nya Bhibhiliya va bwe va bhapatiswa na vari vakhongolo. Vambe vakona na vari ni 100 myaga ni guvbindra!

¹⁶ Nyamayi moyo oyu olu a hevbudego Bhibhiliya, a di bhapatisidwe omu nya dzitshetshe nyo hambanehambane. Khu kharato, a di wudzisa muhevbudzi waye nya Bhibhiliya gu khuye ina si di gu hunga kamo gu a bhapatiswa gambe gani. Muhevbudzi waye a di mu yeyedza mavhesi nyo khaguri nya Bhibhiliya ma hlamudego giwudziso gyaye. Tepo nyamayi wule a nga pwisisa esi Bhibhiliya yi si ganeyago, a di bhapatiswa, ambari olu a nga ba ari vbafuvbi ni gu gira 80 myaga. Ginani hi gi hevbulago avba nya giyeyedzo gegi? Jehovha a na dzumeya gubhapatiswa gwathu basi ha gu hevbula lisine maningano ni gugola gwaye. Khu kharato ambari ho ba hi bhapatisidwe omu nya dzimbe dzitshetshe, gu nga gu vbwetega gu hi bhapatiswa kha nga moyo nya Dzifakazi dza Jehovha. — Leri Mithumo 19:3-5.

17. Ginani egi muthu a yedego gu dundrugeya khigyo litshigu a bhapatiswago khilo?

¹⁷ Litshigu eli muthu a bhapatiswago khilo, litshigu nyo tsakise ngudzu. Tepo gambe nyo dundrugeye gwadi khesi si pategago avba nyo dzi hendzeledze ni gubhapatiswa. Gasi gu gira satshavbo esi si vbwetegago ga muKristo nya lisine, so lomba gudzigaradza. Vapizane va Jesu gu vbwetega gu “va si dzi vbanyeli avo vamune, aholu va vbanyela wule a fudego a wuga khu kotani yawe.” — 2 Vakorinto 5:15; Matewu 16:24.

18. Siwudziso muni hi na bhulago khiso avba nya ndrima yi landreyago?

¹⁸ Kha nga hi hevbudego avba nya ndrima yeyi, gu khala muKristo nya lisine khandri gilo nyo hagane khigyo. Khigyo gi giridego mamayi wa Maria a dzi gira siwudziso hi si wonidego gupheyani nya ndrima. Wo ba uri muvelegi, adzina u di nga dzi wudzisa esi: ‘Ina kamo gyanana gyangu gi dongide gu bhapatiswa? Ina gyanana gyangu gi ngu muti gwadi Jehovha gasi gi dzi hendzeledza gwaye? Ina gyanana gyangu gi yede gu pheya khu gu mana sihevbulo nyo khugege ni thumo nya wadi na gi si gu bhapatiswe? Ahati gyo gira gighoho nya gikhongolo hwane nyo bhapatiswe ke?’ Avba nya ndrima yi landreyago hi na bhula khu siwudziso sesi, nigu hi na hevbula khu edzi vavelegi va gu maKristo va nga manegago khidzo ni mawonelo nya yadi khu gubhapatiswa.