Guwonegeya gwanu gu na wenengedze gasi gu rungudza Jehovha

1. Gighelo muni nyo hathege hi gu nagyo nyo tsake?

HI NGU tsaka ngudzu khu gupwa edzi sithumi sa Nungungulu si digago khidzo guwonegeya gwaso gu wenengedza! Mwaga wu vbindridego, vathu va Jehovha va gimbidziside 10 000 000 sihevbulo nya Bhibhiliya ni guvbindra. Nigu dzimiliyoni nya vathu nya vaphya va tsakeyago va dzude Gidundrugisotunu va ta hevbula khu giningwa nya lihaladzo gya Jehovha, gudzegiswa. — 1 Johane 4:9.

2, 3. a) Ginani gi si hi digisigo gu wenengedza kha nga “mwenge”? b) Ginani hi na ganeyago khigyo avba nya ndrima yeyi?

² Dzifakazi dza Jehovha dzi ngu ganeya malimi nyo hambanehambane mafuni gwatshavbo. Ganiolu isoso kha si hi himbedzeyi gu rungudza Jehovha kha nga ndranga mweyo nyo pwane. (Gutuledwa 7:9) Gani lidimi muni hi ganeyago gani ho vbanya hayi, hi nga wenengedza “kha nga myenge ya mafuni.” — Vafilipi 2:15.

³ Thumo wathu nyo tshumayele, gupwanana gwathu nya wuKristo, ni edzi hi dzi garadzeyago khidzo gu khala na hi dongide, satshavbo soso si ngu resa wuzundzo ga Jehovha. Hi nga diga kharini mwenge mwendro guwonegeya gwathu gu wenengedza omu nya sipandre soso sa siraru? — Leri Matewu 5:14-16.

PHASA VAMBE GU KHOZEYA JEHOVHA

4, 5. a) Vbavbandze nyo tshumayele, hi nga diga kharini guwonegeya gwathu gu wenengedza? b) Mihandro muni nya yadi yi manwago khu gu yeyedza wuwadi? (Wona foto gupheyani nya ndrima.)

⁴ Gu tshumayela ni gu gira vapizane ndziya nya lisima ngudzu nya gu dige guwoneya gwathu gu wenengedza. (Matewu 28:19, 20) Khu 1925, ndrima “Guwonegeya gidemani” yi ganede gu khiyo ndrani nya matshigu nya guhegise, mwalo a nga hadzi tumbega ga Pfhumu na sa londrola “lithomo nya gu dige guwonegeya gwaye gu wenengedza.” Yi bwe khiyo: “Gu vbwetega gu a gira isoso khu gu bhuleya vathu mahungu nya yadi ni gu dzi pwananisa ni dzindziya nya guwonegeya.” (Mukhedziseyi nya 1 nya Junho nya 1925, khu giNgiza) Vbavbandze nya thumo wathu nyo tshumayele, mavbanyelo yathu ma ngu resa wuzundzo ga Jehovha. Vathu nya vangi va ngu hi wona tepo hi tshumayelago. Tepo hi va hegeyago hi bwe hi va losa, sa gu va gira va pimisa silo nya sadi khethu ni Nungungulu hi mu khozeyago.

⁵ Jesu embede vapizane vaye gu khuye: “Ndrangani mu na gu belago, va loseni.” (Matewu 10:12) Omu a nga ba a tshumayela umo Jesu, si di gu olovelegide gu vathu va rana vathu va si vatigo ndrangani gwawe. Malangani nya mangi muhuno, isoso kha si ngo olovelega gambe. Gutala nya dzitepo vathu va ngu goroga tepo va wonago muthu nya mba muti vbamwanya gwawe. Ganiolu ha gu olovelega hi bwe hi yeyedza wuwadi, adzina va nga tshulega. Tepo u tshumayelago khu gikarinyana omu gu tadego ngudzu vathu, ina u ngu si wona gu khuwe wo hegeya u bwe u losa vathu khu ndziya nya wupari, va ngu tshulega gu gu hidzimeleya va bwe vata dzega mabhuku? Adzina va nga vbweta ni gu pheya gihevbulo nya Bhibhiliya!

6. Ginani gi phasago patwa nyo khaguri wu dandridego khu tanga gu thuma khu sighingi gutshumayelani?

⁶ Patwa nyo khaguri wu dandridego khu tanga wa Inglatera kha wu ngo tshumayela gambe khu ndranga ni ndranga nga gale khu kotani nya mawugelo yawe. Khu kharato va gu vega meza nya mabhuku vbavbandze nya ndranga yawe. Avo va gu vbanya vbafuvbi ni xikola, khu kharato va gu vega mabhuku ma na ndrindrago gupima ga vavelegi va tago va ta dzega sanana sawe. Vavelegi nyo khaguri va ngu dzega mabhuku yoyo, gupata ni Os Jovens Perguntam — Respostas Práticas, vholumi 1 ni 2. Moyo nya ndriyathu nya nyamayi a gu piyonero a ngu oloveya gu thuma ni patwa wowo. Vavelegi va ngu si wona gu khavo vbevbugide ni gu khavo patwa wule wo vbweta gu phasa vambe khu lisine. Muvelegi nyo khaguri a di bwe a pheya gu hevbula Bhibhiliya.

7. U nga phasa kharini valuveli va gomogo gipandreni gwago?

⁷ Matshigwana hwane, vathu nya vangi va tutumide tigoni gwawe va ya vbanya omu nya mambe mayigo kha nga valuveli. Ginani u nga girago gasi gu phasa valuveli va gomogo gipandreni gwago gu hevbula khu Jehovha? Nyo pheye, u nga hevbuleya gu losa khu lidimi lawe. Gimbe gambe, khu gu thumisa JW Language u nga hevbula malito nyo khaguri aya adzina ma nga va girago va ema va vbweta gu bhula nago. Khavbovbo, u nga va yeyedza dzivhidhiyu ni mabhuku ma gomogo omu nya jw.org khu lidimi lawe. — Dhewuteronome 10:19.

8, 9. a) Mitshangano yathu ya vbakari nya semana ya gu hi phasa kharini? b) Vavelegi va nga phasa kharini sanana sawe gu tshukwadzisa mihlamulo yaso mitshanganoni?

⁸ Jehovha a ngu hi ninga esi khu lisine hi si vbwetago gasi gu hi dugeleya tepo hi tshumayelago. Khu giyeyedzo, esi hi si hevbulago avba Tshangano nya thumo ni mavbanyelo sa gu hi dongiseya gwadi gu gira maendro nya gubweleleye ni gu tula sihevbulo nya Bhibhiliya.

⁹ Tepo hi endredwago khu vapfhumba mitshanganoni gwathu, va ngu oloveya gu samadziswa khu mihlamulo yi ningwago khu sanana sathu. Mu nga hevbudza sanana sanu gu hlamula khu malito yaso. Vathu nyo khaguri va ngu ndrindrwa vata lisineni khu gupwa sanana na si gu tshamuseya gukhodwa gwaso khu ndziya nyo pwale yi vbevbugago. — 1 Vakorinto 14:25.

TIYISA GUPWANANA

10. Wukhozeyi nya ndranga wu nga phasa kharini dzindranga gu pwanana?

¹⁰ Tepo hi dzi garadzeyago gu phasa ndranga yathu gu thuma gumogo khu gupwanana ni gurula, ha gu reseya wuzundzo Jehovha. Khu giyeyedzo, wa gu ba uri muvelegi, gira malulamiselo nyo manege ni Wukhozeyi nya ndranga tepo yatshavbo. Dzindranga nya dzingi dzi ngu wona JW Broadcasting gumogo, khu hwane va bhula khedzi va nga thumisago khidzo esi va si hevbudego. Dundruga gu khuwe wuthangeli wu vbwetegago ga sanana nya sidugwana wu hambanide ni owu wu vbwetegago ga esi nya sikhongolwana. Gira satshavbo u si kodzago gasi gu phasa givbango ni givbango nya ndranga yago gu phasega khu lisine khu wukhozeyi nya ndranga. — Ndzimo 148:12, 13.

11-13. Hi nga phasa kharini mabandla yathu gupwanana?

¹¹ Ambari wa gu ba u ngari muphya, u nga hengeya avba nya gu gire vatshavbo libandlani va dzipwa na vari va lisima. Mweyo nya dzindziya nya gu gire isoso khu gu gira wupari ni vandriyathu nya vama ni vanyamayi va dandridego khu tanga. Va wudzise egi gi va phasago gu simama gu thumeya Jehovha khu myaga nya yingi yi vbindridego. Avo va nga gu hevbudza sihevbudzo nya lisima ngudzu. Isoso si na va tiyisa ngudzu gupata nago! Nigu hatshavbo, gani hi vaphya mwendro hi dandride khu tanga, hi nga phasa vapfhumba vathu Salawuni nya Mufumo gu va dzipwa na vari gaya. U nga va losa, u va hegeya, u va phasa gu vbweta wulanga nyo khale, ni gu va tivegisa ga vambe. Va phase gudzipwa na vari gaya.

¹² Wo ba u ningidwe gu gimbidzisa tshangano nya thumo nya lithembwe, u nga phasa ava va dandridego khu tanga gu simama va diga guwonegeya gwawe gu wenengedza. Tiyisega gu khuwe va na ni gipandre nyo tshumayele gi va ninganago gani. Gira malulamiselo nya gu vaphya va thuma navo. Vandriyathu va dandridego khu tanga ni ava va gu na ni sigaradzo nya madwali va ngu tala gu vbeya tshivba kholu va tandregago gu tshumayela nga edzi va nga ba va tshumayela khidzo gale. Ganiolu va na tsaka ngudzu va gu wona gu khavo u ngu khathala khavo ni gu pwisisa giemo gyawe. Ambari va gu ba va gumbide kharini mwendro na vari ni myaga nya yingi na vari lisineni, wuwadi wago wu nga va kutsa gu simama gu tshumayela khu sighingi. — Levhi 19:32.

¹³ Vaisrayeli va di gu si gola gu khozeya Jehovha gumogo. Muembi nya dzindzimo lovide gu khuye: “Nga pwani gutshamba ni gutsakisa, valongo va gu vbanya dangamwedo khu gupwanana!” (Leri Ndzimo 133:1, 2.) Uye fananiside gupwanana gogo ni mafura nya gutodze khayo, ma pepisago lidowo li bwe li nungeya gwadi. Khu ndziya nyo fane, hi nga pepisa vandriyathu khu gu va yeyedza wuwadi ni gu olovelega. Isoso sa gu gira libandla li engedzeya gupwanana. U nga dzi garadzeya guti gwadi vandriyathu libandlani gwago? — 2 Vakorinto 6:11-13.

14. U nga diga kharini guwonegeya gwago gu wenengedza gipandreni u vbanyago umo?

¹⁴ Ni hayini u gomogo u nga diga guwonegeya gwago gu wenengedza. Wuwadi wago wu nga kutsa vavhizinyu vago gu hevbula nya singi khu Jehovha. Dzi wudzise gu khuwe: ‘Vavhizinyu vangu va gu nyi wona kharini? Ina ndranga yangu yi agide ni gu vegedzedwa gwadi? Ina yi ngu ninga wuzundzo gipandreni gwathu? Ina nyi ngu phasa vavhizinyu?’ Wudzisa Dzifakazi-kwathu gu khuwe wuwadi wadzo ni giyeyedzo gyadzo nya gyadi gi khuhide kharini valongo vawe, vavhizinyu, sithumi ni sihevbuli sikwawe. — Vaefeso 5:9.

KHALA NU DONGIDE

15. Khu ginani hi yedego gu khala na hi dongide?

¹⁵ Ha gu vbweta gu simama hi diga guwonegeya gwathu gu wenengedza ngudzu, gu vbwetega hi dundruga gu khethu ho vbanya teponi muni. Jesu embede vapizane vaye gungani-gungani gu khuye: “Khalani na mu dongide.” (Matewu 24:42; 25:13; 26:41) Ha gu pimisa gu khethu “tshanisa nya yikhongolo” yi nga romo hwindzo, kha hi na nga khala na hi dongide gasi gu londrola ni levbini lithomo nya gu phase vambe gu hevbula khu Jehovha. (Matewu 24:21) Wulangani nya gu wenengedze ngudzu, guwonegeya gwathu gu na vbunguga vbadugwana-vbadugwana ambari gu tshimega kamo.

16, 17. Ginani u nga girago gasi gu u khala nu dongide?

¹⁶ Gu vbwetega hi khala na hi dongide, ngudzu-ngudzu olu. Litigo la guya li engedzeya guvivba. Ganiolu hi ngu dziti gu khethu mahegiso ma na vboha kamo khu tepo eyi Jehovha a yi hathidego. (Matewu 24:42-44) Ambari ulolo, gu vbwetega gu hi simama gu laphisa monyo ni gu vega gupima avba nya wumindru. Leri Bhibhiliya tshigu ni tshigu, nigu u nga digi gu gombeya ga Jehovha. (1 Pedro 4:7) Hevbula khu vandriyathu nya vama ni vanyamayi va thumedego Jehovha khu myaga nya yingi. Khu giyeyedzo, u nga leri matshango nya guvbanya, nya nga aya ma gomogo omu nya ndrima Setenta anos ‘agarrando a aba da veste de um judeu,’ yi dusidwego omu nya Mukhedziseyi nya 15 nya Abril nya 2012, dzipajina 18-21, khu giPutukezi.

¹⁷ Khala nu pharegide thumoni wa Jehovha. Gireya silo nya sadi vambe, u bwe u vbungadza ni vandriyago va liphuvboni. U na wona gu khuwe u na tsaka, nigu tepo yi na gira khatshi yo vbuvba. (Vaefeso 5:16) Sithumi sa Jehovha si giride silo nya singi ndrani nya 100 myaga yi vbindridego. Nigu muhuno hi pharegide ngudzu guvbindra gale. Thumo wa Jehovha wa gu dandra khu ndziya nya gu ne hi di si yi pimisi. Guwonegeya gwathu gu ngu wenengedza gwadi!

18, 19. Madhota ma nga hi phasa kharini gu thumeya Jehovha khu sighingi? Ninga giyeyedzo.

¹⁸ Ambari olu hi girago sihoso nya singi, Jehovha a ngu hi dzumeleya gu mu thumeya. Gasi gu hi phasa, uye a gu ninga “vathu siningwa,” a gu madhota nya libandla. (Leri Vaefeso 4:8, 11, 12.) Khu kharato tepo madhota ma gu endreyago, londrola tepo yoyo u gomogo nawo gasi gu hevbula khu guti ni wusingalagadzi wawe.

¹⁹ Khu giyeyedzo, patwa nyo khaguri wa Inglatera wu diri ni sigaradzo pangoni gwawo, khu kharato wu di lomba giphaso ga madhota mavili. Mwangadzi wakona a di wona gu khuye mwama waye kha nga ba a thangeya gwadi ndranga khu liphuvboni. Mwama wakona a di gu dzi wona na si kodzi gu hevbudza gwadi a bwe a dzumeya gu khuye a di si giri malulamiselo nya wukhozeyi nya ndranga. Madhota ma di kutsa patwa wowo gu dundrugeya khu giyeyedzo gya Jesu. Ma di kutsa mwama wakona gu pimedzeya edzi Jesu a khathaledego khidzo vapizane vaye. Ma kutsa mwangadzi wakona gu laphiseya monyo mwama waye. Ma bwe ma va ninga mawonelo nyo khaguri nya edzi va nga girago khidzo wukhozeyi nya ndranga ni sanana sawe sa sivili. (Vaefeso 5:21-29) Mwama a di dzi garadzeya gu khala hungo nya wadi nya ndranga. Madhota ma di mu kutsa gu mba tsukula ni gu tumba liphuvbo la Jehovha. Lihaladzo ni wuwadi wu yeyedzidwego khu madhota yale wu phaside ndranga yile khu lisine!

20. Khu wevbini handro u na wu manago wa gu diga guwonegeya gwago gu wenengedza?

²⁰ “Kategide uye a thavago PFHUMU Nungungulu, a gimbilago dzindzilani gwaye!” (Ndzimo 128:1) Wa gu diga guwonegeya gwago gu wenengedza u na tsaka. Khu kharato hevbudza vambe khu Nungungulu, gira satshavbo u si kodzago gasi gu phasa ndranga yago ni libandla gasi gu pwana, ni gu khala na li dongide. Vambe va na wona giyeyedzo gyago nya gyadi nigu va na vbweta gu zundza Babe wathu, Jehovha. — Matewu 5:16.