“Kha nyi ngari gumbi nya wughevenga gambe”

WOMI WANGU WA GALE

Nyi velegidwe dhoropani ga Calgary, Alberta, eyi Canada. Na nyi ngari gyanana, vavelegi vangu va di tshula mutshadho, khu kharato, eni ni mamayi wangu hi diya vbanya ni va vhovho vangu. Va vhovho vangu va di gu hi gola ngudzu, khu kharato nyi dandride na nyiri gyanana nya gu tsake. Nyi ngu dundruga myaga yile nya wanana wangu nyi nga ba nyi rude.

Tepo nyi nga ba nyiri ni 7 myaga. Womi wangu wu di vbindrugedza khu ndziya nya guvivbe ngudzu tepo mamayi wangu a nga bweleleyana ni papayi wangu, ga tepo yoyo hi diya vbanya Estados Unidos gipandreni gya St. Louis, eyi Missouri, khu givbiredza nyi tugude gu kheni papayi wangu a di gu si kodza gu khala muthu nya guvivbe. Khu giyeyedzo, tepo nyi nga vboha gaya hwane nya litshigu nyo pheye ga xikola yangu nya yiphya, uye a tugude gu khuye nyi vetidwe xikwatuno ganiolu, eni kha nya phodza. Uye a di goroga ngudzu a nyi veta guvbindra edzi nyi nga ba nyi vetidwe khidzo xikwatuno! Khu kharato, nyi hevbula gilogyo. Nyi phede gu dwana ni dzikolega dzangu na nyiri ni 7 myaga.

Mavbanyelo nyo vivbe ya papayi wangu ma di gu gorosa mamayi wangu, khu kharato, tepo yatshavbo gaya va di gu khaleya gu dwanisana. Nyi di pheya gu daha dzidroga ni gu seya wadwa na nyiri ni 11 myaga. Nyi di engedzeya gu khala muthu nya maghilivindra nigu nyi di gu patega omu nya gu dwanisane mu dziruwani. Tepo nyi nga vbedza gu hevbula sekundariya nyi khade gighevenga nya gikhongolo.

Tepo nyi nga tshanganisa 18 myaga nyi di dzi lovedzisa gasi gu khala musotshwa eyi Estados Unidos. Esi nyi si hevbudego iyoyo si engedzede maghilivindra yangu, khu kharato, nyi di pheya gu songa vathu. Hwane nya 5 myaga, nyi di diga thumo wangu nya wusotshwa gasi nyi ya hevbula psikologiya na nyi tumba gu nyi na gira thumo nya FBI (Departamento Federal de Investigação, sigla khu gingiza). Nyi di pheya sihevbulo sangu ga Universidhadhe nyo khaguri eyi Estados Unidos, hwane nya isoso nyi bwelede Canada gasi nyi ya simama gu hevbula.

Nyi di si tumbi muthu universidhadhe, kholu vathu va diri va magundrele nigu si di gu gira nga khatsi gu diri mwalo ndziya nya gu lulamise sigaradzo nya vathu. Nyi di vbeledwa khu gutumba nya gu vathu va nga si kodza gu gira gu mafuni gu khala wulanga nya wu tshukwana.

Kha nga olu nyi nga ba nyiri mwalo makungo womini, nyi di pheya gu seya ngudzu wadwa ni gu daha ngudzu dzidroga nigu nyi di gu pimisa basi khu dzitsapawu ni gu hengeya malawu. Womi wangu wu diri gu khaleya gu hongola dzi festatunu ni gu vbindrugedza vanyamayi. Kha nga olu nyi nga ba nyi hevbude wusotshwa nyi di gu khaleya gu dzi bedzedzeya omu nya mayunga. Eni nyi diri ni malamulelo yangu nya silo nigu nyi di gu dwanisa ni wevbini nyi nga ba nyi wona gu kheni a ngu tshanisa vathu. Ganiolu, gasi gu ganeya lisine, eni nyi di gu engedzeya gu dzi gira gumbi nya wughevenga.

BHIBHILIYA YI VBINDRUGEDZIDE KHARINI WOMI WANGU

Litshigu limwedo eni ni pari yangu hwane nya gu ba hi dahide dzidroga hi di dzi dongiseya gasi hi hongola hiya rengisa dzidroga, ganiolu, uye a di nyi wudzisa gu khuye ina eni nyi khu khodwa ga Nungungulu. Eni nyi di mu hlamula gu kheni, “Nungungulu khuye Muvangi nya gutshaniseka gwatshavbo omu mafuni eni ne kha nyi vbweti guti gilo khuye!” Ga litshigu li nga landreya, na nyi romo ga thumo wangu nya wuphya moyo nya githumi khwathu nya Fakazi ya Jehovha a di nyi wudzisa gu khuye: “Wo pimisa gu khuye Nungungulu khuye Muvangi nya gutshaniseka gwatshavbo gu gumogo omu mafuni”? Nyi di hlamala kholu uye a nyi giridego giwudziso gyogyo hwane ga esi nyi ganedego ga litshigu li vbindridego, isoso si nyi giride gu nyi vbweta guti nya singi. Ga 6 migima yi nga landreya, ethu hi manegide ni mabhulo nya mangi nya gu tsakise, ndrani nya mabhulo yathu uye a hlamude siwudziso nya singi nyi nga ba nyiri naso womini khu gu thumisa Bhibhiliya.

Ga tepo yoyo nyi di guvbanya nyi noyivha yangu, ganiolu, uye a di si vbweti guti gilo khesi nyi nga ba nyi hevbula. Ga Dimingu nyo khaguri nyi di mu embeya gu kheni nyi di ranide Dzifakazi dza Jehovha gasi dzi ta hevbula ni ethu Bhibhiliya ndrangani. Ga litshigu li nga landreya, na nyi wide khu thumotuno nyi di ta mu hamuga nigu uye a di phangide satshavbo nyumbani a hongola. Nyi di duga vbavbandzi nyi pheya guliya. Khavbovbo nyi gombeya ga Jehovha na nyi gu lomba giphaso. Iyoyo yi diri tepo nyo pheye nyi nga gombeya ga Nungungulu, khu gu thumisa lina, Jehovha. — Ndzimo 83:18.

Hwane nya matshigu mavili patwa moyo nya Dzifakazi dza Jehovha wu di pheya gu hevbula Bhibhiliya ni eni. Hwane nya gu ba va hongode nyi di simama gu leri libhuku hi nga ba hi li thumisa li gu khilo Poderá Viver Para Sempre no Paraíso na Terra nigu nyi vbedzide gu leri libhuku latshavbo ga wutshigu wule.a Esi nyi si hevbudego maningano khu Jehovha Nungungulu ni gyanana gyaye, Jesu Kristo, si kuhide monyo wangu. Nyi wonide gu kheni Jehovha a ngu hi haladza ngudzu nigu tepo hi garadzegago anuye a ngu garadzega. (Isaya 63:9) Egi gi nyi kuhidego ngudzu gu hevbula maningano khu lihaladzo eli Nungungulu a gu nalo kheni ni edzi nyi wuyedwago khidzo khu muphaso wa gyanana gyaye. (1 Johane 4:10) Nyi pwisiside gu kheni Jehovha a nyi laphisede monyo kholu “kha vbweti gu khuye ne ni moyo a fuviswa, ganiolu a gu vbweta gu khuye vatshavbo va dzi laya.” (2 Pedro 3:9) Nyi di wona gu kheni Jehovha a di gu nyi rana gwaye.

Ga semana yayimweyo nyi di pheya gu hongola mitshanganoni. Eni nyi diri ni ndzudzu nyo laphe, nyi di gu ambala dzi phera nigu nyi di gu thavisa, ganiolu, Dzifakazi dza Jehovha dzi nyi pharide nga khatsi nyi nongo yi nga vbindra tepo nyo laphe na va si mu woni. Avo va dzi yeyedzide kha nga Makristo nya lisine. Si di gu gira nga khatsi nyi di bwelede gaya ga va vhovho vangu, ganiolu, nyi di tsakide ngudzu guvbindra gale.

Khu gitepwana esi nyi nga ba nyi hevbula omu nya Bhibhiliya si di pheya guvbindrugedza womi wangu. Nyi di piya ndzudzu, nyi diga wubhayi, nyi diga gu seya wadwa ni gu thumisa dzidroga. (1 Vakorinto 6:9, 10; 11:14) Nyi di gu vbweta gu tsakisa Jehovha. Khu kharato, nyi di si dzi emeleye tepo nyi nga ba nyi pwisisa gu gilo nyo khaguri nyi nga ba nyi gira gi di vivbide. Wulangani nya isoso, dzitepo nya dzingi nyi di gu dzipwa nandru. Nyi di gu dzi embeya gu kheni ‘kha nyi yeli gu gira gambe isoso’. Khu kharato nya mba hweya nyi di pheya gu dzigaradza, nyi guvbindrugedza mavbanyelo yangu ni magirelo yangu nya silo. Nya gu tsakise khu gu nyi phede gu wona mihandro nya yadi kholu nyi nga ba nyi vbanya guya khu milayo ya Jehovha. Khu 26 nya julho nya 1989 — hwane nya 6 migima na nyi phede gu hevbula Bhibhiliya — nyi di bhabhatiswa kha nga Fakazi ya Jehovha.

NYI WUYEDWE KHARINI

Bhibhiliya yi nyi phaside guvbindrugedza mavbanyelo yangu. Gale muthu nyo khaguri a gu nyi gireya wuvivbi nyi di gu si kodza gu phodza. Ganiolu, olu nyi ngu si kodza “gu vbanya khu gurula ni vathu vatshavbo.” (Varoma 12:18) Nyi ngu dziti gu kheni nyi si kodzide guvbindrugedza kholu Jehovha thumiside lito laye ni liphuvbo nya guage gasi gu nyi phasa. — Vagalatiya 5:22, 23; Vahebheru 4:12.

Muhuno, vbavbandzi nyo khale gumbi nya dzidroga, maghilivindra ni wubhayi nyo dzigaradzeya gu tsakisa Jehovha khu gu gira esi nyi si kodzago gasi gu mu thumeya. Isoso sa gu pata gambe gu phasa vambe gasi vati Jehovha. Hwane nya myaga nyo khaguri na nyi bhabhatisidwe, nyi di hongola ga limbe litigo gasi guya phasedzeya omu gu nga ba gu vbwetega giphaso. Khu gu gimbiya nya tepo, nyi tsakide ngudzu khu gu ba nyi hevbudzide vathu nya vangi gu wona edzi bhibhiliya yi nga va phasago khidzo gasi gu vbindrugedza womi wawe. Nyi tsakide ngudzu gambe tepo mamayi wangu a nga bhabhatiswa kha nga Fakazi ya Jehovha — egi gi mu phasidego gu wona edzi nyi nga vbindrugedza khidzo mavbanyelo yangu.

Khu 1999, ga gidhoropana gi ranwago gu phwani EL Salvador, nyi di kursari xikola eyi muhuno yi tidwago kha nga xikola nya vavhangeli nya mufumo. Xikola yeyi yi nyi trenaride gasi nyi si kodza gu thangeya thumo nya gu tshumayele, gu hevbudza, gumogo ni gu sayisa libandla. Hwane nya mwaga wowu nyi di tshada ni mwangadzi wangu nyo golege, Eugenia. Khu wuvili wathu hi di beleya thumo nya tepo yatshavbo eyi Guatemala.

Vbavbandzi nya gu nyi dzi laya khu womi nyi wu vbanyago muhuno eni nyi tsakide ngudzu. Gu thumisa milayo nya bhibhiliya si nyi tshude ga wubhayi ni maghilivindra, isoso gambe si nyi ningide womi nya wadi wu tadego khu lihaladzo nya lisine ni gurula.