Tshamuselo wa vbavbatshi

a Hi ngu phasega ni gu bonga gudzu khu thumo nya wadi owu madhota ma wu girago gasi gu hi phasa. Avba nya ndrima yeyi, hi na bhula khu 4 silo esi dzimbe dzitepo si si vbevbugigo gu madhota ma si gira. Hi na bhula gambe khedzi giyeyedzo gya mupostoli Pawulo gi na phasago khidzo madhota ya muhuno gu gira silo soso. Ndrima yeyi yi na phasa hatshavbo gu dzi vega wulangani nya madhota ni gu hi vbweta gu va yeyedza lihaladzo ni gu vbevbugisa thumo wawe.