Lito “ngudzu” Pedro a li thumisidego, khu mambe maganelelo li nga tshamuseya gilo gi “thawuludzidwego.” Gipandre nya wuvili nya livhesi leli, gya gu tshamuseya esi lihaladzo lolo nya likhongolo li girago. Ilo la gu fenengedza sighoho sa vandriyathu. Khu giyeyedzo, dundrugeya khu meza yi nga rweregeya nigu yi gu na ni sivbalana. Si nga kodzega gu dzega panu u yi thawuludza gasi gu yi fenengedza, ganiolu nasiri sivbalana nya sidugwana basi ganiolu satshavbo. “Gu fenengedza” sa gu fana ni gu divaleya. Khu ndziya nyo fane, ha gu ba hiri ni lihaladzo nya likhongolo khu vandriyathu hi nga si kodza gu fenengedza sighoho sawe, nasiri gimwegyo mwendro sivili, ganiolu “nya singi”. Lihaladzo hi gu nalo khu vambe li yede gu tiya gasi hi si kodza gu divaleya sihoso hi giredwago khu vandriyathu ambari isoso sa gu ba si garadza. (Kol. 3:13) Tepo hi divaleyago vambe ha gu yeyedza gu khethu lihaladzo lathu li tiyide nigu ha gu vbweta gu tsakisa Jehovha. Mukhedziseyi 11/23 dzipaj. 11-12 dzipar. 13-15

Tepo Josiya a nga ba ari ni 26 myaga a di pheya gu vbahedza tempele ya Jehovha. Khumo va nga “tugula Libhuku nya Nayo wa PFHUMU Nungungulu, owu va nga ningwago khavbo ga Mosi.” Tepo Pfhumu yi ngapwa mahungu nya libhuku lolo, yi di dzegeya gu vbindrugedza silo nyo khaguri yi bwe yi engisa esi si nga ba si lovidwe. (2 Dzik. 34:14, 19-21) U ngu zama gu leri Bhibhiliya tshigu ni tshigu? Abari gu ina, si ngu gimbiya gwadi? Ina u ngu lova mavhesi nyo khaguri ma na gu phasago? Tepo Josiya a nga ba ari ni 39 myaga a di gira gihoso nya gikhongolo gi nga gira gu a songwa. Wulangani nya gu tumbe Jehovha uye a di dzi tumba. (2 Dzik. 35:20-25) Ginani hi gi hevbulago? Ethu hi yede gu simama gu manega ni wupari nyo tiye ni Jehovha na si si khatadzisegi tanga hi gu nayo mwendro tepo hi gu nayo na hi gu mu thumeya. Gasi hi simama gu gira isoso, hi yede gu gombeya ga Jehovha hi mu lomba sileletelo saye, hi hevbula Bhibhiliya ni gu engisa wusingalagadzi hi ningwago khu Makristo ma vidzidwego. Khu kharato, kha wu na nga khaleya gu gira sihoso nigu u na tsaka. — Jak. 1:25. Mukhedziseyi 09/23 dzipaj. 12-13 dzipar. 15-16

Bhibhiliya yi ngu ganeya khu vanyamayi nya vangi va nga haladza Jehovha va bwe va mu thumeya. Kha nga wu ganeyago lowo wu gu khuwo “silo khu gu ninganiseya ni gu tumbega siloni satshavbo.” (1 Thim. 3:11) Ganiolu, muhuno, vaphya va na ni siyeyedzo nya vandriyathu mabandlani va nga si pimedzeyago. Vandriyathu nya vanyamayi, ina mu nguti ndriyathu a gu giyeyedzo nya gyadi mu nga mu pimedzeyago? Khedziseya makhalelo yaye. Khavbovbo, wona edzi u nga pimedzeyago khidzo makhalelo yoyo. Likhalelo nya lisima Mukristo a yedego gu manega nalo gudzinogisa. Ndriyathu nya nyamayi a gu dzi nogisa, a na manega ni wupari nya wadi ni Jehovha ni vambe. Khu giyeyedzo, Ndriyathu nya nyamayi a haladzago Jehovha ni gu dzi nogisa, a ngu hatha gu landrisa gileletelo gi lovidwego omu nya libhuku la 1 Vakorinto 11:3 li ganeyago khava Jehovha a va hathidego gasi gu thangeya libandla ni ndranga. Mukhedziseyi 12/23 dzipaj. 18-19 dzipar. 3-5