Ginani hi nga gi hevbulago khu gilewugiso gya Jesu nya gu vbindrugedzi mati ma khala vinyu? Ho hevbula khu lisima nya gu dzi nogise. Jesu kha dzi khusedza khu gilewugiso a giridego, nigu uye gima kha dzi khusedza khu satshavbo a giridego. Wulangani nya isoso, uye a di gu dzi nogisa nigu tepo yatshavbo a di gu ninga wuzundzo Papayi waye. (Joh. 5:19, 30; 8:28) Ha gu pimedzeya Jesu khu gu dzi nogisa kha hi na nga dzi khusedza khu satshavbo hi girago. Kha hi yeli gu dzi zundza khigyo, ganiolu hi yede gu bonga Nungungulu khu lithomo hi gu nalo nya gu mu thumeyi. (Jer. 9:23, 24) Hongoleni hi ningani wuzundzo Jehovha wu mu fanekeyago. Kholu ethu gima kha hi na nga si kodza gu gira silo nya sadi nya mba phasedzedwa khu Jehovha. (1 Kor. 1:26-31) Tepo hi dzi nogisago ethu kha hi na nga vbweta gu zundzwa khesi hi giredego vambe. Hi ngu tsakiswa khu guti gu khethu Jehovha a ngu ninga lisima satshavbo hi girago. (Fananisa ni Matewu 6:2-4; Hebh. 13:16) Khu lisine, hi na tsakisa Jehovha tepo hi pimedzeyago edzi Jesu a yeyedzidego khidzo gu dzi nogisa. — 1 Ped. 5:6. Mukhedziseyi 04/23 paj. 4 par. 9; paj. 5 dzipar. 11-12

Mupostoli Pawulo kutside Makristo gu khathala khu vambe. Hi nga wu thumisa kharini wusingalagadzi wowu mitshanganoni? Khu gu dundruga gu khuwe vambe navo va ngu dzina gu hlamula mitshanganoni. Nga dundrugeya khesi: Tepo u bhulago ni dzipari dzago, ina u di hadzi gu dzi ninga lithomo nyo ganeye nidzo? Khu lisine ina, kholu uwe wa gu vbweta gu khuwe anidzo dzi patega omu nya mabhulo yanu. Khu ndziya nyo fane, ethu ho vbweta gu khethu vatshavbo va manega ni lithomo nyo ningeye mihlamulo mitshanganoni. Khu lisine, ndziya nya yadi nyo tiyise khiyo vandriyathu khu gu va ninga lithomo nyo ganeye khu gukhodwa gwawe. (1 Kor. 10:24) Hi nga ninga lithomo gasi vambe va patega avba nya mitshangano khu gu hi ningeya mihlamulo nyo role. Ambari wa gu ningeya hlamulo nyo role, potsa gu ganeya silo nya singi. Kholu wa gu hlamula yatshavbo paragarafu, vambe kha va na nga mana gilo nyo hlamule. Mukhedziseyi 04/23 dzipaj. 22-23 dzipar. 11-13

Hi yede gu dundruga gu khethu, gilo nya lisima gu phasa vambe ngudzu-ngudzu khu gu tshumayela. Hi yede gu dzi vbevbugisa tepo hi girago thumo wathu nya gu tshumayele. Vathu hi va tshumayelago va na ni mawonelo nya gu hambane khu Nungungulu, va guta khu malanga nya gu hambane nigu va na ni mitumbunuku nya gu hambane. Mupostoli Pawulo a di gu dzi pwananisa ni siemo nya gu hambane-hambane, nigu ethu hi nga hevbula khu giyeyedzo gyaye. Jesu a di hatha Pawulo gasi gu thuma kha nga “mupostoli . . . [wa] vanyamayigo.” (Rom. 11:13) Khu kharato, Pawulo tshumayede Vajudha, Vagreki, vathu va nga ba va hevbude ngudzu, ava va nga mba hevbula ngudzu ni dzipfhumu. Gasi gu kuha myonyo nya vathu vatshavbo, Pawulo a di dzi gira “satshavbo gasi gu mana vathu nya mafumbo yatshavbo.” (1 Kor. 9:19-22) Vathu a nga ba a ganeya navo, a di gu dundrugeya khumo va nga ba vata khumo ni esi va nga ba va si khodwa, isoso si mu phaside gu dzi pwananisa navo gasi gu va phasa gu khodwa ga Nungungulu. Anethu hi na dugeleya thumoni gwathu nya gu tshumayele ha gu dzi pwananisa ni giemo gya moyo ni moyo hi mu manago. Mukhedziseyi 07/23 paj. 23 dzipar. 11-12