Lihaladzo hi gu nalo khu Nungungulu li ngu gira vathu nyo tumbege va vbweta gu dhumisa lina laye khu monyo wawe watshavbo. Dhavhidhe pwisiside gu khuye gu dhumisa lina la Jehovha so thula gu dhumisa Jehovha kamo. Tepo hipwago lina la Jehovha, ha gu dundrugeya khedzi a khadego khidzo, makhalelo yaye nya yadi ni silo nya sadi a girago. Dhavhidhe a di gu vbweta gu dhumisa lina la Papayi waye kholu Jehovha agide. Uye a di gu vbweta gu gira isoso ‘khu gu thumisa satshavbo a nga ba ari naso’ mwendro khu monyo waye watshavbo. Khu ndziya nyo fane, Valevhi va di gu thangisa ngudzu lithomo leli nya gu dhumise Jehovha. Khu gu dzi nogisa, avo va di dzumede gu khavo malito yawe gima ma di hadzi gu mba si kodza gu ninga lina la Jehovha wudhumo wu vbwetegago. (Neh. 9:5) Nya mba kanakana, gudzinogisa gogo gu reside gutsaka monyoni ga Jehovha. Mukhedziseyi 02/24 dzipaj. 9-10 par. 6

Jehovha kha vegi gupima avba nya sihoso u giridego gasi gu vboheya misuwo yago. (2 Kor. 8:12) Hevbula khu sigaradzo u tshangango naso. Vega gupima ga esi u si kodzidego gu gira. Bhibhiliya yari khiyo: “Nungungulu lulamide, khu kharato gima kha na nga divala thumo wanu.” (Hebh. 6:10) Khu kharato, anuwe kha wu yeli gu divala. Dundruga khesi u si kodzidego gu gira kala olu. Khu giyeyedzo, gu manega ni wupari ni Jehovha, gu ganeya khuye ga vambe vathu mwendro gu bhabhatiswa. Kha nga olu u si kodzidego gu vboheya misuwo ya liphuvboni u nga ba uri nayo gale, u na si kodza gambe gu vboheya misuwo u gu nayo olu. Khu gu phaswa khu Jehovha, uwe u nga si kodza gu vboheya misuwo yago. Tepo u simamago gu dzi garadza gu vboheya misuwo yago ya liphuvboni, u nga divale khu litsako u lipwidego khu gu wona Jehovha na gu phasa ni edzi a gu kategisidego khidzo. (2 Kor. 4:7) Wa gu mba khala khu mawogo, uwe u na hakha makategwa nya mangi. — Gal. 6:9. Mukhedziseyi 05/23 paj. 31 dzipar. 16-18

Jehovha a gu vbwetedza dzindziya gasi gu yeyedza vathu vaye gu khuye a ngu va haladza nigu a ngu va tsakeya. Milowo ya gu yeyedza siemo sivili Jehovha a nga embeya Jesu gu khuye uye Gyanana Gyaye a gi haladzago nigu gi mu tsakisago ngudzu. (Mat. 3:17; 17:5) Ina u ngu dzina gupwa Jehovha na gu embeya gu khuye a ngu gu tsakeya? Jehovha kha hi embeyi isoso khu dzandzini, ganiolu a gu hi embeya khu gu thumisa Lito laye. Tepo hi lerigo malito nyo mbure aya Jesu a embedego vapizane vaye, so gira gu khatshi ha “gupwa” Jehovha na gu hi embeya malito yoyo. Jesu a di gu pimedzeya makhalelo ya Papayi waye. Khu kharato, tepo hi lerigo gu khethu Jesu yeyedzide gu khuye a di gu tsakeya valandreyi vaye nya mba vbeleya, ganiolu nyo tumbege, ethu hi nga dundrugeya Jehovha na gu hi embeya malito yoyo. (Joh. 15:9, 15) Tepo hi tshanganago ni sigaradzo, kha si thuli gu khiso kha hi tsakedwi gambe khu Nungungulu. Gu diga isoso, sa gu hi ninga mathomo nya gu yeyedze edzi hi haladzago khidzo Jehovha ni edzi hi mu tumbago khidzo. — Jak. 1:12. Mukhedziseyi 03/24 paj. 28 dzipar. 10-11