Ethu nethu hi nga yeyedza lihaladzo vandriyathu khu gu khala dzipari dzawe hi bwe hi vbedza tepo navo. (2 Kor. 6:11-13) Nya vangi gwathu libandlani ha guta khu malanga nya gu hambane-hambane nigu hi na ni makhalelo nyo hambane. Hi na si kodza gu tiyisa lihaladzo lathu khu vambe, ha gu vega gupima avbo nya makhalelo yawe nya yadi. Ndrani nya tshanisa nya yikhongolo hi yede gu yeyedza lihaladzo vandriyathu. Tepo tshanisa yoyo yi na pheyago, Jehovha a na hi vhikeya kharini? Wona esi Jehovha a embedego vathu vaye gu gira tepo Bhabhiloni wa gale a nga wugedwa. Uye a di khuye: “Vathu vangu, Indrani, belani dzinyumbani gwanu mu dzi segela malimba, mu sihala umo gikhatinyana kala [tshanisa] yi vbindra.” (Isa. 26:20, NM) Adzina saye hi na landrisa sileletelo sasimweso ndrani nya tshanisa nya yikhongolo. Mukhedziseyi 07/23 dzipaj. 6-7 dzipar. 14-16

Yeyedza khu mithumo gu khuwe u ngu dinganiseya.” Dzi wudzise gu khuwe: ‘Ina vathu va ngu nyi wona nga muthu nya gu dinganiseye, a dzi vbevbugisago ni gu laphisa monyo? Mwendro va gu nyi wona nga muthu nya kanu, nyo garadze mwendro gu banga hungo? Ina nyi ngu engiseya vambe nyi bwe nyi gira esi va si vbwetago sa gu kodzega?’ Tepo hi dzi garadzago gu khala vathu nya gu dinganiseye ha gu pimedzeya Jehovha ni Jesu. Gudinganiseya sa gu pata gu dzi vbevbugisa tepo giemo gyathu gi vbindrugedzago. Gu vbindrugedza nya giemo gu nga hi vangeya sigaradzo hi nga mba si vireya. Khu giyeyedzo, hi na tshuka hi dwala, hi hamuga dzitsapawu nigu sigaradzo nya politika si nga tshuka si hi kuha khu ndziya nyo khaguri. (Muh. 9:11) Gu vbindrugedza nyo khaguri umo nya hengeledzano yathu, gu nga tshuka gu khala gilingo gwathu. U nga si kodza gu dzi pwananisa nagyo wa gu gira silo sesi nya 4: 1) gu dzumeya khuwe giemo gyago gi vbindrugedzide, 2) gu mba vega gupima avbo nya silo si vbindridego, 3) gu vega gupima avbo nya silo nya sadi ni 4) gu gireya silo nya sadi vambe. Mukhedziseyi 07/23 paj. 22 dzipar. 7-8

Muprofeti Dhaniyeli a diri muphya tepo vavelegi vaye va nga mu dzega khu tigoni gwaye nya mavelego Jerusalema, kha nga gibotswa. Ambari olu Dhaniyeli a nga ba ari muphya, uye a di samadzisa masotswa ya Bhabhiloni. Avo va di wona gu khavo Dhaniyeli kha nga ba a ‘haside nigu a di mburide.’ Ni gu gambe a di gu dugeya khumo nya ndranga yi nga ba yiri ni lisima. (1 Sam. 16:7) Khiso si nga gira Vabhabhiloni va vbweta gu trenari Dhaniyeli gasi gu thuma nyumbani nya wufumo. (Dhan. 1:3, 4, 6) Jehovha a di gu haladza Dhaniyeli, khu kotani nya olu a nga ba a hathide gu mu thumeya. Dhaniyeli, adzina a diri ni 20 myaga tepo Jehovha a nga khuye a di gu fana ni Nowa ni Joba. Khu kharato, Jehovha a di gu wona Dhaniyeli na lulamide ngudzu gu fana ni Nowa ni Joba, va nga ba va mu thumede khu myaga nya yingi. (Gen. 5:32; 6:9, 10; Joba 42:16, 17; Ezek. 14:14) Nigu Dhaniyeli a vbanyide tepo nyo laphe, nigu Jehovha a mu haladzide yatshavbo tepo yoyo.— Dhan. 10:11, 19. Mukhedziseyi 08/23 paj. 2 dzipar. 1-2