Mupostoli Pedro a di gu tumbegide, nigu kha dzumeleya gilo gi mu himbedzeya gu landreya Jesu. Khu giyeyedzo, ga tepo nyo khaguri, Jesu a di ganeya khu silo valandreyi vaye va nga mba si pwisisa. (Joh. 6:68) Nya mba pheya khu gu pimisa mwendro gu lomba Jesu a va tshamuseya, nya vangi va di hunga gu ema gu landreya Jesu. Ganiolu, Pedro kha gira isoso, a di simama gu tumbega a bwe a ganeya gu khuye khu Jesu basi a gu “na ni malito ma ningago womi nya gupindruge.” Jesu a di gu dziti gu khuye Pedro ni vambe vapostoli va di hadzi gu mu diga. Ganiolu, Jesu a di ganeya gu khuye, Pedro a di hadzi gu tiya a bwe a simama gu tumbega. (Luka 22:31, 32) Jesu a di gu pwisisa gu khuye: “Monyo wu ngu dzina, ganiolu givili gi garade.” (Marko 14:38) Khu kharato, ambari tepo Pedro a nga mu bomba, Jesu kha mu tsukula. Tepo Jesu a nga wuswa khu gufani a di dzi wonegisa ga Pedro, ganiolu adzina saye Pedro a diri enga. (Marko 16:7; Luka 24:34; 1 Kor. 15:5) Khu lisine, isoso si tiyiside Pedro kholu a di gu vbede tshivba khu kotani nya esi a nga ba a giride. Mukhedziseyi 09/23 paj. 22 dzipar. 9-10

Nungungulu a ngu divaleya sighoho sa vale va khodwago gwaye. Uye a gu divaleya khu gu vbeleya nigu kha khaleyi gu dundruga sihoso a giridego muthu yoyo. (Ndzi. 32:1, 2) Gwaye, muthu yoyo a lulamide nigu a mwalo gihoso khu kotani nya gukhodwa gwaye. Lisine gu Abrahama, Dhavhidhe ni sithumi nyo tumbege sa Jehovha si ranidwe gupwani vathu nyo lulame, ambari ulolo avo kha va nga ba va vbelede nigu va diri sighohi. Ganiolu, khu kotani nya gukhodwa va nga ba vari nago, Jehovha kha ninga lisima sihoso sawe ambari gu va fananisa ni vathu va gu mba mu khozeya. (Efes. 2:12) Ga lidangaliya laye a lovedego Varoma, mupostoli Pawulo a tshamusede gu khuye hi yede gu manega ni gukhodwa ha gu vbweta gu khala pari ya Jehovha. Khu kharato, kha nga Abrahama ni Dhavhidhe, ha gu manega ni gukhodwa nya gu tiye hi na khala nethu dzipari dza Jehovha. Mukhedziseyi 12/23 paj. 3 dzipar. 6-7

Muhuno, Makristo yatshavbo ma na ni lithomo nya gu gireye miphaso Jehovha, khu gu thumisa tepo yawe, tshivba ni dzithomba dzawe gasi gu seketeya mithumo yi girwago khu Mufumo wa Nungungulu. Hi nga yeyedza gu khethu hi ngu ninga lisima lithomo nya gu khozeye Jehovha khu gu gira satshavbo hi si kodzago gasi gu mu thumeya. Mupostoli Pawulo ganede khu silo nya singi hi yedego gu gira gasi gu khozeya Jehovha. (Hebh. 10:22-25) Silo soso so pata gu gombeya ga Jehovha, hi tshumayela vambe khu gitumbiso hi gu nagyo, gu manega mitshanganoni tepo yatshavbo, hi tiyisana khu gyathu “ngudzu-ngudzu olu hi wonago gu khethu litshigu [la Jehovha] li ngu vboha.” Nigu ga libhuku la Gutuledwa, hi hevbude gu khethu ngilozi ya Nungungulu yi ganede gu khiyo: “Khozeya Nungungulu!” nigu yi ganede isoso guvili gasi yi yeyedza gu khiyo silo nya lisima. (Gutu. 19:10; 22:9) Ethu kha hi dzini gu divala esi hi si hevbulago khu tempele nya yikhongolo ya liphuvboni ni lithomo hi gu nalo gasi gu khozeya Nungungulu wathu, Jehovha. Mukhedziseyi 10/23 paj. 29 dzipar. 17-18