Dhomingu, 21 nya Setembro
Vanyamayi navo gu vbwetega na vari vathu . . . va girago silo khu gu ninganiseya ni gu tumbega siloni satshavbo. — 1 Thim. 3:11.
Si ngu hlamadzisa gu wona gyanana na gi gu dandra gi khala muthu nya khongolo. Nigu kha si vbwetegi gu gi dzi garadza gasi gu dandra. Ganiolu, gasi gu dandra khu liphuvboni si hambanide. (1 Kor. 13:11; Hebh. 6:1) Gasi muthu a si kodza gu manega ni wupari nyo tiye ni Jehovha a yede gu dzi garadza. Gu diga isoso, a yede gu phaswa khu liphuvbo nya guage gasi gu manega ni makhalelo nya yadi, gu haguleya makodzelo ni gu dzi dongiseya gasi gu gira mithumo nya yingi mindru watshigu. (Mav. 1:5) Jehovha a di vanga vathu gasi va khala vama mwendro vanyamayi. (Gen. 1:27) Lisine gu vama ni vanyamayi va hambanide khu givili, ganiolu va hambanide gambe khu dzimbe dzindziya. Khu giyeyedzo, Jehovha a di ninga vama ni vanyamayi mithumo nyo hambane ni makodzelo ma nga hadzi gu va phasa gu gira gwadi mithumo yawe. — Gen. 2:18. Mukhedziseyi 12/23 paj. 18 dzipar. 1-2
Muvhulo, 22 nya Setembro
Gimbiyani mu ya gira vapizane vathu nya mayigo yatshavbo, mu va bhabhatisa khu lina la Papayi, ni la Gyanana, ni la liphuvbo nya guage. — Mat. 28:19.
Ina Jesu a di gu vbweta gu khuye vambe va thumisa lina la Papayi waye? Ina. Vathangeyi nyo khaguri nya dzitshetshi va di gu khodwa gu khavo gu ganeya lina la Nungungulu kha si yeyedzi githawo, ganiolu Jesu kha diga silo soso si gu mba seketedwa omu nya Bhibhiliya si mu himbedzeya gu dhumisa lina la Papayi waye. Dundrugeya tepo Jesu a nga vbanyisa mwama moyo a nga ba ari ni madhemoni gipandreni gya Vagerazi. Vathu va di thava ngudzu Jesu va bwe va mu lomba gasi gu duga khu gipandreni mule. (Marko 5:16, 17) Ambari ulolo, Jesu a di gu vbweta gu khuye vathu va mule vati lina la Nungungulu. Khu kharato, Jesu a di embeya mwama a mu vbanyisidego gasi gu embeya vathu gu khuye a di vbanyiswa khu Jehovha nasiri khuye. (Marko 5:19) Jesu a ngo vbweta gu khuye lina la Papayi waye li tidwa mafuni gwatshavbo. (Mat. 24:14; 28:20) Ha gu gira gipandre gyathu, Pfhumu yathu Jesu yi na tsaka ngudzu. Mukhedziseyi 02/24 paj. 10 par. 10
Mavili, 23 nya Setembro
U emisanide ni silo nya singi khu kotani nya lina langu. — Gutu. 2:3.
Hi ngu tsaka ngudzu khu gu gira gipandre nya hengeledzano ya Jehovha matshigoni yaya nyo garadze. Womi mafuni momu wu ngu garadza ngudzu, ganiolu Jehovha a hi ningide vandriyathu gasi gu hi phasa. (Ndzi. 133:1) Uye a ngu hi phasa gu mana litsako ndrangani. (Efes. 5:33–6:1) Uye a ngu hi ninga guti hi gu vbwetago gasi hi pala gu garadzega ni gu mana litsako. Hi yede gu dzi garadza, gasi hi simama gu thumeya Jehovha khu gutumbega. Khu ginani? Kholu dzimbe dzitepo hi nga khunguvanyega khesi vambe va girago mwendro gu ganeya. Ethu hi nga dzipwa na hi vbede tshivba tepo hi girago sihoso, ngudzu-ngudzu ha gu gira sihoso sasimweso khu gu phindra-phindra. Hi yede gu simama gu timiseya thumoni ga Jehovha 1) tepo ndriyathu a hi khunguvanyisago 2) tepo pari yathu nya wugadzi yi hi khunguvanyisago ni 3) tepo hi dzipwago na hi vbede tshivba khu sihoso hi giridego. Mukhedziseyi 03/24 paj. 14 dzipar. 1-2