Dhomingu, 28 nya Setembro
Litshigu nyi na gu gu lombago gu nyi phasa, valala vangu va na bwelela hwane va thava; eni nyi ngu dziti gwadi gukheni Nungungulu a na ni eni. — Ndzi. 56:9.
Livhesi leli la gu ganeya khu gilo gi phasidego Dhavhidhe gu pala hwanga waye. Ambari olu womi waye wu nga ba wu romo mhangoni, uye dundrugede khesi Jehovha a nga hadzi gu mu gireya. Dhavhidhe a di gu dziti gu khuye Jehovha a di hadzi gu mu vbulugisa khu tepo yakone. Kholu Jehovha a di gu ganede gu khuye Dhavhidhe a na khala Pfhumu yi nga hadzi gu landreya Israyeli. (1 Sam. 16:1, 13) Ga Dhavhidhe, satshavbo esi Jehovha a si tumbisidego si di hadzi gu tadzisega. Ginani Jehovha a tumbisidego gu gu gireya? Ethu kha hi vireyi gu khethu a hi vhikeya ga satshavbo sigaradzo sathu. Ganiolu, dundruga gu khuwe satshavbo sigaradzo u tshanganago naso mafuni momu nyo vivbe, Jehovha a na si fuvisa mafuni nya maphya. (Isa. 25:7-9) Muvangi wathu a na ni tshivba nya gu wuse ava va fudego, gu hawulugisa madwali yathu ni gu fuvisa vawugeyi. — 1 Joh. 4:4. Mukhedziseyi 01/24 paj. 6 dzipar. 12-13
Muvhulo, 29 nya Setembro
Kategide wule a divaledwago sighoho saye, wule giwono gyaye gi futidwego. — Ndzi. 32:1.
Dundruga gu khuwe khu ginani u nga hendzeledza womi wago ga Jehovha u bwe u bhabhatiswa. Uwe u di gira silo sesi sa sivili kholu u di vbweta gu manega ni wupari nyo tiye ni Jehovha. Dundruga khegi gi gu phasidego gu tugula gu khuwe u li manide lisine. U diti Jehovha u bwe u pheya gu mu haladza ni gu mu ninga githawo. U di haguleya gukhodwa ni gu kutsega gu dzi laya. U di ema gu gira esi Jehovha a si nyenyago u bwe u pheya gu gira esi si mu tsakisago. U dzipwide nu tshulugide tepo u nga tugula gu khuwe Jehovha a gu divalede. (Ndzi. 32:2) U di patega omu nya mitshangano nya Wukristo u bwe u pheya gu bhuleya vambe esi u si hevbudego. Kha nga Mukristo u dzi hendzeledzidego ni gu bhabhatiswa, u womo ndziyani nya womi, nigu u dzi emisede gu gira satshavbo u si kodzago gasi gu simama avba nya ndziya yeyi. (Mat. 7:13, 14) Simamani na mu tiyide mu si tsekatseki, mu dhumisa Jehovha mu bwe mu engisa milayo Yaye. Mukhedziseyi 07/23 paj. 17 par. 14; paj. 19 par. 19
Mavili, 30 nya Setembro
Nungungulu tumbegide. Kha na nga dzumeleya gu khuye mu tshangana ni silingo mu na tandregago gu si timiseya. Mwa gu lingwa, Nungungulu a na mi ninga makodzelo nyo timiseye gilingo gyogyo. — 1 Kor. 10:13.
Wa gu dundrugeya khu nombelo u nga gira na wu gu tumbisa Jehovha gu khuwe u na gira gugola gwaye, u na mana tshivba nya gu timiseye sigaradzo. Khu giyeyedzo, ina u di hadzi gu pheya gu haladzana ni muthu na wu si mu vbweti? Khu lisine, ahihi! Uwe u tumbiside Jehovha gu mba gira silo nya nga isoso. Wa gu mba dzumeleya gudogoreya nya mba gwadi gu dandra monyoni gwago, kha si na nga vbwetega gu mindru watshigu u dwana nago gasi u gu pala. Uwe u na “gimbilela hwindzo” ni “va nya guvivbedwa khu monyo.” (Mav. 4:14, 15) Uye a di gu dzi emisede gu tsakisa Papayi waye. Gu fana ni Jesu, dzegeya gu potsa ni gevbini gi na zangarisago Nungungulu, oyu u hendzelidzidego womi wago gwaye. (Mat. 4:10; Joh. 8:29) Khu lisine, sigaradzo ni silingo sa gu gu ninga lithomo nya gu yeyedze gu khuwe u dzi emisede gu ‘simama gu landreya’ Jesu. Nigu u nga tiyisega gu khuwe Jehovha a na gu phasa gu gira isoso. Mukhedziseyi 03/24 dzipaj. 9-10 dzipar. 8-10