Obhadhiya
1 Giwoniso gya Obhadhiya,* khegi:
Pfhumu yi Khugegidego Ngudzu, Jehovha, a ngu ganeya esi maningano khu Edhomi, khuye:
“Hi pwide mahungu na mata khiyo ga Jehovha,
Gu rumedwe muningeyi nya mahungu gasi guya embeya mayigo, khuye:
‘Khugani, hongoleni hi dzi dongiseya gasi guya dwana nyimbi naye.’”
2 “Nga khedza! Nyi gu giride nya dugwana ga mayigo yatshavbo;
Uwe u ngu kanyiswa ngudzu.
3 Matshandza ya monyoni gwago ma gu sengide,
Uwe u vbanyago wuthaveloni nya giwindri,
U vbanyago vbatshani, u ganeyago monyoni gwago, khuwe:
‘Khu mani a na nyi girago nyi tshiga mafuni?’
4 Ambari wa gu vbaha nyumba yago vbatshani nga lighama,
Mwendro u vega gisakha gyago vbakari nya dzinyeledzi,
Eni nyi nga si kodza gu gu tshisa,” a ngu ganeya Jehovha.
5 “Wa gu tedwa khu dzimbafa, vaphangi vbakari nya wutshigu,
Ina kha va na nga dzega esi va si vbwetago?
Mwendro guta vavbweri nya dziuvha,
Ina kha va na nga tshiya dzidugwana gasi gu u roledzeya?
(Uwe u na fuviswa khu guvbeleya.*)
6 Esawu vbwetedzedwe kharini!
Dzi vbwetedzedwe kharini dzithomba dzaye dzi sihadego.
7 Va gu tutumiside kala mivbinganoni.
Vatshavbo va nga ba va giride pwanano nago va gu sengide.
Vathu va nga ba vari ni gurula nago va gu pade.
Avo va hodzago nago va na riya naphwi gasi gu gu mola,
Ganiolu uwe kha wu na nga si tugula isoso.
8 Ga litshigu lolo,” Jehovha wari khuye,
“Ina khandreni nyi na vbedzago vagengeyi va Edhomi
Ni guti ga gipandreni nya sigomo gya Esawu?
9 Uwe Temani, vadwani vago va na thava,
Kha nga olu moyo ni moyo wawe a gomogo gipandreni nya sigomo gya Esawu a na fuviswago khu gu songwa.
10 Khu kotani nya wuvivbi wu giredwego ndriyago Jakobe,
Dzitshoni dzi na gu fenengedza,
Nigu u na mwalalega kala gupindruga.
11 Ga litshigu u nga khala u khedziseya basi,
Ga litshigu valombo va nga dzega mabuthu ya Jakobe va ma yisa wugumbini,
Tepo vathu nya mambe mayigo va nga beya khu mwanya va veta dzisolo khu Jerusalema,
Uwe u di gira khatshi u vana gyawe.
12 Kha wa nga ba u yede gu tsaka khu litshigu la ndriyago, litshigu nya dzitshoni dzaye,
Kha wa nga ba u yede gu tsaka khu vathu va Judha,
Nigu kha wa nga ba u yede gu ganeya khu ndziya nya gu dzi khusedze khu litshigu nya gu tshaniseke gwawe.
13 Kha wa nga ba u yela gu beya khu mwanya nya vathu vangu litshigu va nga thegedwa khu mhango,
Kha wa nga ba u yela gu tsaka khu kotani nya gu tshaniseke gwawe, litshigu va nga thegedwa khu mhango,
Kha wa nga ba u yela gu phanga dzithomba dzawe litshigu va nga thegedwa khu mhango.
14 Kha wa nga ba u yela gu khala umo nya mahandzakanya nya dzindziya gasi gu songa ava va nga ba va tutuma,
Kha wa nga ba u yela gu ningeya ava va nga vbuluga khu litshigu nya gu tshaniseke.
15 Litshigu la Jehovha nya gulamule mayigo yatshavbo lomo vbafuvbi.
Esi u nga gireya vambe, anuwe u na giredwa sasimweso.
Esi u nga gireya vambe anuwe si na gu wuyela.
16 Kholu gufana ni enu mu sedego gigomoni nya guage,
Mayigo yatshavbo ma na seya kala gupindruga.
Ma na seya ni gu midza,
Si na gira nga khatshi kha va nga tshuka na va manegide.
17 Khu kharato Gigomoni gya Siyoni gu na manega ava va na vbulugago,
Nigu igyo gi na khala nya guage,
Nigu ndranga ya Jakobe yi na bweledzedwa dzithomba dzi yi lumbago.
18 Ndranga ya Jakobe yi na khala nilo,
Ndranga ya Josefa yi na khala malavbelavbe,
Ndranga ya Esawu yi na khala mavivi,
Avo va na yi vbisa yi vbeya,
Kha gu na nga manega muthu nyo vbuluge ga ndranga ya Esawu,
Kholu khuye mune Jehovha a ganedego.
19 Avo va na fumeya Negebhi ni gipandre nya gigomo gya Esawu
Gya Sefela ni litigo la Vafilisitiya.
Va na fumeya gipandre gya Efrayimi, gipandre gya Samariya,
Ni gu Bhejami a na fumeya Gileyadhi.
20 Ga ava va gomogo wugumbini nya likhokhola leli,
Vathu va Israyeli va na lumba litigo la Vakhanani kala Sarepita.
Avo va gomogo wugumbini ga Jerusalema va nga ba va romo Sefaradhi va na fumeya madhoropa ya Negebhi.
21 Gu na gweya vavbulugisi Gigomoni gya Siyoni
Gasi guya lamula gipandre nya sigomo gya Esawu,
Nigu wufumo wu na lumba Jehovha.