Hi nga hevbula ginani khu malangaliya ya Pedro?

1. Liphuvbo nya guage li phaside Pedro gu rini?

MUPOSTOLI Pedro a di gu dziti gu khuye a di hadzi gufa nya mba hweya. Uye thumede Jehovha khu myaga nya yingi. Thumide ni Jesu ndrani nya thumo waye nyo tshumayele, nigu tshumayede ga malanga nyo hambane-hambane a bwe a thuma kha nga givbango nya huwo nya guthangeye. Ganiolu, thumo waye wu di si vbohi mahegiso. Khu 62-64 matshigoni yathu, uye a di kutswa khu liphuvbo nya guage gasi gu lova mabhuku mavili nya Bhibhiliya, a gu 1 Pedro ni 2 Pedro. Pedro a di gu vireya gu khuye malangaliya yaya ma phasa Makristo, ambari hwane nya gu ba a fude. — 2 Pedro 1:12-15.

2. Khu ginani malangaliya ya Pedro ma nga lowa khu tepo nya yadi?

² Pedro khu gu phaswa khu liphuvbo nya guage, a lovide malangaliya mavili tepo vandriyaye va nga ba va “garadzega . . . khu kotani nya silingo nyo hambane-hambane.” (1 Ped. 1:6) Vama va nga ba va vivbedwe khu myonyo, va di zama gu tsundzisa libandla khu sihevbudzo nya malipha ni mavbanyelo nya mba handzega. (2 Ped. 2:1, 2, 14) Makristo ma nga ba ma vbanya Jerusalema, nya mba hweya ma di hadzi gu emisana ni “mahegiso nya silo satshavbo,” kholu libuthu la Roma li di hadzi gu fuvisa Jerusalema ni satshavbo si nga ba si gimbeleyana ni Gijudha ga tepo yile. (1 Ped. 4:7) Nya mba kanakana, malangaliya a lovidego Pedro ma phaside Makristo guti esi ma nga ba yede gu gira gasi gu timiseya sigaradzo sawe ni gu dzi dongiseya gasi gu emisana ni simbe sigaradzo mindru watshigu.b

3. Khu ginani hi yedego gu ninga lisima malangaliya ya Pedro?

³ Lisine gu Pedro a di loveya malangaliya yaya ga Makristo ma nga ba ma vbanya teponi yaye, ganiolu Jehovha a di hunga gu pata malangaliya yaya umo nya Lito Laye. Khu kharato, anethu hi nga hevbula nya singi khu malangaliya yaya. (Rom. 15:4) Ethu ha gu vbanya mafuni gu tadego khu wuvivbi, nigu hi ngu tshangana ni sigaradzo si nga hi girago si hi garadzeya gu thumeya Jehovha. Gu diga isoso, nugunugu hi na emisana ni Tshanisa nya Yikhongolo guvbindra sigaradzo esi Vajudha va tshanganidego naso. Khu kharato, sidundrugiso hi si manago umo nya malangaliya ya Pedro, si yede gu khala nya lisima gwathu. Iso si ngu hi phasa gu vireya litshigu la Jehovha, gu pala hwanga nya vathu hi bwe hi haladzana ngudzu. Sidundrugiso sesi, si nga phasa gambe madhota guti edzi ma nga phasago khidzo tshambi wa Jehovha.

SIMAMA GU VIREYA

4. Guya khu 2 Pedro 3:3, 4, gukhodwa gwathu gu nga vbola khu kotani nya ginani?

⁴ Ethu hi randredwe khu vathu va gu mba khodwa siprofeto nya Bhibhiliya. Vathu nyo khaguri va gu hi hega kholu hi tshumayelago khu myaga nya yingi gu khethu mahegiso momo vbafuvbi. Nigu vambe va gu ganeya gu khavo mahegiso gima kha ma na nga vboha. (Leri 2 Pedro 3:3, 4.) Tepo hipwago malito yaya ni muthu nyo khaguri thumoni nyo tshumayele, gihevbuli-khwathu mwendro givbango nya ndranga yathu, adzina saye gukhodwa gwathu gu nga vbola. Ganiolu, Pedro tshamusede esi si nga hi phasago.

5. Ginani gi na hi phasago gu vireya mahegiso khu gulaphisa-monyo? (2 Pedro 3:8, 9)

⁵ Ga vambe, si nga gira gu khatshi Jehovha a gu hweya gu fuvisa silo nyo vivbe mafuni momu. Ganiolu, malito ya Pedro ma ngu hi phasa gu wona silo khu ndziya nya yadi ni gu hi dundrugisa gu khethu edzi Jehovha a yi wonago khidzo tepo yi hambanide ni edzi hi yi wonago khidzo. (Leri 2 Pedro 3:8, 9.) Ga Jehovha 1000 myaga ya gu fana ni litshigu limwedo. Jehovha a ngu laphisa monyo nigu kha vbweti gu khuye ne moyo a fuviswa. Ganiolu, ya gu vboha tepo yakone Jehovha a na fuvisa wuvivbi watshavbo. Nigu ethu hi na ni lithomo nya gu thumise tepo yi tshadego gasi gu tshumayela vathu mafuni gwatshavbo.

6. Ginani hi yedego gu gira gasi gu ‘khala na hi gengede’ tepo hi vireyago litshigu la Jehovha? (2 Pedro 3:11, 12)

⁶ Pedro a gu hi kutsa gu hi ‘khala na hi gengede’ kala li vboha litshigu la Jehovha. (Leri 2 Pedro 3:11, 12.) Hi nga gira kharini isoso? Sa gu kodzega si na ba siri sadi gu dundrugeya tshigu ni tshigu khu makategwa hi na ma manago mafuni nya maphya. Ina u di nga dzi dundrugeya na wu romo ga wulanga nyo mbure ngudzu, na wu gu ndrinda phuvbo nya yadi, na wu gu hodza guhodza nyo tshambe ngudzu ni gu hoyozeya valongo ni dzipari dzago dzi nga wuswa khu gufani? Mwendro u di nga dundrugeya na wu gu hevbudza vathu va nga vbanya gale maningano khedzi siprofeto si nga tadzisega khidzo? Gu dundrugeya khesi, si na gu phasa gu vireya u bwe u tumba gu khuwe mahegiso momo vbafuvbi. Guti esi si na giregago mindru watshigu si na hi phasa gu mba ‘pengiswa’ khu sihevbudzo nya malipha. — 2 Pedro 3:17.

EMA GU THAVA VATHU

7. Gu thava vathu si nga hi kuha kharini?

⁷ Ethu hi ngu dziti gu khethu litshigu la Jehovha lomo vbafuvbi, khu kharato ethu ha gu vbweta gu gira satshavbo hi si kodzago gasi gu tshumayela mahungu nya yadi. Ganiolu, dzimbe dzitepo hi nga thava gu gira isoso. Khu ginani? Kholu ethu ho thava esi vathu va na pimisago khethu, nga esi si giregedego Pedro. Ga wutshigu nya gu lamudwe ga Jesu, Pedro a di thava gu ganeya gu khuye a diri moyo nya vapizane vaye. Nigu bombide dzitepo nya dzingi gu khuye kha nga ba a muti Jesu. (Mat. 26:69-75) Ganiolu, Pedro a pade hwanga waye nigu khu gu landreya lovide na tiyide gu khuye: ‘Mu nga thavi esi va si thavago nigu mu nga garadzegi.’ (1 Ped. 3:14) Malito ya Pedro ma gu hi tiyisegisa gu khayo anethu hi nga ema gu thava vathu.

8. Ginani gi nga hi phasago gu mba thava vathu? (1 Pedro 3:15)

⁸ Ginani gi nga hi phasago gu mba thava vathu? Pedro a di khuye: “Rungudzani Kristo myonyoni gwanu kholu uye Pfhumu yanu.” (Leri 1 Pedro 3:15.) Isoso sa gu pata gu dundrugeya khu tshivba ni gikhalo gi gu na ni Pfhumu yathu Jesu Kristo. Wa gu ba u thava gu bhuleya vambe mahungu nya yadi, dundruga Pfhumu yathu. Dundrugeya Jesu na gu fuma ndzadzini nigu na randredwe khu dzingilozi nya dzingi. Dundruga gu khuwe, uye khuye a gu na ni “wufumu watshavbo ndzadzini ni mafuni,” nigu a tumbiside gu khuye: “Eni nyi nanu matshigu yatshavbo kala guhegisani nya litigo.” (Mat. 28:18-20) Pedro a gu hi kutsa “gu hi dzi emiseya tepo yatshavbo” gasi gu ganeya khesi hi si khodwago. Ina u ngu dogoreya gu tshumayela muthu nyo khaguri thumotuno gwago, xikwatuno mwendro wumbe wulanga? Gupheya, dundrugeya gu khuwe ga giemo muni u dogoreyago gu gira isoso u bwe u dongiseya esi u na ganeyago. Gombeya u lomba gutiya-hwambo, na wu gu tumba gu khuwe Jehovha a na gu phasa gu mba thava vathu. — Mith. 4:29.

“HALADZANANI NGUDZU”

9. Ga giemo muni Pedro a digidego gu yeyedza lihaladzo? (Wona fotu.)

⁹ Pedro hevbude edzi a nga yeyedzago khidzo lihaladzo. Uye a di gu romo tepo Jesu a nga khuye: “Nyi ngu mi ningani nayo nya wuphya wu gu khuwo: Haladzanani. Kha nga eni nyi mi haladzidego, anenu haladzanani.” (Joh. 13:34) Khu tepo nyo khaguri Pedro a di bomba gu hodza ni vandriyaye va nga ba va siri Vajudha kholu a nga ba a thava Makristo nya Vajudha. Mupostoli Pawulo a di ganeya gu khuye esi Pedro a giridego a di gu ‘pfhadzedzeya.’ (Gal. 2:11-14) Pedro a dzumede gu kawukwa nigu hevbude gilogyo. Ga malangaliya mavili a lovidego, uye a tshingiside gu khuye kha hi yeli gu ganeya basi gu khethu hi ngu haladza vandriyathu, ganiolu hi yede gu yeyedza gu khethu hi ngu va haladza.

10. Ginani gi na hi phasago gu yeyedzana “lihaladzo nya wundruye li gu mwalo gupfhadzedzeya?” Tshamuseya. (1 Pedro 1:22)

¹⁰ Pedro a di ganeya gu khuye hi yede gu “manega ni lihaladzo nya wundruye li gu mwalo gupfhadzedzeya,” khu vandriyathu. (Leri 1 Pedro 1:22.) Gasi hi manega ni lihaladzo nya wundruye, hi yede gu engisa satshavbo hi si hevbulago. Silo soso sa gu pata gihevbudzo gi gu khigyo “Nungungulu mwalo gihatheya.” (Mith. 10:34, 35) Kha hi na nga ba hi engisa gileletelo gya Jesu ha gu haladza vathu nyo khaguri basi libandlani. Lisine gu adzina saye hi na ni wupari nyo tiye ni vandriyathu nyo khaguri, nga Jesu a nga ba ari ni wupari nyo tiye ni vapostoli nyo khaguri. (Joh. 13:23; 20:2) Ganiolu, Pedro a gu hi kutsa gu hi dzi garadzeya gu haladza vatshavbo vandriyathu kholu avo va gu gira gipandre nya ndranga yathu.— 1 Ped. 2:17.

11. So thula ginani gu ‘haladzana ngudzu’?

¹¹ Pedro yeyedzide gu khuye si na ni lisima gu ‘haladzana ngudzu’ mwendro khu lisine khu monyo wathu watshavbo. Lito gu “haladzana ngudzu” so thula gu haladza muthu nyo khaguri ambari so ba si garadza gu mu yeyedza lihaladzo muthu yoyo. Khu giyeyedzo, ginani hi nga hadzi gu gira a gu tshuka ndriyathu nyo khaguri a hi khunguvanyisa mwendro gu hi gorosa? Adzina saye, gupheya hi na vbweta guphodza wulangani nyo yeyedze lihaladzo. Ganiolu, Pedro hevbude ga Jesu gu khuye gu phodza kha si tsakisi Jehovha. (Joh. 18:10, 11) Pedro a di lova gu khuye: “Mu nga bweledzeyini guvivba khu guvivba mwendro guvala khu guvala. Ganiolu, bweledzeyani khu makategwa.” (1 Ped. 3:9) Wa gu ba u haladza vandriyago khu lisine, u na yeyedza wuwadi vatshavbo u bwe u zama gu pwisisa muthu a gu khunguvanyisidego.

12. a) Gu haladza ngudzu vandriyathu sa gu hi kutsa gu gira ginani? b) Guya khu vhidhyu yi gu khiyo: Não deixe nada atrapalhar nossa união, ginani hi yedego gu dzi garadzeya gu gira?

¹² Ga lidangaliya laye nyo pheye, Pedro thumiside lito gu ‘haladzana ngudzu.’ Lihaladzo leli, li ngu hi phasa gu mba divaleya basi sighoho nyo khaguri, ganiolu “sighoho nya singi.” (1 Ped. 4:8) Adzina saye Pedro a di gu dundrugide esi a si hevbudego ga Jesu myaga hwane maningano khu gu divaleya. Ga tepo yile, Pedro a di gu pimisa gu khuye a di gu yeyedza wuwadi, tepo a nga khuye a di hadzi gu divaleya ndriyaye “7 nya ugo.” Ganiolu, Jesu hevbudzide Pedro ni vambe gu divaleya “77 nya ugo” mwendro tepo yatshavbo sa gu vbwetega. (Mat. 18:21, 22) Sa gu ba si gu garadzeya gu landrisa wusingalagadzi wowu, u nga vbeyi tshivba. Dzimbe dzitepo, hatshavbo si ngu hi garadzeya gu divaleya. Nya lisima, gu gira satshavbo u si kodzago gasi gu divaleya ndriyago u bwe u andrisa gurula naye.c

MADHOTA KHATHALEYANI GWADI TSHAMBI WA JEHOVHA

13. Khu ginani dzimbe dzitepo si garadzeyago madhota gu mana tepo gasi gu tiyisa vandriyawe?

¹³ Khu lisine, Pedro gima kha divala esi Jesu a mu embedego hwane nya gu ba a wusidwe khu gufani. Jesu a di khuye: “Havisa sinvutana sangu.” (Joh. 21:16) Abari gu u lidhota u ngu dziti gu khuwe malito yaya ma ngu thuma avbo gwago nuwe. Lisine gu si nga garadzeya lidhota gu mana tepo gasi gu khathaleya thumo wowu nya lisima ngudzu. Madhota gupheya ma yede gu khathaleya dzindranga dzawe khu nyamani ni liphuvboni. Gu diga isoso, ma yede gu khala giyeyedzo nya gyadi khu gu hongola thumoni nyo tshumayele, gu dongiseya mitshangano nya libandla, dziasembleya ni dzikongresu. Mambe madhota ma yede gu phasedzeya Kometi yi bhudzisanago ni dziospitali mwendro Departamento local de desenho/Construção. Khu lisine, madhota ma pharegide ngudzu.

14. Ginani gi nga phasago madhota gu havisa gwadi tshambi? (1 Pedro 5:1-4)

¹⁴ Pedro a di embeya madhota gu khuye: “Havisani tshambi wa Nungungulu.” (Leri 1 Pedro 5:1-4.) Abari gu u lidhota, hi ngu dziti gu khethu u ngu haladza vandriyago nigu u ngu dzina gu va khathaleya. Dzimbe dzitepo, u nga dzipwa na wu pharegide mwendro na wu garade, nyo bwe u si si kodzi gu tadzisa thumo wago. Ga giemo gegi u nga gira ginani? Embeya Jehovha edzi u dzipwago khidzo. Pedro lovide gu khuye: “Oyu a thumago, a na thume khu tshivba a ningwago khu Nungungulu.” (1 Ped. 4:11) Vandriyathu adzina saye va ngu tshangana ni sigaradzo nya gu kha si kodzegi gu si lulamisa mafuni momu gu tadego khu wuvivbi. Ganiolu, dundruga gu khuwe: “Muhavisi nya khongolo” Jesu Kristo a nga va phasa gwadi guvbindra uwe. Uye a nga gira isoso olu ni mafuni nya maphya. Jehovha a gu vbweta gu khuye madhota ma havisa ni gu haladza vandriyawe, ma bwe ma “khala giyeyedzo vbakari nya tshambi.”

15. Lidhota nyo khaguri la gu havisa kharini tshambi? (Wona fotu.)

¹⁵ Ndriyathu moyo nyo pwani khu William, a thumago kha nga lidhota khu myaga nya yingi, a ngu liti lisima nya gu havisi vandriyaye. Tepo wu nga pheya tungu nya COVID-19, uye ni mambe madhota, ma di gira satshavbo ma nga si kodza gasi gu ligareya vandriyawe va nga ba va gira gipandre nya mitsawa yawe. Uye a gu tshamuseya gu khuye: “Vandriyathu nya vangi va di gu khala vonga, nigu si di gu vbevbuga gu va manega ni mapimo nya mba yadi.” Tepo ndriyathu nyo khaguri a tshanganago ni sigaradzo, William a gu mu engiseya gwadi gasi gu pwisisa edzi a dzipwago khidzo ni esi a si vbwetago. Khavbovbo, a gu vbweta mabhuku mwendro dzivhidhyu umo nya sayiti yathu gasi gu mu phasa. Uye wari, khuye: “Olu si na ni lisima gu havisa vandriyathu guvbindra gale. Ethu ha gu gira satshavbo hi si kodzago gasi gu phasa vathu va gu mba muti Jehovha, khu kharato hi yede gu gira sasimweso gasi gu phasa vandriyathu gu simama lisineni.”

DZUMEYA GU HEVBUDZWA KHU JEHOVHA

16. Hi nga si thumisa kharini esi hi si hevbudego umo nya malangaliya ya Pedro?

¹⁶ Kala avba, hi manide sihevbudzo nyo khaguri avba nya malangaliya ya mavili ya Pedro. Adzina u wonide gilo u vbwetago gu tshukwadzisa. Khu giyeyedzo, ina u ngu dogoreya gu dundrugeya khu makategwa u na ma manago mafuni nya maphya? Ina u nga dzi vegeya misuwo nya gu tshumayele thumotuno, xikwatuno mwendro wumbe wulanga? Ina u ngu wona dzimbe dzindziya u nga dzi thumisago gasi gu yeyedza lihaladzo nya lisine vandriyago? Madhota, ina mu dzi emisede gu havisa tshambi wa Jehovha khu monyo wanu watshavbo? Adzina u nga tugula gu khuwe somo silo u yedego gu tshukwadzisa, ganiolu u nga dzumeleyi isoso si gu vbedza tshivba. “Pfhumu yi na ni wuwadi,” nigu yi na gu phasa gu vbindrugedza esi si vbwetegago. (1 Ped. 2:3) Pedro a gu hi tiyisegisa gu khuye: “Nungungulu . . . a na mi hevbudza kala mu vidzwa. Uye a na mi tiyisa, a mi ninga tshivba, a mi vega avba nya sisekelo nya gu tiye.” — 1 Ped. 5:10.

17. I wuyelo muni hi na wu manago ha gu dzumeya gu hevbudzwa khu Jehovha hi bwe hi timiseya?

¹⁷ Gupheyani, Pedro a di gu pimisa gu khuye kha yedwe gu manega vbafuvbi ga Jesu. (Luka 5:8) Ganiolu, khu gu phaswa khu Jehovha ni Jesu, Pedro timisede a bwe a simama kha nga mulandreyi wa Kristo. Kha nga handro wakone, Jehovha a mu dzumelede gu beya “Mufumoni nya gupindruge wa Pfhumu yathu ni Muvbulugisi wathu, Jesu Kristo.” (2 Ped. 1:11) Khu lisine, eyi i wuyelo nyo tsakisi ngudzu! Wa gu timiseya nga Pedro, u bwe u dzumeya gu hevbudzwa khu Jehovha, anuwe u na mana wuyelo nya gu vbanye kala gupindruga. Khu ndziya yoyo, u na ‘maneya makungo nya gukhodwe gwago, a gu guvbulugiswa gwago.’ — 1 Ped. 1:9.