NDRIMA NYA GIHEVBULO 20
U nga tshukwadzisa milombelo yago!
“Mu embeledzeleni mabala ya monyoni gwangu.”— NDZI. 62:8.
NDZIMO 45 Esi nyi si pimisago monyoni gwangu
ESI HI NA SI HEVBULAGO AVBA NYA NDRIMA YEYIa
Ethu hi nga gombeya ga Jehovha tshigu ni tshigu gasi hi mu lomba sileletelo hi nga si thumisago womini gwathu (Wona paragrafu 1)
1. Jehovha a gu kovhidhari sithumi saye gu rini? (Wona fotu.)
KHU MANI hi nga mu lombago gu hi thaveleya ni gu hi ninga sileletelo? Ethu hi ngu wuti hlamulo nya giwudziso gegi! Hi nga hidzimeya ga Jehovha Nungungulu khu nombelo kholu uye a ngu hi kovhidhari gu gombeya gwaye. Nigu Bhibhiliya ya gu hi kutsa khiyo “gombeyani tepo yatshavbo.” Khu kharato, hi ngu dziti gu khethu uye a gu vbweta gu khuye hi gombeya gwaye. (1 Tes. 5:17) Hi nga dzipwa na hi tshulegide gu gombeya gwaye hi bwe hi mu lomba sileletelo hi nga si thumisago womini gwathu gwatshavbo. (Mav. 3:5, 6) Khu kotani nya olu Jehovha a gu na ni wuhindzi, a gu hi embeya gu khuye hi nga gombeya gwaye ni ga yevbini tepo.
2. Ginani hi na bhulago khigyo avba nya ndrima yeyi?
2 Ethu hi ngu bonga ngudzu Jehovha kholu a hi dzumeleyago gu gombeya gwaye, khu kharato hi yede gu dusa tepo gasi gu gombeya. Ganiolu, adzina hi ngu dzipwa na si gu lomba gu tshukwadzisa milombelo yathu. Nya gu tsakise khu gu hi ngu mana sileletelo ni gu tiyiswa umo nya Milowo nya guage. Avba nya ndrima yeyi, hi na wona edzi hi nga dzi tshiyelago khidzo tepo gasi gu gombeya khu gu hevbula khu giyeyedzo gya Jesu. Hi na bhula gambe khedzi hi nga tshukwadzisago khidzo milombelo yathu khu gu hi khumbuga 5 silo nya lisima.
JESU A DZI VEGEDE TEPO GASI GU GOMBEYA
3. Ginani Jesu a nga ba a gi pwisisa khu nombelo?
3 Jesu a di gu dziti khuye milombelo yathu yi na ni lisima ga Jehovha. Na ngasi guti mafuni, a wonide Papayi waye na gu hlamula milombelo nya vama ni vanyamayi nya gutumbege. Khu giyeyedzo, Jesu a wonide Papayi waye na gu hlamula milombelo ya Ana, Dhavidhe, Eliya ni vambe. (1 Sam. 1:10, 11, 20; 1 Dzipf. 19:4-6; Ndzi. 32:5) Khiso si giridego Jesu a kutsa valandreyi vaye gu gombeya tepo yatshavbo.— Mat. 7:7-11.
4. Ginani hi gi hevbulago khu milombelo ya Jesu?
4 Jesu a vegede giyeyedzo nya gyadi valandreyi vaye khu milombelo a yi giridego. Ndrani nya thumo waye nya gu tshumayele a di gu gombeya tepo yatshavbo. A di gu dzi vegeya tepo nya gu gombeye, kholu tepo yatshavbo a di gu khala na pharegide khu gu hevbudza vathu. (Marko 6:31, 45, 46) A di gu gira isoso khu gu a vindruga gasi a ya gombeya nari enga. (Marko 1:35) Khu tepo nyo khaguri a di gombeya wutshigu watshavbo na ngasi hungi makungo nya lisima. (Luka 6:12, 13) Ga wutshigu a nga hadzi songwa, Jesu gombede ngudzu gasi gu tadzisa gilo nya lisima avbo nya thumo waye omu mafuni. — Mat. 26:39, 42, 44.
5. Hi nga pimedzeya kharini Jesu tepo hi gombeyago?
5 Giyeyedzo gya Jesu gya gu hi hevbudza khigyo ambari na hi pharegide kharini, ethu hi yede gu dzi vegeya tepo gasi gu gombeya, adzina saye dzimindrudzile, mihani, vbasiyambotuno ambari kamu wutshigu. Tepo hi girago isoso, hi na yeyedza Jehovha khethu hi ngu bonga khu giningwa gegi nya lisima. Ndriyathu nya gupwani khu Lynne a ngu dundruga khedzi a dzipwidego khidzo khu tepo nya gupheye a nga hevbula khu lithomo nya gu gombeye. Uye wari khuye: “Tepo nyi nga hevbula khu tepo nya gupheye gu kheni nyi nga gombeya ga Jehovha ni ga yevbini tepo, si nyi phaside gu mu wona kha nga pari yangu ni gu nyi kutsa gu tshukwadzisa milombelo yangu.” Kha si kanakanise gu khiso anethu hi ngu dzipwa khu ndziya yayimweyo. Khu kharato, hongoleni hi bhula khu 5 silo nya lisima hi nga si khumbugago umo nya milombelo yathu.
5 SILO HI NGA SI KHUMBUGAGO UMO NYA MILOMBELO YATHU
6. Guya khu Gutuledwa 4:10, 11 ginani egi Jehovha a yedego gu hakha?
6 Dhumisa Jehovha umo nya milombelo yago. Mupostoli Johane a di wona 24 madhota ndzadzini na ma gu khozeya Jehovha. Ayo ma di dhumisa Nungungulu ma bwe ma ganeya khayo Uye a ngu yedwa khu gu hakha “wudhumo, wuzundzo ni tshivba.” (Leri Gutuledwa 4:10, 11.) Dzingilozi nya gutumbege anidzo dzi na ni sighelo nya gupwale nya gu dhumise Jehovha, idzo dzi naye ndzadzini nigu dzi ngu si kodza gu muti gwadi, dzi ngu wona makhalelo yaye nya yadi ga satshavbo a girago. Tepo dzi wonago edzi Jehovha a girago khidzo silo, dza gu kutsega gu mu dhumisa. — Joba 38:4-7.
7. Silo muni hi nga dhumisago khiso Jehovha?
7 Anethu hi yede gu dhumisa Jehovha umo nya milombelo yathu. Hi nga gira isoso, khu gu hi mu embeya edzi hi mu haladzago khidzo ni gu mu embeya esi si girago hi mu ninga githawo. Tepo u lerigo ni gu hevbula Bhibhiliya zama gu tugula makhalelo ya Jehovha u ma golago ngudzu. (Joba 37:23; Rom. 11:33) Khu kharato, embeya Jehovha edzi u dzipwado khidzo khu makhalelo yoyo. Hi nga dhumisa gambe Jehovha khesi a hi gireyago ni esi a giridego vandriyathu vatshavbo. Tepo yatshabo uye a na hi khathaleya ni gu hi vhikeya. — 1Sam. 1:27; 2:1, 2.
8. Sighelo muni hi gu naso gasi gubonga Jehovha? (1 Vatesalonika 5:18)
8 Bonga Jehovha. Hi na ni sighelo nya singi nya gu bonge Jehovha umo nya milombelo yathu. (Leri 1 Vatesalonika 5:18.) Hi nga mu bonga khu satshavbo hi gu naso ni siningwa nya sadi sitago khiyo gwaye. (Jak. 1:17) Khu giyeyedzo, hi nga yeyedza gubonga gwathu khu silo nya samadzise a si giridego, womi wathu, ndranga yathu, dzipari dzathu, gutumba a hi ningago ni gu mu bonga khu hi dzumeleya gu manega ni wupari nya gu hathege naye.
9. Khu ginani hi yedego gu haguleya gubonga?
9 Hi yede gu dzigaradza gasi gu vbwetedzeya sighelo si nga hi girago hi bonga Jehovha. Ha gu vbanya ga litigo vathu nya vangi va gu mba yeyedza gubonga, avo va gu vega gupima basi ga esi va gu naso vbavbandze nya gu yeyedze gubonga khesi va gu naso. Ha gu pimedzeya makhalelo yaya, umo nya milombelo yathu hi na khaleya gu lombeteya silo basi. Gasi silo sesi si si dugeleyi, gu vbwetega hi haguleya gubonga khu satshavbo silo Jehovha a hi gireyago. — Luka 6:45.
Gu simama gu dundrugeya khu satshavbo esi Jehovha a hi ningago si nga hi phasa gu timiseya (Wona paragrafu 10)
10. Gu yeyedza gubonga gu phaside kharini ndriyathu moyo gu timiseya sigaradzo? (Wona fotu.)
10 Gu yeyedza gubonga gu nga hi phasa gu timiseya sigaradzo. Wona giyeyedzo gya Kyung-sook umo nya Mukhedziseyi nya 15 nya Janeiro nya 2015, khu Giputugezi. Uye a di tugudwa pwani a na ni madwali nya câncer. Uye a di khuye: “Gigaradzo gegi nya madwali gi nyi vbedzide ngudzu tshivba.” Uye a gu engedza gambe khuye: “Eni nyi di dzipwa nga ndzandzi vbavbandze nya mati.” Ginani gi nga mu phasa gu timiseya? Matshigu yatshavbo na ngasi lali a di gu gombeya khu 5 silo si nga mu giregeya litshigu lolo. Gu gombeya gu mu phaside gu mba garadzega ni gu kutsega gu yeyedza lihaladzo laye khu Jehovha; pwisiside khuye Jehovha a ngu phasa sithume saye nya gutumbege sa gu tshangana ni sigaradzo nigu tugude khuye hi na ni makategwa nya mangi guvbindra sigaradzo sathu. Gufana ni Kyung-sook ethu hi na ni sighelo nya singi nya gu bonge Jehovha, ambari ha gu ba hi tshangana ni sigaradzo. Ha gu yeyedza gu khethu hi ngu bonga Jehovha, uye a na hi phasa gu timiseya sigaradzo sathu ni gu simama na hi rude.
11. Khu ginani vapizane va Jesu va nga ba va yede gu tiya-hwambo?
11 Lomba giphaso ga Jehovha gasi u tiya-hwambo tepo u tshumayelago. Na ngasi bweleyi ndzadzini, Jesu dundrugiside vapizani vaye khu lisima nya gu ninegeye wufakazi khuye gukhugela “Jerusalema, ni Judheya gwatshavbo ni Samariya kala mahegiso nya mafu.” (Mith. 1:8; Luka 24:46-48) Hwane nya isoso, vathangeyi nya Vajudha va di mola Pedro ni Johane va bwe va va dzega va hongola navo Tribhunali nya Gijudha gasi guya va thurugiseya nigu va himbedzeya gu tshumayela. (Mith. 4:18, 21) Ginani Pedro ni Johane va giridego?
12. Guya khu Mithumo 4:29, 31, ginani vapostoli va giridego?
12 Gasi gu hlamula vathangeyi nya Vajudha avo va di khavo: “Lamulani enu vamune: Ina si lulamide mahoni ga Nungungulu gu mi engisani, wulangani nya gu engise Nungungulu? Ganiolu, ethu kha hi yeli gu diga gu ganeya khu silo hi nga si wona ni gu sipwa.” (Mith. 4:19, 20) Tepo Pedro ni Johane va nga tshudwa, vapizane va di gombeya khu lito nya gu khugege khavo: “Tiyisa sithumi sago, gasi si simama gu ganeya khu lina lago nya mba thava gilo.” Jehovha hlamude nombelo wavo. — Leri Mithumo 4:29, 31.
13. Ginani hi gi hevbulago khu giyeyedzo gya Jin-hyuk?
13 Ethu hi nga pimedzeya vapizane khu gu simama gu tshumayela ambari mifumo ya gu hi himbedzeya. Wona giyeyedzo gya ndriyathu nya mwama nya gupwani khu Jin-hyuk. Tepo a nga ba a romo pasoni a di ningwa thumo nya gu woneleye sibotshwa nyo khaguri, ganiolu a di dzumeledwa basi gu ganeya navo khu silo si nga ba si gimbileyana ni thumo a nga ningwa nasiri gu ganeya navo khu mahungu nya Bhibhiliya. Uye a di gombeya a lomba gutiya hwambo gasi a si kodza gu tshumayela tepo yatshavbo. (Mith. 5:29) Uye wari khuye: “Jehovha hlamude milombelo yangu khu gu nyi ninga gutiya hwambo ni guti gasi gupheya sihevbuli nya singi nya Bhibhiliya. Khu kharato, eni nyi di gu lova malangaliya nyi nga ba nyi ningeya sibotshwa ga litshigu li nga hadzi landreya.” Ethu hi nga tiyisega gu khethu Jehovha a na hi phasa gu gira thumo wathu nya gutshumayele. Gufana ni Jin-hyuk, hi nga gombeya hi lomba guti ni gu tiya-hwambo.
14. Ginani hi nga girago tepo hi tshanganago ni sigaradzo? (Ndzimo 37:3, 5)
14 Gombeya ga Jehovha gasi a gu phasa gu timiseya sigaradzo sago. Nya vangi va ngu tshangana ni sigaradzo nya singi nya nga madwali, gutshaniseka khedzi vadzipwago khidzo, gu fedwa khu sigodwa sawe, gu sayisa ndranga, gu wugedwa ni simbe sigaradzo. Silo nya nga mitungu, dziyimbi si engedzede sigaradzo nya singi. Khu kharato, embeya Jehovha edzi u dzipwago khidzo nga edzi u nga hadzi gu embeya pari yago na wu tiyisega gu khuwe Jehovha a na “gira satshavbo.”— Leri Ndzimo 37:3, 5.
15. Nombelo wu nga hi phasa kharini gu “timiseya sigaradzo”? Ninga giyeyedzo.
15 Ha gu gombeya tepo yatshavbo si na hi phasa gu “timiseya tepo hi tshanganago ni sigaradzo.” (Rom. 12:12) Jehovha a ngu siti esi vakhozeyi vaye va tshanganago naso nigu uye a ngu va engisa “va gu mu lomba giphaso.” (Ndzi. 145:18, 19) Ndriyathu moyo nya piyonera a gu ni 29 myaga nya gupwane khu Kristie a di tugula gu khuye isoso lisine. Nya mba si vireya a di pheya gudwala ngudzu, nigu isoso si di mu gira a vbeya tshivba. Khu gu landreya, a di tugula khuye mamayi waye a na ni madwali ma nga hadzi gu mu songa. Kristie wari khuye: “Nyi di gombeya Jehovha khu monyo wangu watshavbo gasi a nyi ninga tshivba tshigu ni tshigu. Nyi di zama gu gira silo sa liphuvboni. Nombelo wu nyi phaside gu timiseya sigaradzo, nyi di gu dziti kheni Jehovha a na ni eni tepo yatshavbo. Ambari olu nyi ngasi hawulugigo, Jehovha a hlamude milombelo yangu khu gu nyi ninga gurula.” U nga divali khuwe “Jehovha a ngu kodza gu vbulugisa silingoni ava va mu thavago.” — 2 Ped. 2:9.
Gasi gu pala gilingo, ethu hi yede gu gombeya ga Jehovha hi lomba giphaso, gu gira esi hi lombago umo nya milombelo yathu ni gu tiyisa wupari wathu ni Jehovha (Wona dziparagrafu 16-17)
16. Khu ginani hi yedego gu lomba Jehovha gasi a hi phasa gu pala silingo?
16 Lomba Jehovha gasi a gu phasa gu pala silingo. Khu kotani nya mba vbeleya, hi ngu tshangana ni silingo. Sathane a gu gira satshavbo a si kodzago gasi gu hi tandregisa gu dwana ni silingo. Mweyo nya ndziya a yi thumisago gasi gu ghoha mapimo yathu, sivbungadzo nya mba sadi. Sivbungadzo soso si nga tadza mapimo yathu khu silo nya mba sadi si bwe si hi gira hi ghoha. — Marko 7:21-23; Jak. 1:14, 15.
17. Hwane nya gu ba hi gombede gasi hi mana giphaso, ginani hi yedego gu gira? (Wona fotu.)
17 Ethu hi ngu vbweta giphaso gya Jehovha gasi hi pala silingo. Avba nya nombelo waye Jesu ganede khuye: “U nga hi digi hi thegeya silingoni ganiolu hi vbulugise ga oyu nya guvivbe.” (Mat. 6:13) Jehovha a ngu dzina gu hi phasa, ganiolu hi yede gu mu lomba giphaso. Hi yede gu gira esi hi si lombago umo nya milombelo yathu. Hi nga potsa gu leri ni gu engiseya silo si ngu mba phasa. (Ndzi. 97:10) Hi nga si kodza gu tadza mapimo yathu khesi hi lerigu ni gu hevbula omu nya Bhibhiliya. Gu manega mitshanganoni ni thumoni nyo tshumayele aniso si na nga vhikeya mapimo yathu. Jehovha a ngu tumbisa khuye kha na nga dzumedzisa hi mane silingo nya guvbindre tshivba yathu. — 1 Kor. 10:12, 13.
18. Moyo ni moyo wathu ginani a yedego gu gira?
18 Moyo ni moyo wathu gu vbwetega a simama gu gombeya ngudzu guvbindra gale, gasi hi si kodza gu simama gutumbega ndrani nya matshigu yaya nya gu hegise. Tshigu ni tshigu hi yede gu dzi vegeya tepo gasi gu gira nombelo wu dugeyago monyoni. Jehovha a gu vbweta gu khuye hi ‘mu embeledzeya mabala ya monyoni gwathu.’ (Ndzi. 62:8) Dhumisa Jehovha ni gu mu bonga khu satshavbo a girago. Mu lombe gutiya hwambo gasi u si kodza gutshumayela, gasi u pala ni gevbini gigaradzo mwendro gilingo u tshanganago nagyo. U nga dzumeyi gilo mwendro muthu a gu tandregisa gu gombeya tshigu ni tshigu ga Jehovha. Jehovha a gu hlamula kharini milombelo yathu? Hi na mana hlamulo nya giwudziso gegi ga ndrima yi landreyago.
NDZIMO 42 Nombelo nya githumi gya Nungungulu
a Ethu ha gu vbweta gu khethu milombelo yathu yi fana ni lidangaliya hi loveyago pari yathu na si gu dugeya monyoni. Ambari ulolo, kha si vbevbugi gu tshiya tepo gasi gu gombeya nigu si nga tshuka si hi garadzeya guti esi hi nga gombeyago khiso. Avba nya ndrima yeyi hi na bhula khu silo sesi.