Ina u dongide gasi gu emisana ni tshanisa nya yikhongolo?

1. Khu ginani si gu wugengeyi gu dzi dongiseya ga dzimhango?

ETHU hi na si kodza gu vbulugisa womi wathu ha gu dzi dongiseya. Khu giyeyedzo, tepo yi giregago mhango nya yikhongolo, vale va nga dzi dongiseya va ngu vbuluga nigu va ngu si kodza gu phasa vambe. Hengeledzano nyo khaguri ya Europa yi zamago gu phasa vathu yari khiyo: “Gudzidongiseya nya gwadi gu nga vbulugisa womi nya vathu.”

2. Khu ginani hi yedego gu dzi dongiseya na yi si vbohi tshanisa nya yikhongolo? (Matewu 24:44)

² “Tshanisa nya yikhongolo” yi na vboha khavba ni avba. (Mat. 24:21) Ganiolu, tshanisa nya yikhongolo yi na hambana ni dzimbe dzimhango kholu ethu hi ngu dziti gu khethu yi na vboha. Tanga nya 2000 myaga hwane, Jesu gengedzide valandreyi vaye gu dzi dongiseya na li si vbohi litshigu leli. (Leri Matewu 24:44.) Ha gu dzi dongiseya si na hi vbevbugeya gu timiseya ga tepo yoyo nyo garadze hi bwe hi phasa vambe gu gira sasimweso. — Luka 21:36.

3. Gutimiseya, pweya-wusiwana ni lihaladzo si nga hi phasa kharini gu dzi dongiseya gasi hi ta emisana ni tshanisa nya yikhongolo?

³ Ethu hi yede gu haguleya makhalelo mararu gasi hi ta si kodza gu emisana ni tshanisa nya yikhongolo. Ginani hi yedego gu gira ha gu tshuka hi lombwa gu huweleya mahungu nya gulamule ga vawugeyi vathu? (Gutu. 16:21) Hi yede gutimiseya gasi gu engisa Jehovha hi tumba gu khethu uye a na hi vhikeya. Ginani hi yedego gu gira, vandriyathu va gu tshuka va luza silo nyo khaguri mwendro satshavbo va gu naso? (Habh. 3:17, 18) Hi yede gu va yeyedza pweya-wusiwana khu gu vbwetedzeya dzindziya nya gu va phase. Ma gu tshuka mayigo nyo khaguri ma wugeyana si lombega gu hi khala ni vandriyathu khu tepo nyo khaguri, ginani hi yedego gu gira? (Ezek. 38:10-12) Hi yede gu tiyisa lihaladzo lathu khavo gasi hi phasana ga tepo yoyo nyo garadze.

4. Bhibhiliya yo yeyedza kharini gu khiyo hi yede gu haguleya gutimiseya, pweya-wusiwana ni lihaladzo?

⁴ Lito la Nungungulu la gu hi kutsa gu simama gu haguleya gutimiseya, pweya-wusiwana ni lihaladzo. Luka 21:19 wari khuye: “Khu gutimiseya gwanu, mu na vbulugisa womi wanu.” Vakolosi 3:12 wari khuye: “Ambalani pweya-wusiwana.” Nigu 1 Vatesalonika 4:9, 10 wari khuye: “Mu ngu hevbudzwa khu Nungungulu gu haladzanani khu gyanu . . . Ganiolu, vandriyathu, nyi ngu mi lomba gu kheni mu engedzeya gu gira isoso.” Yatshavbo mavhesi yaya ma di lovedwa vapizane va nga ba va yeyedzide gutimiseya, pweya-wusiwana ni lihaladzo. Ambari ulolo, avo va di yede gu simama gu yeyedza makhalelo yaya. Anethu hi yede gu gira sasimweso. Gasi hi phasega, hongoleni hi wona edzi Makristo nyo pheye ma yeyedzidego khidzo makhalelo yaya. Khu gu landreya, hi na wona edzi hi nga pimedzeyago khidzo vapizane vale ni gu yeyedza gu khethu hi dongide gasi hi ta emisana ni tshanisa nya yikhongolo.

SIMAMA GUTIMISEYA

5. Ginani Makristo nyo pheye ma giridego gasi gutimiseya silingo sawe?

⁵ Makristo ya matshigoni ya Pawulo ma di yede gutimiseya. (Hebh. 10:36) Ayo ma di gu tshangana ni sigaradzo esi vatshavbo va tshanganago naso, ganiolu ma diri ni simbe sigaradzo si nga ba si vangwa kholu va nga ba vari Makristo. Nya mangi, kha ma wugedwa basi khu vathangeyi nya wukhongeyi nya Gijudha ni dzipfhumu dza Roma, ganiolu khu valongo vawe gambe. (Mat. 10:21) Nigu ayo, libandlani dzimbe dzitepo ma di gu yede gu bomba sihevbudzo nya malipha sa vawugeyi va nga ba va zama gu hambanisa libandla. (Mith. 20:29, 30) Ambari ulolo, Makristo yoyo ma simamide gutimiseya. (Gutu. 2:3) Khu ndziya muni? Ayo ma dundrugede khu siyeyedzo nya vathu va khumbugidwego omu nya Bhibhiliya va nga yeyedza gutimiseya nya nga Joba. (Jak. 5:10, 11) Ma di gombeya ma lomba tshivba. (Mith. 4:29-31) Nigu ayo ma di simama gu dundruga gu khayo Jehovha a na ma tshatshazeya ma gu timiseya. — Mith. 5:41.

6. Ginani u gi hevbulago khu giyeyedzo gya ndriyathu Merita?

⁶ Anethu hi nga si kodza gu timiseya ha gu hevbula khu siyeyedzo sa ava va khumbugwago omu nya Bhibhiliya ni omu nya mabhuku yathu hi bwe hi dundrugeya khiso. Khu gu gira isoso, ndriyathu Merita wa Albânia a si kodzide gutimiseya tepo a nga ba a wugedwa khu valongo vaye. Uye wari khuye: “Nyi tiyisidwe ngudzu khu gu hevbula khu matimo ya Joba. Uye a tshanganide ni sigaradzo nya singi nigu kha nga ba a muti uye a nga ba a mu vangeya sigaradzo soso, ambari ulolo uye a di khuye: ‘Nyi na kala nyifa na nyi nga gutumbegide.’ (Joba 27:5) Eni nyi tugude gu kheni Joba a tshanganide ni sigaradzo nya singi gu vbindra sangu. Gu hambana naye, eni nyi ngu muti oyu a nyi vangeyago sigaradzo sesi.”

7. Abari gu kha hi tshangani ni sigaradzo nya sikhongolo olu, ginani hi yedego gu hevbuleya gu gira?

⁷ Hi nga simama gu timiseya ha gu gombeya tepo yatshavbo ga Jehovha hi mu embeya satshavbo si hi garadzago. (Filp. 4:6, 1 Tes. 5:17) Adzina saye kha wu tshangani ni sigaradzo nya sikhongolo olu. Ganiolu, u nga gombeya ga Jehovha u mu lomba giphaso tepo u garadzegago ni gu mbati gilo nyo gire. Wa gu gombeya ga Nungungulu tshigu ni tshigu gasi a gu phasa gu emisana ni sigaradzo nya sidugwana, kha wu na nga kanakana gu gombeya gwaye tepo u na tshanganago ni sigaradzo nya sikhongolo mindru watshigu. Khu kharato, u na tiyisega gu khuwe Nungungulu a ngu yiti tepo nya yadi gasi gu gu phasa ni esi a yedego gu gira. — Ndzi. 27:1, 3. 

8. Giyeyedzo gya Mira gya gu hi hevbudza ginani khu gutimiseya sigaradzo sathu olu? (Jakobe 1:2-4) (Wona fotu.)

⁸ Ho ba hi dzina guta timiseya ndrani nya tshanisa nya yikhongolo hi yede gu timiseya sigaradzo hi tshanganago naso olu. (Rom. 5:3) Khu ginani hi ganeyago isoso? Vandriyathu va tugude gu khavo gutimiseya sigaradzo va nga tshangana naso si va phaside gutimiseya sigaradzo va nga hadzi tshangana naso mindru watshigu. Tepo va nga timiseya sigaradzo khu gu phaswa khu Jehovha avo va tiyisegide gu khavo Jehovha a ngu dzina gu va phasa. Khu kotani nya olu va nga ba va khodwa ga Jehovha avo va si kodzide gutimiseya sigaradzo si nga landreya. (Leri Jakobe 1:2-4.) Mira, piyonera moyo wa Albânia, a tugude gu khuye gutimiseya sigaradzo a tshanganidego naso gale si ngu mu phasa gutimiseya sigaradzo a tshanganago naso olu. Dzimbe dzitepo o pimisa gu khuye, khuye enga a tshanganago ni sigaradzo nya singi. Ganiolu, a gu dundruga edzi Jehovha a mu phasidego khidzo 20 myaga hwane a bwe a dzi embeya khuye: ‘Simama na wu tumbegide. U nga digi gu thumeya Jehovha hwane nya gu ba a gu phaside gu timiseya sigaradzo nya singi.’ Anuwe u nga dundrugeya khedzi Jehovha a gu phasidego khidzo gutimiseya. Tiyisega gu khuwe uye a ngu gu wona tepo u timiseyago sigaradzo, nigu a na gu tshatshazeya. (Mat. 5:10-12) Khu kharato, tepo tshanisa nya yikhongolo yi na vbohago u na ba u hevbude edzi u nga timiseyago khidzo nigu u na ba u dzi emisede gutimiseya.

YEYEDZA PWEYA-WUSIWANA

9. Libandla la Antiyokiya wa Siriya li yeyedzide kharini pweya-wusiwana?

⁹ Wona esi si dugeledego tepo Makristo ma nga tshangana ni ndzala nya yikhongolo Judheya. Tepo libandla la Antiyokiya wa Siriya li ngapwa gu khilo vandriyawe va Judheya va gu tshaniseka khu ndzala avo va di va pweya-wusiwana. Khu kharato, avo va di gira gilogyo gasi gu phasa vandriyawe. Avo va “di hunga gu rumeya giphaso ga vandriyathu va Judheya guya khu makodzelo” yawe. (Mith. 11:27-30) Ambari olu vandriyathu va nga ba va vbanya hwindzo, Makristo ya Antiyokiya ma di gu dzi emisede gu va phasa. — 1 Joh. 3:17, 18.

10. Dzindziya muni hi nga dzi thumisago gasi gu yeyedza pweya-wusiwana tepo vandriyathu va tshanganago ni dzimhango nya tumbunuku? (Wona fotu.)

¹⁰ Anethu hi nga yeyedza pweya-wusiwana tepo hi pwago gu khethu vandriyathu va ngu tshangana ni dzimhango nya tumbunuku mwendro simbe sigaradzo. Hi nga dzi emiseya gu gira isoso khu gu wudzisa madhota khu projetu nyo khaguri gasi gu phasedzeya, khu gu gira miningelo nya thumo wu girwago mafuni gwatshavbo mwendro gu gombeleya vandriyathu va tshangango ni dzimhango.b (Mav. 17:17) Khu giyeyedzo khu 2020, 950 dzikometi nya guphasedzeye vandriyathu va nga thegedwa khu dzimhango, dzi hathidwe gasi gu phasedzeya vandriyathu va nga ba va vbweta giphaso ndrani nya tungu nya COVID-19 mafuni gwatshavbo. Hi ngu bonga ngudzu vandriyathu va giridego thumo wowu. Khu kotani nya olu va nga ba va pweya-wusiwana vandriyathu avo va kabanisede silo nyo dzi vbanyise khiso, guhodza ga liphuvboni, guvbahedza dzinyumba dza vandriyathu ni gu vbahedza malanga nya wukhozeyi. — Fananisa ni 2 Vakorinto 8:1-4.

11. Ginani gi giregago tepo hi yeyedzago pweya-wusiwana?

¹¹ Ha gu yeyedza pweya-wusiwana hwane nya gu ba yi giregide mhango nyo khaguri, vambe va na wona gudzigaradza hi gu giridego. Khu giyeyedzo, khu 2019 gingulo nyo pwani Dorian gi di tshungunula Salawu nya Mufumu Bahamas. Tepo vandriyathu va nga ba vbahedza Salawu nya Mufumu va di wudzisa muvbahi nyo khaguri a gu siri Fakazi gu khavo: Kharini u dzi vbwetago khu thumo wowu? Uye a di va hakha gu khuye: “Eni nyo tsakeya gu mi ninga esi si vbwetegago gasi gu vbahedza khiso Salawu ni dzitsapawu dzakone gasi gu livba vameseri . . . Nyo gireya silo sesi hengeledzano yanu. Nyi kuhidwe khedzi mu pharago khidzo dzipari dzanu.” Vathu nya vangi mafuni momu kha va muti Jehovha, ganiolu vathu nya vangi va ngu wona esi Dzifakazi dza Jehovha dzi girago gasi gu phasa vambe. Hi ngu tsaka khu gu tugula gu khethu tepo hi yeyedzago pweya-wusiwana vambe, isoso si nga gira vathu va vbweta guti nya singi khu Jehovha, oyu a tadego “khu wuhindzi.” — Efes. 2:4.

12. Gu haguleya pweya-wusiwana muhunu sa gu hi dongiseya kharini na yi si vbohi tshanisa nya yikhongolo? (Gutuledwa 13:16, 17)

¹² Khu ginani hi yedego gu yeyedza pweya-wusiwana ndrani nya tshanisa nya yikhongolo? Bhibhiliya yo ganeya gu khiyo vale nya gu kha va na nga seketeya dzipfhumu dza mafuni momu va na tshangana ni sigaradzo olu ni ndrani nya tshanisa nya yikhongolo. (Leri Gutuledwa 13:16, 17.) Adzina saye vandriyathu va na vbweta giphaso gyathu gasi gu mana silo nyo dzi vbanyise. Tepo Pfhumu yathu Jesu Kristo yi na tago gasi gu ta lamula vathu, ethu ho vbweta gu yi ta hi mana na hi gu yeyedza pweya-wusiwana gasi yi hi rana guya hodza “thomba nya Mufumo.” — Mat. 25:34-40.

ENGEDZEYA LIHALADZO LAGO

13. Kha nga li yeyedzago libhuku la Varoma 15:7, Makristo nyo pheye ma yeyedzide kharini lihaladzo lawe?

¹³ Vatshavbo va di gu dziti gu khavo yatshavbo Makristo nyo pheye ma di gu haladzana. Ina si ma vbevbugede gu yeyedza lihaladzo? Wona gu hambana gu nga ba gu romo umo nya libandla la Roma. Vajudha nyo khaguri va di gu hevbudzidwe gu landrisa Nayo wa Mosi, ganiolu vambe va di guta khu mambe mayigo, nigu va diri ni mavbanyelo nyo hambane. So wonegisa gu khiso Makristo nyo khaguri ma diri dzigumbi ni gu mambe ma di gutshulegide. Makristo yale ma nga ba ma tshulegide adzina saye ma diri vamune nya dzigumbi dzodzo. Makristo yoyo, ma simamide kharini gu yeyedzana lihaladzo ambari olu ma nga ba ma hambanide? Mupostoli Pawulo a va gengedzide gu khuye va yede gu ‘hakhana khu gyawe.’ (Leri Varoma 15:7.) A di vbweta khuye ginani khu malito yaya? Lito gu ‘hakha’ lo thula gu hakha gwadi muthu nyo khaguri ndrangani gwago. Khu giyeyedzo, Pawulo a di embeya Filemoni gasi gu hakha gwadi gumbi yi nga ba yi thavide Onesimo. Uye a di khuye: “Mu hakhe gwadi.” (File. 17) Nigu Prisila ni Akila va hakhide gwadi Apolo, oyu a nga ba a si siti nya singi khu Kristo guvbindra avo, ganiolu “va di mu rana khu phuvbo.” (Mith. 18:26) Wulangani nya gu Makristo yale ma dzumeleya gu hambaniswa, ayo ma di hakhana khu gyawe.

14. Ginani egi Anna ni mwama waye va giridego gasi gu yeyedza lihaladzo?

¹⁴ Ethu nethu hi nga yeyedza lihaladzo vandriyathu khu gu khala dzipari dzawe hi bwe hi vbedza tepo navo. Tepo hi girago isoso, avo navo va na hi yeyedza lihaladzo. (2 Kor. 6:11-13) Wona giyeyedzo gya Anna ni mwama waye. Hwane nya gu ba va hathidwe gasi gu thuma kha nga vamisiyonariyu África Ocidental, tungu nya COVID-19 wu di pheya. Khu kotani nya tungu, avo kha va si kodza gu tshangana ni vandriyawe libandlani nigu kha sa va vbevbugeya gu vati. Va yeyedzide kharini lihaladzo? Va di thumisa videoconferência gasi gu bhula ni vandriyathu va bwe va va embeya gu khawo va ngu dzina ngudzu gu tivana gwadi navo. Dzindranga nya dzingi dzi bongide khu lihaladzo eli vamisiyonariyu vava va nga ba va li yeyedza, nigu dzitepo nya dzingi va di gu ligareyana ni gu rumeleyana dzimesaji. Khu ginani patwa wowu wu nga dzi garadzeya guti gwadi vandriyathu va libandlani gwavo? Anna wari khuye: “Gima kha nyi na nga divala lihaladzo eli vandriyangu va nyi yeyedzidego eni nyi ndranga yangu dziteponi nya dzadi ni edzi nyo garadze. Nigu esi si nyi kutside neni gu yeyedza lihaladzo.”

15. Ginani hi gi hevbulago khu giyeyedzo gya ndriyathu Vanessa khu gu yeyedza lihaladzo vandriyathu? (Wona fotu.)

¹⁵ Nya vangi gwathu libandlani ha guta khu malanga nya gu hambane-hambane nigu hi na ni makhalelo nyo hambane. Hi na si kodza gu tiyisa lihaladzo lathu khu vambe, ha gu vega gupima avbo nya makhalelo yawe nya yadi. Ndriyathu Vanessa si di gu mu garadzeya gupwanana ni vambe libandlani. Ganiolu, wulangani nya gu potse vale va nga ba vari ni makhalelo ma nga ba ma si mu tsakise uye a di hunga gu vbedza tepo navo. Isoso si mu phaside gu wona gu khuye Jehovha a ngu va haladza. Uye wari khuye: “Gu khugeya mwama wangu a khala muwoneleyi nya sirkwitu hi ngu vbedza tepo nya yingi ni vandriyathu va gu na ni makhalelo nya gu hambane-hambane, nigu isoso si ngu nyi phasa gu pwanana navo. Olu nyi ngu gola vandriyathu nyo hambane-hambane, nigu Jehovha nuye a ngu va gola kholu a ngu dzumeleya gu khozedwa khu vathu nyo hambane-hambane.” Tepo hi hevbuleyago gu wona vathu nga edzi Jehovha a va wonago khidzo, ha gu yeyedza gu khethu hi ngu va haladza. — 2 Kor. 8:24.

16. Khu ginani hi yedego gu haladza vandriyathu ndrani nya tshanisa nya yikhongolo? (Wona fotu.)

¹⁶ Ndrani nya tshanisa nya yikhongolo hi yede gu yeyedza lihaladzo vandriyathu. Tepo tshanisa yoyo yi na pheyago, Jehovha a na hi vhikeya kharini? Wona esi Jehovha a embedego vathu vaye gu gira tepo Bhabhiloni wa gale a nga wugedwa. Uye a di khuye: “Vathu vangu, Indrani, belani dzinyumbani gwanu mu dzi segela malimba, mu sihala umo gikhatinyana kala [tshanisa] yi vbindra.” (Isa. 26:20, NM) Adzina saye hi na landrisa sileletelo sasimweso ndrani nya tshanisa nya yikhongolo. “Dzinyumbani” adzina dzi na thula mabandla yathu. Ndrani nya tshanisa nya yikhongolo, Jehovha a ngu hi tumbisa gu khuye a na hi vikheya ha gu simama gu mu thumeya gumogo ni vandriyathu. Ethu kha hi yeli basi gu dzi garadza olu gu laphiseya monyo vandriyathu, ganiolu hi yede gambe gu va haladza. Khu kotani nya esi, adzina saye hi na si kodza gu vbuluga.

DZI DONGISEYE OLU

17. Ha gu dzi dongiseya olu, ginani hi na gi kodzago gu gira ndrani nya tshanisa nya yikhongolo?

¹⁷ “Litshigu nya likhongolo la Pfhumu Nungungulu” yi na ba yiri tepo nyo garadze ga vathu vatshavbo. (Sof. 1:14, 15) Anavo vathu va Jehovha va na tshangana ni sigaradzo. Ganiolu, ha gu dzi dongiseya olu, hi na si kodza gu rula hi bwe hi phasa vambe. Hi na timiseya ni gevbini gigaradzo hi na tshanganago nagyo. Tepo vandriyathu va na tshanisekago, ethu hi na gira satshavbo hi na si kodzago gasi gu va phasa khu gu va yeyedza pweya-wusiwana ni gu va ninga esi si vbwetegago gasi gu va vbanya. Nigu, ha gu hevbuleya gu yeyedza lihaladzo vandriyathu olu hi na si kodza gu va yeyedza lihaladzo lolo mindru watshigu. Jehovha a na hi tshatshazeya khu gu hi ninga womi nya mba vbeya mafuni gu na ba guri mwalo dzimhango ni sigaradzo. — Isa. 65:17.