Tumba Jehovha nga Samisoni

1-2. Khu ginani gu hevbula khu giyeyedzo gya Samisoni si gu sadi?

GINANI gitago mapimoni gwago tepo upwago lina, Samisoni? Adzina saye u nga dundruga khu tshivba nya yingi a nga ba ari nayo. Nigu isoso lisine. Ganiolu, Samisoni a hungide makungo nya mba yadi ma nga mu vangeya sigaradzo. Ambari ulolo, Jehovha vegide gupima ga satshavbo esi Samisoni a giridego gasi gu mu thumeya. Nigu Nungungulu a patide giyeyedzo gyaye umo nya Bhibhiliya gasi hi hevbula khigyo.

² Jehovha thumiside Samisoni gasi gu gira silo nya gu samadzise ni gu phasa vathu vaye Israyeli. Hwane nya myaga nya yingi Samisoni na fude, mupostoli Pawulo, khu gu phaswa khu Jehovha a lovide lina la Samisoni avbo nya sasamedzo nya vama va yeyedzidego gukhodwa. (Hebh. 11:32-34) Giyeyedzo gya Samisoni, gi nga hi tiyisa. Uye tumbide Jehovha tepo a nga ba a tshangana ni sigaradzo. Avbo nya ndrima yeyi, hi na bhula khesi hi nga si hevbulago khu Samisoni ni edzi giyeyedzo gyaye gi nga hi tiyisago khidzo.

SAMISONI TUMBIDE JEHOVHA

3. I thumo muni Samisoni a ningidwego?

³ Tepo Samisoni a nga velegwa, Vafilisitiya va di gu tshanisa Vaisrayeli. (Val. 13:1) Vaisrayeli va di gu tshaniseka ngudzu, kholu Vafilisitiya va di gu vivbedwe ngudzu khu monyo. Jehovha a di hatha Samisoni gasi gu “tshudzisa Israyeli mandzani ga Vafilisitiya.” (Val. 13:5) Isoso si di hadzi gu garadza ngudzu. Gasi gu gira thumo wowo, Samisoni a di yede gu tumba Jehovha.

4. Jehovha phaside kharini Samisoni gasi gu mu vbulugisa ga Vafilisitiya? (Valamuli 15:14-16)

⁴ Hongoleni hi wona giyeyedzo nya edzi Samisoni a tumbidego khidzo Jehovha ni gu tumba giphaso gyaye. Ga giemo nyo khaguri, libutho nya masotshwa ya Vafilisitiya li di hongola kala dhoropani ga Lehi mwendro Judha gasi guya mola Samisoni. Vama va nga ba va vbanya Judha, va di thava, khu kharato va di hunga gu ningeya Samisoni ga nala wavo. Samisoni a di hungwa kamu khu vathu vaye va bwe va mu ningeya ga Vafilisitiya. (Val. 15:9-13) Ganiolu, ‘liphuvbo la PFHUMU Nungungulu li di mu ninga tshivba.’ Nigu Samisoni a di si kodza gu kanula dzingodzi dzile. Khavbovbo, a di rola “gihaya nya buru nya gu bani yi ngari gufa,” a gi thumisa gasi gu songa 1000 vama nya Vafilisitiya. — Leri Valamuli 15:14-16.

5. Samisoni thumiside kharini gihaya nya buru gasi gu yeyedza gu khuye a di gu tumba Jehovha?

⁵ Khu ginani Samisoni a nga thumisa gihaya nya buru? Kha sa nga ba si olovelegide gu thumisa gihaya gasi gu dwana khigyo. Ganiolu, nya mba kanakana, Samisoni a di gu dziti gu khuye a di hadzi dugeleya khu gu phaswa khu Jehovha nasiri khu gihaya gile a nga ba ari nagyo mandzani. Mwama yoyu nyo tumbege, a di thumisa egi a nga gi mana gasi gu gira gugola ga Jehovha. Khu lisine, Samisoni a kategisidwe ga giemo gile nigu a si kodzide gu pala vama vale, kholu a di gu tumba Jehovha.

6. Giyeyedzo gya Samisoni gya gu hi tiyisegisa ginani?

⁶ Jehovha a nga hi ninga tshivba nya gu gire ni wevbini thumo, ambari ha gu ba hi wona gu khethu kha hi na nga wu kodza gu wu gira. Nigu Nungungulu a nga hi phasa khu ndziya nyo samadzise ngudzu. Khu kharato, tumba gu khuwe Jehovha, oyu a ningidego tshivba Samisoni a na gu phasa gu gira gugola gwaye, wa gu mu tumba ni gu vbwetedzeya giphaso Gyaye.— Mav. 16:3.

7. Ninga giyeyedzo nya edzi si gu na ni lisima khidzo gu vbwetedzeya sileletelo ga Jehovha.

⁷ Vandriyathu va thumago avbo nya dziprojetu nya gu vbahe ndrani nya hengeledzano yathu, va ngu yeyedza gu khavo va ngu tumba Jehovha. Gale si di gu olovelegide gu vandriyathu va dhezenyari ni gu vbaha Dzisalawu nya Mufumo ni dzimbe dzinyumba nya hengeledzano yathu. Ganiolu, khu kotani nya olu vathu nya vangi va nga ba va bhabhatiswa, hengeledzano yi di hunga gu vbindrugedza silo nyo khaguri. Vathu va thangeyago dziprojetu dzedzi, va di vbwetedzeya sileletelo ga Jehovha va bwe va thumisa dzimbe dzindziya, nya nga gu renga dzinyumba. Ndriyathu moyo nyo pwani khu Robert a thumidego myaga nyo yingi avbo nya dziprojetu nya gu vbahe mafuni gwatshavbo a di ganeya gu khuye: “Gupheyani kha sa vbevbugeya vathu nyo khaguri gu dzi pwananisa ni malulamiselo yaya nya maphya. Esi si di gu hambanide ngudzu ni edzi hi nga ba hi thuma khidzo khu myaga nya yingi. Ganiolu, vandriyathu va di dzi emisede gu dzi pwananisa ni guvbindrugedza gogu, nigu si di gu romo guagani gu Jehovha a di gu kategisa malulamiselo yaya nya maphya.” Egi gimwegyo nya siyeyedzo nya edzi Jehovha a thangeyago khidzo vathu vaye gasi gu gira gugola gwaye. Hi na gira gwadi ho khaleya gu dzi wudzisa gu khethu: ‘Ina nyi ngu vbwetedzeya sileletelo sa Jehovha, nigu nyi dzi emisede gu vbindrugedza silo nyo khaguri gasi gu mu thumeya khu ndziya nya yadi?’

SAMISONI A DI LONDROLA GIPHASO A NGA NINGWA KHU JEHOVHA

8. Ginani a giridego Samisoni tepo a ngapwa lidora?

⁸ Adzina u ngu dundruga gu khuwe Samisoni a giride silo nya singi nyo samadzise. Khu giyeyedzo, Samisoni songide ngala nya mba na gilo nyo dzi vhikeye khigyo. Khu gu landreya, a songa 30 vama nya Vafilisitiya dhoropani ga Asikaloni. (Val. 14:5, 6, 19) Samisoni a di gu dziti gu khuye nya mba na giphaso gya Jehovha na sa si kodza gu gira satshavbo sesi. Isoso si wonegide tepo Samisoni a ngapwa lidora hwane nya gu ba a songide Vafilisitiya. Wulangani nya gu vbwetedzeye mati mwendro gu zama gu lulamisa gigaradzo abune, uye a di lomba giphaso ga Jehovha. — Val. 15:18.

9. Ginani a giridego Jehovha tepo a nga lombwa giphaso khu Samsoni? (Valamuli 15:19)

⁹ Jehovha hlamude gilombo gya Samisoni khu gu gira gifefe nya mati khu gilewugiso. Tepo Samisoni a nga seya mati, “tshivba yaye yi di wuyeleya.” (Leri Valamuli 15:19, NM.) Sa gu wonegisa gu khatshi gifefe gyogyo nya mati gi simamide gu manega kala tepo muprofeti Samuweli a nga lova libhuku la Valamuli. Tepo yatshavbo Vaisrayeli va nga ba va wona gifefe gile nya mati, va di gu dundruga gu khavo va gu tumba Jehovha a na va phasa ni ga gevbini giemo.

10. Ginani hi yedego gu gira gasi gu hakha giphaso gya Jehovha? (Wona fotu.)

¹⁰ Anethu hi ngu vbweta giphaso gya Jehovha na si si khathadzisegi makodzelo hi gu nawo mwendro silo hi giridego thumoni gwaye. Hi yede gu dzi nogisa hi bwe hi dzumeya gu khethu hi na si kodza basi gu gira esi Jehovha a hi lombago ha gu mu tumba. Gufana ni tshivba ya Samisoni yi nga wuyeleya tepo a nga seya mati a nga ningwa khu Jehovha, anethu hi na si kodza gu simama na hi tiyide khu liphuvboni ha gu londrola yatshavbo malulamiselo Jehovha a hi ningago. — Mat. 11:28.

11. Aleksey yeyedzide kharini gu khuye a di gu tumba Jehovha, nigu hi nga mu pimedzeya kharini?

¹¹ Wona giyeyedzo gya Aleksey, a gu moyo nya vandriyathu va Rússia va wugedwago khu tshivba. Ginani gi mu phasidego gu simama na tiyide ambari a nga ba a tshangana ni siemo nyo garadze? Uye ni mwangandzi waye va di gira longoloko nya wadi wa liphuvboni. Uye wari, khuye: “Eni nyo zama gu gira gihevbulo nya muthu enga ni gu hevbula Bhibhiliya tshigu ni tshigu. Vbadzimidrutunu ha gu hevbula lowo nya litshigu hi bwe hi gombeya ga Jehovha hatshavbo.” Hi nga hevbula ginani khu giyeyedzo gya Aleksey? Wulangani nya gu dzi tumbe, hi yede gu tumba Jehovha. Khu ndziya muni? Khu gu gira silo si na vbahago gukhodwa gwathu. Nya nga gu hevbula Bhibhiliya, gu gombeya, gu hongola mitshanganoni ni gu tshumayela. Khavbovbo, Jehovha a na hi ninga giphaso hi gi vbwetago gasi hi simama gu mu thumeya. Uye a tiyiside Samisoni nigu khu lisine a na hi tiyisa nethu.

SAMISONI KHA VBEYA TSHIVBA

12. Makungo muni nya mba yadi Samisoni a hungidego, nigu gudzegana ga Samisoni ni Dhalila gu di hambanide khu ndziya muni?

¹² Samisoni a diri muthu nya mba vbeleya nga ethu, khu kharato dzimbe dzitepo a hungide makungo nya mba yadi. Ga tepo nyo khaguri a hungide makungo ma nga mu vangeya sigaradzo nya sikhongolo. Hwane nya gu ba Samisoni a thumide kha nga mulamuli khu tepo nyo khaguri, uye “a di dogorela nyamayi nya gudugele kovani wa Soreki, nya gupwani khu Dhalila.” (Val. 16:4) Na si tivani ni Dhalila, Samisoni a di khade noivhu wa nyamayi moyo nya Mufilisitiya. Khu Jehovha a nga mu ruma gu gira isoso, kholu li diri lithomo nya gu dwane ni Vafilisitiya. Ga yimbe tepo, Samisoni a di ya khala gaya ga nyamayi moyo nya gibhayi, dhoropani ga Vafilisitiya, Gaza. Eli li diri limbe lithomo gasi Jehovha a ninga tshivba Samisoni nya gu dwane ni Vafilisitiya ga lidhoropa lile. (Val. 14:1-4; 16:1-3) Ganiolu, Dhalila adzina saye a diri Muisrayeli, khu kharato gu dzegana gwawe gu di hadzi gu mba ninga lithomo Samisoni nya gu dwane ni Vafilisitiya.

13. Ginani egi Dhalila a giridego?

¹³ Vafilisitiya va di ninga dzitsapawu nya dzingi Dhalila gasi gu senga Samisoni. Khu kotani nya olu Samisoni a nga ba a haladza ngudzu Dhalila, kha nga ba a si kodza gu tugula esi a nga ba a vbweta gu gira. Dhalila a di gu khaleya gu wudzisa Samisoni egi gi nga ba gi mu gira a manega ni tshivba. Khu gu hegisa, Samisoni a di mu embeya. Nya mba tsakisa khu gu, gihoso a giridego Samisoni gi mu giride a luza tshivba a bwe a si tsakedwi khu Jehovha khu tepo nyo khaguri. — Val. 16:16-20.

14. Khu wevbini wuyelo a wu manidego Samisoni khu gu ba a tumbide Dhalila?

¹⁴ Samisoni livbide tengo nya wukhongolo ngudzu khu gu ba a tumbide Dhalila wulangani nyo tumbe Jehovha. Vafilisitiya va di mola Samisoni va mu gira gikhumo, khavbovbo va mu khotheya Gaza. Khu tepo nyo khaguri Samisoni a di gu vegide vbavbatshi vavbanyi va dhoropani mule. Ganiolu, ga tepo yeyi khuye a nga ba a vegwa vbavbatshi khu gu girwa mutshindri nya dzimbewu pasoni. Vafilisitiya va di resa Samisoni avbo nya festa yawe. Avo va di gu pimisa gu khavo va di si kodza gu mola Samisoni khu gu phaswa khu nungungulu wawe, nya malipha, Dhagoni. Vafilisitiya va di gu vbweta gu tsorodzeya Samisoni, khu kharato va di mu rana khu pasoni gasi ‘guya va hegiseya.’ — Val. 16:21-25.

15. Samisoni a yeyedzide kharini gu khuye a di gu tumba gambe Jehovha? (Valamuli 16:28-30) (Wona fotu avba nya kapa.)

¹⁵ Samisoni a di giride gighoho nya gikhongolo ngudzu, ganiolu uye kha diga gu thumeya Jehovha. Uye a di vbwetedzeya lithomo nyo gire esi Jehovha a nga ba a si vbweta, a gu gu dwana ni Vafilisitiya. (Leri Valamuli 16:28-30.) Samisoni a di lomba Jehovha gu khuye: “Nyi ninge gambe tshivba, gikhati gegi basi, u nyi gira gu nyi dzi phodzela ga Vafilisitiya.” Jehovha a di hlamula gambe gilombo gya Samisoni, a mu ninga tshivba nya mba olovelega khu ndziya nya gilewugiso. Khu kotani nya isoso, Samisoni a si kodzide gu songa Vafilisitiya nya vangi ga tepo yile guvbindra dzimbe dzitepo.

16. Ginani hi gi hevbulago khesi Samisoni a giridego hwane nya gu ba a ghohide?

¹⁶ Lisine gu Samisoni a di yede gu emisana ni mihandro nya mba yadi a nga yi mana khu kotani nya sihoso saye. Ganiolu, kha diga gu zama gu gira gugola ga Jehovha. Anethu hi nga tshangana ni giemo gya gimwegyo. Ha gu gira gihoso, hi yede gu dzumeya gu laywa mwendro gu luza malungelo nyo khaguri libandlani. Ganiolu, kha hi yeli gu ema gu thumeya Jehovha. Dundruga gu khuwe Jehovha gima kha hi digi. (Ndzi. 103:8-10) Ambari olu hi girago sihoso, hi nga simama gu thumiswa khu Jehovha gufana ni Samisoni.

17-18. Ginani u gi hevbulago khu giyeyedzo gya Michael? (Wona fotu.)

¹⁷ Wona giyeyedzo gya ndriyathu moyo nya muphya nyo pwani khu Michael. Uye a di pharegide thumoni wa Jehovha khu gu thuma kha nga muphasedzeyi nya libandla ni piyoneiro nya tepo yatshavbo. Nya mba tsakisa khu gu a di gira gihoso nyo khaguri a luza malungelo libandlani. Uye a di khuye: “Silo si di gu gimbiya gwadi nigu nyi di gu pharegide ngudzu thumoni wa Jehovha. Khu kharato, nyi di gu dzipwa gu khatshi gi mwalo gilo nyi nga girago thumoni wa Jehovha. Nyi di gu dziti gu kheni Jehovha kha na nga nyi diga. Ambari ulolo, nyi di gu khaleya gu dzi wudzisa gu kheni, ina nyi na si kodza gu manega ni wupari ni Jehovha ni gu gira nya singi libandlani nga gale?”

¹⁸ Esi si tsakisago khu gu Michael kha vbeya tshivba. Khu gu gimbiya nya tepo uye a di bweledzedwa malungelo yaye libandlani. Muhuno, a gu thuma kha nga piyoneiro nya tepo yatshavbo nigu lidhota. Uye a gu tshamuseya gu khuye: “Eni nyi di vega gupima avbo nya wupari wangu ni Jehovha. Tepo yatshavbo nyi di gu mu embeya esi si nga ba si romo monyoni gwangu, nyi hevbula ni gu dundrugeya. Nyi tiyisidwe ngudzu nigu giphaso nyi gi hakhidego, ngudzu-ngudzu gya madhota, gi nyi phaside gu tugula gu kheni Jehovha a ngu nyi haladza. Olu nyi nga thuma libandlani na nyiri ni livhalo li agidego. Isoso si nyi hevbudzide gu kheni Jehovha tepo yatshavbo a na divaleya ni wevbini muthu a dzi layago khu lisine.” Ethu hi nga tiyisega gu khethu Jehovha a na hi thumisa ni gu hi kategisa ambari ho ba hi giride sihoso, ganiolu ha gu dzi garadza gu lulamisa sihoso sathu hi bwe hi simama gu mu tumba.— Ndzi. 86:5; Mav. 28:13.

19. Giyeyedzo gya Samisoni gya gu gu tiyisa kharini?

¹⁹ Avba nya gihevbulo gegi, hi hevbude khu sigiro nyo samadzise si giregidego womini ga Samisoni. Uye kha nga ba a vbelede, ganiolu kha diga gu dzi garadzeya gu thumeya Jehovha ambari hwane nya gu ba a giride gihoso khu kotani ya Dhalila. Jehovha kha tsukula Samisoni nigu a mu thumiside khu ndziya nyo samadzise. Nigu Jehovha a gu wona Samisoni nga mwama a nga yeyedza gukhodwa nya gu samadzise. Khu kharato, uye womo avbo nya sasamedzo nya vama va yeyedzidego gukhodwa, va khumbugwago umo ga Vahebheru gipimo 11. Si ngu tsakisa ngudzu guti gu khethu, ho thumeya Papayi wathu nya lihaladzo a vbwetago gu hi tiyisa ngudzu-gundzu ho ba hi vbede tshivba. Khu kharato, gufana ni Samisoni hi nga embeya Jehovha gu khethu: “Nya gu gu lomba gukheni nyi alakanye! . . . [u] nyi ninga gambe tshivba.” — Val. 16:28.