1. Khu mani hi yedego gu gombeya gwaye, nigu ginani hi yedego gu gi gombeleya?

Jesu a hi hevbudzide gu khuye gu vbwetega hi gombeya ga Papayi wathu wa ndzadzini basi. Jesu nuye a di gu gombeya ga Jehovha. A di khuye: “Gombeyani kharati: ‘Papayi wathu u gu romo ndzadzini . . . ’” (Matewu 6:9) Tepo hi gombeyago ga Jehovha, wupari wathu naye wo tiya huwo ro.

Hi tshulegide gu gombeya khu gevbini gilo. Ganiolu, gasi gu Nungungulu a hlamula milombelo yathu, gu vbwetega yi gimbileyana ni gugola gwaye. “Ha gu lomba gilo maningano ni gudzina gwaye, hi na ni lisine nya gukhethu [Nungungulu] a ngu hipwa.” (1 Johane 5:14) Jesu a hi ningide giyeyedzo nya silo hi yedego gu si gombeleya. (Leri Matewu 6:9-13.) Ganiolu, tepo hi gombeyago khu silo sathu, hi nga divali gu mu bonga Nungungulu khesi a hi gireyago ni gu mu lomba gu khethu a phasa vambe.

Mufumo wa Nungungulu wu phede gu fuma ndzadzini. Nya mba hweya, wu na vbindrugedza silo nya singi ngudzu mafuni. Hi na bhula khu silo nyo khaguri nya sadi wu na girago Mufumo wowu.

1. Mufumo wa Nungungulu wu na resa kharini gurula ni gululama mafuni?

Jesu, Pfhumu nya Mufumo wa Nungungulu, a na fuvisa vathu vatshavbo nyo vivbe ni mifumo nya vathu ga nyimbi nya Arimagedhoni. (Gutuledwa 16:14, 16) Tepo isoso si na giregago, gu na tadzisega gitumbiso gegi nya Bhibhiliya: “Khadukhadu, kha gu na wonega gambe muthu nya guvivbe, u na vbweta gu wona wulanga waye u si wu mani.” (Ndzimo 37:10) Khu gu thumisa Mufumo wa Nungungulu, Jesu a na resa gurula ni gululama mafuni gwatshavbo.— Lerini Isaya 11:4.

2. Wu na ba wu khade kharini womi wathu tepo gu na giregago gugola ga Nungungulu mafuni?

Nga dundrugeya nu vbanya tigoni gu gu na ni vathu nya vadi ni gululama, nigu vatshavbo na va haladza Jehovha ni gu golana khu gyawe! Khiso si na giregago Mufumoni wa Nungungulu, kha nga olu ‘va nya gululama va na fumeyago litigo, va vbanya umo kala gupindruga.’ (Ndzimo 37:29) Mwalo a na dwalago, nigu vatshavbo va na vbanya kala gupindruga.

3. Ginani egi Mufumo wa Nungungulu wu na girago hwane nyo ba wu fuviside vathu nyo vivbe?

Hwane nyo ba vathu nyo vivbe va fuvisidwe, Jesu a na fuma khu 1000 myaga. Ndrani nya tepo yoyo, uye ni ava nya 144 000 a na fumago navo, va na phasa vathu mafuni gu khala vathu nyo vbeleye. Guhegisani nya 1000 myaga, mafu yatshavbo ma na ba mari paradhesi, nigu vathu vatshavbo va na tsaka kholu va na ba va engisa milayo ya Jehovha. Khavbovbo, Jesu a na bweledza wufumu ga Papayi waye, Jehovha. ‘Lina la Jehovha li na agiswa’ khu guvbeleya. (Matewu 6:9, 10) Si na dzegeya gu wonega gu khiso Jehovha, Pfhumu nya yadi yi khathalago khu vathu. Jehovha a na fuvisa Sathane, madhemoni, ni wevbini muthu a na hathago gu wugeya Mufumo waye. (Gutuledwa 20:7-10) Khu kotani nya Mufumo wa Nungungulu, hi na ba hiri ni womi nya guvbeleye kala gupindruga.

GIRA WUGEVISISI NYO ETE

4. Mufumo wa Nungungulu wu na fuvisa yatshavbo mifumo nya vathu

Bhibhiliya yari khiyo “muthu nya tshivba a gu fumela mumbe muthu gasi gu mu tshanisa.” (Muhevbudzi 8:9) Jehovha a na thumisa Mufumo waye gasi gu fuvisa wuvivbi watshavbo.

Lerini Dhaniyeli 2:44 ni 2 Vatesalonika 1:6-8, mu vbedza mu bhula khu siwudziso sesi:

• Ginani egi Jehovha ni Jesu va na girago khu mifumo nya vathu ni ava va seketeyago mifumo yoyo?

• Wo dundrugeya khesi u si hevbudego khu Jehovha ni Jesu, khu ginani u khodwago gu khuwe va na lamula vathu khu ndziya nya yadi?

5. Jesu Pfhumu nya yadi

Kha nga Pfhumu nya Mufumo wa Nungungulu, Jesu a na gira silo nya singi nya sadi gasi gu phasa vathu mafuni gwatshavbo. Sistirini VHIDHYU gasi mu wona gu khenu Jesu a ngu dogoreya ngudzu gu phasa vathu nigu Nungungulu mu ningide tshivba nyo gire isoso.

VHIDHYU: Jesu yeyedzide esi Mufumo wa Nungungulu wu na girago (1:13)

Silewugiso a giridego Jesu tepo a nga ba ari mafuni, giyeyedzo basi nya esi a na girago kha nga Pfhumu nya Mufumo wa Nungungulu. Ga makategwa yaya vbavbatshi vbavba, khu yavbini yakona u dogoreyago ngudzu gu ma wona na ma girega? Lerini milowo nya Bhibhiliya yi ganeyago khu makategwa yaya.

6. Mufumo wa Nungungulu wu na resa wumindru nyo tsakise

VHIDHYU: Mahemanyana nya wumindru nyo tsakise (4:38)

Lerini Ndzimo 145:16, mu vbedza mu bhula khu giwudziso gegi:

• Wo dzipwa kharini khu guti gu khuwe Jehovha a na “khurisa [gudogoreya nya] sivangwa satshavbo nya guvbanye”?

REZUMO

Mufumo wa Nungungulu wu na gira satshavbo esi Nungungulu a si vbwetago. Wu na vbindrugedza mafu ma khala paradhesi nyo tale khu vathu va engisago ni gu khozeya Jehovha kala gupindruga.

Siwudziso nyo wusedze

• Mufumo wa Nungungulu wu na agisa kharini lina la Jehovha?

• Khu ginani hi nga khodwago gu khethu Mufumo wa Nungungulu wu na tadzisa satshavbo situmbiso si gomogo omu nya Bhibhiliya?

• Ga satshavbo silo nya sadi esi Mufumo wu na girago, khu sevbini esi u vbwetago ngudzu gu khuwe si girega?

HEVBULA SIMBE

Tugula gu khuwe so thula ginani Arimagedhoni.

“Ginani nyimbi nya Arimagedhoni?” (Ndrima nya jw.org, khu Giputukezi)

Hevbula khesi si na giregago ndrani nya 1000 myaga nya Mufumo wa Jesu. Hevbula gambe khesi si na giregago hwane nya myaga yeyi.

“Ginani gi na giregago khu Litshigu nya Gulamule?” (Mukhedziseyi nya 1 nya Setembro nya 2012, khu Giputukezi)

Wona edzi dzindranga dzi nga dzi dundrugeyago khidzo na va romo Paradhesini.

Dzi dundrugeye Paradhesini (1:50)

Ga ndrima “Nyi diri ni siwudziso nya singi si nga ba si nyi garadza,” wona edzi muwugeyi moyo nya politika a nga mana khidzo mihlamulo nya siwudziso saye.

“Bhibhiliya yi ngu vbindrugedza womi nya vathu” (Mukhedziseyi nya 1 nya Janeiro nya 2012, khu Giputukezi)