Simama gurula u bwe u tumba Jehovha

1. Gu fana ni Pfhumu Dhavhidhe, giwudziso muni egi vambe vathu va nga girago?

HATSHAVBO hi ngu vbweta gurula. Mwalo ni moyo gwathu a dzinago gu garadzega. Ambari ulolo, dzimbe dzitepo hi ngu ba hi garadzega ngudzu. Khu ndziya yeyi, simbe sithumi sa Jehovha si nga gira giwudziso nyo fane ni egi Pfhumu Dhavhidhe a giridego Jehovha tepo a nga khuye: “Kala lini hefemulo wangu na wu gu vila, monyo na wu gu kukutelana matshigu yatshavbo khu wuvi?” — Ndzi. 13:2.

2. Ginani hi na bhulago khigyo avba nya ndrima yeyi?

² Ambari olu dzimbe dzitepo hatshavbo hi garadzegago, gu na ni silo hi nga girago gasi gu vbungula gu garadzega. Gupheya, avba nya ndrima yeyi, hi na bhula khu silo si hi girago hi garadzega. Khavbovbo, hi na wona 6 silo hi nga girago si na hi phasago gu simama ni gurula tepo hi tshanganago ni sigaradzo.

GINANI GI NGA HI GIRAGO HI GARADZEGA?

3. Silo muni si nga hi girago hi garadzega, nigu, ina hi nga si kodza gu potsa silo soso?

³ Gu na ni silo nya singi si nga hi girago hi garadzega, nigu, ethu hi mwalo makodzelo nyo gire gu silo soso si si hi dugeleyi. Khu giyeyedzo, ethu hi mwalo makodzelo nyo vbungule dzipreso dzi engedzedwago nya guhodza, sombo ni dzinyumba dzi lugariswago mwaga ni mwaga. Nigu hi mwalo makodzelo nya guti gu khethu sithumi kwanu mwendro sihevbulo kwanu si na hi kutsedzeya kala hayi gu mba tumbega mwendro gu gira wubhayi. Ethu hi mwalo makodzelo gambe nyo gire gu vathu va ema gu gira wuvivbi gipandreni gwathu. Ethu ha gu tshangana ni sigaradzo satshavbo sesi khu gu ha gu vbanya ga litigo omu vathu nya vangi va hungago gu gira silo na va si dzi seketeyi omu nya matshina nya milayo nya Bhibhiliya. Sathane, nungungulu nya litigo leli a ngu dziti gu khuye vambe vathu kha va na nga thumeya Jehovha, kholu “sigaradzo nya guvbanya” si nga va gira va garadzega ngudzu. (Mat. 13:22; 1 Joh. 5:19) Khu kharato, kha hi hlamali khu gu ba litigo leli li tade khu sigaradzo esi si girago gu vathu va garadzega.

4. Ginani gi nga dugeleyago ha gu garadzega ngudzu khu sigaradzo sathu?

⁴ Ethu hi nga garadzega ngudzu khu kotani nya sigaradzo nyo bwe hi tandrega gu pimisa khu gimbe gilo. Khu giyeyedzo, ethu hi nga garadzega khu gu khethu kha hi na nga mana dzitsapawu nyo eneye gasi gu renga esi hi si vbwetago. Hi nga garadzega khu gu khethu hi na dwala hi si kodzi gu thuma mwendro gu wu luza thumo kamo. Hi nga garadzega gambe khu gu khethu kha hi na nga si kodza gu tumbega tepo hi lingwago gu fanya nayo wa Nungungulu. Nugunugu, Sathane a na gira gu vale a va thangeyago va wugeya vathu va Nungungulu, khu kharato, adzina hi nga garadzega khu gu khethu ina hi na si kodza gu emisana ni gu wugedwa gogo gani. Adzina hi nga dzi wudzisa gu khethu: ‘Ina si vivbide gu nyi garadzega khu kotani nya silo sesi?’

5. A di gu vbweta gu khuye ginani Jesu tepo a nga khuye “mu nga garadzegi”?

⁵ Hi ngu dziti gu khethu Jesu a embede valandreyi vaye khuye: “Mu nga garadzegi.” (Mat. 6:25) Ina Jesu a di gu vbweta gu khuye kha hi yeli gu garadzega khu gilo? Khu lisine ne! Dundruga gu khuwe gale simbe sithumi sa Jehovha si emisanide ni gu garadzega. Ganiolu, Jehovha a di gu si tsakeya sithumi saye.b (1 Dzipf. 19:4; Ndzi. 6:3) Khu lisine, Jesu a di gu vbweta gu khuye kha hi yeli gu garadzega ngudzu khu sigaradzo nya guvbanya nyo bwe hi wona khatsi gu thumeya Nungungulu khandri gilo nya lisima womini gwathu. Ginani hi nga girago ha gu dzipwa na hi garadzegide? — Wona kwadru “U nga si gira kharini?”

6 SILO SI NA HI PHASAGO GU SIMAMA NA HI RUDE

6. Guya khu Vafilipi 4:6, 7, ginani gi nga hi phasago gu dzipwa na hi rude?

⁶ (1) Gombeya tepo yatshavbo. Tepo u garadzegago gombeya ga Jehovha gasi a gu phasa. (1 Ped. 5:7) Jehovha a na hlamula milombelo yago khu gu gu ninga “gurula ga Nungungulu gu dzi kodzago gu vboha ni omu hi si gu alakanyigo.” (Leri Vafilipi 4:6, 7.) Jehovha a na gu ninga gurula gogo khu gu thumisa liphuvbo laye nya guage. — Gal. 5:22.

7. Ginani hi yedego gu gi dundruga tepo hi gombeyago ga Nungungulu?

⁷ Tepo u gombeyago ga Jehovha, mu tuleye monyo wago u mu embeya satshavbo u sipwago. Mu embeye gigaradzo gyakone u bwe u mu tshamuseya edzi u dzipwago khidzo khu kotani nya gigaradzo gyogyo. Sa gu kodzega gu gi lulamisa, mu lombe a gu ninga guti nya edzi u nga girago khidzo a bwe a gu ninga tshivba nyo gire isoso. Sa gu mba kodzega gu lulamisa gigaradzo gyogyo, lomba Jehovha a gu phasa gu mba garadzega ngudzu. Wa gu gira milombelo nyo kongome u na si kodza gu wona edzi Jehovha a hlamulago khidzo milombelo yoyo. Wa gu mba mana hlamulo nya nombelo wago khu gu vbiredza, u nga tsukuli gu gombeya. Jehovha kha vbweti basi gu khuye u gira milombelo nyo kongome, ganiolu, a gu vbweta gambe gu khuye u simama gu gombeya. — Luka 11:8-10.

8. Ginani hi yedego gu gi pata omu nya milombelo yathu?

⁸ Tepo u bhuleyago Jehovha sigaradzo sago khu nombelo, pata malito nyo bonge. Gwadi gu hi dundrugeya khu silo nya sadi hi gu naso ambari ha gu ba hi emisana ni sigaradzo. Ganiolu, ahati wa gu mba si kodza gu mu embeya Jehovha edzi u dzipwago ke? Dundruga gu khuwe, Jehovha a na hlamula nombelo wago ambari wa gu ganeya basi khuwe: ‘Jehovha nyi phase.’ — 2 Dzik. 18:31; Rom. 8:26.

9. Hi nga gu mana kharini gu vhikedwa nya lisine?

⁹ (2) Tumba guti ga Jehovha na siri ogu gwago. Dziteponi dza muprofeti Isaya, vathu va Judha va di gu thava gu wugedwa khu vaAsiriya. Vathu va Judha kha va nga ba va vbweta gu khavo vaAsiriya va va tshanisa. Khu kharato, va di lomba giphaso ga vaGipito. (Isa. 30:1, 2) Jehovha a va gengedzide khuye, gutumba vaGipito si di hadzi gu va reseya mihandro nya mba yadi. (Isa. 30:7, 12, 13) Khu gu thumisa Isaya, Jehovha a embede vathu vaye edzi va nga manago khidzo gu vhikedwa nya lisine. Uye a di khuye: ‘Tshivba yanu mu na yi mana gurulani ni gu tumba Jehovha.’ — Isa. 30:15b.

10. Ga siemo muni hi nga yeyedzago gu tumba gwathu ga Jehovha?

¹⁰ Hi nga yeyedza kharini gu tumba gwathu ga Jehovha? Wona siyeyedzo nyo khaguri. Nga dundrugeya khu gu u mana thumo wu na gu ningago dzitsapawu nya dzingi, ganiolu, si lomba gu khiso u thuma dziora nya dzingi wu bwe wu gu gira u si kodzi gu gira nya singi thumoni wa Jehovha nya nga edzi u girago khidzo olu. Nga dundrugeya gambe khu muthu nyo khaguri thumotunu gwago a gu embeya gu khuye a gu vbweta gu haladzana nago, ganiolu, muthu yoyo khandri Fakazi ya Jehovha. Mwendro nongo wago wa vbafuvbi a gu embeya gu khuye wa gu mba diga gu thumeya Jehovha, u nga ganeyi gambe ni eni. U di hadzi gu gira ginani? Ga siemo sesi si di hadzi gu gu garadzeya guti egi u na girago. Ganiolu, Jehovha a na gu ninga sileletelo u si vbwetago. (Mat. 6:33; 10:37; 1 Kor. 7:39) Giwudziso khegi: Ina u na tumba Jehovha u bwe u landrisa sileletelo saye?

11. Khu yavbini matimu nya Bhibhiliya hi nga hevbulago gasi hi si kodza gu simama na hi rude ha gu ba hi wugedwa?

¹¹ (3) Hevbula khu siyeyedzo nya sadi ni esi nya mba sadi. Bhibhiliya yi na ni matimu nya mangi ma tshingisago lisima nyo simame hi rula hi bwe hi tumba Jehovha. Tepo u hevbulago matimu yaya, wona esi si phasidego sithumi sa Jehovha gu simama na si rude tepo si nga ba si wugedwa. Khu giyeyedzo, tepo tribhunal nya yikhongolo nya giJudha yi nga vega nayo nyo khuwo vapostoli va di yede gu ema gu tshumayela, avo kha va thava. Wulangani nya isoso, khu gu tiya avo va di khavo: “Hi fanede gu yingela Nungungulu guvbindra gu yingela vathu.” (Mith. 5:29) Ambari hwane nyo ba va kwamuledwe, vapostoli kha va thava. Khu ginani? Kholu va di gu dziti gu khavo, Jehovha a ngu va phasa. Uye a di gu tsakiswa khavo. Khu kharato, avo va di simama gu tshumayela mahungu nya yadi. (Mith. 5:40-42) Khu ndziya nya gu fane, tepo Sitefane a nga vbweta gu songwa uye a di simama na rude nigu “khovbe yaye yi di ngangamela nga ngilozi.” (Mith. 6:12-15) Khu ginani? Khu gu uye a di gu tiyisega gu khuye Jehovha a di gu mu tsakeya.

12. Guya khu 1 Pedro 3:14 ni 4:14, Khu ginani hi nga tsakago tepo hi wugedwago?

¹² Vapostoli va di si kanakani gu khavo, Jehovha a diri ni avo. Uye ava ningide tshivba nya gu gire silewugiso. (Mith. 5:12-16; 6:8) Jehovha kha hi ningi tshivba nya gu gire silewugiso muhuno. Ganiolu, Jehovha khu gu thumisa Lito laye a ngu hi embeya gu khuye tepo hi wugedwago khu kotani nya gu lulama, uye a ngu hi tsakeya nigu liphuvbo laye nya guage li na ni ethu. (Leri 1 Pedro 3:14; 4:14.) Khu kharato, kha hi yeli gu garadzega khu gu khethu hi na gira ginani ha gu tshuka hi wugedwa. Vbavbandzi nya isoso, hi yede gu gira satshavbo hi si kodzago gasi hi tiyisa gu tumba gwathu nya gu khethu Jehovha a na hi phasa ni gu hi vbulugisa. Gu fana ni vapizane vale, anethu gu vbwetega hi tumba malito ya Jesu ma gu khayo: “Eni mune nyi na mi ningani magana nya guti, ayo valala va na gu mba dzi kodzago gu ma bomba.” Jesu a hi tumbiside khuye: “Khu gu timisela gwanu, mu na vbanyisa mihefemulo yanu.” (Luka 21:12-19) Nigu u nga divali gu khuwe Jehovha gima kha na nga divala silo nya sidugwana si girwago khu sithumi saye esi si fago na si tumbegide gwaye. Khu kharato, uye a na si wusa.

13. Hi nga wuyedwa kharini khu gu hevbula matimu ya vale va tandregidego gu simama na va rude ni gu tumba Jehovha?

¹³ Hi nga hevbula gambe khu siyeyedzo sa vale va tandregidego gu simama na va rude ni gu tumba Jehovha. Gu hevbula siyeyedzo soso nya mba sadi, si na hi phasa gu potsa gu gira sihoso sasimweso esi avo va giridego. Khu giyeyedzo, ga mwaga nyo pheye nya gu fume ga Pfhumu Aza Judha, uye lombide giphaso ga Jehovha tepo a nga wugedwa khu libuthu nya likhongolo nya masotshwa nigu Jehovha a mu kategiside a pala. (2 Dzik. 14:9-12) Khu hwane, tepo libuthu nya lidugwana la Pfhumu Bhahasa wa Israeli li nga ta mu wugeya, Aza a di lomba giphaso ga vaAsiriya vbavbandzi nya gu lombe giphaso ga Jehovha kha nga esi a giridego gu pheyani. (2 Dzik. 16:1-3) Nigu tepo a nga ba a dwala ngudzu nari vbafuvbi ni gufa, uye kha lomba giphaso ga Jehovha. — 2 Dzik. 16:12.

14. Ginani hi nga gi hevbulago khu sihoso sa Aza?

¹⁴ Gupheyani, Pfhumu Aza lombide giphaso ga Jehovha tepo a nga emisana ni gigaradzo. Ganiolu, khu gu gimbiya nya tepo uye kha lomba giphaso ga Nungungulu waye. Vbavbandze nya isoso, uye a di zama gu lulamisa sigaradzo khu abune. Tepo Aza a nga lomba giphaso ga vaAsiriya gasi gu ta dwana ni vaIsrayeli, adzina gupheyani si wonegide gu khatsi khyadi. Ganiolu, isoso ne kha sa pfoledwa khu lidambo. Jehovha khu gu thumisa muprofeti a di mu embeya khuye: “Kha nga olu u tumbidego mufumeli wa Siriya, u si tumbi PFHUMU Nungungulu wago, khu guralo, nyimbi ya mufumeli wa Siriya, yi tsitimugide mandzani gwago.” (2 Dzik. 16:7) Hi yede gu dzi woneya gasi hi si pimisi gu khethu hi nga lulamisa sigaradzo sathu khu habune nya mba lomba sileletelo sa Jehovha si gomogo omu nya Lito laye. Ambari sa gu lomba gu hi hunga silo khu gu vbiredza, hi yede gu lomba giphaso ga Jehovha nigu uye a na hi phasa gasi gu hi hunga gu gira silo nya sadi.

15. Ginani hi nga girago ha gu ba hi leri Bhibhiliya?

¹⁵ (4) Vegisa hungoni mavhesi nyo khaguri nya Bhibhiliya. Tepo u manago mavhesi nya Bhibhiliya ma yeyedzago lisima nyo simame gurula ni gu tumba Jehovha, zama gu ma vegisa hungoni. Gasi u si kodza gu ma vegisa, ma leri khu lito nyo khugege mwendro gu ma lova wulanga nyo khaguri u na si kodzago gu ma wona tepo yatshavbo. Jehovha a embede Josuwa gu khuye a di yede gu leri libhuku nya nayo tshigu ni tshigu khu lito la vbavbatshi gasi gu a dugeleya. Esi a nga hadzi gu leri omu nya libhuku nya nayo si di hadzi gu mu phasa gambe gu mba thava, ganiolu, a manega ni gutiya gasi gu thangeya vathu va Nungungulu. (Jos. 1:8, 9) Mavhesi nya mangi nya Bhibhiliya ma nga gu phasa gu dzipwa na wu rude ga siemo si gu girago u dzipwa na wu garadzega mwendro gu thava. — Ndzi. 27:1-3; Mav. 3:25, 26.

16. Jehovha a nga thumisa kharini libandla gasi li hi phasa gu simama ni gurula hi bwe hi mu tumba?

¹⁶ (5) Dzitshanganise ni vathu va Nungungulu. Jehovha a gu thumisa vandriyathu gasi gu a hi phasa gu simama ni gurula ni gu hi mu tumba. Mitshanganoni gwathu hi ngu phasega khu dziganelo, mihlamulo ya va engiseyi nigu hi ngu tiyiswa khu mabhulo hi manegago nawo ni vandriyathu. (Hebh. 10:24, 25) Hi ngu tiyiswa gambe khu dzipari dza libandlani tepo hi dzi bhuleyago khu sigaradzo sathu. “Magana nya yadi” ya pari yathu ma nga hi phasa gu vbungula gu garadzega.— Mav. 12:25.

17. Guya khu Vahebheru 6:19, gutumba gwathu avba nya Mufumo wa Nungungulu gu nga hi phasa kharini gu simama ni gurula ndrani nya dzitepo nyo garadze?

¹⁷ (6) Tiyisa gutumba gwago. Gutumba gwathu avba nya Mufumo wa Nungungulu go fana ni “giwindri nya gutiye gi hi ningago gutiya ambari ha gu ba hi tshangana ni sigaradzo mwendro gu garadzega. (Leri Vahebheru 6:19.) Dundrugeya khu wumindru owu Jehovha a hi tumbisago, nigu ga tepo yoyo gu mwalo muthu a na garadzegago khu gilo. (Isa. 65:17) Dzi dundrugeye na wu vbanya khu gurula omu nya litigo nya liphya, omu gu na ba guri mwalo silo nya gu vivbe. (Mik. 4:4) U na tiyisa gambe gutumba gwago wa gu bhuleya vambe maningano ni litigo nya liphya. Gira satshavbo u si kodzago thumoni nyo tshumayele ni gu gira vapizane. Wa gu gira isoso, u na “manega ni gutumba nyo tiye kala mahegiso.” — Hebh. 6:11, NM.

18. Sigaradzo muni adzina si na dugeleyago mindru wa tshigu nigu ginani hi nga girago gasi gu hi si pala?

¹⁸ Kha nga olu litigo la Sathane li gu romo vbafuvbi ni gu fuviswa, hi na tshangana ni sigaradzo nya singi si na hi girago hi garadzega. Lowo wathu nya mwaga nya 2021 wu na hi phasa gu emisana ni sigaradzo hi bwe hi simama ni gurula na siri khu tshivba yathu, ganiolu khu gu tumba Jehovha. Ndrani nya mwaga wowu, hongoleni hi yeyedza khu mithumo yathu gu khethu, hi na ni gutumba avba nya gitumbiso gya Jehovha gi gu khigyo: ‘Tshivba yanu mu na yi mana gurulani ni gutumbani.’— Isaya 30:15.