GIHEVBULO 17

Gasi Jesu a diri muthu nyo khale kharini?

Nyo imprimirwi

Tepo hi hevbulago khesi Jesu a ganedego ni gu gira mafuni, hi ngu tugula makhalelo ma hi girago hi khala dzipari dzaye ni gu khala dzipari dza Jehovha, Papayi waye wa ndzadzini. Khu yavbini makhalelo yakona yoyo? Nigu hi nga mu pimedzeya kharini Jesu guvbanyani gwathu?

1. Jesu a gu fana kharini ni Papayi waye?

Jesu vbanyide ndzadzini ni Papayi waye nya lihaladzo khu myaga nya yingi a bwe a hevbula silo nya singi gwaye. Khu kharato, Jesu a ngu pimisa, a dzipwa ni gu gira silo kha nga edzi Jehovha a girago khidzo. (Leri Johane 5:19.) Gasi gu ganeya lisine, Jesu a ngu pimedzeya gwadi makhalelo ya Jehovha nyo bwe a ganeya khuye: “Uye a nyi wonago, a ngu wona Babe.” (Johane 14:9) Tepo u yago u hevbula khu makhalelo ya Jesu, u naya u muti gwadi Jehovha. Khu giyeyedzo, gu wona edzi Jesu a nga ba a khathala khidzo khu vathu, so yeyedza edzi Jehovha a khathalago khidzo khuwe.

2. Jesu yeyedzide kharini gu khuye a ngu haladza Jehovha?

Jesu a di khuye: “Satshavbo sesi nya gufela gukheni litigo li dziti nya gukhilo nyi ngu gola Babe, ni gukhilo nyi ngu gira kha nga idzo Babe a nga nyi rumago khidzo.” (Johane 14:31) Tepo a nga ba ari mafuni, Jesu yeyedzide gu khuye a di gu haladza Papayi waye khu gu mu engisa siloni satshavbo, ambari tepo si nga ba si garadza gu gira isoso. Vbavbandze nya isoso, Jesu a di gu gola gu bhula ni vathu khu Papayi waye ni gu va phasa gu khala dzipari dza Nungungulu. — Johane 14:23.

3. Jesu yeyedzide kharini gu khuye a ngu haladza vathu?

Bhibhiliya yari khiyo Jesu a ngu “tsakiswa khu vathu.” (Mavingu 8:31) Jesu a di gu phara gwadi vathu vatshavbo; a diri mwalo gihatheya. Vbavbandze nya isoso, uye tepo yatshavbo a di gu tiyisa vambe nigu a di dzi emisede gu va phasa. Silewugiso a giridego kha sa yeyedza tshivba yaye basi, ganiolu si yeyedzide gambe gu khiso a di gu pweya wusiwana vathu. (Marko 1:40-42) Malito yaye ma di gu thaveleya ni gu ninga gutumba vathu vatshavbo nya myonyo nya yadi va nga ba va mu engiseya. Jesu a di dzi emisede gu tshaniseka ni gufa kholu a di gu haladza vathu. Ganiolu, a gu haladza ngudzu vale va engisago sihevbudzo saye. — Leri Johane 15:13, 14.

GIRA WUGEVISISI NYO ETE

Hevbula simbe khu makhalelo ya Jesu u bwe u hevbula ndziya nyo yeyedze khiyo lihaladzo ni gupweya-wusiwana.

4. Jesu a di gu haladza Papayi waye

Giyeyedzo gya Jesu gyo hi hevbudza edzi hi nga yeyedzago khidzo gu khethu hi ngu mu haladza Nungungulu. Lerini Luka 6:12 ni Johane 15:10; 17:26. Hwane nyo leri mavhesi yaya, bhulani khu giwudziso gegi:

Hi nga yeyedza kharini gu khethu hi ngu haladza Jehovha nga edzi Jesu a mu haladzago khidzo?

Jesu a gombeyago. — Jesu a di gu mu haladza Papayi waye nigu a di gu tala gu bhula naye khu nombelo

5. Jesu a ngu khathala khu vathu va vbwetago giphaso

Jesu a di gu khathala ngudzu khu vambe vathu guvbindra uye. A di gu thumisa tepo ni tshivba yaye gasi gu phasa vambe vathu ambari na garade. Lerini Marko 6:30-44, mu vbedza mu bhula khu siwudziso sesi:

Khu guya khu mavhesi yaya, Jesu yeyedzide kharini gu khuye a ngu khathala khu vambe vathu?— Wona mavhesi 31, 34, 41, ni 42.
Khu ginani Jesu a nga ba a phasa vathu?— Wona livhesi 34.
Jesu pimedzede makhalelo ya Papayi waye. So hi hevbudza ginani isoso khu Jehovha?
Hi nga yeyedza kharini gu khethu hi ngu khathala khu vambe nga Jesu?

Jesu a girago gilewugiso nyo hodzise vathu nya vangi khu gu kategisa 5 dzipawu ni sindzandzyana sivili. Vapizane va kabaniseyago guhodza ga vama, ni vanyamayi ni sanana.

6. Jesu na ni wuhindzi

Jesu a diri mwalo silo nya singi, ganiolu a di gu ninga vambe sa sidugwana a nga ba ari naso, nigu o hi kutsa gu gira sa simweso. Lerini Mithumo 20:35, mu vbedza mu bhula khu giwudziso gegi.

Khu guya khu malito ya Jesu, ginani hi yedego gu gira gasi hi tsaka?

Sistirini VHIDHYU, mu vbedza mu bhula khu siwudziso sesi.

VHIDHYU: “A ngu tsaka ngudzu oyu a ningago guvbindra oyu a hakhago” — Gipandre (4:00)

Hi nga yeyedza kharini wuhindzi ambari ho ba hiri mwalo silo nya singi?

U di gu dziti?

Bhibhiliya yo hi hevbudza gu gombeya ga Jehovha khu lina la Jesu. (Leri Johane 16:23, 24.) Tepo hi girago isoso, ho yeyedza gu khethu hi ngu bonga kholu Jesu a hi tuledego ndziya nyo khale dzipari dza Jehovha.

VAMBE VARI KHAVO: “Nungungulu kha khathali khu gutshaniseka gwathu.”