GIHEVBULO 32
Mufumo wa Nungungulu wu ngu fuma!
Mufumo wa Nungungulu wu phede gu fuma ndzadzini khu mwaga nya 1914. Khiyo tepo ya mweyo ma nga pheya matshigu nya guhegise nya gu fume nya vathu. Ho dziti kharini? Hi na wona esi Bhibhiliya yi si profetidego khu mahungu yaya hi bwe hi wona giemo nya mafu gukhugeya khu 1914.
1. Ginani egi Bhibhiliya yi gi profetidego?
Libhuku la Dhaniyeli li ngu hi phasa gu pwisisa gu khethu Mufumo wa Nungungulu wu phede gu gufuma guhegisani nya dzitepo dzi ranwago pwani “livbandre na sivili sikhati” mwendro 7 dzitepo. (Dhaniyeli 4:16, 17) Hwane nyo ba gu vbindride myaga nya yingi, Jesu ranide tepo yoyo khuye ‘tepo yi vegisidwego ya vanyamayigo,’ nigu hevbudzide gambe gu khuye tepo yeyi yi di si vbeyi. (Luka 21:24) Kha nga hi na si wonago, 7 dzitepo dzi di hadzi hegisa khu 1914.
2. Ginani gi tago na gi girega mafuni gukhugeya khu 1914?
Vapizane va Jesu va wudziside khavo: “Nga hi embeya: Lini si na giregago silo sesi? Nigu giwoniso muni gi na yeyedzago guta gwago ni gu hegisa nya litigo leli?” (Matewu 24:3) Tepo a nga va hlamula, Jesu ganede khu silo nya singi si nga hadzi girega hwane nyo ba a phede gu fuma kha nga Pfhumu nya Mufumo wa Nungungulu. Simbe sakona si di gu pata dzinyimbi, dzindzala ni sirevareva. (Leri Matewu 24:7.) Bhibhiliya gambe yi profetide khu makhalelo nya vathu va ‘matshiguni nya guhegise’, nigu khu kotani nya makhalelo yawe, womi wu di hadzi garadza. (2 Thimoti 3:1-5) Gukhugeya khu 1914, silo sesi satshavbo si phede gu wonega ngudzu.
3. Khu ginani litigo li yago li vivba ngudzu gukhugeya wu nga pheya gu fuma Mufumo wa Nungungulu ndzadzini?
Gitepwana hwane nyo ba Jesu a khade Pfhumu nya Mufumo wa Nungungulu, a di dwana nyimbi nya yikhongolo ni Sathane ni madhemoni yaye ndzadzini. Sathane a di padwa ga nyimbi yoyo. Bhibhiliya yari khiyo uye “tshigide vbakari gwanu [mafuni] na tade khu likhulo nya likhongolo ngudzu, kholu a dzitigo nya gukhuye gikhati gyaye gidugwana ngudzu.” (Gutuledwa 12:9, 10, 12) Sathane zangaride ngudzu kholu a ngu dziti gu khuye a na fuviswa. Khu kharato, womo kho a tshanisa vathu mafuni gwatshavbo. Kha si hi hlamadzisi gu wona wuvivbi na wu engedzeya mafuni! Ganiolu, Mufumo wa Nungungulu wu na fuvisa satshavbo sigaradzo si vangwago khu Sathane.
GIRA WUGEVISISI NYO ETE
Wona esi si hi girago hi khodwa gu khethu Mufumo wa Nungungulu wu phede gu fuma khu 1914. Wona gambe gu khuwe isoso so hi kutsa gu gira ginani.
4. Siprofeto nya Bhibhiliya so yeyedza gu khiso Mufumo wa Nungungulu wu phede gu fuma khu 1914
Nungungulu a di gira gu Nebhukadhenazari, pfhumu ya Bhabhiloni wa gale, a lora silo nyo khaguri. Ga loro wowo, Jehovha a di gu mu yeyedza esi si nga hadzi mu giregeya khu gu gimbiya nya tepo. Dhaniyeli a di mu embeya tshamuselo nya loro wowu, nigu loro wowu wu di tadzisega ga mufumo wa Nebhukadhenazari ni avba nya Mufumo wa Nungungulu. — Lerini Dhaniyeli 4:17.a
Lerini Dhaniyeli 4:20-26, mu vbedza mu thumisa dzikwadru dzi gomogo avba nya pajina 133 gasi gu hlamula siwudziso sesi:
(A) Ginani egi Nebhukadhenazari a gi wonidego omu nya loro? — Wona mavhesi 20 ni 21.
(B) Ginani gi nga hadzi giregeya simbo a nga wu lora? — Wona livhesi 23.
(C) Ginani gi nga hadzi girega guhegisani nya 7 dzitepo? — Wona livhesi 26.
Guyelana muni gu gomogo avba nya simbo nya loro ni Mufumo wa Nungungulu?
GIPROFETO (Dhaniyeli 4:20-36)
Mufumo
(A) Simbo nya wukhongolo
Mufumo wu ema gu fuma
(B) ‘Kokani simbo,’ kala “guvbindra livbandre na sivili sikhati” mwendro 7 dzitepo
Mufumo wu pheledza gu fuma
(C) “Mufumo wago u na bweledzedwa”
Gutadzisega nyo pheye nya giprofeto gegi . . .
(D) Simbo wu di gu emeya mani?— Wona livhesi 22.
(E) Mufumo waye wu emide lini gu fuma? — Lerini Dhaniyeli 4:29-33.
(F) Ginani gi nga giregeya Nebhukadhenazari guhegisani nya 7 dzitepo? — Lerini Dhaniyeli 4:34-36.
GUTADZISEGA NYO PHEYE
Mufumo
(D) Nebhukadhenazari, Pfhumu ya Bhabhiloni
Mufumo wu pheledza gu fuma
(E) Hwane nya mwaga nya 606 Na ma si gu vbohi matshigu yathu, Nebhukadhenazari a phedwa khu lihuri a tandrega gu fuma gu vbindra 7 myaga nya lisine
Mufumo wu ema gu fuma
(F) Wu wuyeleya wuthu wa Nebhukadhenazari a bwe a pheledza gu fuma gambe
Gutadzisega nya wuvili nya giprofeto gegi . . .
(G) Simbo wu di gu emeya mani? — Lerini 1 Dzikoronika 29:23.
(H) Mufumo wawe wu emide lini gu fuma? Ho dziti kharini gu khethu tepo Jesu a nga ba ari mafuni va di emide gu fuma? — Lerini Luka 21:24.
(I) Mufumo wowu wu pheledzide lini gu fuma nigu hayini?
GUTADZISEGA NYA WUVILI
Mufumo
(G) Dzipfhumu dza Israyeli dzi nga ba dzi emeya Mufumo wa Nungungulu
Mufumo wu pheledza gu fuma
(H) Jerusalema gu fuviswa, khavbovbo dzipfhumu dza Israyeli dzi ema gu fuma khu 2520 myaga
Mufumo wu ema gu fuma
(I) Jesu a pheya gu fuma ndzadzini kha nga pfhumu nya Mufumo wa Nungungulu
7 dzitepo go thudwa myaga mingani?
Sipandre nyo khaguri nya Bhibhiliya si ngu hi phasa gu pwisisa simbe. Khu giyeyedzo, libhuku la Gutuledwa lari khilo dzitepo dziraru ni metadu dzo emeya 1260 matshigu. (Gutuledwa 12:6, 14) Khu kharato, 7 dzitepo go patwa guvili tengo wowu, mwendro go thudwa 2520 matshigu. Dzimbe dzitepo Bhibhiliya yi ngu thumisa litshigu limwedo gasi gu emeya mwaga mowo. (Ezekiyeli 4:6) Khidzo saye ni 7 dzitepo dzi thudwago omu nya libhuku la Dhaniyeli — idzo dzo emeya 2520 myaga.
5. Litigo li vbindrugedzide ngudzu gukhugeya khu 1914
Jesu profetide esi si nga hadzi girega mafuni tepo a nga hadzi pheya gu fuma. Lerini Luka 21:9-11, mu vbedza mu bhula khu giwudziso gegi:
Khu guya khu mavhesi yaya, khu sevbini silo u si wonago na si girega muhuno?
Mupostoli Pawulo ganede khu makhalelo va nga hadzi manega nawo vathu matshiguni nya guhegise nya gu fume nya vathu. Lerini 2 Thimoti 3:1-5, mu vbedza mu bhula khu giwudziso gegi:
Wo si wona kharini, ina vathu muhuno va nawo makhalelo yaya?
6. Hi yede gu dzi emiseya gu seketeya Mufumo wa Nungungulu
Lerini Matewu 24:3, 14, mu vbedza mu bhula khu siwudziso sesi:
Khu wevbini thumo nya lisima wu yeyedzago gu khuwo Mufumo wa Nungungulu wu phede gu fuma?
U nga hengeya kharini thumoni wowu?
Mufumo wa Nungungulu wu ngu fuma, nigu litshigu nya gu wu pheya gu fumeya mafu yatshavbo lomo vbafuvbi. Lerini Vahebheru 10:24, 25, mu vbedza mu bhula khu giwudziso gegi:
Ginani egi moyo ni moyo wathu a yedego gu gira kha nga olu hi wonago gu ‘khethu litshigu la Pfhumu li ngu vboha’?
Nari khatshi u diri ni makodzelo nyo phase mwendro gu vbulugisa vambe, ginani u nga hadzi gira?
VAMBE VA NGA WUDZISA KHAVO: “Khu ginani Dzifakazi dza Jehovha dzi ningago ngudzu lisima mwaga nya 1914?”
U di hadzi khuwe ginani?
REZUMO
Siprofeto nya Bhibhiliya ni giemo nya litigo si ngu yeyedza gu khiso Mufumo wa Nungungulu wu ngu fuma. Tepo hi tshumayelago ni gu hongola mitshanganoni, ho yeyedza gu khethu hi ngu khodwa ga Mufumo wowo.
Siwudziso nyo wusedze
Ginani gi nga girega guhegisani nya 7 dzitepo dzi thudwago omu nya libhuku la Dhaniyeli?
Ginani gi gu girago u khodwa gu khuwe Mufumo wa Nungungulu wu phede gu fuma khu 1914?
U nga yeyedza kharini gu khuwe u ngu khodwa gu khuwe Mufumo wa Nungungulu wu phede gu fuma?
HEVBULA SIMBE
Wona esi valovi nya matimu ni vambe vathu va ganeyago khesi si giregago mafuni gukhugeya khu 1914.
Wona edzi giprofeto gya Matewu 24:14 gi vbindrugedzidego khidzo womi wa mwama nyo khaguri.
“Nyi di gu gola baisebol guvbindra gimbe gilo!” (Mukhedziseyi nya N.° 3 nya 2017, khu Giputukezi)
Ho dziti kharini gu khethu giprofeto gya Dhaniyeli gipimo 4 gyo tadzisega avba nya Mufumo wa Nungungulu?
Ho dziti kharini gu khethu 7 dzitepo dzi thudwago omu ga Dhaniyeli gipimo 4 dzi hegiside khu 1914?