Ina valongo ni dzipari dzathu va fudego hi na tshuka hi va wona gambe?

Gufa gu ngu hi vangeya wuvi nya wukhongolo ni gutshaniseka. Khigyo gi girago Bhibhiliya yi rana gufa khiyo nala. (1 Vakorinto 15:26) Ga gihevbulo 27, hi wonide gu khethu Jehovha a na fuvisa nala yoyu. Ganiolu, ginani gi na giregago khu vathu va fudego? Ga gihevbulo gegi, u na hevbula khu gitumbiso nyo tsakise gya Jehovha — a na wusa dzibhiliyoni nya vathu va ta vbanya kala gupindruga. Ina isoso si na girega kamo? Ina va na wuswa va vbanya hayi? Ndzadzini mwendro mafuni?

1. Ginani egi Jehovha a vbwetago gu gira khu valongo ni dzipari dzathu va fudego?

Jehovha a ngu dzina ngudzu gu wusa ava va fudego. Mwama nyo khaguri nyo tumbege nyo pwani khu Joba a di gu khodwa gu khuye Nungungulu kha na nga mu divala a gufa. A di embeya Nungungulu, khuye: “U na nyi rana, nyi di hadza gu gu hakha [khu thowoni].” — Leri Joba 14:13-15.

2. Ho dziti kharini gu khethu ava va fudego va na wuswa?

Tepo Jesu a nga ba ari mafuni, Nungungulu mu ningide tshivba nyo wuse vathu va fudego. Khu giyeyedzo, wuside gyadzyana gimwegyo nya 12 myaga ni gyanana nya gikhwathana gya nyamayi moyo a nga ba fedwe khu mwama. (Marko 5:41, 42; Luka 7:12-15) Uye gambe wuside pari yaye Lazaro khu ga vafudego. Ambari olu gu nga ba gu vbindride 4 matshigu Lazaro na fude ni gu dzingwa, Jesu si kodzide gu mu wusa. Jesu a di gombeya ga Nungungulu, khuye: “Lazaro, duga vbavbandze.” Khavbovbo, “mufi a di duga.” (Johane 11:43, 44) Nga dundrugeya khedzi valongo ni dzipari dza Lazaro va tsakidego khidzo!

3. Gutumba muni hi gu nago khu valongo ni dzipari dzathu va fudego?

Bhibhiliya yi ngu tumbisa khiyo: “Gomo guwuga ga vale va fudego.” (Mithumo 24:15) Vathu vale Jesu a va wusidego tepo a nga ba ari mafuni kha va hongola ndzadzini. (Johane 3:13) Avo va tsakide khu gu wuswa va vbanya gambe omu mafuni. Khu ndziya nyo fane, nya mba hweya, Jesu a na wusa vathu nya vangi gasi va ta vbanya paradhesini mafuni. Uye a di khuye “vatshavbo va fudego va gomogo marowoni” va na wuswa. (Johane 5:28, 29) Isoso so thula gu khiso vatshavbo va gomogo mapimoni ga Nungungulu, gupata ni vale va gu mba dundrugwa gambe khu muthu, va na wuswa va vbanya gambe.

GIRA WUGEVISISI NYO ETE

4. Jesu yeyedzide gu khuye a ngu si kodza gu wusa ava va fudego

Hevbula gambe khesi Jesu a giredego pari yaye Lazaro. Lerini Johane 11:14, 38-44, mu vbedza mu bhula khu siwudziso sesi:

• Ho dziti kharini gu khethu Lazaro a di fude khu lisine? — Wona livhesi 39.

• Jesu wuside Lazaro gasi a vbanya gambe omu mafuni. Nari khatsi Lazaro a di hongode ndzadzini, ina Jesu na mu wuside a ta vbanya gambe omu mafuni?

Sistirini VHIDHYU.

VHIDHYU: Jesu a wusa Lazaro (1:16)

5. Vathu nya vangi va na wuswa va vbanya gambe!

Lerini Ndzimo 37:29, mu vbedza mu bhula khu giwudziso gegi:

• Dzibhiliyoni nya vathu va na wuswago khu gufani va na ya vbanya hayi?

Vbavbandze nyo wuse basi sithumi nyo tumbege sa Jehovha, Jesu a na wusa vatshavbo ava va fudego. Lerini Mithumo 24:15, mu vbedza mu bhula khu giwudziso gegi:

• Khu mani u nga ba u tsakeya gu mu wona na wusidwe a vbanya gambe?

Nga dundrugeya khesi: Si ngu vbevbuga ngudzu gu Papayi a wusa gyanana gyaye gi ladego. Khu ndziya ya mweyo, Jesu nuye si na mu vbevbugeya gu wusa vathu va fudego

6. Guwuswa ga ava va fudego gu nga gu thaveleya gu bwe gu gu ninga gutumba

Leri omu nya Bhibhiliya esi si nga dugeleya nyamahegyana wa Jayiro. Matimu yaya ma ngu tiyisa ni gu thaveleya vathu nya vangi va garadzegago khu gu ba va fedwe khu muthu nyo khaguri. Lerini matimu yoyo omu ga Luka 8:40-42, 49-56.

Na si gu wusi nyamahegyane wa Jayiro, Jesu a di embeya papayi wakona, khuye: “U nga thavi, khodwa basi.” (Wona livhesi 50.) Gutumba nya guwuswe ga ava va fudego gu nga gu phasa kharini . . .

• wo fedwa khu muthu u mu golago?

• womi wago wo ba wuri mhangoni?

Sistirini VHIDHYU, mu vbedza mu bhula khu giwudziso gi landreyago.

VHIDHYU: Guwuswa ga ava va fudego ga gu hi tiyisa kharini hwambo? (3:21)

• Gitumbiso nya guwuswe ga ava va fudego gi thavelede ni gu tiyisa kharini vavelegi va Felesiti?

REZUMO

Bhibhiliya yi ngu tumbisa gu khiyo dzibhiliyoni nya vathu va fudego va na wuswa. Jehovha o vbweta gu khuye va wuga va vbanya gambe, nigu ningide tshivba Jesu nyo gire isoso.

Siwudziso nyo wusedze

• Ginani egi Jehovha ni Jesu va vbwetago gu gireya ava va fudego?

• Dzibhiliyoni nya vathu va na wuswago va ya vbanya hayi — ndzadzini mwendro mafuni? Khu ginani u ganeyago isoso?

• U ngu khodwa gu khuwe vathu va fudego va na wuswa va vbanya gambe? Khu ginani?

HEVBULA SIMBE

Wona mawonelo nya yadi ma nga gu phasago gu timiseya wo fedwa khu muthu.

“Wuvi wu vangwago khu gu fedwa” (Khendzugani! nya N.° 3 nya 2018, khu Githwa)

Ina matshina nya milayo nya Bhibhiliya ma nga phasa muthu a garadzegago khu gu fedwa khu muthu?

Tepo hi fedwago khu muthu hi mu golago (5:06)

Hi nga phasa kharini gyanana gyo ba gi fedwe khu muthu gi mu golago?

Gudzegiswa (2:07)

Ina kamo vomo va na wuswago va ya vbanya ndzadzini? Khu vamani va no ne wuswa?

“Ginani guwuswa ga ava va fudego?” (Ndrima nya jw.org, khu Giputukezi)