So thula ginani gu mba dzi bedzedzeya omu nya politika?

Jesu embede valandreyi vaye gu khuye va si “lumbi litigo.” (Johane 15:19) Isoso so pata gu mba dzi bedzedzeya omu nya politika, mwendro gu lumba partidho nyo khaguri ni gu seketeya dzinyimbi nya mafu. Gasi gu ganeya lisine, khandri tepo yatshavbo si vbevbugago gu mba dzi bedzedzeya omu nya politika. Adzina vathu va nga hi hega khu kotani nya isoso. Ginani hi nga girago gasi hi simama gu mba dzi bedzedzeya omu nya politika ni gu tumbega ga Jehovha?

1. Khu yavbini mawonelo ya Makristo khu mifumo nya vathu?

Makristo ma ngu ninga githawo mifumo nya vathu. Khu kharato, ho gira esi Jesu a nga ganeya hi ‘ningeya ga Sezari esi si gu sa Sezari.’ Isoso so thula gu khiso hi ngu engisa milayo nya litigo, nya nga gu livba mikhupo. (Marko 12:17) Bhibhiliya yo hevbudza gu khiyo mifumo nya vathu yo fuma basi kholu Jehovha a yi dzumeleyago. (Varoma 13:1) Khu kharato, hi ngu dziti gu khethu mifumo nya vathu yi mwalo tshivba ni makodzelo nyo fume, nigu khu Nungungulu enga ni Mufumo waye va gu na ni tshivba nyo lulamise sigaradzo nya vathu.

2. Hi nga yeyedza kharini gu khethu kha hi dzi bedzedzeyi omu nya politika?

Gufana ni Jesu, ethu kha hi dzi bedzedzeyi omu nya politika. Tepo vathu va nga wona gimwegyo nya silewugiso sa Jesu, va di zama gu mu gira pfhumu, ganiolu kha dzumeya. (Johane 6:15) Khu ginani a nga bomba? Uye mune a di khuye: “Mufumo wangu khandri wa mafuni momu.” (Johane 18:36) Kha nga vapizane va Jesu, hi ngu yeyedza gu khethu kha hi dzi bedzedzeyi omu nya politika khu dzindziya nyo hambanehambane. Khu giyeyedzo, kha hi hongoli dzinyimbitunu. (Leri Mikeya 4:3.) Vbavbandze nya isoso, kha hi seketeyi ne partidho mweyo nya politika ni vafumeli vakona. Hi ngu ninga githawo litigo hi vbanyago ga ilo, ganiolu kha hi khuzeyi bhandeira mwendro gu gira simbe silo si gimbileyanago ni esi. (1 Johane 5:21) Edzi khidzo dzindziya nyo khaguri hi yeyedzago khidzo gu khethu hi ngu tumbega ga Mufumo wa Nungungulu khu monyo watshavbo.

GIRA WUGEVISISI NYO ETE

3. Makristo nya lisine kha ma dzi bedzedzeyi omu nya politika

Jesu ni valandreyi vaye va di si dzi bedzedzeyi omu nya politika. Anethu gu vbwetega hi pimedzeya giyeyedzo gyawe. Lerini Varoma 13:1, 5-7; 1 Pedro 2:13, 14. Khavbovbo, mu sistiri VHIDHYU mu vbedza mu bhula khu siwudziso sesi.

VHIDHYU: Makristo nya lisine kha ma dzi bedzedzeyi omu nya politika — Gipandre 1 (4:28)

• Khu ginani hi yedego gu ninga githawo mifumo nya vathu?

• Khu dzevbini dzindziya nyo khaguri hi nga yeyedzago khidzo gu khethu hi ngu yi engisa mifumo yeyi?

Omu nya dzinyimbi, mayigo nyo khaguri ma ngu dzi embeya gu khayo kha ma dzi bedzedzeyi omu nya silo nya politika, ganiolu ma vbedza ma seketeya eno ni eno. Gwadigwadi gasi so thula ginani gu mba dzi bedzedzeya omu nya silo nya politika? Lerini Johane 17:16. Khavbovbo, mu sistiri VHIDHYU mu vbedza mu bhula khu giwudziso gegi.

VHIDHYU: Makristo nya lisine kha ma dzi bedzedzeyi omu nya politika — Gipandre 2 (3:11)

• So thula ginani gu mba dzi bedzedzeya omu nya politika?

Ginani hi na girago wo tshuka wufumu wu hi lomba gu gira silo si dwanisanago ni milayo ya Nungungulu? Lerini Mithumo 5:28, 29. Khavbovbo, sistirini VHIDHYU mu vbedza mu bhula khu siwudziso sesi.

VHIDHYU: Makristo nya lisine kha ma dzi bedzedzeyi omu nya politika — Gipandre 3 (1:18)

• Go tshuka nayo nya vathu ni nayo wa Nungungulu yi dwanisana, nayo wa mani hi yedego gu wu engisa?

• Khu sevbini siemo nyo khaguri u wonago gu khuwe Makristo kha ma yeli gu engisa wufumo?

4. U nga dzi bedzedzeyi omu nya politika khu mapimoni ambari khu mithumo yago

Lerini 1 Johane 5:21. Khavbovbo, sistirini VHIDHYU mu vbedza mu bhula khu giwudziso gegi.

VHIDHYU: Khu ginani Makristo nya lisine ma yededo gu tiya hwambo — Gasi ma si dzi bedzedzeyi omu nya politika (2:49)

• Kha nga hi si wonidego omu nya vhidhyu, khu ginani Ayenge a nga hunga gu mba dzi bedzedzeya omu nya politika mwendro omu nya silo nya nga gu khuzeya bhandeira?

• Wo si wona kharini, ina uye hathide silo nya sadi?

Khu sevbini simbe siemo si nga lingago gudziemiseya gwathu nyo mba dzi bedzedzeya omu nya politika? Sistirini VHIDHYU, mu vbedza mu bhula khu siwudziso sesi.

VHIDHYU: Sihevbudzo hi si manago omu nya Mukhedziseyi — Simamani gu mba dzi bedzedzeya omu nya politika omu nya mafu yaya ma gu mwalo gupwanana (5:16)

• Hi nga simama kharini gu mba lumba litigo lo tshuka litigo lathu li veteya ni mambe mayigo?

• Hi nga si kodza kharini gu simama hi si dzi bedzedzeyi omu nya politika ambari o tshuka politiko nyo khaguri a ganeya mwendro gu gira silo si gu kuhago?

• Mahungu nya politika hi ma pwago omu nya dzinotisya mwendro ni vathu ma nga hi tandregisa kharini gu mba dzi bedzedzeya omu nya politika?

REZUMO

Makristo ma ngu dzi garadza ngudzu gasi ma si lumbi litigo khu mapimoni, khu malito ni mithumo yawe.

Siwudziso nyo wusedze

• Ginani hi yedego gu ninga mifumo nya vathu?

• Khu ginani hi gu mba yela gu dzi bedzedzeya omu nya politika?

• Siemo muni si nga lingago gudziemiseya gwathu nyo mba dzi bedzedzeya omu nya politika?

HEVBULA SIMBE

Gudzigaradza muni ogu adzina hi nga gu girago gasi hi si dzi bedzedzeyi omu nya politika?

Jehovha gima kha hi diga (3:14)

Ginani egi dzindranga dzi yedego gu gira gasi dzi khala na dzi dongide gu mba dzi bedzedzeya omu nya politika?

U nga dzi bedzedzeyi omu nya silo nya litigo (4:25)

Khu ginani gu dwaneya litigo si gu mba resa wuzundzo nya wukhongolo ga muthu?

“Ga Nungungulu satshavbo si ngu kodzega” (5:19)

Wona esi u yedego gu gira gasi u si lumbi litigo tepo u hathago thumo nyo dzi vbanyise.

“Muthu ni muthu a na dzi hlamuleya” (Mukhedziseyi nya 15 nya Março nya 2006, khu Giputukezi)

Gu hweya ni gu mba hweya, Makristo yatshavbo ma na wugedwa, ambari kamo gu tshaniswa. Ina isoso si yede gu hi thavisa?

1. Khu ginani hi vireyago gu tshaniswa?

Bhibhiliya yari khiyo: “Vatshavbo vale va vbwetago gu vbanya khu gukhodwa ga Kristo Jesu va na saniswa.” (2 Thimoti 3:12) Jesu tshanisidwe kholu kha nga ba a gira gipandre nya litigo la Sathane. Anethu kha hi giri gipandre nya litigo. Khu kharato, kha hi hlamali tepo hi tshaniswago khu mifumo ni dzihengeledzano nya wukhongeyi nya litigo leli. — Johane 15:18, 19.

2. Hi nga dzi dongiseya kharini gasi gu timiseya ho tshaniswa?

Gu vbwetega hi engedzeya gu mu tumba ngudzu Jehovha olu. Dzi ninge tepo nyo gombeye ga Jehovha ni gu leri gipandre nyo khaguri nya Bhibhiliya tshigu ni tshigu. Manega mitshanganoni tepo yatshavbo. Satshavbo sesi si na gu ninga tshivba nyo tiye hwambo tepo u tshaniswago, ambari wo ba u tshaniswa khu valongo vago. Mupostoli Pawulo, oyu a tshanisidwego dzitepo nya dzingi, a di khuye: “[Jehovha] khuye muphasedzeli wangu, eni kha nyi thavi gilo.” — Vahebheru 13:6.

Ho patega thumoni nyo tshumayele tepo yatshavbo, hi na engedzeya gutiya-hwambo gwathu. Gu tshumayela si ngu hi gira hi engedzeya gu tumba Jehovha ni gu mba thava vathu. (Mavingu 29:25) Wo tiya hwambo u tshumayela olu, u na dzi dongiseya gu simama u tshumayela ambari mifumo yo zama gu emisa thumo wathu. — 1 Vatesalonika 2:2.

3. Khu ginani si gu sadi gu timiseya tepo hi tshaniswago?

Mwalo a golago gu tshaniswa. Ganiolu, ho timiseya tepo hi tshaniswago, gukhodwa gwathu gu na engedzeya gu tiya hugo roo. Wupari wathu ni Jehovha wo engedzeya gu tiya kholu a ngu hi phasa tepo hi wonago gu khethu hi vbeledwe khu tshivba. (Leri Jakobe 1:2-4.) Jehovha a ngu vbisega ngudzu tepo a hi wonago na hi tshaniseka. Ganiolu a ngu tsaka ngudzu tepo a hi wonago na hi timiseya. Bhibhiliya yari khiyo: ‘Mwa gu tshaniswa na mu giride esi nya sadi, Nungungulu a na mi kategisa khu gu timisela gwanu.’ (1 Pedro 2:20) Jehovha a ngu tumbisa ga vatshavbo ava va na timiseyago kala mahegiso womi nya gupindruge omu nya litigo li na gu ba liri mwalo dzitshanisa. — Matewu 24:13.

GIRA WUGEVISISI NYO ETE

4. U nga si kodza gu timiseya wo ba u tshaniswa khu valongo

Jesu a di gu dziti gwadi gu khuye vambe ndrangani gwathu kha va na nga tsaka khu gu hi wona hi thumeya Jehovha. Lerini Matewu 10:34-36, mu vbedza mu bhula khu giwudziso gegi:

• Ginani gi nga giregago o tshuka moyo ndrangani a hunga gu thumeya Jehovha?

VHIDHYU: Jehovha hi hakhide (5:13)

• Ginani u nga hadzi gira yo tshuka pari yago mwendro nongo a zama gu gu digisa gu thumeya Jehovha?

Lerini Ndzimo 27:10 ni Marko 10:29, 30. Hwane nyo leri milowo yeyi, bhulani khu giwudziso gegi:

• Gitumbiso gegi gi nga gu phasa kharini vo tshuka valongo mwendro dzipari dzago va zama gu gu digisa gu thumeya Jehovha?

5. U nga digi gu thumeya Jehovha ambari wo ba u tshaniswa

VHIDHYU: Tiya hwambo tepo u tshaniswago (6:27)

• Siyeyedzo sa omu nya vhidhyu so tiyisa kharini gukhodwa gwago?

Lerini Mithumo 5:27-29 ni Vahebheru 10:24, 25. Hwane nyo leri milowo yeyi, bhulani khu giwudziso gegi:

• Khu ginani si gu sa lisima gu simama hi thumeya Jehovha ambari wo ba thumo wathu nyo tshumayele ni mitshangano na si himbedzedwa?

6. Jehovha a na gu phasa gu timiseya

VHIDHYU: Jehovha Nungungulu a na nyi tiyisa (3:40)

• Kha nga hi si wonidego omu nya vhidhyu, ginani gi phasidego vandriyathu vava gu timiseya?

Lerini Varoma 8:35, 37-39 ni Vafilipi 4:13. Hwane nyo leri milowo yeyi, bhulani khu giwudziso gegi:

• Milowo yeyi yo engedzeya kharini gu gu gira u tumba gu khuwe u na si kodza gu timiseya ni gevbini gilingo?

Lerini Matewu 5:10-12, mu vbedza mu bhula khu giwudziso gegi:

• Khu ginani u nga si kodzago gu tsaka ambari wo ba u tshaniswa?

REZUMO

Jehovha a ngu ninga lisima gudzigaradza gwathu nyo mu thumeye, ambari olu hi tshaniswago. Khu gu phaswa khuye, hi nga si kodza gu timiseya!

Siwudziso nyo wusedze

• Khu ginani Makristo ma vireyago gu tshaniswa?

• Ginani u nga girago olu gasi gu dzi dongiseya gu tshaniswa?

• Khu ginani u nga tiyisegago gu khuwe si ngu kodzega gu thumeya Jehovha, ambari ho ba hi tshaniswa?

HEVBULA SIMBE

Wona edzi Jehovha a phasidego khidzo ndriyathu nya lidzaha gu timiseya tepo a nga khotedwa khu kotani nya gu mba dzi bedzedzeya omu nya politika.

Timiseya ambari wo ba u tshaniswa (2:34)

Wona egi gi phasidego patwa nyo khaguri gu thumeya Jehovha khu gutumbega khu myaga nya yingi ambari va nga ba va tshaniswa.

Gu thumeya Jehovha dziteponi nyo garadze (7:11)

Wona dzindziya nyo timiseye khidzo gu tshaniswa nu tiyide hwambo.

“Dzi dongiseye olu, gasi gu emisana ni gutshaniswa mindru ga tshigu” (Mukhedziseyi nya Julho nya 2019)

Wona gighelo nya gu hi si hlamali ho ba hi tshaniswa khu valongo. Wona gambe ndziya nyo andrise gurula ni gu simama gu tumbega ga Jehovha so tshuka si girega isoso.

“Lisine kha la ‘resa gurula, ganiolu li di resa xipadha’” (Mukhedziseyi nya Outubro nya 2017, khu Giputukezi)