Khu ginani gu gu na ni wuvivbi ni gutshaniseka?

Tepo vathu va tshanganago ni sigaradzo, va ngu oloveya gu dzi wudzisa khavo: “ Khu ginani si giregago silo sesi?” Si ngu tsakisa ngudzu guti gu khethu Bhibhiliya yi ngu hlamula giwudziso gegi!

1. Gasi wuvivbi wu phede kharini?

Sathane Dhiyabhulosi a di wugeya Jehovha. Uye a di vbweta fumeya vambe. Khu kharato, a di sengedzeya vathu nyo pheye, Adhamu ni Evha, gasi va dzi pata naye va wugeya Nungungulu. Sathane giride kharini isoso? A di lipheya Evha. (Genesi 3:1-5) A di gira Evha a pimisa gu khuye Jehovha a di gu mu siheya silo nya sadi. Sathane a di gu vbweta gu khuye vathu va pimisa gu khavo va na tsaka vo mba engisa Nungungulu. Khu kharato, a di pheya gu lipha tepo a nga embeya Evha khuye kha na ngafa. Khiso si girago Bhibhiliya yi rana Sathane khiyo “muliphi gambe babe nya malipha.” — Johane 8:44.

2. Ginani egi Adhamu ni Evha va nga hunga gu gira?

Jehovha yeyedzide wuhindzi nya wukhongolo ga Adhamu ni Evha. Uye a di va tshuside gu hodza mihandro nya misimbo yatshavbo yi nga ba yiri omu nya jardim ya Edheni, ganiolu a va himbedzeya gu hodza mowo basi. (Genesi 2:15-17) Ambari ulolo, avo va di hatha gu hodza mihandro nya simbo wowo. Evha “a di hava handro wule a gu hodza.” Khu gulandreya, Adhamu a di “hodza nuye.” (Genesi 3:6) Adhamu ni Evha va diri vathu nyo vbeleye. Khu kharato, na si va vbevbugede gu gira silo nya sadi. Ganiolu, va di hunga gumbaengisa. Kha nga olu va mba engisa, va di ghoheya Nungungulu va bwe va yeyedza gu khavo kha va vbweti gu fumedwa khuye. Isoso si va resede sigaradzo nya sikhongolo ngudzu. — Genesi 3:16-19.

3. Gumbaengisa ga Adhamu ni Evha gu kuhide kharini womi wathu?

Tepo Adhamu ni Evha va nga ghoha, va di khala vathu nya mba vbeleya, khavbovbo va vbindriseya gumbavbeyela gogo ga sanana sawe satshavbo. Maningano ni Adhamu, Bhibhiliya yari khiyo: “Gighoho gi bede mafuni khu muthu moyo basi, gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.” — Varoma 5:12.

Ina ka, khu ginani hi tshanisekago? Dzimbe dzitepo ho tshaniseka khu kotani nya silo nyo vivbe hi girago. Dzimbe dzitepo hi tshaniseka khu kotani nya silo nyo vivbe esi vathu va hathago gu gira. Hi ngu tshaniseka gambe khu gu manega ga wulanga nya mba wadi ni tepo nya mba yadi.— Leri Muhevbudzi 9:12.

GIRA WUGEGISISI NYO ETE

4. Gasi khu mani a hi girago hi tshaniseka?

Vathu nya vangi vo khodwa gu khavo khu Nungungulu a fumeyago mafu. Ina lisine lolo? Sistirini VHIDHYU.

VHIDHYU: Khu mani a fumeyago mafu? (1:24)

Lerini Jakobe 1:13 ni 1 Johane 5:19, mu vbedza mu bhula khu giwudziso gegi:

• Ina khu Nungungulu a hi vangeyago gutshaniseka ni wuvivbi?

5. Wona mihandro nya mufumo wa Sathane

VHIDHYU: Khu ginani Nungungulu a dzumedzeyago guvivba ni gutshaniseka? — Gipandre (3:07)

Lerini Genesi 3:1-6, mu vbedza mu bhula khu siwudziso sesi:

• Malipha muni ma ganedwego khu Sathane?— Wona mavhesi 4 ni 5.

• Ginani a ganedego Sathane gasi a gira Adhamu ni Evha va pimisa gu khavo somo silo nya sadi esi Jehovha a nga ba a va siheya?

• Khu guya khu Sathane, ina vathu va nga tsaka vo fumedwa khu Jehovha?

Lerini Muhevbudzi 8:9, mu vbedza mu bhula khu giwudziso gegi:

• Kha nga olu mafu ma gu mba fumedwa khu Jehovha, silo muni si giregago?

1. Adhamu ni Evha va diri vathu nyo vbeleye nigu va di gu vbanya Paradhesini. Ganiolu, va di engisa Sathane va wugeya Jehovha

2. Khu gu ba va wugede Jehovha, litigo li di tala khu gighoho, gutshaniseka ni gufa

3. Jehovha a na fuvisa gighoho, gutshaniseka ni gufa. Vathu va na bwe va vbeleya va vbanya Paradhesini

6. Jehovha a ngu vbisega khu gutshaniseka gwathu

O dzipwa kharini Nungungulu khu gutshaniseka gwathu? Hongoleni hi wonani esi Pfhumu Dhavhidhe ni mupostoli Pedro va lovidego. Lerini Ndzimo 31:7 ni 1 Pedro 5:7, mu vbedza mu bhula khu giwudziso gegi:

• Mavhesi yaya mo yeyedza gu khayo Jehovha a ngu gu wona gutshaniseka gwathu nigu a ngu dzina gu hi phasa. Wo dzipwa kharini khu gupwa isoso?

REZUMO

Sathane, Adhamu ni Evha khavo va nga hi reseya gutshaniseka mafuni. Jehovha a ngu khathala ngudzu khethu nigu nugunugu a na vbedza gutshaniseka gwatshavbo.

Siwudziso nyo wusedze

• Malipha muni aya Sathane a nga embeya Evha?

• Gumbaengisa ga Adhamu ni Evha gu kuhide kharini womi wathu?

• Ho dziti kharini gu khethu Jehovha a ngu vbisega khu gutshaniseka gwathu?

HEVBULA SIMBE

Ginani gighoho. Wona hlamulo omu nya Bhibhiliya.

“Ginani gighoho?” (Ndrima nya jw.org, khu Giputukezi)

Hevbula simbe khu gigaradzo gi wusidwego khu Sathane omu nya jardim ya Edheni.

“Khu ginani Nungungulu a dzumeleyago gutshaniseka?” (Mukhedziseyi nya 1 nya Janeiro nya 2014, khu Giputukezi)

Wona mihlamulo nya gu thaveleya nya giwudziso nya lisima ngudzu.

“Khu ginani Vajudha va nga songetedwa? Khu ginani Nungungulu a nga si dzumeleya?” (Ndrima nya jw.org, khu Giputukezi)

Wona egi mwama nyo khaguri a gi hevbudego khu gutshaniseka gwaye.

Kha nyi ngu dzipwa gambe nyonga (5:09)

Muhuno hi ngu ghoha, hi ngu tshaniseka ni gufa kholu Adhamu ni Evha va nga mba engisa Nungungulu.a Ganiolu, kha sa vbeleya avbovbo. Jehovha rumede Gyanana gyaye, Jesu Kristo, gasi gu ta hi tsudzisa ga gighoho ni gufa. Bhibhiliya yo hevbudza gu khiyo hi di dzegiswa khu gufa ga Jesu. Gudzegiswa i tengo wu livbwago gasi gu tshudzisa muthu. Jesu hi dzegiside khu gu ningeya womi waye nyo vbeleye. (Leri Matewu 20:28.) Khu kotani nya olu Jesu a ningedego womi nyo vbeleye a nga ba ari nawo mafuni, a hi tulede ndziya nya gu hi bweledzedwa satshavbo esi Adhamu ni Evha va luzisidego. Gufa ga Jesu gu yeyedzide edzi uye ni Jehovha va hi haladzago khidzo. Gihevbulo gegi gi na gu phasa gu engedzeya gubonga gwago khu gufa ga Jesu.

1. Gufa ga Jesu gu nga hi phasa kharini muhuno?

Kha nga olu hi gu sighohi, hi ngu gira silo nya singi si gu mba mu tsakisa Jehovha. Ganiolu, ha gu dzi laya khu sighoho sathu, hi gombeya ga Jehovha khu lina la Jesu Kristo hi lomba divalelo, hi bwe hi gira satshavbo si gomogo tshivbani gwathu gasi hi si giri gambe sihoso soso, hi na khala dzipari nya dzikhongolo dza Nungungulu. (1 Johane 2:1) Bhibhiliya yari khiyo: “Kristo nuye fude gumogo basi khu kotani nya sighoho, na gufela enu. Muthu nya wadi afela va nya guvivba, gasi gu va yisa ga Nungungulu.”— 1 Pedro 3:18.

2. Hi na phasega kharini khu gufa ga Jesu Kristo mindru wa tshigu?

Jehovha rumide Jesu gasi gu ta ningeya womi waye nya guvbeleye “gasi ni wevbi a khodwago [ga Jesu] a si mbembi, aholu a mane guvbanya nya gupindruge.” (Johane 3:16) Khu kotani nya muphaso wa Jesu, Jehovha a na fuvisa wuvivbi watshavbo wu giregago khu kotani nya gumbaengisa ga Adhamu ni Evha. Isoso so thula gu khiso ho khodwa ga muphaso wa Jesu, hi na manega ni lithomo nyo vbanye kala gupindruga paradhesini mafuni! — Isaya 65:21-23.

GIRA WUGEVISISI NYO ETE

3. Gufa ga Jesu gu ngu hi tshula ga gighoho ni gufa

VHIDHYU: Khu ginani Jesu a ngafa? — Gipandre 1 (2:01)

• Lithomo muni eli Adhamu a li luzidego khu gu mba engisa Nungungulu?

Lerini Varoma 5:12, mu vbedza mu bhula khu giwudziso gegi:

• Gighoho gya Adhamu gi kuhide kharini womi wathu?

Lerini Johane 3:16, mu vbedza mu bhula khu giwudziso gegi:

• Khu ginani Jehovha a rumedego Gyanana gyaye gita mafuni?

1. Adhamu a diri muthu nyo vbeleye, ganiolu gumbaengisa gwaye gu giride gu vathu vatshavbo va ghoha ni gufa

2. Jesu a diri muthu nyo vbeleye nigu khu kotani nya guengise gwaye, vathu vatshavbo va tulegedwe khu ndziya nyo mane womi nyo vbeleye va bwe va vbanya kala gupindruga

4. Gufa ga Jesu gu ngu phasa vathu vatshavbo

VHIDHYU: Khu ginani Jesu a ngafa? — Gipandre 2 (2:00)

• So kodzega kharini gu gufa nya muthu moyo basi gu phasa vathu vatshavbo?

Lerini 1 Thimoti 2:5, 6, mu vbedza mu bhula ni khu giwudziso gegi:

• Adhamu a diri muthu nyo vbeleye, ganiolu khu kotani nya gighoho gyaye, hatshavbo hi ngu ghoha ni gufa. Jesu nuye a diri muthu nyo vbeleye. Khu ginani “guvbanya gwaye” gu nga ba gu eneya gasi gu dzegisa vathu vatshavbo?

5. Gudzegiswa giningwa nya gyadi gi tago khiyo ga Jehovha

Dzipari dza Jehovha dzo wona gudzegiswa kha nga giningwa nya lisima ngudzu. Khu giyeyedzo, lerini Vagalatiya 2:20, mu vbedza mu bhula khu giwudziso gegi:

• Mupostoli Pawulo yeyedzide kharini gu khuye a di gu wona gudzegiswa kha nga giningwa a ningidwego khu Nungungulu?

Tepo Adhamu a nga ghoha, uye ni sanana saye satshavbo va di konedwa gufa. Ganiolu, Jehovha a di rumeya Gyanana gyaye gi tafa, gasi gu tula ndziya nya gu u mana womi nya gupindruge.

Tepo mu lerigo mavhesi yaya, dundrugeyani khedzi Jehovha a dzi pwidego khidzo khu gu wona Gyanana gyaye na gi tshaniseka. Lerini Johane 19:1-7, 16-18, mu vbedza mu bhula khu giwudziso gegi:

• Wo dzipwa kharini khesi Jehovha ni Jesu va gu giredego?

REZUMO

Gufa ga Jesu gu tude ndziya nya Jehovha a divaleya sighoho sathu, gu bwe gu hi ninga lithomo nyo vbanye kala gupindruga.

Siwudziso nyo wusedze

• Khu ginani Jesu a fudego?

• Khu ginani guvbanya nya guvbeleye ga Jesu gu nga ba gu eneya gasi gu dzegisa vathu vatshavbo?

• Gufa ga Jesu gu nga gu phasa kharini?

HEVBULA SIMBE

Wona gighelo gi girago gu womi nya guvbeleye wa Jesu wu ranwa pwani gudzegiswa.

“Muphaso wa Jesu wu nga thuma kharini kha nga ‘gudzegiswa nya vathu nya vangi’?” (Ndrima nya jw.org, khu Giputukezi)

Wona esi hi yedego gu gira gasi hi vbulugiswa.

“So thula ginani gu pwani Jesu a ngu vbulugisa?” (Ndrima nya jw.org, khu Giputukezi)

Ina Jehovha a ngu divaleya ni sighoho nya sikhongolo?

“Siwudziso si hlamudwago khu Bhibhiliya” (Mukhedziseyi nya 1 nya Maio nya 2013, khu Giputukezi)

Wona edzi mwama nyo khaguri a nga phasega khidzo khu muphaso wa Jesu tepo a nga ba a dwanisana ni mapimo nyo vivbe.

“Kha nyi ngari gumbi nya wughevenga gambe!”(Ndrima nya jw.org)