-
Hi nga hatha kharini silo nya sadi?Vbanya nu tsakide kala gupindruga! — Gihevbulo nya Bhibhiliya
-
-
5. Ninga githawo mavhalo ya vambe
Vathu va hambanide, khigyo gi girago gu va hatha gu gira silo nyo hambane. Ina ka, hi nga yeyedza kharini gu khethu hi ngu ninga githawo mavhalo ya vambe? Nga dundrugeya khu siemo sesi:
Giemo nyo pheye: Nga dundrugeya khu ndriyathu nya nyamayi a golago gu dzi makiyari, a rurago a hongola ga limbe libandla omu vandriyathu nya vanyamayi si gu mba va phara gwadi gu wona vambe vanyamayi na va dzi makiyaride.
Lerini Varoma 15:1 ni 1 Vakorinto 10:23, 24, mu vbedza mu bhula khu siwudziso sesi:
Khu guya khu mavhesi yaya, ginani egi ndriyathu yoyu a yedego gu gira? Ginani u na girago wo ba uri ni muthu a wonago esi livhalo lago li gu dzumeleyago gu gira na si vivbide?
Giemo nya wuvili: Nga dundrugeya khu ndriyathu nyo khaguri nya mwama a dzi tigo gu khuye Bhibhiliya kha yi himbedzeyi gu seyanyana wadwa, ganiolu uye a dzi hatheya gu mba seya. Khavbovbo, a ranedwa gipfhitsha nyo khaguri khu vandriyathu, a ya wona vandriyathu na va seya wadwa.
Lerini Muhevbudzi 7:16 ni Varoma 14:1, 10, mu vbedza mu bhula khu siwudziso sesi:
Khu guya khu mavhesi yaya, ginani egi ndriyathu yoyu a yedego gu gira? Ginani u na girago wo wona muthu na gira silo esi livhalo lago li gu mba gu dzumeleya gu gira?
Ginani hi yedego gu gira gasi hi gira silo nya sadi?
1. Gombeya ga Jehovha u lomba giphaso gasi u hunga esi u nga girago. — Jakobe 1:5.
2. Gira wugevisisi omu nya Bhibhiliya ni omu nya mabhuku yathu gasi u mana matshina nya milayo nya Bhibhiliya ma nga gu phasago. U nga lomba gambe wusingalagadzi ga Makristo ma vidzidwego.
3. Dundrugeya khedzi esi u vbwetago gu gira si na kuhago khidzo livhalo lago ni mavhalo la vambe.
-
-
U nga gira kharini gasi ndranga yago yi tsaka? — Gipandre 1Vbanya nu tsakide kala gupindruga! — Gihevbulo nya Bhibhiliya
-
-
6. U nga si kodza gu pala sigaradzo pangoni gwago
Li mwalo lipango li gu mwalo sigaradzo. Khu kharato, gu vbwetega gu mwama ni ngadzi va thuma gumogo gasi gu pala sigaradzo. Sistirini VHIDHYU, mu vbedza mu bhula khu siwudziso si landreyago.
Kha nga hi si wonidego omu nya vhidhyu, ginani gi yeyedzago gu khiyo lihaladzo la patwa wowu li di gu dzidziya?
Ginani va giridego gasi gu tiyisa lipango lawe?
Lerini 1 Vakorinto 10:24 ni Vakolosi 3:13. Hwane nyo leri milowo yeyi, bhulani khu giwudziso gegi:
Wusingaladzi wowu wu nga tiyisa kharini lipango?
Bhibhiliya yari khiyo gu vbwetega hi zundzana. Gu zundzana so pata gu phara muthu khu ndziya ya yadi ni githawo. Lerini Varoma 12:10, mu vbedza mu bhula khu siwudziso sesi:
Ina mwama mwendro mwangadzi a yede gu vireya mumbe gu khuye a pheya khuye gu mu zundza? Khu ginani u ganeyago isoso?
-
-
Khu ginani maambalelo yathu ni ndziya hi dzi mburiseyago khiyo si gu sa lisima?Vbanya nu tsakide kala gupindruga! — Gihevbulo nya Bhibhiliya
-
-
Muthu ni muthu na ni maambalelo yaye ni ndziya yaye nyo dzi mburiseye khiyo. Ganiolu, gu na ni matshina nya milayo nya Bhibhiliya ma hi phasago gu ambala sombo hi si golago, ganiolu na si tsakisa Jehovha gambe. Hongoleni hi bhulani khu matshina nyo khaguri nya milayo yoyo.
1. Ginani gi nga hi phasago gu hatha sombo nyo ambale ni ndziya nyo dzi mburiseye khiyo?
Kha nga sithumi sa Jehovha, gu vbwetega hi khala na hi agide hi bwe hi ambala sombo ‘si yeyedzago githawo, hi si dzi mburiseyi khu ndziya nyo vbindrise, hi ambala khu ndziya yi yeyedzago gupima nya gwadi’, hi bwe hi dzi mburiseya khu ndziya ‘yi tsakisago Nungungulu.’ (1 Thimoti 2:9, 10) Hongoleni hi wona 4 matshina nya milayo: 1) Gu vbwetega hi ambala sombo ‘si yeyedzago githawo.’ Mitshanganoni nya Dzifakazi dza Jehovha, adzina u wonide gu khuwe vathu va Jehovha va na ni maambalelo nyo hambanehambane. Ganiolu, maambalelo ni mindzudzu yathu gu vbwetega si yeyedza githawo ga Nungungulu wathu, Jehovha. 2) Kha hi yeli gu ‘dzi mburiseya khu ndziya nyo vbindrise’, mwendro gu ambala sombo si na wuseyago vambe gudogoreya nya malawu ni gu ndrindra gupima ga vambe. 3) Ho yeyedza ‘gupima nya gwadi’ khu gu mba landrisa dzimodha nya litigo. 4) Maambalelo yathu gu vbwetega tepo yatshavbo ma ‘tsakisa Nungungulu’, gasi vatshavbo va si wona gu khavo ho khozeya Nungungulu nya lisine. — 1 Vakorinto 10:31.
2. Maambalelo yathu ma nga kuha kharini vandriyathu?
Lisine gu hi tshulegide gu dzi hatheya sombo nyo ambale, ganiolu gu vbwetega hi dundrugeya khedzi sombo sathu si na va kuhago khidzo vambe. Hi yede gu dzi garadzeya gu mba khunguvanyisa vambe, ganiolu hi “tsakisa [ndriyathu] kwawe khu silo nya sadi, gasi hi mu tiyisela gukhodwani.” — Leri Varoma 15:1, 2.
3. Maambalelo yathu ma nga gira kharini vathu va vbweta gu hevbula khu Jehovha?
Tepo yatshavbo hi yede gu ambala khu ndziya nya yadi, ngudzungudzu tepo hi hongolago mitshanganoni ni thumoni nyo tshumayele. Kha hi vbweti gu khethu vathu va si engiseyi mahungu nya yadi khu kotani nya maambalelo yathu. Gu diga isoso, gu vbwetega hi ambala khu ndziya yi na ‘mburisago sihevbudzo hi hakhidego khu ga Nungungulu, Muvbanyisi wathu’, gasi vathu va kodza gu hevbula nyasingi khu Jehovha.— Tito 2:10.
GIRA WUGEVISISI NYO ETE
Wona edzi maambalelo ni ndziya hi dzi mburiseyago khiyo si nga vbevbugiseyago khidzo vambe gu wona gu khavo hi Makristo nya lisine.
Maambalelo yathu ma nga yeyedza gu khayo hi ngu ninga githawo wufumu mwendro ne. Khu ndziya nyo fane, maambalelo yathu ma yede gu ninga githawo Jehovha, ambari olu a kodzago gu wona esi si gomogo monyoni gwathu
4. Maambalelo nya yadi ma ngu yeyedza githawo khu Jehovha
Khu gevbini gighelo nya lisima gi hi girago hi ambala khu ndziya nya githawo? Lerini Ndzimo 47:2, mu vbedza mu bhula khu siwudziso sesi:
Maambalelo yathu ma nga kuha edzi vathu va mu wonago khidzo Jehovha. Isoso si yede gu kuha kharini maambalelo yathu?
Wo si wona kharini, ina si ngu hunga kamo gu ambala gwadi tepo hi hongolago mitshanganoni mwendro thumoni nyo tshumayele? Khu ginani?
5. Ginani gi nga hi phasago gu hatha gwadi sombo nyo ambale ni ndziya nyo dzi mburiseye khiyo?
Kha si hungi gu sombo sathu na siri nyo dhure, ganiolu gu vbwetega na si agide ni gu bwe si yelana ni giemo hi gomogo ga igyo. Lerini 1 Vakorinto 10:24 ni 1 Thimoti 2:9, 10. Khu hwane mu bhula khu gighelo gi hi girago hi si ambali sombo . . .
nya mba khedzega mwendro nya mba ninga githawo.
nyo manye, nyo wonegeye, mwendro si wuseyago vambe gudogoreya nya malawu.
Ambari olu Makristo muhuno ma gu mba thangedwa khu Nayo wa Mosi, Nayo wowu wu ngu hi hevbudza edzi Jehovha a si wonago khidzo silo. Lerini Dhewuteronome 22:5, mu vbedza mu bhula khu giwudziso gegi:
Khu ginani hi gu mba yela gu ambala mwendro gu dzi mburiseya khu ndziya nya gu mwama a gira khatshi nyamayi mwendro nyamayi a gira khatshi mwama?
Lerini 1 Vakorinto 10:32, 33 ni 1 Johane 2:15, 16, mu vbedza mu bhula khu siwudziso sesi:
Khu ginani si gu sadi gu dzi wudzisa khethu: ‘Ina maambalelo yangu ma ngu khunguvanyisa muthu libandlani mwendro omu nyi vbanyago umo?’
Omu u vbanyago umo, vathu vo oloveya gu ambala ni gu dzi mburiseya kharini?
Wo si wona kharini, ina si ngu yela gu Makristo ma ambala ni gu dzi mburiseya nayo khu ndziya ya yimweyo? Khu ginani?
Hi nga ambala ni gu dzi mburiseya khu dzindziya nyo hambanehambane, ambari ulolo khu ndziya yi tsakisago Jehovha
VAMBE VARI KHAVO: “Nyi tshulegide gu ambala ni gevbini nyi gi vbwetago.”
Uwe ke, u ngu dzumeleyana navo? Khu ginani?
REZUMO
Tepo hi ambalago gwadi ni gu dzi mburiseya khu ndziya nya yadi, ho yeyedza gu khethu hi ngu ninga githawo Jehovha ni vambe.
Siwudziso nyo wusedze
Khu ginani maambalelo yathu ni ndziya hi dzi mburiseyago khiyo si gu na ni lisima ga Jehovha?
Khu yavbini matshina nya milayo ma nga hi phasago gu hatha sombo hi na ambalago ni edzi hi nga dzi mburiseyago khidzo?
Maambalelo yathu ma nga kuha kharini edzi vathu va wu wonago khidzo wukhozeyi nya lisine?
HEVBULA SIMBE
Wona esi sombo sago si ganeyago khuwe.
“Nyi muthu nyo khale kharini?” (Ndrima nya jw.org, khu Giputukezi)
Wona gu khuwe khu ginani si gu sadi gu pheya khu gu pimisa nu si dzi lovi tatuagem.
“Ginani egi Bhibhiliya yi ganeyago khu dzi tatugagem?” (Ndrima nya jw.org, khu Giputukezi)
Wona mambe matshina nya milayo ma nga gu phasago guti esi u nga ambalago.
Wona edzi nyamayi nyo khaguri a si kodzidego khidzo gu manega ni mawonelo nya yadi khu maambalelo ya vambe.
-