‘VBINDZUGEDZANI MAVBANYELO MU KHALA VATHU VAPHYA MAPIMONI GWANU’

7. Hi nga vbindrugedza kharini edzi hi gu idzo khu ndrani?

⁷ Ina si ngu kodzega gu vbindrugedza guwegeleya hi gu nago mwendro edzi hi gu idzo khu ndrani? Lito la Nungungulu la gu hlamula esi: “Dzi garadzeni khu gu vbindrugedza mavbanyelo mu khala vathu vaphya myonyoni ni mapimoni gwanu. Ambalani mavbanyelo nya muthu muphya a giridwego a fanana ni Nungungulu khu gululama ni ndruda lisineni.” (Vaefeso 4:23, 24) Ina, si ngu kodzega gu vbindrugedza edzi hi idzo khu ndrani, ganiolu kha si vbevbugi. Hi yede gu gira nya singi nyo vbindre gu potsa gu dogoreya nyo vivbe ni gu ema gu gira silo nyo vivbe. Gu vbwetega hi vbindrugedza ‘mavbanyelo hi khala vathu vaphya mapimoni.’ Isoso so pata gu vbindrugedza gu dogoreya gwathu, makhalelo ni esi si hi kutsago gu gira silo. Isoso si na vbweta gu hi simama gu dzi garadza, hi si khali khu mawogo.

8-9. Matshango ya ndriyathu nyo khaguri ma gu yeyedza kharini lisima nya gu hi vbindrugedza edzi hi gu idzo khu ndrani?

⁸ Hongoleni hi wona giyeyedzo gya ndriyathu moyo a nga ba ari muthu nya maghilivindri gale yoyo. A diri maleveni nigu a di gu dwaniseya vathu, ganiolu tepo a nga ema gu gira isoso a di ninganedwa gu bhapatiswa. Isoso si ningede wufakazi nya wadi gipandreni mule a nga ba a vbanya umo. Ganiolu, ga wutshigu nyo khaguri gitepwana hwane nyo bhapatiswe, a di tshangana ni giligo a nga ba sa gi vireya. Maleveni moyo a di hongola gaya gwaye aya mu khutedzeya gasi gu dwana naye. Gupheyani ndriyathu yoyo kodzide gu dzi phara a potsa gu dwana ni mwama wule. Ganiolu tepo mwama wule a nga pheya gu ganeya gu vivba khu lina la Jehovha ndriyathu a di kukuteya a sindrwa gu dziphara. A khuga a mu khinyeya nyago. Khu ginani a giridego isoso? Ambari olu gihevbulo gyaye nya Bhibhiliya gi mu phaside gu potsa maghilindri a nga ba ari nawo, uye a di nga si vbindrugedzi mavbanyelo yaye a khala muthu muphya mapimoni. Khu mambe maganelelo, uye a di si vbindrugedzi edzi a gu idzo khu ndrani.

⁹ Ganiolu uye kha tsukula. (Mav. 24:16) Khu gu phaswa khu madhota uye simamide gu dandra khu liphuvboni. Khu gu hegisa a di emiswa kha nga lidhota. Ga wutshigu nyo khaguri nari vbavbandze nya salawu nya Mufumo, a di emisana ni gilingo nyo fane ni gile nyo pheye. Mwama moyo nya maleveni a di gu vbweta gu veta lidhota-kwawe. Ginani ndriyathu a giridego? Khu gu rula ni gu dzinogisa a di bhula ni maleveni wule, a mu phasa gurula mapimo, a bwe a mu phasa gambe gu hongola gaya. Khu ginani ndriyathu a nga dzi phara khu ndziya nyo hambane ga tepo yeyi? Khu gu ndriyathu a di gu vbindrugedzide mavbanyelo yaye a khala muthu muphya mapimoni. Uye a diri muthu nya gurule ni gu dzi nogisa khu lisine. Nigu isoso si ningide wuzundzo Jehovha!

10. Ginani hi yedego gu gira gasi hi vbindrugedza edzi hi gu idzo khu ndrani?

¹⁰ Guvbindrugedza gogu kha gu giregi gabune mwendro khavba ni avba. Adzina si na lomba gu hi dzi garadza ngudzu khu myaga nya yingi. (2 Ped. 1:5) Kha gu na nga girega khu gu ba hi thumede Jehovha khu tepo nyo laphe. Hi yede gu gira satshavbo hi si kodzago gasi gu vbindrugedza guwegeleya gwathu ga ndrani. Gu na ni silo nyo khaguri nya lisima hi nga girago gasi hi kodza gu vbindrugedza. Hongoleni hi si wona silo soso.

HI NGA VBINDRUGEDZA KHARINI MAVBANYELO YATHU, HI KHALA VATHU VAPHYA MAPIMONI?

11. Nombelo wu nga hi phasa kharini gu vbindrugedza mavbanyelo hi khala vathu vaphya mapimoni?

¹¹ Gu gombeya khigyo gilo nyo pheye nya lisima hi yedego gu gira. Gu vbwetega hi gombeya kha nga muembeleyi nya dzindzimo, a nga khuye: “Nungungulu, vega monyo nya wadi ndrani gwangu u wusedza liphuvbo nya gutiye monyoni gwangu.” (Ndzi. 51:10) Gasi hi si kodza gu vbindrugedza mavbanyelo hi khala vathu vaphya mapimoni, gu vbwetega hi lomba giphaso ga Jehovha. Ina ka, hi nga tiyisega kharini gu khethu Jehovha a na hi phasa gu vbindrugedza? Hi nga tiyiswa khesi Jehovha a tumbisidego gu gireya vaIsrayeli nyo bange mihungo, va dziteponi dza Ezekiyeli, a di khuye: “Nyi na thela gwawe monyo moyo basi, nyi va thela liphuvbo nya liphya . . . nyi [va] thela monyo nya nyama,” si thulago monyo wu dzumeyago gu thangedwa khu Nungungulu. (Ezek. 11:19) Jehovha a di dzi emiside gu phasa vaIsrayeli vovo gu vbindrugedza, nigu a dzi emisede gu hi phasa nethu muhuno.

12-13. a) Khu guya khu Ndzimo 119:59, hi yede gu dundrugeya khu ginani? b) Siwudziso muni u yedego gu dzi gira?

¹² Gu dundrugeya khigyo gilo nya wuvili nya lisima hi yedego gu gira. Tepo hi lerigo lito la Nungungulu tshigu ni tshigu, hi yede gu dzi ninga tepo nyo dundrugeye mwendro nyo pimise khesi hi hevbulago, gasi hi tugula esi hi yedego gu vbindrugedza. (Leri Ndzimo 119:59; Hebh. 4:12; Jak. 1:25) Gu vbwetega hi tugula guwegeleya adzina hi gu nago gu kutsedzedwego khu dzifilosofiya nya vathu. Hi yede gu dzumeya gu khethu hi ngu hosisa hi bwe hi dzi garadzeya gu pala sihoswahoswana sathu.

¹³ Khu giyeyedzo, dzi wudzise khuwe: ‘Ina nyi na ni wufu mwedro lidiwo monyoni gwangu?’ (1 Ped. 2:1) ‘Ina nyi ngu dzi khusedza khu kotani nya omu nyi vbanyago umo, sihevbulo sangu, mwendro dzitsapawu nyi gu nadzo?’ (Mav. 16:5) ‘Ina nya gu woneya vbavbatshi ava va gu mwalo silo nya nga esi nyi gu naso ni vathu va gu va lifumbo nyo hambane ni langu?’ (Jak. 2:2-4) ‘Ina nyi ngu gola esi hi nigwago khu litigo la Sathane?’ (1 Joh. 2:15-17) ‘Ina nyi ngu sixitiri sivbungadzo si yeyedzago silo nya malawu ni wughevenga?’ (Ndzi. 97:10; 101:3; Amosi 5:15) Mihlamulo nya siwudziso sesi yi na yeyedza omu u yedego gu dzi garadzeya gu tsukwadzisa. Ha gu si kodza gu vbindrugedza mapimo mwendro gudzipwa gu dandramedego monyoni gwathu, hi na tsakisa Papayi wathu wa ndzadzini. — Ndzi. 19:14.

14. Khu ginani si gu sa lisima gu hatha dzipari nya dzadi?

¹⁴ Gu hatha dzipari nya dzadi khigyo gilo nya wuraru nya lisima hi yedego gu gira. Gani hi ngu si tugula gani kha hi si tuguli, ava hi dzi tshanganisago navo va ngu kutsedzeya ngudzu mavbanyelo yathu. (Mav. 13:20) Thumotunu mwendro xikwatunu, hi randredwe khu vathu nya gu gima kha va na nga hi phasa gu pimisa khu ndziya yi tsakedwago khu Nungungulu. Ambari ulolo, hi nga mana dzipari nya dzadi mitshanganoni yathu nya wuKristo. Iyoyo khiyo hi na ya kutswago gu gira “mithumo yatshavbo nya yadi.” — Hebh. 10:24, 25.