Hi nga gira kharini gasi hi simama na hi agide mahoni ga Nungungulu?

Nga dundrugeya khu mamayi nyo khaguri a dongiseyago gyanana gyaye gasi gi hongola xikwatunu. Kha gi digi gi hongola nya mba hamba nigu a gu gi ambigisa sombo nya sadi, si agidego gwadi. Isoso so phasa gu gyanana gyogyo gi manega ni womi nya wadi, si bwe si yeyedza vambe gu khiso vavelegi vagyo va ngu gi sayisa gwadi. Gufana ni vavelegi va vbwetago gu khavo sanana sawe si khala na si agide, Papayi wathu, Jehovha, o vbweta gu khuye hi aga givilini ni mavbanyeloni yathu. Ho khala na hi agide, hi na phasega ngudzu hi bwe hi ninga wuzundzo Jehovha.

1. Hi nga gira kharini gasi hi khala na hi agide givilini?

Jehovha wari khuye: “Enu agani.” (1 Pedro 1:16) Gasi hi khala vathu nyo age, gu vbwetega hi aga givilini ni mavbanyeloni yathu. Hi nga aga givilini khu gu hamba tshigu ni tshigu, so kodzega, ni gu handza sombo sathu gambe, hi bwe hi agisa dzimovha ni dzindranga dzathu. Hi nga phasedzeya gambe gu agisa Salawu nya Mufumo. Ho khala na hi agide givilini, hi na ninga wuzundzo Jehovha. — 2 Vakorinto 6:3, 4.

2. Gasi hi khala na hi agide, mavbanyelo muni hi yedego gu ma potsa?

Bhibhiliya yo hi kutsa gu ‘dzi handza guvivba gwatshavbo nya givili ni liphuvbo.’ (2 Vakorinto 7:1) Khu kharato, hi yede gu potsa ni gevbini gilo hi gi wonago gu khethu gi na nyenyezisa givili mwendro mapimo yathu. Ho vbweta gu khethu mapimo yathu ma tsakisa Jehovha. Khu kharato, ho gira satshavbo hi si kodzago gasi gu potsa mapimo nyo vivbe. (Ndzimo 104:34) Hi bwe hi dzi garadzeya gu mba valeteya mwendro gu ganeleya silo nyo nyenyeze. — Leri Vakolosi 3:8.

Khu sevbini simbe silo si nga nyenyezisago givili ni mavbanyelo yathu? Gu na ni silo nyo khaguri si nga nyenyezisago givili gyathu. Khu kharato, kha hi dahi silo nya nga feya, mbangi ni gu thumisa dzidroga. Ho gira isoso, hi na vbanya womi nya wadi hi bwe hi ninga githawo giningwa nya womi. Hi ngu dzi garadzeya gu khala na hi agide mavbanyeloni yathu khu gu potsa silo nyo nyenyeze, nya nga masturbaçãoa ni gu sistiri pornografiya. (Ndzimo 119:37; Vaefeso 5:5) Kha si vbevbugi gu diga gu gira silo sesi, ganiolu Jehovha a nga hi phasa. — Leri Isaya 41:13.

GIRA WUGEVISISI NYO ETE

3. Gu aga givilini si ngu zundza Jehovha

Tepo hi hevbulago milayo eyi Jehovha a nga ninga litigo la Israyeli, hi ngu pwisisa gu khethu khu ginani Jehovha a vbwetago gu khuye vathu vaye va aga. Lerini Ekisodha 19:10 ni 30:17-19, mu vbedza mu bhula khu siwudziso sesi:

• Mavhesi yaya mo yeyedza kharini edzi Jehovha a gu wonago khidzo guaga nya givili gyathu?

• Silo muni nya sadi hi yedego gu gira tepo yatshavbo gasi hi khala na hi agide?

So vbweta gu hi dzi ninga tepo ni gu dzi garadza gasi hi khala na hi agide. Hi nga si kodza gu gira isoso, ambari ho ba hi vbanya ga wulanga nyo khale kharini, gani hi sighanyi mwendro sisiwana. Sistirini VHIDHYU, mu vbedza mu bhula khu giwudziso gegi.

VHIDHYU: Nungungulu a ngu haladza vathu va gu ni mavbanyelo nyo age (4:10)

• Khu ginani vathu hi va tshumayelago va na engedzeyago gu mu ninga githawo Jehovha vo wona gu khavo silo sathu so khala na si agide?

4. Diga siolovedzo nyo vivbe

Abari gu u ngu daha mwendro gu thumisa dzidroga, kha hi kanakani gu khethu u ngu dziti edzi si garadzago khidzo gu diga siolovedzo nyo vivbe. Ginani gi nga gu phasago? Dundrugeya khedzi siolovedzo soso si ghohago khidzo givili gyago. Lerini Matewu 22:37-39, mu vbedza mu bhula khu siwudziso sesi: Gu daha feya mwendro gu thumisa dzidroga si nga . . .

• ghoha kharini wupari nya muthu ni Jehovha?

• si nga ghoha kharini gupwanana ga muthu yoyo ni valongo vaye ni vambe vathu?

Dzi garadzeye gu diga siolovedzo nyo vivbe.b Sistirini VHIDHYU.

VHIDHYU: Dzi phare (2:47)

Lerini Vafilipi 4:13, mu vbedza mu bhula khu giwudziso gegi:

• Gu gombeya ni gu hevbula Bhibhiliya tshigu ni tshigu ni gu hongola mitshanganoni si nga phasa kharini muthu gu pala giolovedzo nyo vivbe?

5. Dwana ni mapimo ni siolovedzo nya mba handzega

Lerini Vakolosi 3:5, mu vbedza mu bhula khu siwudziso sesi:

• Ho dziti kharini gu khethu sexting ni masturbação kha sa handzega mahoni ga Jehovha?c

• Wo si wona kharini, ina si ngu pwisisega gu Jehovha a vbweta gu khuye hi manega ni mavbanyelo nyo age? Khu ginani?

Wona dzindziya nyo dwane khidzo ni mapimo nya mba handzega. Sistirini VHIDHYU.

VHIDHYU: Gira gilogyo gasi u khala nu agide (1:51)

Jesu thumiside gipimaniso nyo khaguri gasi gu yeyedza gu khuye gu vbwetega hi dzi emiseya gu khala na hi agide mavbanyeloni yathu. Lerini Matewu 5:29, 30, mu vbedza mu bhula khu giwudziso gegi:

• Jesu kha nga ba a vbweta gu khuye hi dzi bayiseya givili gyathu, ganiolu a di vbweta khuye hi yede gira gilogyo. Silo muni esi muthu a yedego gu gira gasi gu gimbileya hwindzo ni mapimo nya mba handzega?d

Wo ba u dwana gasi gu diga mapimo nya mba handzega, tiyisega gu khuwe Jehovha a ngu ninga lisima gudzigaradza gwago. Lerini Ndzimo 103:13, 14, mu vbedza mu bhula khu giwudziso gegi:

• So ba si gu garadzeya gu diga giolovedzo nyo khaguri nya mba handzega, lowo wowu wu nga gu phasa kharini gu simama gu dwana?

U nga vbeyi tshivba!

So tshuka litshigu lolo si hi phazamisa, si ngu vbevbuga ngudzu gu dzi embeya khethu: ‘Si ngu garadza. Kha nyi na nga si kodza.’ Ganiolu, nga dundrugeya khesi: Mututumi o tshuka a philinganyega a thega, kha si thuli gu khiso padwe, ne gu khiso gu vbwetega a ya pheledza khu zero. Khu ndziya nyo fane, wo tshuka u phazamanyana, kha si thuli gu khiso u tandregide. Ne kha si thuli gu khiso satshavbo u giridego gasi gu dwana ni giolovedzo gyogyo nyo vivbe, u di gu dzi vbedzeya tepo. Gu phazama khwathu hatshavbo — gu ngu gira gipandre nya gu hi phase gu dugeleya. Khu kharato, u nga vbeyi tshivba! Khu gu phaswa khu Jehovha, u nga si kodza gu pala giolovedzo nyo vivbe.

REZUMO

Ho aga givilini, ni mapimoni ni mavbanyeloni yathu, hi na tsakisa Jehovha.

Siwudziso nyo wusedze

• Khu ginani si gu na ni lisima gu hi khala vathu nyo age?

• Hi nga gira kharini gasi hi aga givilini?

• Ginani u nga girago gasi gu mapimo ni mavbanyelo yago si khala na si agide?

HEVBULA SIMBE

Silo muni nya sidugwana u nga si girago gasi u khala nu agide ambari wo ba uri mwalo dzitsapawu nya dzingi?

Womi ni guaga — Hamba mandza (3:01)

Wona dzindziya dzi na gu phasago gu diga gu daha.

“U nga gira kharini gasi u diga gu daha?” (Khendzugani! nya Maio nya 2010, khu Giputukezi)

Wona sigaradzo si vangwago khu pornografiya.

“Pornografiya — Khyadi mwendro yi ngu vanga sigaradzo?” (Mukhedziseyi nya 1 nya Agosto nya 2013, khu Giputukezi)

Wona egi gi phasidego mwama nyo khaguri gu pala vhisyu nyo wone pornografiya.

“Nyi thegide nyi wuga kala nyi si kodza gu pala” (Mukhedziseyi nya N.° 4 nya 2016, khu Giputukezi)

6. Jehovha a na gu phasa gu timiseya

VHIDHYU: Jehovha Nungungulu a na nyi tiyisa (3:40)

• Kha nga hi si wonidego omu nya vhidhyu, ginani gi phasidego vandriyathu vava gu timiseya?

Lerini Varoma 8:35, 37-39 ni Vafilipi 4:13. Hwane nyo leri milowo yeyi, bhulani khu giwudziso gegi:

• Milowo yeyi yo engedzeya kharini gu gu gira u tumba gu khuwe u na si kodza gu timiseya ni gevbini gilingo?

Lerini Matewu 5:10-12, mu vbedza mu bhula khu giwudziso gegi:

• Khu ginani u nga si kodzago gu tsaka ambari wo ba u tshaniswa?